Arabic Discussion Forum with a Special Interest in Travel and Immigration

SindBad · 12th November 2011, 08:20 PM

موال يا دنيا

يا دنيا مالك كده
واخدنا ورا كده ليه
ليه ياياياي يااا دنووووويا

انا بقول يا دنيا مالك كده
وخدانا ورا كده ليه
يارب فك الضيق
هات الفرج بعديه

يا دنيا حلوك مر
يا دنيا حلوك مر
والشهد مررتيه
ليه ليه يا دنيا
يا يا ياااااااا دنيا

يا دنيا ناسك سمك..
بحرك غريق كده ليه
كبيرنا ياكل صغيره
ولا يحنش عليه
كلك حيتان يا دنيا
أخرة ده كله ايه
ليه ليه يا دنيا
يا يا ياااااااا دنيا

يا دنيا ليه الولد
رفض طاعة ولدييه
والأخ من أخوه انجرح
ومن ظلمه جار عليه
والجار يجور وينسى
وصايا النبي ليه
والصاحب يصاحب
ولا مصاحب إلا
لمصلحة لييه
ليه ليه يا دنيا
يا يا ياااااااا دنيا

يا ظالم الناس صبرك
ده لكل ظالم نهاية
وبص لغيرك
وخدلك م الزمان آية
وارجع لربك وتوب
قبل نهاية الحكاية
ده يوم الحساب هتنسأل
ده كله عملته
لييييييييييييييييييييه
ليه ليه يا دنيا
يا يا ياااااااا دنيا

لولا · 12th November 2011, 08:20 PM

اقتباس

المشاركة الأصلية كتبت بواسطة SindBad


	ميت خروف يدبحوا اكراماً لجيتك حدانا يا لولا يا زينة البنات الشعر الحملنتيشي ده ... نكتة بس مسجوعة فكاهة حاجة زي كده

تصدق انا لو قعدت لبكره مش حعرف انطق الكلمه دى كيف اذ حيث بسا اكتبها

اما انتو الشعرا الحلمنتشين عليكم كلاااااااااام .. اعجوبه يا ولداااااااه

SindBad · 1st January 2012, 08:03 PM

اقتباس

المشاركة الأصلية كتبت بواسطة لولا


	تصدق انا لو قعدت لبكره مش حعرف انطق الكلمه دى كيف اذ حيث بسا اكتبها اما انتو الشعرا الحلمنتشين عليكم كلاااااااااام .. اعجوبه يا ولداااااااه

نعتذر لولا هانم عن التأخير
مسجوعة من السجع
سجع يسجع فهو ساجع ومسجوعة
منورة يا افندم

SindBad · 1st January 2012, 08:11 PM

عوكاشااااااااااااا
عوكاشااااااااااااا
عوكاشااااااااااااا
عقله تاه عقله تاه
عوكاشاااااااااااااا
خلاص اتجنن
يا ولداه يا ولداه

عوكاشا لاهطل
عمال يبرطم
يصحى يعظم
اعلامي اهتم
ولا بيندم
وقام مرفس
وقلب عشااااااه
عوكاشااااااا
عقله تاه عقله تاه
عوكاشااااااا

بيحب البط
وينط ينط
ونازل عط
وراح متحط
وعقله شط
وصرخ عباسااااااه
عوكاشاااااااااااااااااا
عقله تاه عقله تاه عقله تاه

أكمل ولا كفياه كده .....

Eng.Fathy Elbanna · 2nd January 2012, 07:08 PM

السلام عليكم ورحمة الله وبركاته
هل لى أن أقدم لكم شاعر العامية بحق
الشيخ أمين الديب

_____________________

[COLOR="rgb(255, 0, 255)"]نبدأ بالقصيدة الاولى بعنوان (((( أخر كلام ))))[/COLOR]

___________________________________________

بعد مابقلع هدومى

قبل نومى

لازم أقرا كام مقاله

نرفزونى..سخنونى

حفزونى..إنى أكتب

عن ولاد الكلب

والسفاح شارون

قول سهرت

نمت..بعد الفجر ما إدن

والعيال بيقومونى

صحصحونى

قمت مفزوع من منامى

هجت فيهم

جت مراتى قالت لى..مالك

إيه جرالك؟

ليه بتشخط فى العيال

قلت باحلم

كنت باحلم إنى ميت وانفزعت

انبسطى..؟

كشرت وبسرعة قالت:

إيه دا أصله. طب وماله

يستحق الموت وأكثر

اللى يهرب من عياله

كنت فين م المغربية؟

تيجى بعد الفجر مادن؟

إنت فاكر إن دا ح يخيل على

شعرإيه؟

واللا إيه بتهببه.. وتقول قضيه

هى فين هى القضيه؟

هم يعنى كلمتينك.. اللى حى يحلوا

القضية؟

هيه ناقصة

وإحنا مالنا

ما انت شايف . كله خايف

والمدافع همسه حايره..عالشفايف

وانت عارف

الصهاينة ناس قويه.. ومفتريه

واللى أدهى من داكله

لما يبقى الكل نايم.. وانت قال تكتب

قصيده!!

عن ولاد الكلب والسفاح شارون

أبقى نايمه!!

أسمعك بتقول شارون؟

من غير سلام ولا يحزنون!

