Arabic Discussion Forum with a Special Interest in Travel and Immigration

حازم حسن · 13th March 2012, 08:18 PM

جمييييييييييييلة
طب ما تيجى نجرب .. وانت داخل كنتاكى او الشبراوى حتى النهاردة .. خد البنت او الولد اللى قدام المحل واعزمهم .. جررررب .. صدقنى هتبقى طاير من الفرحة :)

من كام يوم كان فى بنت وصاحبتها خارجين يشتروا شويه حاجات
وانتوا عارفين البنات والشوبينج
لفو...ا كتيييير وفى نص اليوم جاعوا وراحوا مطعم متعودين ياكلوا فيه
المطعم شيك وواجهته كلها ازاز

ودايما فى كام طفل صغير بيبقوا واقفين بره المطعم يتفرجوا.. بيقولوا نفس الجمله للى داخل واللى خارج:
(والنبى يا أبله..والنبى يا استاذ ادينى حاجه اشترى أكل اصلى مكلتش من الصبح)

المره دى كانت طفله واحده بس هى اللى واقفه لان الدنيا كانت بتمطر اوووى
كالعاده قالت نفس الجمله
صاحبه البنت فتحت شنطتها تطلع اى فلوس تديهالها

البنت قالت لا متديهاش حاجه استنى ..
صاحبتها قالت.. اييييه ؟انتى اللى بتقولى كده؟غريبه
البنت ردت ...احنا هندخلها تاكل معانا.انا بتكلم بجد..لقت 4 عيون مبرقين .عنين صاحبتها وعنين الطفله
الطفله فضلت تعيط وتضحك وتتنطط ييجى 5 دقايق متواصله

البنت اخدت الطفله من ايدها ودخلوا المطعم حطوا شنطهم واخدت البنت للحمام تغسلها وشها وايديها

قعدوها معاهم على الترابيزه وكل اللى فى المطعم بطلوا اللى بيعملوه وقعدوا يتفرجوا على ال3 كأنهم فيلم
وقتها المشهد...فعلا فيلم ...بس فيلم ثابت على لقطه واحده فى كل المطعم
وترابيزتهم بس هى المشهد المتحرك

المهم ادولها المينيو وقالوها شاورى بس على اى حاجه وهانجيب احنا ال3 زي اللى انتى تختاريه مهما كان

شاورت وطلبوا الاكل وقعدوا ياكلوا ويتكلموا ويضحكوا
الغريبه ان الطفله كانت بتاكل بطريقه حلوه جدااااا ...عكس ما كانوا فاكرين :)
الترابيزه اللى جنبهم كان فيها شاب ومراته وبنته حوالى 4 سنين
بعد 10 دقايق كده الأب وشوّش بنته
وبضحكه رهيبه وبسرعه راحت ماسكه الكولا بتاعتها وراحت جايه بايسه الطفله ومديالها الكولا فى ايدها ...
كل اللى كان يخرج من المطعم كان بيحيى ال3 بنات بطريقته
اللى يضحكلهم وهو خارج..واللى يصقفلهم .واللى يعاكس البنت الصغيره واللى يطبطب عليها
واللى يديلها حاجه حلوه.....

كل واحد من اللى قاعدين اكيد كان ليه انطباع مختلف عن اللى جنبه
بس اكيد كلهم حاجه اتهزت جواهم

انا متأكد ان فى حاجه اتهزت جواكوا انتوا كمان

ارجوكوا اوعوا تحرموا نفسكوا من الاحساس ده...جربوه بس
مواقف انسانية فى حياتنا

أحمد فاروق · 13th March 2012, 08:29 PM

جزاك الله خيرًا على الموضوع المؤثر
فعلا ...
It feels good to GIVE

العطاء فيه سعادة كبيرة لا تقدر بمال. فاللي بيعطي المال بيشتري بيه ما لا يُقدّر بمال، يبقى هو الكسبان. ده غير الثواب من عند ربنا ... والقصة دي مش بس عطاء، لأ، دي تكافل اجتماعي وأمومة وحنان ورحمة وإعطاء مثل وقدوة ... وحاجات كتير جدًا.

