لابد من تطهير الداخلية

[NazeeH]

الصحف المصرية والعربية

استمرار الداخلية في البلطجة



تقادم الخطيب استاذ جامعي ومستشار للرئيس لجنة تقصي الحقائق.. ومع ذلك انظروا ماذا حدث معه!!

د. تقادم الخطيب أستاذ جامعي وناشط سياسي وعضو في لجنة تقصي الحقائق التي شكلها رئيس الجمهورية للتحقيق في أحداث الثورة يحكي ما تعرض شهادته على ما حدث له في كمين للداخلية ومحاولة تلفيق تهمة حيازة حشيش له:

١-كنت استقل أتوبيس السوبر جيت لقضاء إجازة العيد مع أهلي في الصعيد بمحافظة الأقصر وعند مدخل مدينة نقادة بمحافظة قنا تم إيقاف الأتوبيس.

٢-صعد إلي الأتوبيس ضابط شرطة برتبة ملازم أول أحمد فتحي عرفت اسمه بعد كده وكان معاه ٢أمناء شرطة وكان بيطلب البطاقات الشخصية وانا لم اكن منتبه

٣-توجه نحوي وقال لي طلع بطاقتك فقلت له ماشي وانا بأطلع البطاقة رفع صوته وقال خلص بسرعة يالا.رفضت أسلوبه وقلت له لا تكلمني بهذه الطريقة

٤-انت مش من حقك تكلمني بهذه الطريقة لا يوجد قانون طوارئ يبرر هذا الأمر والدنيا التغيرات فيه ثورة حصلت في البلد ضد التعامل بالطريقة دي

٥-رد وقال لي جيب البطاقة وأعطيته البطاقة وبعدها قال لي انت مش عامل نفسك راجل كمل لحد الآخر وشوف اللي حيحصل لك ايه ورفضت النزول معاه

٦-بعدها مباشرة كلمت مساعد وزير العدل أمين لجنة تقصي الحقائق اللي انا عضو فيها وشرحت له الموقف فقال لي حدد لي مكانك بالضبط وانا حاتصرف

٧-بعدها مباشرة صعد الأتوبيس عسكري وقال لي انزل ضروري وانا باكلمك بالذوق لأنك لو مانزلتش بالذوق حتنزل بالعافية والذنب حيكبرعليك جداًرفضت انزل

٨-بعدها على طول طلع ضابط امن مركزي وقال لي انزل يا حيوان فرفضت النزول وقلت له خليك محترم،فيه واحد راكب جنبي قال له ده دكتور في الجامعة

٩-رد ضابط الأمن المركزي وقال له طظ فيه وفي الجامعة ولازم ينزل، رفضت النزول وكلمت على طول مستشار الرئيس المهندس محمد سيف الدولة ابلغه بالأمر

١٠-وانا باكلم مستشار الرئيس صعد الأتوبيس ملازم اول محمد عمر عرفت اسمه بعد كده وخطف التليفون من ايدي وشدني من ذراعي وضربني في بطني بالبوكس

١١-الخط كان مفتوح ومستشار الرئيس سمع كل حاجة وسمع الشتيمة القبيحة من الضابط ولما شدني الضابط دفعني ناحية سلم الأتوبيس والجنود بعدها استلموني

١٢-كل واحد من الجنود كان ماسكني من ناحية والضابط كان بيضربني في اللحظة دي بإيديه ورجليه وشدوني ناحية الضابط الأول أحمد فتحي ولما شافني قال

١٣-الضابط لما شافني قال لي اديك نزلت بالعافية يا ابن الوسـ** وحط إيده في جيبه وطلع قطعة حشيش من جيبه وقال لي انا حلبسك قضية المخدرات دي

١٤-وحاكتب في المحضر أني ضبطتها معاك يامعـ** وخلي حد يطلعك من الناس اللي بتكلمها،فقلت له وضميرك فين قال لي ضميري عند أمك ياابن المرة.......