انت فاهم إنه ح يهمه الكلام؟

واللا دول عايزين سلام؟

واللا ح يخاف من كلام؟

هو همه من كلينتون. واللابوش

واللاهمه من باراك.. واللاهمه من...!

واللا عايز تبقى شاعر؟

واللا من أبنود جنابك؟

واللا عايز تقديريه؟

قلت طبعاً

أى شاعر يستحق التقديريه

يستاهلها عن جداره

مش خساره

ليه يا خويا

هو طلع إسرائيل؟

واللا عمر فى الصحارا

حاجه تانيه!!

والقطاع العام بيخسر

كان منع عنه الخساره؟

واللاسكان المقابر

كان بنالهم كام عماره؟

واللاشغل ألف عامل

أو منعهم من الدواره؟

واللا وزع عالغلابة

ألف طن من الدقيق

واللاحتى كام شيكاره؟

فوق لروحك

هو خدها عن وهيبه

والأغانى لعبد حليم

مش عشان حل القضيه

القضية هى.. هى

واحنا فى الخيبه القويه!

قلت جاهله.

إنتى جاهله

انتى فاكره الشعر ساهل؟

دا اللى ينكر فضل شاعر

يبقى جاهل

قلبك ابيض

مش حترجع الا لما يحبسوك

عالكبر ويبهدلوك

انت بتقول يا سادتنا يا قادتنا..

ارفضوا تهديد أمريكا والتحيز لليهود؟

طب ولو زعلت أمريكا

طب منين حيأكلونا؟

والحكومة نفسها بتمد إيدها

ويقولوا لهم شحتونا!!

انت عايز يحبسونا ؟

لوعايزنا نقب اكتب

حط همك فى الأغانى

فطر الشعب بأغانى

نيم الشعب باغانى

والأغانى..

بيبعوها بالدولار الأمريكانى

واللا يعنى جت علينا

واشتهينا الفقر.. تانى؟

عيش وهيص

شجع الأبطال ولادنا

اللى رفعوا راس بلدنا

مسخروا أولاد ناميبيا

واللا ليبيا.

عيش وهيص..

انت يعنى كنت غاندى..؟

واللا حافظ واللا شوقى؟

واللا بيرم أو جاهين؟

مانت طول عمرك بتكتب!

حد سمعك؟

قول لى مين؟

والا كام واحد بيحضر

فى النداوى ف أى حته

حتلاقيهم..خمسه سته!

أما لو تكتب أغانى

تبقى نجم ولك سماك

واللى جاى يطلب لقاك

واللى يتصور معاك

والصحافة والإذاعه

والبرامج..

كله ح يسجل معاك

زى شعبان عبدالرحيم

واللا شوف جمهور حكيم

تبقى شاعر زى صاحبك

كل واحد يرضى عنك

الحكومه والصهاينه والخلايجه

والتوانسه

والاجانب والذوات

بالخصوص صنف البنات

هو دا آخر كلامى

تمشى بيه.. أو تفارق من سكات

ميت يمين ماتقول قصيده

لاملا كل الدار صوات

واللى يسأل تانى عنك

راح اقول له غار ومات!

basant mohammed · 29th March 2017, 09:04 AM

ممكن اى حد من اللى بيكتبوا زجل يكلمنى عشان مش عارفة ابعت ماسج لحد porfavor

sayedsaad · 12th March 2018, 12:04 AM

حلمنتيشي
حماده المزين قرر يهاجر
طول عمره طموح بيحب يعافر
ويتعب ويشقي ليحقق مراده
حماده المزين بيعشق بلاده
والجوع ده يهون وسط اهله وصحابه
طول عمره نفسه يشوفها وسط العرب واسياده
تدي اكتر ما تاخد
خيرها مغرق بلاد
حماده المزين مكنشي مبين حقيقه شعوره
وسافر حماده وساب الصحاب
وسنه ورا التانيه ولا عاد مبينهم جواب
ولما امه ماتت ولا صلاش عليها
سابت في نفسه حاجه معرفش يدويها
وحماده المزين مكنشي مبين حقيقه شعوره
posted via mobile device

مواقع هامة وإعلانات نصية
البحث فى القرآن الكريم	القرآن الكريم - الشيخ البنا	الصحف المصرية والعربية	المصحف المرتل المنشاوي	تلاوات نادرة لمشاهير القراء	Pass Medical Exams

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
سحل طبيب مصرى بالسعودية	سهى يافا	موضوعات عامة ... موضوعات خفيفة ... منوعات	21	17th November 2011 02:45 PM
امثال حلمنتيشي	yasovinas	خمسة فرفشة	73	22nd September 2010 03:03 AM
قارئة الفنجان ..يا شعبي شعبي..	بنت شعنونة	موضوعات عامة ... موضوعات خفيفة ... منوعات	6	2nd May 2010 08:50 PM
بنتي بتقولي .. يا شعبي شعبي!!!!!!!!!	بنت شعنونة	الأسرة والطفل	9	26th February 2010 05:42 PM

Arabic Discussion Forum with a Special Interest in Travel and Immigration

Immigration to Canada, Australia, and New Zealand

Egypt and Middle East Politics, History and Economy

Jobs in Saudi Arabia, USA, Canada, Australia, and New Zealand

أدب وشعر وقراءات متنوعة

زجل ... شعبي... مصري ... حلمنتيشي