سيدة مصر الاولى · 14th March 2012, 10:18 AM

روعة ...فعلا تخيلوا بدل ما نبص للأطفال دى بأشمئزاز و افضل اوصى بنتى متبصش عليهم اخد الطفلة دى فى ايدى و ادخلها لاول مرة فى حياتها تقريبا تختار الاكل اللى هى عايزاه
جزاك الله كل خير على الفكرة الروعة دى و ان شاء الله فى اقرب فرصة اكل فيها برة هعمل كده

only you · 14th March 2012, 10:41 AM

الله يبارك للبنت دى انا عمرى ما ببصلهم نظره وحشه بالعكس انا قلبى بيوجعنى اوى لما بشوف حد منهم وبلعن الظروف اللى وصلتهم لكده خصوصا ان اعمارهم فى سن ولادى الصغيرين والحمد لله معوده ولادى يتعاملو معاهم عادى جدا وانا الكسبانه انى بغرس فيهم حب العطاء والعطف على المسكين وحسبى الله ونعم الوكيل فى الحاكم اللى بلده اطفالها مشرده وجعانه ومش لاقيه الغطا فى عز البرد بجد انانفسيتى بتتعب اوى وبحس بالعجز لما ببص فى عيونهم

سيدة مصر الاولى · 14th March 2012, 04:14 PM

انا مقصدش انى ببصلهم نظرة وحشة لكن بكون حريصة جدا ان جنى متلمسهومش او تيجى جنبهم لانهم فى الغالب بيبقوا مش نظاف

حازم حسن · 14th March 2012, 04:14 PM

جزاكم الله كل خير
قال رسول الله

{ الخير في أمتى إلى يوم الدين }

تووت · 14th March 2012, 04:41 PM

والله انا نفسي رئيس مصر القادم يشوف حل للبنت دي (طبعا قصدي المشكلة كلها ، مش البنت شخصيا)...

يعني لو احنا دخلنا بيها المطعم ، دا مش حيحصل كل يوم...
ولو حصل من آخرين...
طيب فين الصحة؟ فين التعليم؟ فين أبسط حقوق الملبس والمسكن...الخ

عشان كده مشكلة أطفال الشوارع لازم تتحل على مستوى مصر كلها...

مش حلول فردية (المشكلة أكبر من الحلول الفردية بجد)...

عموما هي طبعا مبادرة جميلة... بس زي ما بقول يا رب يشوفولهم حل ، لأن الأطفال دول يقطعوا القلب...

وحتى المجرمين منهم أو متعاطي المشروبات... فعلا المجتمع اللي عملهم كده...

نتوقع ايه من شخص قاعد طول اليوم في الشارع ، لابس نفس الهدوم ، مفيش تعليم ، مفيش صحة ، مفيش توجيه ، مفيش أمان؟!

تامر

Remooo · 18th March 2012, 08:47 PM

مــــلامــــح · 18th March 2012, 10:11 PM

دعوه لموضوعي

رســـوماتى

هى حركه جمييله وهتسعد ال هيعملها اكتر من الطفل او الطفله ال هيكلوا وجبه

بس فعلا المشكله اكبر من كده بكتيير زى ما بيقول استاذ تامر

ياريت يبقى فى حلول حقيقيه للاطفال دول

حازم حسن · 20th March 2012, 12:43 PM

اقتباس

المشاركة الأصلية كتبت بواسطة Remooo

نفسي اي حد وهوه داخل كنتاكي ياخدني معاه

مواقع هامة وإعلانات نصية
البحث فى القرآن الكريم	القرآن الكريم - الشيخ البنا	الصحف المصرية والعربية	المصحف المرتل المنشاوي	تلاوات نادرة لمشاهير القراء	Pass Medical Exams

Latest Threads By This Member
Thread	Forum	Last Poster	Replies	Views	Last Post
عندهم توفيق عكاشة زيينا	شؤون عربية ودولية	الموعلم	4	993	25th October 2015 02:48 PM
الاقيش عندكم الفيلم ده	صحافة ... إعلام ... سينما ومسرح	حازم حسن	6	1166	29th September 2014 05:07 PM
سؤال في الختم البيضاوي (ربنا يوعدنا)	مواضيع شخصية	حازم حسن	9	28715	13th April 2013 11:39 AM
اضراب سائقي القطارات	شؤون مصر الداخلية	حازم حسن	15	2796	8th April 2013 05:45 PM
المواطن - أول بطولة مطلقة لفنان مصري في السينما...	صحافة ... إعلام ... سينما ومسرح	حازم حسن	20	4148	6th September 2012 04:10 PM

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
ماتيجوا نعمل حزب :-))	Farida	من نحن ؟	27	7th March 2011 10:12 AM

Arabic Discussion Forum with a Special Interest in Travel and Immigration

Immigration to Canada, Australia, and New Zealand

Egypt and Middle East Politics, History and Economy

Jobs in Saudi Arabia, USA, Canada, Australia, and New Zealand

تكافل إجتماعى

ماتيجوا نجربها