١٥-بعدها مباشرة الضرب اشتغل فيه تاني وأخذوا يضربوني ويدفعوني على عربية البوكس ويمارسوا أسلوب القهر ضدي وشتائم لا يمكن وصفها

١٦-الناس اللي راكبة في الأتوبيس شافت الكلام ده فصعبت عليها فنزلوا يترجوا الضباط فقالوا ليهم ده كلب ولازم نعلمه الأدب ويبقي حد يطلعوامن عندنا

١٧- الضباط مشوا الأتوبيس وكنت لوحدي واخدوا التليفون مني وجاني الضابط أحمد فتحي وقال لي الثورة في التليفزيون بس مش هنا، هنا مافيش ثورة

١٨-وقال لي انت حتقعد معانا أسبوع اتنين ثلاثة لحد ما نشوف مين اللي حيقدر يطلعك ومركبين عربية البوكس وركب معايا عسكري فقلت له عاوز اعمل مكالمة

١٩-العسكري قال لي مش حاقدرأعطيك التليفون قدامهم فقلت له حاعطيك فلوس فوافق وقال لما يمشوا بعيد عن العربية لأنك لو ماكلمتش حد حيموتوك في القسم

٢٠-الضابط رجع البوكس وقال لي انت بقي بتاع الثورة وتباع لجنة تقصي الحقائق طاب ابقي جيب حقك الأول علشان تعرف تجيب حق اللي راحوا لأنك حتحصلهم

٢١-وبعدها نزلوني من العربية وركبوني عربية تانية وكان راكب فيها ٤شباب غلابة جداً وسمعت الضابط بيقول العيال دي معاهم حشيش كمان ولازم محضر ليهم

٢٢-وصلنا قسم شرطة نقادة وهناك كان رئيس المباحث منتظرني اول مانزلت من العربية وقال لي أتفضل معاي على مكتبي وكنت وقتها منهك تماماً

٢٣- كنت ماسك بطني من الضرب وطلبت منه انه يجيب لي تليفوني من الضابط فجاب لي التليفون وعملت اتصالاتي بناس كتير علشان أقول لهم انا فين بالضبط

٢٤-كلمني بعدها مساعد وزير العدل وقال لي الدنيا كلها عرفت بموضوعك وماتخافش وبعدها بشوية جاءني ٣عمداء وعقيد أحدهم رئيس شعبة واعتذروا لي فرفضت

٢٥- بعدها كلمني مساعد وزير الداخلية مدير الأمن واعتذر لي فرفضت اعتذاره وقلت له انا عاوز حقي ومش حسيب حقي أبدا لو حصل ايه وانا مش حاسكت أبدا

٢٦-فجأة لقيت اتصال من المستشار العظيم زكريا عبد العزيز وقال لي انا حالا سامع باللي حصل ليك اوعي تنتنازل عن حقك يا تقادم وكلنا معاك

٢٧-كلمت بعدها وائل قنديل وكلمت ناس كتيير علشان الأمر يتحول لقضية رأي عام وكلمت مستشار الرئيس مرة تانية وقلت له بلغ الرئيس باللي حصل معايا

٢٨-بعدها انتقل مدير الأمن للقسم وجاءني وقال لي انا باعتذر بشدة عن اللي حصل والعيال دي حنعرف نؤدبهارفضت اعتذاره وقلت له انا عاوز حقي مش حسيبه

٢٩-في الفترة دي كانت زميلتنا العزيزة حياة اليماني بتتابعني أولا بأول وكانت ناس كتير جداً بتتابعني أيضاً ومدير الأمن كان عاوز يرضيني فرفضت

٣٠-مدير الأمن تركني وقعد مع ضباطه على انفراد وحرروا محضر ضدي أني قمت بالاعتداء على الضباط الثلاثة وعلى القوة وعددها ١٧عسكري معاهم!

