سيدة مصرية ما شاء الله تضع 7 أطفال في معجزة إلهية تشهدها مستشفى الشاطبي بالإسكندرية

[فالحة هانم]

الصحف المصرية والعربية

سمعت هذ الخبر في التليفزيون ولقيته على النت قلت اكتبه هنا علشان كلنا نتعظ إن الله إذا أراد شيئا أن يقول له كن فيكون .. في أي من شئون حياتنا .. سواء عمل او غربة او زواج او دراسة او انجاب اطفال او ..... الخ

https://www.masrawy.com/News/Various/.../16/twins.aspx

ربنا يقدرهم على مصاريفهم وعلى تربيتهم .. وسمعت في التليفزيون انهم ناويين يستقبلوا هدايا مادية لصالح الأسرة دي ..وربنا يكون في عون بباهم .. هو عامل زراعي .. وربنا يفتح له ابواب رزق لهم .. آآآآآمين

"

 

[hoppa]

سبحان الله معجزة فعلا فهى لم تأخذ منشطات و لم تتوقع ولادة اكثر من طفل واحد

سبحان الله
عقبالى لما ربنا يدنى توائم زيهايا حبى لهم

بس مش سبعة اتنين او تلاتة كفاية اوييييي مش عايزين نتعب الراجل اللى هيتحمل مصاريف اكل و لبس

كان الله فى عون عم فراج ابو الاطفال
و اهو رمضان داخل دلوقتى و المصريين فيهم الخير مش بيتأخروا

اما الحكومة بقى
ادى نتيجة حملة نحكم عقلنا
عشان يبطلوا حملات:11:
المصريين مش بيجيب فيهم

من اظرف التعليقات فى المصري اليوم:

"إزاي حيتم تطبيق قانون الطفل الثالث عليه ضريبة و مش حيتلقى دعم بالعند في الحكومة" و يمكرون و يمكر الله والله خير الماكرين" موتوا بغيظم يا حكومة"

 

 

[فالحة هانم]

والله صح يا hoppa

اقتباس اما الحكومة بقى ادى نتيجة حملة نحكم عقلنا عشان يبطلوا حملات المصريين مش بيجيب فيهم

عندك حق في كده


سبحان الله كل ما الحكومة تغلي الأسعار علشان الناس تقعد تحرم نفسها من كل حاجة حتى من العيال والله .. أو المتجوزين جديد يفكروا يأجلوا شوية حكاية العيال دي علشان المصاريف

أو تعمل حملات مش تنظيم نسل .. لآلآلآلآ دي عايزة انعدام نسل اصلا

سبحان الله .. ربنا يدي بدل العيل اتنين وتلاتة واديكي شايفة ما شاء الله لاقوة الا بالله سبعة

وبرضة ربنا يكرم اللي اتأخرت في الإنجاب .. وتجيب توائم كمان .. انتي مش ملاحظة برضة ان التوائم كترت آخر 3 أو 4 سنين .. :

أنا أريد والحكومة تريد ... والله يفعل ما يريد .... سبحان الله

وسلميلي يا حكومة على تنظيم الأسرة :[

 

 

[gameel]

ما شاء الله تبارك الله
حيوية فائقة في التناسل وعطالة شبه كاملة في الرأس ، والعدد 77 مليون جهاز تناسلي يزدادون مليوناً ونيفاً كل عام .



.

 

 

[Miramar]

بالنسبة للي معارضين تحديد النسل و تنظيمه ..
يحضرني عبارة مش فاكرة سمعتها فين ..
احترسوا مصر ترجع إلى الخلف .. ربنا يستر

 

 

[فالحة هانم]

الأخت Miramar شكرا على مداخلتك

اقتباس بالنسبة للي معارضين تحديد النسل و تنظيمه .. يحضرني عبارة مش فاكرة سمعتها فين .. احترسوا مصر ترجع إلى الخلف .. ربنا يستر

أنا في رأيي أن مصر بترجع إلى الخلف من حوالي 25سنة .. قبل ما عددنا يكتر كده

وعلى فكرة انا ليه قلت من 25 سنة .. لأن الحكومة لما شافت في النظرة المستقبلية ان العدد حيكتر ويضايقها ..قامت عملت ايه ؟؟؟ جابت البذور والسماد والتقاوي اللي تقطع الخلف من أصله .. ودي حقيقة .. علشان يحددوا النسل

قووم إيه .. الجيل الجديد اللي طلع وفي سن الزهور ده .. قال إيه مبيخلفش .. ستات ورجاله .. ليه بأة ؟؟

علشان اللي متتسماش البذور والتقاوي والمبيدات كمان .. علشان الحكومة قررت كده

قوووم الناس عملت إيه ... الأزواج اتعالجوا بمنشطات ..فبدل ما كانوا حيجيبوا اتنين بالكتير .. بقت لما الست تبقى حامل ... تبقى حامل في توأم .. وبعد ما يكبروا التوأم .. تفكر تجيب لهم واحد يسليهم ويلعبوا به .. تقوم جايبة توأم كمان

وبعدين ما هي الصين والهند اكتر مننا بكتير في عدد السكان .. بس هما وظفوا العدد بتاعهم ده في المشروعات الصغيرة .. وبقى بالفعل لما الواحد يدخل شارع في الصين ـــ العمارة مثلا الأولى بتركب الكي بورد بتاع الكمبيوتر .. والتانية بتركب الماذر بورد ..والتالتة المروحة .. لغااااية ما الواحد يوصل لآخر الشارع ويشيل الكمبيوتر في علبته :11:

احنا بس محتاجين ناس في الحكومة يحبوا البلد بجد ويحبوا شعبها المطحون ويحبوا جيلها اللي طالع .. علشان متكونش الأعداد السكانية دي مشكلة عندنا

وواضح ان في مصر ..الأزمة الحقيقية اللي فيها هي .. الحب ... محدش من الكبار عايز يحبها لمصلحتها ولمصلحة شعبها .. والله يكون في عون الشعب ..

دمتم بود

 

 

[ابتسامــة]

ماشاء الله
ربنا يبارك لهم فيهم
ويعينهم بصراحة محتاجين كل العون الممكن
مش قادرة اتصور الأم لما السبعة يعيطوا في نفس الوقت
هتراعيهم ازاي؟!

 

 

[أحمد فاروق]

خبر ظريف اهوه

اقتباس «غزالة» تسمي توائمها السبعة: جمال وعلاء وحسني ومبارك وسوزان وخديجة وجيهان أطلق فراج علي البرقي، والد التوائم الـ٧ الذين أنجبتهم زوجته «غزالة» بالإسكندرية أسماء: جمال وعلاء وحسني ومبارك وسوزان وخديجة وجيهان، علي التوائم، وأوضح أن أسماءهم الرسمية ستكون محمد وكريم وبلال وياسين للأولاد وحبيبة وإسراء ودعاء للبنات، وقال إن القبائل البدوية التي ينتمي إليها تمنح كل مولود اسمين، أحدهما للشهرة والثاني للتدوين في الأوراق الرسمية. ...