هاملتون لأول مرة

[Eng Hesham]

الصحف المصرية والعربية

بارك الله لك فيما رزق

مستنيين الحكاوى يا دكتور بس ياريت تكون بالتواريخ على قدر الامكان

 

 

[محمد منجي]

حمد الله على السلامة.... يا دكتور....

شوقتنا....

 

 

[مييزو]

حمد لله ع السلامة يا دكتور ورحلة موفقة يعنى تجربة حضرتك فيها شبه كبير من تجربتى اللى إن شاء الله هعرضها لما أعمل اللاندنج وأخلص إجراءات الهجرة على خير بإذن الله

على فكرة مقصدش أخطف الأضواء من حضرتك ههههههههههه
أنا قصدى عشان نفيد الجميع بس لو ممكن ياريت حضرتك تعرض لنا التواريخ عشان نعيش جوه الأحداث ومتابع بإهتمام الموضوع الشيق ده

 

 

[shampania]

حمد الله على السلامة يا دكتور
بداية جميله ومشوقة
وربنا يسهل وكل واحد تتيسر اموره على خير

تسجيل متابعة في اول الصفوف (الصف اللى رايح من الخليج ههههه)

 

 

[Clinical chemist]

ما شاء الله

أنا دخلت أنام وصحيت الصبح على كل الردود الجميلة دى

شكرا لكل من بارك لى وأهتم بموضوعى

أنا والله غرضى الأساسى أفيدكم بتفاصيل ربما لم تذكر من قبل فى هذا المنتدى

وأتمنى لكم كل الخير فى القادم

بس لو عايزين نصيحتى .......أرموا الأمور على الله وسيبوه يختارلكم

لم يكون نفسك فى موضوع ادرسة كويس الأول ثم أستخير الله ثم أسع وخذ بالأسباب......وتأكد تماما أن ربنا هيوجهك غصبا عنك للى فيه الخير
وعمرى ما فوضت الأمر لله وخسرت.......أبدا

 

 

[Clinical chemist]

بخصوص التواريخ

أرسلت الملف 20/11/2010

سحب المبلغ 29/11/2010

السفر للسعودية فبراير /2011

PER 28/2/2011

والباقى هقوله فى سياق الموضوع

المهم

قلتلكم أنا أن الأمور كانت زى الفل والأمن مستتب وبقيت رئيس قسم والعائلة معاى والبلد حلوة......يا نهار أبيض أمال فيه أيه بقى.....ده أيه الافترى ده.

أول صدمة كانت المدارس......كل ما أروح مدرسة أسجل لأولادى ألقيهم كاتبين المدرسة الفلانية الدولية......أدخل المدرسة أشوف الدولية دى أيه ألقيها خرابة......أقسم بالله أن معظم مدارس مصر الحكومية أنظف منها.....طيب دولية ليه يا جماعة.....أه أصل بتدرس مناهج غير سعودية.....كتب مزورة ومحطوط عليها علامة كمبريدج....مدرسين وطلبة هنود.....مبانى قذرة......حزنت قوى وأنا بضطر أسجل أولادى فى مدرسة من دول غصب عنى عشان نقضى باقى السنة. لكن سدة النفس الحقيقية حصلت أول يوم دراسة لما لقيت سواق الباص الهندى بيقولى هو ابنك الصغير فين أصلى مش لاقيه عشان اروحه.......متخيلين الرجل ده بيقول أيه؟؟؟
سبت الكليه وجريت على المدرسة وكان ليها بابين كنت هادخل من باب وربنا ألهمنى أدخل من الباب التانى عشان ألاقى أيه......أبنى الصغير 4 سنين واقف فى الشارع قدام المدرسة بيسأل واحد يروح ازاى......كل مافتكر الموقف ده أبكى......حضنته ودخلت المدرسة .....سألت على مكتب المدير السعودى ورزعت الباب وعملت كل ما يمكن أن تتخيلوه .....يافشلة....طفل صغير يطلع من المدرسة للشارع أزاى دى متحصلش فى أصغر حضانة عندنا فى مصر....وسحبت ملف أولادى الأتنين وأضطريت أقعد أبنى الصغير فى البيت والكبير دخلته مدرسة فيها الرمق (علم مفيش بس فى مبانى حلوة)......دى كانت بداية سدة نفسى تجاه البلد.....ده أنا أبنى كان هيضيع.