٣١-مدير الأمن كان بيتظاهر انه معايا بس هو الحقيقة كان في صف الضباط بتوعه..كنت اتكلمت مع صديقي مالك عدلي وهو اول واحد عرفته بالموضوع

٣٢-مالك قال لي لازم تعمل محضر في القسم وتذكر فيه كل الوقائع وفعلا عملت كده وحررت المحضر في وجود مدير الأمن ووجهت الاتهامات صريحة ومباشرة

٣٣-مستشار الرئيس كلم وزير الداخلية فرد عليه و وقال له اصله وجدوا معاه حشيش فقال له مستشارا الرئيس ده اكاديمي وعيب أنتوعاوزين خالد سعيد تاني

٣٤- بعدها رجع وزير الداخلية وأخبر مستشار الرئيس أني واقعة الحشيش مش معايا مع حد تاني وطبعا هم العيال الغلابة اللي لفقوا لهم القضية

٣٥- وصل عندي شباب الجمعية الوطنية في قنا والمحامين معاهم وحضروا كتابة المحضرضد الضباط ومالك عدلي كان بعت ٣تلغراف لوزيرالداخلية والنائب العام

٣٦-د.هبةرؤوف كانت كلمتني وقالت ماتسيبش الشباب الغلابة فكلمت مدير الأمن وقلت له لازم الناس دي تخرج وفعلا تم إطلاق سراحهم الساعة ٧الصبح

٣٧-الساعة٩الصبح جاءني مساعد وزير العدل لقطاع الجنوب وحاول بكل الطرق والوسائل انه يخليني أتنازل رفضت بشدة وقلت له عاوز حقي مش حأسيب حقي

٣٨-مورست علي ضغوط كبيرة جداً للتنازل فقط عن المحضر رفضت تماماً وحينها أدركت أني محتجز في القسم علشان كده فرفضت وطالبت بعرضي على النيابة

٣٩-كلمت مستشار الرئيس وقلت له انا محتجز وانت مش قادر تطلعني من القسم دول بيضغطوا على علشان أتنازل وكمان بيهددوني فقال لي إياك تتنازل

٤٠-مدير الأمن ومساعد الوزير لقطاع الجنوب كان عندهم رعب ان الضباط يتعرضوا على النيابة ويتحقق معاهم وانا كنت رافض لأي محاولة تهدئة او تنازل

٤١-مع إصراري على انه لازم يتم عرضي على النيابة والضباط لازم يتعرضوا معايا واني مش حاتنازل عن شيء وكم عرفت ان مستشار الرئيس مغلوب على أمره

٤٢-فعلا تم عرضي على النيابة والضباط أتحقق معاهم لمدة ٦ساعات واللي حقق معايا كان مساعد المحامي العام وكان رجلا في غاية التهذيب والاحترام

٤٣-أثناء عرضي على النيابة مستشارين للرئيس احدهما القانوني والآخر للأمن القومي فكانت جملتي لهم طهروا الداخلية وقولوا لمرسي طهر الداخلية

٤٤- تم إخلاء سبيلي بضمان محل إقامتي وكذلك الضابطين والقضية مستمرة والشهود متواجدين ولن أتراجع أبدا واحمل مرسي المسئولية الكاملة لما حدث معي


جزء من المواقع التي نشرت الخبر

 

[NazeeH]

مافكرت فيه بعد قراءة الخبر:-
- السبب الأقوى والأهم لقيام الثورة هو الممارسات الغير آدمية من قبل الداخلية.
- لو مواطن عادي بسيط هيتصل بمين !
ويعمل ايه !
لك الله يا مصر

 

 

[dana]

اى شخص مكانه كان هيتصالح ومن الاول مش هيجر شكل الشرطة حاجة مقرفة وجهاز عاوز الحرق

 

 

[savary]

طاب انتوا بتقتلوا القتيل و تمشوا فى جنازته يعنى ؟؟


بص يا أستاذ نزيه ..

واسمع كلامى دا كويس

لو مرسى مش عاوز مصير مبارك

لو مش عاوز يترمى زى الكلب فى السجن


يعمل اربع حاجات وبسرعة جدا


سامعنى ...بسرعة جدا !

