Arabic Discussion Forum with a Special Interest in Travel and Immigration

قلب ملاك · 11th June 2010, 04:11 PM

فى الواقع هذا الموضوع يشغل اهتماما خاصا شخصيا لعدة اسباب تتمثل فى كونى طبيب او طالب فى السنة النهائية لكلية طب ايضا والدى كان صيدلانيا وبالتالى تربيت ونشات وانا علاقة مميزة بالادوية ايضا والاهم اننى شخصيا رغم كل هذا وقعت فريسة وصحية لسوء استخدام هذا العقار والسبب المهم ايضا اننى اشاهد وارى اعداد رهيبة من الناس يتناولون هذا الدواء وكانه شىء عادى جدا وبسيط وهين وفى الحقيقة انا لا ابالغ ابدا عندما اقول لكم ان الترامادول اصبح تقريبا فى كل مكان وفى متناول الجميع والسوق تم اغراقه بكميات رهيبة من هذا العقار .

المسالة ليست تتعلق بنسبة بسيطة من الناس كماهو متعارف عليه بالنسبة لمتعاطى اى مخدر بل ان قضية هذا العقار وقصته تختلف عن اى مخدر اخر .

والاختلاف هنا يكمن فى اعتقاد الغالبية العظمى من مستخدميه انه عقار مفيد وغير ضار وانه ليس بمخدر ولايسبب الادمان وانه وسيلة جيدة للتعامل مع اعباء وضغوط الحياة .

لقد وجد الترامادول فى مصر ارض خصبة للانتشار بهذا الشكل الفظيع
بين مختلف الطبقات والاوساط الاجتماعية ومختلف المراحل العمرية

وانا لا اقول هذا الكلام بناء على اوهام ابدا بل عن خبرة لسنوات طويلة
من متابعة للعائلة وللجيران وللاصدقاء وللزملاء حتى سائقى التاكسى وسائقى الميكروباص
العمال وتقريبا كل من اتعامل معه بداية من الحلاق ومرورا بمن يعمل فى البقالة والعطارة وانتهاءا حتى بالاطباء والصيادلة !!!

بصراحة لم يعد من مصلحتنا التعتيم على هذه القضية وهذه الازمة وانا اعتبرها ازمة خطيرة تهدد امن وصحة مجتمع بالكامل ولا اعلم فى الحقيقة من مصلحة من التعتيم الشديد على هذا الواقع .

عندما اجد الناس فى كل مكان يحملون هذا العقار حتى السيدات !!
وحتى طلبة المدارس !

عندما اجد اعمامى واخالاتى وازواجهم متعودين على تناول هذا العقار با انتظام !!

وكلما اتحدث مع شخص بصراحة اكتشف انه يتعامل معه !!

اذن فالمسالة لم تعد بسيطة او محدودة ابدا .

وحتى فى المصالح الحكومية المختلفة شريط الترامادول وسيلة لتخليص اى معضلة وهنروح بعيد ليه فى المرور لاستخراج رخصة القيادة كنت بوزع الترامادول والنتيجة اننى وجدت من ينوب عنى فى كل الاختبارات وحصلت على الرخصة بكل سلاسة .

السيارة استطيع الدخول بها للحرم الجامعى لان الحرس طلبوا من الترامادول وانا لبيت الطلب !

ما اقصده من كل هذا هو اننا بصدد حالة عامة ولسنا بصدد شىء بسيط او شىء محدود !!

عندما اجد اخوتى الصغار يتحدثون عن اصدقائهم وكيف يعرضون عليهم انواع مختلفة من الحبوب وبالطبع كالعادة هو الترامادول اللعين .

اصبحت اشعر صدقونى انه مع الوقت سيصبح هذا العقار مثل البيبسى والشيبسى او مثل الاسبيرين والبنادول !!

من لايعلم ماهو الترامادول
هو مسكن قوى يعمل على الجهاز العصبى المركزى وبالتحديد مستقبلات الافيون لهذا فتاثيره شبيه للمواد الافيونية مثل المورفين والكودايين وان كان اقل قوة واقل ادمانا منها بالتاكيد .

تنتج هذا العقار العديد من شركات الادوية المصرية وهو متوفر فى كل الصور حقن حبوب كبسول تحاميل نقط او دروبز .

العقار طوال السنين الماضية كان مصنف من ضمن الجدول الثانى او الفئة ب من جدول الادوية المخدرة وهذه الفئة من السهل جدا على اى صيدلى صرفها بدون اى مصاعب او مشاكل .

اصبحت نسبة كبيرة وفظيعة من الصيدليات تبيع هذا العقار واصبح وسيلة سهلة لتحقيق ربح كبير حيث يصل سعر الشريط الى 70 جنيه رغم ان ثمنه الحقيقى حوالى 10 جنيهات .
وهكذا اصبحت موضة وانا مثلا كشخص واحد وفى محيط منطقة واحدة اعرف اكثر من 13 صيدلية تبيع كميات رهيبة من هذا العقار .

