حكاية مهاجر (يومياتي في الطريق الى الهجرة)

[CanadaCloser]

الصحف المصرية والعربية

اخواني المطاريد الاعزاء السلام عليكم ورحمة الله وبركاته، بعد الطلبات الجماهيرية الكثيرة اني افصل رحلة كفاحي في التقديم على الهجرة العشوائية واللي الحمد لله ربنا اكرمني فيها وكنت احد الفائزين.
اسمحولي اني اضيفها كيوميات ممكن تفيد اي حد يكون في نفس وضعي ومحتاج معلومات وححاول اني افصل في موضوع الاجراءات لعل وعسى تكون مفيدة للجميع، نداء للإدارة يا ريت اذا شافوا اني بهيس وبقول اي كلام
يقفلو الموضوع بسرعة ، في البداية خلوني اعرف بنفسي انا اسمي عمر عبدالجواد، فلسطيني الجنسية من مواليد السعودية درست في مصر واشتغلت في السعودية بعد التخرج تحديدا في مدينة الرياض.
ونبدأ من أول الحكاية خالص ، صلو على النبي.
كان يا ما كان في سالف العصر والاوان، الوقت كان في شهر سبتمبر 2010 وانا مروح من الشغل على المغرب كده، جاني اتصال من صديق قديم قاللي انت فين قولت له مروح البيت وبعد السلامات والكلمات قاللي انا ناوي اقدم في اللوتري النسة دي، انا قلت لوتري !!! ايه يعني لوتري ، دي حاجة بتجيب فلوس، قاللي لا دي قرعة الهجرة العشوائية لامريكا، وانهم بختارو ناس كتير من حول العالم وبيعطوهم قرين كارد ببلاش، الله يا نهار اسود!! انا قلت اله وكم احتمالية انك تفوز قاللي 1% او 2% لو حظك حلو، ايه رايك نقدم سوا، طبعا قلت اله انا اقدم في حاجة انا عارف اني مش حاخدها لا يعم الله الغني.
ومشيت الايام وصرنا في شهر اكتوبر ويومها قابلت صديقي ده في كوفي شوب وقاللي خلاص انا قدمت قلت له يا عم انت بتهرج قاللي قدمت وخلاص يمكن تكون لي فرصة واهاجر ولو تسمع مني انت تقدم كمان قلت انا ما عرفش ايه يعني لوتري وعايزني اقدم ازاي، قاللي انا عندي رابط لمنتدى عربي الله يكرمه (طبعا مش حقوله عشان اصحابنا في المنتدى هنا ما يزعلوش) وقاللي في خطوات الهجرة بالتفصيل ما عليك الا تعبي معلوماتك ومش حتخسر حاجة قلت اله قشطة ارسله على المسنجر انهاردة بالليل (طبعا ماكانش فيه واتساب ايامها او انا كنت ما عرفش حاجة عن التكنولوجيا المهم مع علينا)، بالليل ارسلي الرابط وبدات اعبي البيانات وامشي على الخطوات الموجودة في المنتدى لحد ما وصلت لموضوع الصور اه دول عايزين صورة محددة اتصلت على صاحبي قاللي دي لازم تتصورها في اي ستوديو تصوير وتقوله صورة للهجرة الامريكية، قلت له ما ينفعش احط صورتي وانا على الكورنيش قاللي لا قلت له انسى الموضوع مش حقدم انا كسول جدا ومش حينفع اروح ادور على ستوديو واتصور دي عيزالها مجهود كبير يا بني. بعدها بكم يوم وانا ماشي بالصدفة مروح من الشغل زي العادة وبدور على مطعم عشان اتغدى، هبااا بالصدفة لقيت ستوديو، الله امال بقولو الستوديهات بعيدة ليه، رحت وقلت للاخ المصور انا عايز
اتصور صورة للهجرة الأمريكية وتكون خمسة في خمسة ووداني مطرطرة فيها واتصورت واخدت منها نسخة على سي دي عشان ارفعها على موقع اللوتري ورجعت وبالليل عبيت بياناتي ورفعت الصورة وقاللي كده قشطة خلاص مش عايز اشوف وشك الا على وقت السحب واللي هو مفروض في شهر مايو الجاي.
وراحت الايام ونسيت اني مقدم على اللوتري وراح شهر مايو 2011 وانا ناسي انه في قرعة اساسا وجه شهر اكتوبر وبالصدفة لقيت صاحبي اياه الله يكرمه وقاللي شيكت على اللوتري، لوتري!! لوتري ايه يا عم قاللي اللي قدمنا عليه السنة اللي فاتت، ايوا ايوا افتكرت دحنا قدمنا مع بعض وشيكنا وطبعا ما اختارونيش لا انا ولا صاحبي قلت له شفت انا قلت الك انها صعبة قاللي لسا في قرعتين على شهر مايو وشهر اكتوبر 2012 الجاي، وطبعا جه شهر مايو وانا ناسي زي العادة انه فيه لوتري وراح شهر مايو وفي الفترة دي طبعا انا كنت خطبت والحمد لله، وفي تاريخ 13/7/2012 تاريخ مش حنساه ابدا، وانا في الشغل بشيك على ايميلاتي لقيت ايميل وعنوانه "Please check your DV-2012 entrant information‏"
قلت حيشتغلونا بقا وقدم وادفع 200 دولار عشان تفوز والشركات الحرامية اياها لقيت انه الايميل رسالة عاديه عبارة عن 10 سطور تقريبا خلاصتها انت ما شيكتش على اللوتري بتاعك ليه شيك عليه بسرعة عشان اذا كنت فايز تلحق تجيب الورق المطلوب، طبعا انا قلت يا ولاد الحرامية للدرجة دي وصلت الحرمنه عندكو انا في لحظتها كنت عايز امسح الايميل بس جاني احساس بقوللي اصبر قلت خلاص ابقا اشيك عليه من البيت احسن واشوف حعمل ايه، نسيت اقولكم انا في الفترة دي بدأت اراسل محامي في كندا وارسلت له الطلب بتاعي وحولت له اول دفعه كانت 900 دولار (حر ونار في جتته لانه ما رضيش يرجعهم لما لغيت الطلب) وده تفسير النك نيم بتاعي، وصلت البيت ورحت لاخويا عشان يقرا الطلبات الباقية واللي لازم ارسلهه للمحامي الكندي عشان الهجرة الكندية وفي نص الكلام قولت اله وصلني ايميل انهارده بقوللي شيك الى اللوتري بتاعك وكلام فاضي عايزك تشوفه معايا فتحت الميل
وقرانا الميل سوا قاللي ده مستحيل يكون مزيف لانه في رابط اللوتري الرسمي بتاع الحكومة وكان فيه رابط تاني بقولي في حالة نسيت رقم Confirmation بتاعك تقدر تسترجعه من الرابط ده طبعا نا نسيت اللوتري كلها مش حنسى الكونفيرميشن ورجعته وشيكت والمفاجأه "You have been selected" ايه فيه ايه انت بتقول ايه قاللي اخويا مبروك اختاروك في اللوتري، يا نهار اسود كنت حمسح الايميل انهارده!! وقاللي لازم تمشي على التعليمات اللي في الرابط الموجود في الصفحة عشان تعبي الطلب وترسله لولاية كنتاكي. الصورة في المرفقات هي نسخة من الايميل اللي وصلني.
في الحلقة الجاية ححكيلكو عن المعاناة في تعبئة الطلب وازاي اخدت الفيزا بعد معاناه رهيبة وخصوصا انه الوقت كان بيداهمني وما بقاش غير اقل من شهرين بس لحد 30 سبتمبر ويلتغي الطلب بتاعي.
تابعوني في الحلقة القادمة.