 

 

[Clinical chemist]

تانى سبب

الكفيل ونظام سحب الجواز....لا وأيه الجواز مش بيتحفظ فى نفس الكلية....لا عيب.....بيحفضوا جوازات كل الكليلت فى الادارة العامة ببريدة (القصيم)

طيب يعنى لما يحصل حاجة لا قدر الله للأهل فى مصر وعايز أنزل يبقى أيه الحل .......لا دى بسيطة خالص يا راجل متشيلش هم .....وقت ما تعوز الجواز أكتب طلب وأحنا نبعته لرئاسة الكليات فى الرياض وهم يبعتوه للأدارة العامة ببريدة وبعدين بريدة تبعت للرياض وبعدين الرياض تبعت للدمام ومع السلامة
يعنى فيها 10 أيام من ساعة ماقررت اسافر لحد ماسافرت فعلا.......طيب واسافر ليه ...هو فى حاجة طارئة بتستمر 10 أيام

وأدركت ساعتها أنى مسجون فى السعودية مش بشتغل فى السعودية - أنا عارف أن بعض الجهات فى السعودية أسهل من كده بكتير بس ده كان الوضع عندى- وأزدادت الغصة فى حلقى.

 

 

[waleedelrefiey]

يا سلام يا دكتور
ربنا يعينك
بس القانون بيقول ممنوع الكفيل أو المؤسسة تحتفظ بجواز سفر العامل
بس بردك ملهوش لازمة
يعن لا مؤاخذه تبله و تشرب ميته
عشان لازم هم الي يخرجولك بردك
يعني المشكلة مش الجواز معاهم أو مع سيادتك
المشكلة هم الي لازم يخرجوك

ربنا معاك يا دكتور و يعينك
و نشوف بأه عملوا معاك ايه بعد ما مسكت القسم
ده كان يوم ما يعلم بيه الا ربنا
مصري يمسك قسم ليه أن شاء الله ؟
طيروك أمته يا دكتور من رئاسة القسم؟

 

 

[Clinical chemist]

نيجى بقى للسبب التالت والآخير والنهائى والحاسم لتركى للسعودية بعد عام واحد فقط وهو
الاستغلال

أنا أول ما جيت....كان المطلوب - زى ما بيحصل مع كل الاكاديمين فى العالم - أخلص محاضراتى وأقعد فى مكتبى ساعات معينة لمتابعة الأبحاث وشكرا ولو فى يوم مفيش محاضرات مش لازم أروح الكلية.....جميل؟

بعد 6 أشهر تحول النظام من نظام كلية محترمة الى نظام مدرسة ابتدائى.....لازم أجى كل يوم من الساعة 8 الى 4 حتى لو معنديش حاجة .....وأيه بقى......اختراع جديد....حصريا ....ولأول مرة فى العااااااااااااااالم ......دفتر حضور وانصراف يعنى أدخل الصبح أقف فى طابور مع موظفين الكلية - مع احترامى والله للموظفين وانما العلماء لا يعاملون بهذة الطريقة - وأوطى عشان أمضى قدام السكرتير لحسن يكتبنى غياب وينقطع عيشى.....كل عيش يا سيد

ولأنى سبت مصر عشان أنا مش بدور على أكل العيش وأنما الاحترام........ولأنى تحولت من عالم الى موظف.....ولأنى أجبرت على رئاسة القسم بدون زيادة فى المرتب......لكل هذة الأسباب ......أتخذت القرار بأن تكون هذة السنة هى آخر سنة لى بالسعودية وقلت أنا أكمل العام الدراسى وأتكل على كندا
يعنى كان تخطيطى أبقى فى كندا أكتوبر 2012.......الله أمال أنا فى هاملتون أزاى دلوقت ؟!

ده بقى فيلم الأكشن والرعب لأول مرة معا

أنتظرونى بعد الفاصل هاجيب حاجات من السوبرماركت وراجع (يا خراب بيتك يا محمد)
واعدكم بمزيج من المتعة والاثارة والتشويق

 

 

[canada wait me]

اقتباس المشاركة الأصلية كتبت بواسطة waleedelrefiey يا سلام يا دكتور ربنا يعينك بس القانون بيقول ممنوع الكفيل أو المؤسسة تحتفظ بجواز سفر العامل بس بردك ملهوش لازمة يعن لا مؤاخذه تبله و تشرب ميته عشان لازم هم الي يخرجولك بردك يعني المشكلة مش الجواز معاهم أو مع سيادتك المشكلة هم الي لازم يخرجوك ربنا معاك يا دكتور و يعينك و نشوف بأه عملوا معاك ايه بعد ما مسكت القسم ده كان يوم ما يعلم بيه الا ربنا مصري يمسك قسم ليه أن شاء الله ؟ طيروك أمته يا دكتور من رئاسة القسم؟

منتظرين الباقى يادكتور وبالتوفيق

مفيش فائدة فيك لمض وسابق الاحداث
مش قلتلك متتكلمش طول ما الكبير وجود