دا بس فى المحيط بتاعى فما بالكم ببقية البلد .

دا غير السوق السوداء الى بتحصل على الدواء من صيدليات ايضا واحيانا من شركات الادوية مباشرة .

المهم الموضوع تعدى كل الحدود
واصبحت قضية تحتاج الى قرار حاسم

وحقا منذ حوالى 8 اشهر صدر قرار من وزارة الصحة با ادراج الترامادول ضمن الجدول الاول الفئة أ وهذا الجدول يتم صرفه بصعوبة شديدة والصيدلية تحصل منه على كميات محدودة بل اى صيدلية بتصرفه بتتعرض للتفتيش وللسؤال بشكل دورى .

قرار حاسم ومع صدور القرار تاكد للجميع ان الترماول سيختفى وان 90 فى المية من المستخدمين والمدمنين عليه سيتوقفوا غصبا عنهم .

لكن المفاجاة والشىء الغريب بل والمضحك ايضا
ان الصين فطنت للازمة والجماعة الصينيين استغلوا الفرصة
وبدا مصريين يسافروا للصين وللهند ايضا واستطاعوا استيراد كميات ضخمة من الترامادول المصنع فى تلك الدول فى مصانع وفى ظروف غامضة الله اعلم عن مدى مطابقة العقار للمواصفات القياسية .

المهم فجاة بعد صدور قرار الوزير واختفاء الترامادول المصرى
وجدنا كميات رهيبة تجتاح السوق من الترامادول المستوورد

واصبحنا امام مشكلة اسوء من الاول واصبح القرار وكانه جاء لمصلحة هذه الادوية المهربة !!!!

كيف دخلت هذه الكميات الرهيبة مش مشكلتنا ومش تخصصنا .

المهم دلوقتى ان احنا امام كم هائل من هذا العقار يتم تداوله بين مختلف الفئات من الناس .
والمشكلة الان اصبحت اكبر من الاول والسبب ببساطة ان العقاقير المهربة من الخارج مجهولة المصدر ولاتستطيع ان تحدد اى شركة او اى دولة بالتحديد هى المصنعة والشريط او العلبة تشتريها ولا تجد فيها روشتة مثلا كما يوجد عيوب فى التقفيل واضحة وكذلك التاثير متفاوت بشكل غريب .

اذن نحن امام مصيب تتلخص فى السؤال التالى

ماذا لو كانت هذه الادوية المهربة تم تصنيعها فى ظروف غير مناسبة ؟؟
ماذا لو كانت تحتوى على مواد مسرطنة او مواد خطيرة تم اضافتها اليها ؟؟
ماذا لو كانت ملوثة مثلا ؟؟

هل لنا ان نتصور انه بسهولة شديدة يمكن الان لاى جهه معادية لمصر تستطيع ان تدس لنا اخطر المواد بنفس الطريق والاسلوب الذى دخلت الينا به هذه الادوية ؟

فى الواقع كان الوضع قبل قرار الوزير افضل وعلى الاقل كنا نعلم مع اى مادة بالتحديد نتعامل وكانت الامور اكثر وضوحا .

الان الدواء زاد انتشاره
سعره اصبح متوفر للجميع
الغش والكميات الفاسدة وامكانية احتواء الحبوب على مواد خطيرة

هذا بالطبع الى جانب خطورة ومشاكل الترامادول اساسا فى حد ذاته .

ويتبع

قلب ملاك · 11th June 2010, 04:46 PM

اهم الاسباب التى تسببت فى انتشار هذا العقار بين مختلف الفئات

اولا فى ظل اعباء الحياة والصعوبات التى يعانيها الناس اصبح الكثير يتناول العقار من اجل الحصول على قدرة اكبر لمزاولة العمل بطاقة اكبر ومجهود اكبر بدون كلل او تعب وفى الحقيقة السبب فى ذلك يعود لتاثير الترامادول المسكن حيث لايشعر الشخص بالالم الطبيعى الذى يشعر به الانسان عندما يتحامل على نفسه .

والنتيجة ان الشخص من هؤلاء يتعرض لاجهاد شديد ويتحامل على نفسه وهو لايشعر با ان جسده يعانى حقا من اجهاد .

لهذا تجد من يتناول العقار با استمرار تجده يفقد الكثير من الوزن وقد يصاب بالضعف الشديد ان لم ينتبه لذلك .

ثانيا الترامادول يسبب حالة من البرود والهدوء الشديد احيانا الى درجة البلادة ولهذا يلجىء اليه كل من يريد ان يغيب عن الواقع وكل من يريد ان يتهرب من مواجهة الواقع وهذه عموما صفة اى مخدر .