الراجل مش قدامه وقت ..

هيكلة الداخلية - ( تطهير كامل و شروط التحاق جديدة و كاميرات مراقبة فى كل قسم شرطة )

هيكل اجور و مرتبات

ضرايب تصاعدية

تأسيسية توافقية .



وبسرعة جدا !!!


احنا لينا شهور بنقول الكلام دا و ربنا عالم اننا بنقوله مخلصين لبلدنا و شعبنا

و بتقولوا العلمانيين الريبراريين الكفار الخ الخ

وقولنا ان الكلام دا مبقاش ياكل عيش مع الناس !


الكلام دا قالته اسماء محفوظ لمرسى لنفسها

قالتله يا تهيكل الداخلية يا ريس يا اما هنولع فيها !



انتوا احرار يا عم نزيه و الا قد بلغنا ...اللهم فاشهد !

 

 

[chemistry]

اللى ملوش ظهر هيضرب على قفاه

 

 

[m.eisa]

اقتباس المشاركة الأصلية كتبت بواسطة savary يعمل اربع حاجات وبسرعة جدا سامعنى ...بسرعة جدا ! الراجل مش قدامه وقت .. هيكلة الداخلية - ( تطهير كامل و شروط التحاق جديدة و كاميرات مراقبة فى كل قسم شرطة ) هيكل اجور و مرتبات ضرايب تصاعدية تأسيسية توافقية . وبسرعة جدا !!!

يسلم فمك يا سفارى ..... مصداقية مرسى على المحك ..... خاصة تعامله مع الحادث ده

 

 

[محمد علي عامر]

متهيألي مفيش إتنين يختلفوا على إن الداخلية دي محتاجة لكام صاروخ أرض أرض يشيل أبوها من جدورها صالحها بطالحها.

ولكن عمليا ماذا يمكن لمرسي القيام به آخذا في الإعتبار أن:

الداخلية بلطجية ورأينا ذلك في المرحلة الإنتقامية أنهم أطلقوا بلطجيتهم على الشعب علشان يربوه ولكنهم لما رأوا أن الرئيس الجديد لم يعمل على تطهير جهازهم لموا بلطجيتهم ثم عادوا شوية شوية إلى ممارساتهم القديمة.

لا ندري ماذا سيكون رد فعل ضباط الدخلية لو أن الرئيس مرسي أقال الآلاف منهم دفعة واحدة هل سيشعلون البلد وهم العارفين بكل صغيرة وكبيرة فيها؟

مرسي لا يضمن إستعداد القيادات العسكرية للوقوف بجانبه بإنزال الجيش مرة أخرى للحفاظ على الأمن ومجابهة ما يمكن أن يفعله بلطجية الداخلية المقالين مباشرة وغير مباشرة

غالبا سيقف من يسمون أنفسهم بالقوى المدنية من ليبراليين وقوميين ويساريين في صف الدولة العميقة وجهاز داخليتها وإعلامها وقضائها ( ربما ليس حبا فيهم وإنما كرها في الصف الآخر) إلا من رحم ربي.

مشكلة أخرى تحول دون تطهير الداخلية الآن أن هناك إستفتاء على الدستور قريبا وسنحتاج للئام الداخلية من أجل حفظ الأمن وهم يعلمون ذلك.

أعتقد أن اللغة الوحيدة التي يفهمها بلطجية الداخلية هي لغة القوة

عندما قامت الجماعات الجهادية في التسعينيات بإغتيال ضباط الشرطة تعلموا الأدب وتمسكنوا إلى أن تمكنوا فعادوا إلى سيرتهم الأولى.

لو أن مرسي ضمن ولاء الجيش له كرئيس للدولة لكان تطهير الداخلية أمر يسير ولكن بما أن هذا أمر مشكوك فيه فلن يستطيع تطهيرها.






