كنا فين وبقينا فين ورايحين فين

[le prince]

الصحف المصرية والعربية

صباحكو ثورة يا مطاريد

الناس كلها فرحانه فى الشوارع والبلد بقى فيها حالة سعادة غير عادية
الكلام ده عند الاغلبية طبعا ومش بنعمم لان فيه ناس زعلانة

بس اللى فرحانين اوى دول لو سالت كتير منهم انت فرحان ليه هيقولو عشان حسنى مشى

وكاننا طلعنا الثورة دى عشان احنا فيه تار بايت بينا وبينه مش عشان مصلحة مصر
وكاننا لما مشينا حسنى بقينا دولة عظمى فى يوم واحد وحققنا كل اللى احنا عايزينه

انا واحد من الناس مكنتش متابع سياسة اوى قبل 25 يناير
وزى مالناس كلها شايفة دلوقتى
الكلام فى السياسة بقى على لسان كل واحد فى الشارع
الناس كلها بتتكلم عن الحريات والديموقراطية والدكتاتوريه وتعدد الاحزاب والراديكالية
وانا مش باقصد طبقة معينة من الناس
حتى ابسط الطبقات بقت بتتكلم فى كل حاجة

وده خلانا نلاحظ ان الشعب المصرى كان مغيب سياسيا تماما

وبقى بييجى فى دماغى حاجات استغرب احنا ازاى كنا شايفينها عادية

يعنى مثلا كان ممكن تسأل واحد انت معاك كارنيه الحزب ولا لا؟
مستحيل يرد عليك يقولك تقصد حزب ايه؟
لان هو حزب واحد

ولو سألنا اى حد ايه هى مهام رئيس الجمهورية هيقول انه رئيس كل حاجة فى البلد

وان مجلس الشعب وظيفته الموافقه على القرارات اللى تاخدها الحكومة

وتلاقى ناس كتير تقول حسنى مبارك محدش يقدر يمسك مكانه
وكأننا 85 مليون حمار وبنى ادم واحد اسمه محمد حسنى مبارك

وبرده كنت تلاقى الناس تقول ان الظابط بيعزب تجار المخدرات و الارهابيين
بس الناس المحترمة لا
وكأن حقه 100/100 انه يعزب الخارجين عن القانون ويبقى بكده بيخدم الوطن

واللى جاننى انى ليا واحد صاحبى مغيب تماما

بيقوللى ان الداخلية كان لازم تبقى جبارة كده عشان الارهاب والاخوان ميبوظوش البلد

وان الراجل ده عملنا انتعاش اقتصادى جبار بس احنا اللى مش فاهمين يعنى ايه معدل النمو3%والناتج الاجمالى مش عارف كام والحاجات اللى هما كانو مصدعينا بيها

بيقولى طب انت كنت عايزه يعمل ايه للتعليم؟
يدخل كل فصل ويشوف المدرس بيشرح ولا لا؟

ويدخل كل مستشفى ويقول للدكتور متكتبش دوا غلط

يعدى على الموظفين يقولهم متخدوش رشوة والنبى

ولما اقوله احنا اتخرجنا وكنا مش فاهمين حاجة
يقولى ماهو فيه دكتور بيشرح وفيه كتاب بس انت اللى مبتزاكرش
قولتله طب ليه بانجح مدام مبزاكرش
يقولى يعنى انت زعلان عشان نجحت واتخرجت وسافرت واشتغلت
دانت ناكر للجميل اوى يا اخى

شوفو من كتر يأسه من النظام شاف الحل اننا منعتبش على النظام ونسيب الناس لضميرها


اللى اكتشفته ان الراجل ده بوظ عقول الناس منه لله

الناس مش فاهمة ايه الغلط فى اللى فات ما عدا السرقة طبعا
ومش فاهمين ازاى مصر ممكن تتقدم وتتحسن فى اللى جاى ماعدا ان المرتبات هتزيد
ومش فاهمين الاعتصامات والمطالب الفئوية دى ممكن تدمر ايه فى البلد


يعنى ببساطة فى ناس كتير مش فاهمة احنا كنا فين وبقينا فين وعايزين نروح على فين

انا طولت عليكو معلش بس انا مضايق من الموضوع ده اوى بصراحة

عشان كده انا قلت افتح الموضوع ده

عايزين نناقش اوضاع البلد واحد ورا التانى ولما نفتح موضوع نتكلم فيه لحد منخلصه ونتكلم عن اللى كان بيحصل فى الجاهلية اللى احنا كنا عايشينها
وعن الصح اللى المفروض يتعمل ونحققه ازاى

مواضيع زى مهام المناصب دى و سلطاتها

منصب رئيس الجمهورية
الحكومة
مجلس الشعب
القضاء
المحليات

ومواضيع زى

التعليم
الصحة
تعدد الاحزاب
الاستثمار

اختارو موضوع نبدأنتكلم فيه عبال مارجع من الشغل بالليل

سلام مؤقتا يا بشر