ثالثا وهو من اهم الاسباب حقا
الجنس

يستخدم لعلاج سرعة القذف

فهو يقوم بتقليل حساسية الخلايا العصبية الموجودة فى القضيب وبالتالى يحتاج الى مزيد من الضغط والوقت لكى يصل الرجل لقمة النشوة .

سرعة القذف مشكلة يعانى منها الكثير من الرجال
واحيانا لاتكون هناك مشكلة لكن المسالة تكون مسالة طمع من جانب الزوج والزوجة

ايضا لا يجب ان ننسى ان افلام البورنو التى اصبحت منتشرة هنا وهناك تروج لمفاهيم خاطئة ويتصور الناس ان العلاقة الجنسية الطبيعية تكون بهذا الشكل الغير طبيعى مما يؤدى لحالة من التمرد وانعدام الثقة عند الرجل والمراة وهذا ما دفع الرجال شباب وكبار فى السن الى استخدام الفياجرا من اجل الحصول على انتصاب قوى والترامادول من اجل مدة طويلة ...!!

واصبح الرجل يخاطر بصحته ويعرض نفسه للخطر فى مقابل اثبات فحولته .
وفى الواقع وفى المحصلة ستجد الشخص من هؤلاء غير مستمتع ابدا
بل تصبح العملية ميكانيكية لان الاحساس يختفى تقريبا

هذه اهم الاسباب وهناك اسباب اخرى تتعلق برغبة البعض فى عمل دماغ كما يقال وينتشر الان استخدامه بين اهل الكيف فلم يعد يكتفى هؤلاء بالحشيش او البانجو او الكحوليات بل يتم الان الخلط بين كل هذا وبين الترامادول وفى الواقع كل المواقع الطبية والروشتة اساسا بتاعة الدواء تحذر من خلط العقار مع اى مادة مثل الكحول او اى مهدىء او مخدر اخر .

النساء يستخدمن هذا المخدر للقيام بالاعمال المنزلية بدون كلل او ملل او تعب وانا اعرف بنفسى نماذج كثيرة .!!!

فى المداخلة القادمة سا اتحدث عن الاعراض الجانبية والمساوء والمخاطر
وسوف نعقد مقارنة بين ما يقدمه لك الدواء من ما نظن انه ايجابيات
وبين السلبيات

وسوف اشرح لكم بكل واقعية وبدون مبالغة او تدليس ان الافضل للانسان عدم الدخول فى هذه التجربة من الاساس وانا اتحدث هنا من خلال علم ودراسة ومن خلال تجربة ومعاناة ومن خلال الاستماع للناس .

ويتبع

قلب ملاك · 11th June 2010, 05:31 PM

فى بداية التعامل مع العقار حقا يشعر المتعاطى بتاثيرات لطيفة وممتعة لن ننكر ذلك ولن نكذب على انفسنا واساسا هذا ينطبق ايضا مثلا على الكحول فكلنا نعلم ان له تاثير ممتع وانه يلبى شهوة معينة وسبب نجاح الترمادول واكتساحه للسوق هو عدم ظهور اعراض معينة على المتعاطى فمثلا يستطيع الشاب ان يعتاد تناول هذا العقار ورغم ذلك الاهل والاصدقاء مثلا لايشعرون با اى اثار الا ان كانوا اصحاب خبرة معينة او اذا كانت حالة الشخص متقدمة جدا .

اضافة الى عدم ظهور اعراض واضحة وبالعامية كده مش بيفضح زى ما قلنا حالة النشوة والنشاط والاقبال على القيام بمجهودات كبيرة الى درجة انه يمكن للشخص ان يستنزف فواه الجسدية ورغم ذلك تجده لايشعر بالتعب .

الكثير من زملائى كانوا يستخدمونه مثلا ايام المذاكرة والامتحانات لانه بيقدر يخليهم يستحملوا المجهود بالساعات الطويلة .

بس اكتشفنا بعد كده ان مذاكرة ساعة واحدة وانت طبيعى احسن من ساعات وانت تحت تاثير هذا المخدر .

فشعورك بانك فى احسن حال وانك تستطيع فعل كل شىء هو شعور وهمى وغير حقيقى .

بعض الشباب ممن يشعرون بالخجل المفرط او انعدام الثقة بالنفس او ضعفها وجدوا فى هذا العقار علاجا لهم لانه ببساطة بيقلل الشعور وبيعمل حالة من البرود زى ما قلنا فبتكون برده ثقة زائفة وليست مبنية على واقع .

فى جميع الاحوال هو شانه شان اى مسكن لا يعتبر علاج ولا يعالج المشكلة بالعكس يترك المشكلة تتفاقم وانت لاتشعر .