 

[max]

تسجيل متابعه ....
سبحان الله انت شوفت النتيجه بعدها باكتر من شهرين ... عملت ايه و انت كنت لسه خاطب ؟؟؟ ينفع تعدل الحاله في الاوراق ال متزوج؟

 

 

[rania]

الحمد لله على السلامة
تسجيل متابعة

 

 

[canada wait me]

تسجيل متابعة اول كرسي على اليمين

 

 

[arandas]

تسجيل متابعه بالتاكيد، ده الواحد بقاله يمكن اربع سنين بيقدم و مفيش نصيب، على العموم هي نتيجه 2015 النهارده ربنا يسهل، و بالتوفيق في مشوارك ان شاء الله.

 

 

[Myssaremia]

تسجيل متابعه

 

 

[AhmedBadawi]

دعوه لموضوعي

مجموعة مطاريد لاندنج 2015

تسجيل متابعة معاك. فكرة حلوة ان احنا نسمع قصة حد هاجر أمريكا. معظم المواقع بتتكلم عن كندا وأمريكا بيبقى مهضوم حقها. بالتوفيق في السرد

 

 

[khaled hindi]

أتمنى لك التوفيق في حياتك في اميريكا...

تسجيل متابعة...

 

 

[mmabass]

السلام عليكم ورحمة الله وبركاته
ألف مبروك .. لقد سعدت بهذا الخبر

 

 

[Ali Mokhtar]

عمر باشا مبرووووووك الموضوع الجديد.....اكيد تجربتك هتفيدنا كلنا وشكرا لانك استجبت لطلبنا بفتح الموضوع بالتوفيق دائما .....ومنتظرين الحكاية فى الصفوف الامامية