Arabic Discussion Forum with a Special Interest in Travel and Immigration

أبو الفوز · 4th July 2011, 07:02 AM

السلام عليكم ...
طريقة حساب جمارك السيارات في مصر عبارة عن ألغاز وطلاسم صعب الواحد يقدر يفهمها ويحسبها بسرعة ... دورت كتير على المواقع لاقيت في ناس مشكورين قالو الطريقة ... ممكن الناس تختلف في نسبة هنا ولا هناك بس عموما قدرت أعرف ازاي بتتحسب .. ففكرت اني اعمل اكسل شيت يكون سهل الاستخدام ويديني قيمة تقريبية للجمارك على السيارات فئة 1600 سي سي.
وعشان الفايدة تعم ... أنا حطيطه هنا على المنتدى عشان لو واحد محتار ومش عارف يحسبها يقدر لوحده يقوم بالعملية دي.
الاكسل شيت موجود في المرفقات ...

طريقة الاستخدام كالتالي:
- أي خانه مظللة بالأصفر معناها انك تقدر تغير القيمة اللي فيها
1- أدخل تاريخ موديل السيارة: في المثال بتاعي انا حاطط 2009
2- أدخل سعر شراء السيارة بعملة البلد اللي انت شاريه منه: في المثال بتاعي انا حاطط 59000 درهم اماراتي
3- ادخل سعر تحويل عملة البلد اللي انت شاريه منه للجنيه المصري: في المثال بتاعي انا حاطط 1.61
بس يا سيدي كده مأموريتك انتهت حتلاقي في القسم الأول حساب مصاريف الجمارك لكل سنه وأنا مظللها باللون الأزرق ومحسوبة بالجنيه المصري.

طبعا ممكن حد يقول ان سعر الشراء مش هو المعتمد في الحساب عند الجمارك المصرية حقوله انت صح وعداك العيب وأزح لأن سعر الشراء متحمل عليه مكسب الوكيل في بلد الشراء وكمان مصاريف الشحن.. بس احنا بنقول دي طريقة تقريبية للحساب عشان تدينا فكره عن الجمارك ولو كانت دقيقة بنسبة 95% يبقى احنا قمنا بالغرض.

واحد تاني يقولي أمال القسم التاني ده انت عامله ليه ... حقوله حلمك عليه يا سيدي ... خليني أسأل سؤال هو ليه الناس عايزه تشتري عربية على الزيرو من بره وبعد كده تنزلها مصر؟ ممكن يكون احد أو بعض أو كل الاسباب التالية:
1- لما اشتيريها واجي انزلها حوفر فلوس
2- حتبقى عربيتي ومحافظ عليها وعرف خباياها وأحسن من اني اشتري مستعمل من مصر
3- المواصفات الخليجي احسن من مصر

القسم التاني بيرد على النقطه رقم واحد بيشوف اذا كنت حتوفر ولا لأ ... ازاي يا عم الحج؟
في حاجه اسمها معدل اهلاك - الاخوه المحاسبين عارفينه - بمعنى انك لما تشتري معده كل سنه قيمتها بتنزل بمبلغ معين بنسميه معدل الاهلاك مثلا 10% زي ما انا حاطط .. ففي القسم التاني احنا بنشوف قيمة السيارة بتبقى كام كل سنه على اساس معدل الاهلاك ده ففي تاني سنه مثلا سعر السيارة حيكون 53100 درهم في تاني سنه وتالت سنه حيكون 47200 درهم وهكذا. يعني لو جيت بعت العربية في تاني سنه حيكون معايا في جيبي 53100 درهم ولو بعتها في تالت سنه حيكون معايا في جيبي 47200 درهم ... قشطه كده؟
دلوقتي انا عرفت لو بعتها حيكون معايا كام بالدرهم أو الجنيه .. أضيف على المبلغ ده مصاريف الجمارك والشحن اللي حسبناها في القسم الأول يديني المبلغ الكلي اللي معايا في جيبي افتراضيا ... يعين مثلا في تاني سنه حيكون معايا 142343 جنيه مصري وتالت سنه حيكون معايا 129718 جنيه وهكذا. مفهوم لغاية كده؟ طيب ... دلوقتي لو سيادتك معاك المبلغ ده تقدر تشتري نفس العربية دي في مصر بالمبلغ ده؟ شوف بقه انت سعر السوق كام وقارن وأنا كده مأموريتي انتهت.