الاعراض الجانبية الواضحة والتى يعانى منها المتعود على الدواء

انخفاض شديد فى الشهية وصعوبة الاكل والمضغ والبلع
مشاكل فى الهضم الى درججة توقف ملية الهضم تماما فى حالة الجرعات الكبير

فهو يسبب توقف الحركة الدودية للامعاء

بالتالى امساك شديد ومزمن والامساك دا مصيبة فى حد ذاته وممكن يعمل اكتئاب فظيع ويخلى شكل الواحد دبلان وباين عليه انه تعبان

تاثيره على مركز التنفس فى المخ بالتالى يقلل من معدل التنفس عشان كده الجرعات العالية منه تكمن خطورتها فى امكانية حدوث مشكلة وازمة فى التنفس لاقدر الله ودا خصوصا فى حالات مزجه مع المهدئات او الكحوليات .

حساسية وهرش وحكة شديدة .

انسان العين نلاحظ انه بيكون ضيق ولو دققت فى عين الشخص هتلاقيها ضيقة ومش مظبوطة .

والمشكلة بقى الاكبر او المصيبة هى الادمان .

شركة جروننثال المانيا روجت فى البداية ان العقار لايسبب الادمان وانه بيسبب مجرد اعراض انسحاب بسيطة .
لكن فى الواقع النظرة دى تغيرت فى الفترة الاخيرة .

العقار يسبب الادمان حقا والتعود عليه يجعل الانسان شبه عاجز عن ممارسة حياته الطبيعية بدونه .

وادمان هذه المواد بشكل عام سببه ان المخ بطبيعته بيقوم با افراز مسكنات طبيعية عند اللزوم وعند الحاجة . لكن عندما يجد المخ كميات جاهزة وكبيرة من المخدر فى الجسم يقوم بالتوقف عن افراز هذه المسكنات التى تعرف بالاندورفينات . يعنى بالعامية المخ بيجيله حالة من الكسل وبيتوقف تقريبا عن افراز وانتاج المسكن الطبيعى لان البديل موجود وبزيادة كمان .

لهذا عند التوقف عن العقار

يكون المخ مازال فى حالة من الكسل ويصبح الجسم يعانى من نقص حاد فى الاندورفينات

يترتب على ذلك عدم وجود عملية تسكين للالم التى تتم بشكل طبيعى فى اى انسان .

نجد مجموعة شديدة من اعراض الانسحاب حينها

منها حدوث الالام فى مختلف انحاء الجسم وشعور بعد الارتياح

اكتئاب شديد وافكار سلبية جدا

بدلا من الامساك تتحول العملية الى اسهال شديد والم فى البطن رهيب

التعرق وزيادة كل افرازات الجسم بشكل عام .

والشىء السىء والرهيب هو عدم القدرة على النوم بتاتا ولو حدث ونمت سيكون نوم فظيع كله كوابيس وكله الم واكتئاب ونوم متقطع لايزيد عن 3 او 4 سااعات او اقل .

هذه الاعراض تصيب اى انسان اذا ما قام با ستخدام هذا الدواء لفترة لشهور مثلا وبانتظام .

اعرف ناس للاسف بقالهم اكثر من 10 الى 15 سنة وقعوا اسرى لهذا الدواء وعاجزين عن التوقف رغم انهم متعلمين ومثقفين ومدركين لخطورة الامر .

المصرى بطبيعته يخجل من الذهاب لطبيب نفسى مثلا او لمصحة او مركز للعلاج حيث ان المسالة مرتبطة فى ذهنة بوصمة عار مثلا او بالسمعة .

وفى الحقيقة انا بلاحظ ان الكل بيحاول يخبى على الناس

انا عن نفسى اول ما جربته اخبرت اهلى وكنت صريح مع الكل عشان اقدر الاقى الى يساعدنى

انا مش ملاك واى انسان بيضعف وممكن يغلط .

تحدثنا عن اعراض الانسحاب وعن الاعراض الجانبية وهم بيكونوا عكس بعض على فكرة .
تحدثنا عن انتشار الدواء وتحدثنا عن مشكلة كونه مهرب ومستورد من جهات مجهولة ومصنع فى ظروف مجهولة وهذه مصيبة اخرى كما اشرنا وتحتاج لتدخل حاسم من الدولة حتى لو كان الحل الوحيد هو اعادة الترامادول المصرى للجدول ب .

بقى الحديث عن المشاكل التى يسببها الترامادول على مستوى الحياة الشخصية والعلاقات الاجتماعية
وكيف يعتبر هذا العقار واى مخدر عائق امام نجاح الانسان ووسيلة لفشل وللتراجع

على عكس ما قد يظنه الشخص فى بداية علاقته بهذا الشىء .