أعتقد أن المسألة تحتاج إلى حل جذري (على رأي الدكتور الشربيني)

 

 

[جرديز]

سبب الفوضى هو ان الرئيس بيهرّج ... مع وافر الاحترام .
يا بيه ده ما شالش رؤساء الأحياء والمحافظين !!!
منتظر منه يطهّر الداخلية ؟؟؟!!!!!
الرئيس محمد مرسي بيقضي على النموذج الاسلامي في الحكم , دون ان يشعر .

 

 

[جرديز]

اقتباس المشاركة الأصلية كتبت بواسطة محمد علي عامر لا ندري ماذا سيكون رد فعل ضباط الدخلية لو أن الرئيس مرسي أقال الآلاف منهم دفعة واحدة هل سيشعلون البلد وهم العارفين بكل صغيرة وكبيرة فيها؟

ولا اي حاجة .
ولا اي رد فعل .
انت فاهم الشعب المصري زي الافغاني والا العراقي والا حتى السوري ؟!
ظابط الشرطة المصري الفاسد من أنجس وأجبن عباد الله .
عدد الناقمين والمستعدين لردود فعل حيكون قليل جدا , وحتنحصر ردود افعالهم في عمليات غبية يمكن بسهولة تحديد نقاط البداية فيها وصولا اليهم .
انا لو رئيس حسيب قانونهم ( الغاب ) ياخد مجراه والحالات اللي حتبدأ بالانتقام حسيبها للشعب يقتص منها وحسمح بده وافتح بابه .
لو خدت في اعتبارك مبدأ الإقصاء والتصفية بالتدريج حتلاقي نفسك مش محتاج تقيل اكتر من 50 قيادة , الباقي كله هيلم نفسه لأنهم ما يهمهمش غير لقمة العيش زي المواشي والأبقار , لا مبدأ ولا عقيدة ولا أيدولوجيات .
ثم تضع معايير محددة وقواعد في كتب مطبوعة لأسلوب عمل جهاز الشرطة , وتدربهم عليها فترة محدودة لا تتجاوز 3 اشهر .
اللي يغلط ارميه بره وافتح باب التقدم لخريجي الحقوق .
كل يوم في مصانع بتتقفل وشركات بتصفي اشمعنى الظابط اللي يفضل مكانه .
ارميه في الشارع يشتغل سباك او مبيض محارة عشان يتربى ويعرف ان فرصة العمل ليها احترامها .
لكن لو انت كرئيس جاي تاخدهم على حجرك وتطبطب عليهم فده بقى موضوع تاني .

 

 

[جرديز]

أشباه الأشياء

ثمة ملاحظات إدارية يمكنك ملاحظتها في جهاز الشرطة في مصر للوقوف على اسباب الخلل فيه .
منها فقدان الارتباط الشرطي .
وهي ما يمكننا تسميته بأشباه الأشياء .
زي المطب الصناعي . تلاقيه ملوش مواصفات المطب لا من حيث الاتجاه ولا الخام ولا الارتفاع ولا الميل . لكن بيسموه مطب .
أشباه اشياء .
جهاز الشرطة انت بتدخله بناء على اتفاق مسبق يفترض فيك مخزون من :
الشجاعة - الجرأة - الايمان الشديد بالخدمة العامة - الاستعداد للتضحية .
ازاي بقى لما تتخرج ويحصل في البلد قلق , نلاقيك بتلطم على وشك زي الولايا وبتقول اضمنولي حمايتي كي اقوم بمهمتي .
!!!!!!!!!!!!!!!!!!!
ده انت بتاع الحماية اساسا . جايلنا احنا نضمنلك حماية .
امال انت بتبيع ايه بقى ؟؟؟!!!
هذا الكلام يعني ببساطة ان الـ job-describtion بتاع شغلانة ضابط الشرطة مشوه وبحاجة على اعادة صياغة , لاستقطاب افراد مؤهلين اصلا للعمل .
مش مجرد ناس عايزة تلبس نضارة شمس وتلبس اسود وتضرب نار زي الكابتن كريم عبد العزيز .