واحد ناصح تالت يقولي أمال القسم التالت ده أيه ؟؟؟ حقوله هو نفس القسم التاني بس الفرق اني بحط قيمة السيارة الحقيقة حسب سعر السوق بدل استعمال معدل الاهلاك ... فمثلا أنا شاري عربيتي سنة 2009 واحنا دلوقتي في 2011 فأنا عارف قيمتها دلوقتي ومفيش داعي ان اعتمد على معدل الاهلاك ... وانا ممكن احط توقعاتي لسعرها في السنوات المقبلة.

القسم التاني ينفع الناس اللي لسه شارية عربيات جديدة السنة دي . والقسم التالت للناس اللي شارية عربيات من فترة.

انشاء الله يكون الموضوع عجبكم وتكونوا استفدتم منه

ana_3enady · 4th July 2011, 08:01 AM

دعوه لموضوعي

RobertInole

مشكووووووور والله ما جصرت

حلم بعييد · 13th July 2011, 07:24 AM

طيب سؤال العربيه البيجو ليها جمارك اقل لاني سمعت كده؟

تصحيح · 13th July 2011, 07:47 AM

دعوه لموضوعي

مصر المستقبل - الرؤيا

مجهود ممتاز

قيمة السيارة يتم احتسابها علي اساس جداول سعر المصنع سنة الانتاج مخصوما منها 10 % اهلاك عن كل سن و غرامة بقيمة5 % عن كل سنة زيادة علي سنة الصنع حيث ان المسموح بدخوله مصر فقط سنة الانتاج ما لم تكن معلوماتي قديمة

بندق · 13th July 2011, 10:15 AM

التخفيض يكون بحد أقصى 30%
رسم تنمية المارد يكون بنسبة 3% من القيمة الأصلية
يتم اضافة الشحن والنولون للقيمة الأصلية للسيارة قبل احتساب الجمارك
لا عبرة بالسعر الذى اشتريت به .. العبرة بسعر السيارة من المصنع
(لأنه يمكن وكيل فى دولة معينة واخد خصم 40% مثلا وبيبع السيارة فى بلده بسعر أقل)

aboadham · 6th August 2011, 07:44 AM

معلش يا اخى الحساب بتاعك مش مظبوط شوية لان تقريبا كدة بيكون المبلغ اللى مفروض تدفعه كله بيكون 40 % من قيمة السيارة يعنى مثلا تقريبا لو سيارة ثمنها 60 الف درهم يكون الجمرك ليها حوالى من 32 الف الى 37 الف جنيه والله اعلم

aboadham · 6th August 2011, 07:52 AM

لو فيه تعديل موفق بإذن الله ... لك مني أجمل تحية .

Virus · 6th August 2011, 09:57 AM

ده شيت جامد دبابة...انت لازم تنشره ياعم ده في ناس بتدوخ عشان تحسب الحسبة دي ..تسلم ايدك

ozoozo · 6th August 2011, 10:24 AM

نزلت الشيت ومش باين فيه حاجه مفهومه كلها رموز غريبه

Tornado · 8th August 2011, 04:26 PM

جزاك الله كل خير بجد

مواقع هامة وإعلانات نصية
البحث فى القرآن الكريم	القرآن الكريم - الشيخ البنا	الصحف المصرية والعربية	المصحف المرتل المنشاوي	تلاوات نادرة لمشاهير القراء	Pass Medical Exams

Latest Threads By This Member
Thread	Forum	Last Poster	Replies	Views	Last Post
حساب جمارك السيارة فئة 1600 سي سي	مال وأعمال	منى مجدى	15	14296	4th July 2011 07:02 AM

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
الاحتلال يقرر بناء 1600 وحدة استيطانية بالقدس	أسامة الكباريتي	فلسطين أرض الرباط	1	10th March 2010 07:17 AM

Arabic Discussion Forum with a Special Interest in Travel and Immigration

Immigration to Canada, Australia, and New Zealand

Egypt and Middle East Politics, History and Economy

Jobs in Saudi Arabia, USA, Canada, Australia, and New Zealand

مال وأعمال

حساب جمارك السيارة فئة 1600 سي سي