فى الواقع انا اشبه هذا المخدر بفتاة ليل شكلها جميل من الخارج ومغرى
وما ان تقترب منها وتسقط فريسة لها بعدها ستتمنى لو انك ابتعدت من البداية

ويتبع بالحديث عن

كيف تسبب الترامادول فى حدوث مشاكل نفسية بالنسبة لى وفى حدوث تاخر بالنسبة لى خصوصا فى الدراسة وتراجع مستوايا بشكل واضح دا غير الناحية الصحية والشكل والمظهر .

وبشكل عام قبل ان اخوض فى تفاصيل

اصبحت شخصا منطويا ابتعد عن اى تجمعات
اغلق هاتفى بشكل مستمر ولا اريد الاستماع لاحد
ادمنت الانترنت لاننى اجد فيه وسيلة التواصل المثالية مع الخارج
فى الدراسة تاخرت سنة بسب عدم دخولى الامتحانات من الاساس
بعد ماكنت بجيب امتياز وجيد جدا على الاقل اصبح اقصى طموحى النجاح
الجانب العاطفى ابتعدت عنه تماما فالترامادول يقتل الاحساس فى الانسان خصوصا بعد وقت طويل
ولكم ان تتصوروا شاب فى ال 23 ولايجد اى رغبة اتجاه الجنس الاخر ولا افكر فى هذا تماما
الى درجة اننى مقتنع اننى غير صالح للزواج حاليا

هو لايسبب العقم او الضعف الجنسى بوضوح
ولو توقفت عنه وتخلصت منه تعود طبيعى

لكن اثناء وجودك تحت تاثيره تجد نفسك زاهدا فى كل شىء
سواء طعام او جنس او عاطفة او حتى موسيقى او او

افراطى فى التفكير بشكل فلسفى واهتمامى بالموت ومابعد الموت والغيبيات واهتمامى المفرط بالدين الى حد الهوس ولا اعلم صراحة ان كان هذا جانب ايجابى ام سلبى لكن بشكل عام انا لست سعيد فى المحصلة واتمنى لو اتخلص تماما من هذا البلاء .

ارجوا تحذروا ابناءكم من هذا الخطر المحيط بالجميع
ارجوا ان لا تهتم ولو با اول تجربة فا اى ادمان يبدء بتجربة

والمخدرات ليست شهوة فطرية تولد مع الانسان
لكنها شهوة تظهر بمجرد التجربة

بعكس الشهوات الطبيعية الاخرى .

طبعا على الجانب المادى بتصرف فلوس كتير فى شىء بيضرك
بيدفعك للتدخين بشراهة والسبب هو عدم شعورك بدخان السيجارة وبالتالى تقول دائما هل من مزيد !!

برود فى التعامل مع الناس وكسل ذهنى وبدنى

الغريب انه فى البداية كان بيدفعنى للتحرك بنشاط وللحديث مع الناس وبيدينى اشياء ايجابية نوعا ما او انا كنت متصور واهما انها ايجابية

دلوقتى لا اجد الا السلبيات .

يجب توعية الناس بصراحة وبالتفصيل .
يجب ان ندرك ان هذا العقار حقا يهدد الجميع .
لانه متوفر بسهولة وفى كل مكان .

ولكم ان تتصوروا ان قرات تصريح لاحد الشخصيات المهمة فى اميركا حول المسكنات
وقال ان المسكنات والمهدئاات اصبحت تهدد الامن القومى الامريكى .
رغم ان هناك ضوابط شديدة ورقابة صارمة.

هناك دراسات واضحة وواقعية حول هذا الجانب الخطير .
هناك رفم او خط ساخن يمكن لاى مواطن الاتصال به للحصول على علاج بسرية .
هناك طرق حديثة للعلاج بسهولة ويسر للاسف احنا هنا مسمعناش عنها .
هناك ثقافة التعامل مع القضية .

هنا كالعادة الموضوع فيه فلح وجليطة نوعا ما واعذرونى للفظ .

لان انا لقيت سلبية فظيعة فى التعامل من جانب اطباء وعدم ابداء اى اهتمام
فا صراحة دا شىء كرهنى فى انى استعين با اى طبيب .

يبقى على الاقل انا بحكى تجربتى
وبتمنى للناس الوقاية الى هى خير من العلاج .

تخيلوا دا عقار واحد وان كان هو الاكثر شيوعا با اكتساح بعد الحشيش .

طبعا فى ادوية اخرى مصيبة برده فى حد ذاتها والادوية دى بقى مرتبطة بالجرائم .
ومرتبطة بالحوادث الفظيعة الى بنسمع عنها .

اقسم بالله لو عملتوا تحليل دم لسائقى السيارات ستجدوا نسبة فظيعة من قائدى المركبات وهم تحت تاثير المخدر .

مع التحية للجميع
ارجوا ان يكون فى موضوعى اى شىء مفيد وجديد وميكنش ممل .

KANE · 11th June 2010, 06:12 PM

https://www.almatareed.org/vb/showthread.php?t=7637

dr-amira · 11th June 2010, 07:11 PM

موضوع رائع ياقلب ملاك و شاغلنى جدا بما انى صيدلانية و بيمر عليا كم مرعب من اللى عاوزين ترامادول
فعلا الوضع بقى غريب و مرعب ...من اول استاذ كلية الطب اللى بينصح الطلبة على ضمانته انهم ياخدوه ايام المذاكرة لتطويل وقت المذاكرة و التركيز....والشورة الهم بتاعة جرعة من الفياجرا و الترامادول....وقرار الوزير بضمة للجدول الاول اللى فرحنا جدا بس جاب لنا صدمة بعد كده من انتشار الصينى ....
انا و الله باشوف مواقف تبكى من الامهات والاباء اللى بيجيبوا اقراص لاقوها فى جيوب ولادهم و عاوزين يعرفوا بتاعة ايه ...و بتبقى الصدمة لما يعرفوا انها مواد مخدرة
انا جت لي ام معاها شريط لقته فى جيب ابنها طلع مورفين اقراص ...جاية من الصين ...يعنى مش الترامادول بس ....
ما اخبيش عليك الموضوع شكله متعمد و الادلة كتير

1-وفرة المنتج المصرى من مصانع متعددة كأنه لبا او بونبونى
2-وفرة المستورد كان له تصريح استيراد مش تهريب
3-ضالة العقوبة ....تم ضبط شقة يديرها عضو بارز فى الحزب الوطنى لتصنيع الترامادول وتوزيعة واخد حكم بالسجن 6 سنين طبعا بعد ما هرب برة مصر و بالرغم من انه ادويه الجدول الاول
4-بالرغم من شهرة الصيدليات واماكن البيع ومعرفتها للجميع الاانه لا يتم اغلاقها تحت اى ظروف
5-انا شخصيا بلغت عن صيدلية دمرت مئات الشباب ومشهورة ببيع الترامادول و الادوية المخدرة ...ولا حد عملها حاجة

haya · 11th June 2010, 09:08 PM

مجهود جميل جدا يا ملاك بس ليا تعقيب علي كذا نقطة
أولهم الفئات اللي بتتناول العقار وخاصة لو بأتكلم عن فئة البالغين بالتحديد
المفروض ان أي بني أدم بيقدم علي تناول عقار بالشكل ده هو مدرك كويس جدا لاضراره لانه غالبا بيكون اخده بنصيحة من حد يعرفه وفي النهاية دي مسئولية شخصية بحتة
الفئة التاانية وهيا السيدات اللي بتاخده علشان تنجز شغل البيت بصراحة انا مذهولة من الكلام ده ..بجد ده حقيقي ؟؟؟و ولو هو حقيقي هو للدرجه دي احنا فقدنا القدرة علي ترتيب اولويات حياتنا علشان يبقي اعمل كارثة واجيب لنفسي مصيبة وادمر صحتي علشان اخدم بيتي وعيالي اللي هما هما نفسهم برضه مش هاقدر اخدمهم واتحول لكائن عاله بعد تغلل الاضرار الجانبيه للعقار ده؟؟ مش عارفه الحتة دي مش عارفة ااستوعبها بجد

النقطة التالتة وهي الاخطر فعلا وهو الصمت الحكومي والرقابي تجاه تهريب شحنات من الادوية دي من الصين ...هل يا تري الحكومة غير قادرة علي تضيق الخناق علي التهريب
وهل هي غير قادرة علي تفتيش الصيدليات بصفه دوريه وتجريم بعقوبة شديدة توقف انتشاره بالشكل ده..ولا ده مقصود علشان نكمل التغيب والتيه اللي عايش فيه الناس وننتقل وننتشر لكل فئات العمر حتي االطلبة والمجتهدين واللي عايزين يذاكروا يبقي ده مدخلهم ..
حتي الستات ..الستات كمان اووووفر اووووي

brain · 11th June 2010, 09:31 PM

موضوع رائع يا استاذ قلب ملاك
بس عندي 3 اسئله
انا اعرف ان الادويه المصنفه جدول ا بيبقى صعب جدا تداولها تعتبر مخدرات - فاكر اكيد الكوديفان اللي انتشر مع الشباب خلال فتره منتصف التسعينات
طيب ازاي المخدر ده متوافر حتى الان و بالسهوله دي ؟
السؤال الثاني
هل يؤدي الى الادمان بمعنى الادمان ؟
يعني نفس ادمان المخدرات الاصليه ؟
و لا يستطيع الانسان ان يحيا بصوره طبيعيه اذا لم يحصل عليه ؟
السؤال الاخير
الترمادول من الاسم اتسائل هل هو ينتمي الى العائله المشهوره - التي يتزعمها كلا من البنادول و الادول ؟
و اذا كانوا من نفس العائله فهل هذان المسكنان لهما اعراض و نتائج مشابهه للترامادول ؟ حتى لو كانت بصوره اخف مثلا ؟

قلب ملاك · 11th June 2010, 09:55 PM

اقتباس

المشاركة الأصلية كتبت بواسطة KANE


	https://www.almatareed.org/vb/showthread.php?t=7637

شكرا يا استاذى
لم اعلم حقيقة وجود نفس الموضوع فى المنتدى
واعتقد يمكن حقا ضمه الى الموضوع الاصلى

الجديد نوعا ما هنا
ان الكلام من واقع التجربة بعيدا عن كلام الروشتات

انا عاوز اوصل للناس نوعية الازمة بالتحديد
ودا هيظهر فى ردى على اسئلة السادة الاعضاء

انا اعانى حقا مع هذا العقار واحاول التخلص منه
فقد كانت تجربتى له رغبة منى فى بذل مجهود اكبر فى المذاكرة
والحقيقة يوم ما جربته مذكرتش ولا حاجة ونزلت اتمشيت خدت الكورنيش كله من اوله لاخره من غير ما اشعر با اى تعب وكنت مبسوط على الفاضى بدون سبب وكنت لوحدى كمان !!!

فا بدات حكاية ارتباطى بهذا الدواء

انا بطبعى خجول متردد حساس بل مفرط فى الحساسية
ابكى كثيرا جدا لابسط الاسباب واتفهها

الترامادول عاجلى النقطة دى وخلانى اكثر برودا وثباتا

لكن مع الوقت انقلب السحر على الساحر

انا مش عاوز اضحك على الناس واقولهم ان الترامادول وهم وانه مش بيعمل تاثير وانه ايحاء .

لا حقيقى هو تاثيره قوى ويعتبر ممتع جدا فى البداية وبمجرد تجربته بتنمو فى داخلك شهوة البحث عن هذه النوعية من العقاقير .

زى اى شهوة مهو الزنا ممتع ويلبى غريزة لكن مش معنى دا انه اخرته كويسة .
لو قلتلك الزنا مفيش فيه متعة عشان اخوفك منه ابقى بضحك عليك

اساسا تكمن قوة الارادة فى تحدى هذه الشهوة والرغبة .

الشىء المهم ان لازم كلنا نعرف التالى

شهوة المخدرات تنمو بتعاطيها اى انها شهوة مكتسبة ولاتولد مع الانسان
بعكس الشهوات الاخرى الاساسية كالاكل والجنس .

شكرا لمرورك وان شاء الله سا اقرا موضوعك بالتفصيل الى واضح انه مميز حقيقى .

قلب ملاك · 11th June 2010, 10:08 PM

اقتباس

المشاركة الأصلية كتبت بواسطة dr-amira


	موضوع رائع ياقلب ملاك و شاغلنى جدا بما انى صيدلانية و بيمر عليا كم مرعب من اللى عاوزين ترامادول فعلا الوضع بقى غريب و مرعب ...من اول استاذ كلية الطب اللى بينصح الطلبة على ضمانته انهم ياخدوه ايام المذاكرة لتطويل وقت المذاكرة و التركيز....والشورة الهم بتاعة جرعة من الفياجرا و الترامادول....وقرار الوزير بضمة للجدول الاول اللى فرحنا جدا بس جاب لنا صدمة بعد كده من انتشار الصينى .... انا و الله باشوف مواقف تبكى من الامهات والاباء اللى بيجيبوا اقراص لاقوها فى جيوب ولادهم و عاوزين يعرفوا بتاعة ايه ...و بتبقى الصدمة لما يعرفوا انها مواد مخدرة انا جت لي ام معاها شريط لقته فى جيب ابنها طلع مورفين اقراص ...جاية من الصين ...يعنى مش الترامادول بس .... ما اخبيش عليك الموضوع شكله متعمد و الادلة كتير 1-وفرة المنتج المصرى من مصانع متعددة كأنه لبا او بونبونى 2-وفرة المستورد كان له تصريح استيراد مش تهريب 3-ضالة العقوبة ....تم ضبط شقة يديرها عضو بارز فى الحزب الوطنى لتصنيع الترامادول وتوزيعة واخد حكم بالسجن 6 سنين طبعا بعد ما هرب برة مصر و بالرغم من انه ادويه الجدول الاول 4-بالرغم من شهرة الصيدليات واماكن البيع ومعرفتها للجميع الاانه لا يتم اغلاقها تحت اى ظروف 5-انا شخصيا بلغت عن صيدلية دمرت مئات الشباب ومشهورة ببيع الترامادول و الادوية المخدرة ...ولا حد عملها حاجة

شكرا لمرورك سيدتى الفاضلة ولاهتمامك .

ملاحظاتك فى غاية الدقة

انا اتعجب ايضا من وفرة الدواء بهذا الكم الرهيب وكانه حقيقى بونبونى !!!!
ايام ما كان جدول ثانى كانت شركات الادوية بتوزع كميات رهيبة وكنت اعرف صيادلة عن طريق معارف ليهم فى المؤسسة المصرية للادوية بيقدروا يصرفوا كميات كبيرة جدا .

دا غير السوق السوداء حاجة زى الافلام
تدخلى شوارع معروف اطفال صغيرين تلاقيهم واقفين بشوال مليان كميات هائلة من الادوية والشباب حوالين الولد زى الرز !!!!

الشارع دا فضل 5 سنين مليان كل انواع الادوية وبتتباع فيه على الرصيف واى عيل صغير فى المنصورة كان عارف دا ماعدا الحكومة على ما يبدوا !!!!

دا غير 3 او 4 مناطق تانين بيوزعوا برده بكميات رهيبة جدا .

المصيبة الجديدة
غر دا كله

وفرة المستورد بهذا الشكل
انا لو عاوز اجيب كراتين فى موجود وجاهزة
وناس دلوقتى بتدخل ب مئات الاف كا استثمار فى هذا المجال
والحاجة بتتباع بسرعة الصاروخ لان الطلب عليه فظيع

راجل كبير اخر مرة جبنا سيرة الترامادول لقيته بيقولى دا معجزة العصر !!

ايضا شهرة الصيدليات
يعنى انا بس لوحدى وفى محيط منطقة ضيقة اعرف بقولك ما لايقل عن 10 صيدليات متخصصين فى الموضوع دا .

طيب بلاش الصيدليات الاماكن المشبوهة الى قلتلك عليها هى كمان مشهورة والتجار مشهورين بالاسماء كمان ومعروف اماكنهم ولو اى جهة حكومية عاوزة تقرير مفصل بالاسماء وبالاماكن والعناوين بالتحديد ناس كتير يقدروا يدلوها .

بس يبدوا ان الناس دول بيبقوا مامنين نفسهم او فى سر احنا مش عارفينه .

الحشيش بقالة شهور مختفى تماما وجرام الحشيش دلوقتى بثمن جرام البودرة
ودا اكبر دليل على ان الحكومة لما بتحب تمسك حاجة وتخفيها بتقدر

اختفاء الحشيش ايضا كان فى نفس توقيت رفع الترامادول المصرى للجدول الاول

وفى نفس التوقيت البلد اتغرقت بالمستورد

حاسس ان فى اننه فى الموضوع .
وحاسس ان العملية تتعلق بمصالح ناس وناس .

بس عموما الله اعلم منقدرش نجزم بشىء .
المخدرات برده موجودة فى العالم كله بس اشك ان فى اى دولة متقدمة بيتم تعاطيها بالشكل الى فى مصر دا .

biopasha · 11th June 2010, 10:09 PM

موضوع رائع يا قلب ملاك .. تسلم ايدك

مواقع هامة وإعلانات نصية
البحث فى القرآن الكريم	القرآن الكريم - الشيخ البنا	الصحف المصرية والعربية	المصحف المرتل المنشاوي	تلاوات نادرة لمشاهير القراء	Pass Medical Exams

Latest Threads By This Member
Thread	Forum	Last Poster	Replies	Views	Last Post
شفيق كوزير .....انجازات وحقائق	إنتخابات الرئاسة	بريف هااارت	1	721	28th May 2012 12:47 PM
اؤيد اللواء عمر سليمان رئيسا لمصر	إنتخابات الرئاسة	imatinib	143	12512	16th August 2011 07:21 AM
شادى الغزالى وشراء التوكيلات !	شؤون مصر الداخلية	قلب ملاك	23	2538	16th August 2011 06:27 AM
حول الايمان والالحاد .....نقاش مفتوح	أديان وعقائد أخرى	قلب ملاك	110	15249	17th July 2010 09:19 PM
لنحلق فى سماء الأتونية !	أديان وعقائد أخرى	ana_3enady	7	1791	23rd June 2010 01:21 AM

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
ملحوظة تسترعي الانتباه !!	gadolly	شؤون مصر الداخلية	25	18th December 2010 09:42 AM

Arabic Discussion Forum with a Special Interest in Travel and Immigration

Immigration to Canada, Australia, and New Zealand

Egypt and Middle East Politics, History and Economy

Jobs in Saudi Arabia, USA, Canada, Australia, and New Zealand

إستشارات صيدلانية ودوائية

الترمادول ازمة وقضية تستحق الانتباه !