الثورة دى اتصورت ... نذيع ؟؟

[tafshan]

الصحف المصرية والعربية

نقول الاول الجمله السخيفه المكرره اللى كل الناس بتقولها .. متشكرين يا مجلس يا عسكرى انك حميت الثوره و الخ .. بس حماها من ايه ؟؟

المجلس العسكرى عندما انعقد بصفه مستمره يوم 11 فبراير و القى خطاب التنحى الشهير بلسان الرجل اللى واقف قدام الراجل اللى وراء عمر سليمان اتفق مع الثوار ضمنياً على ان يقوم بادارة البلاد لمدة 6 اشهر الى حين اعادة انتخاب مجلس الشعب و انتخاب رئيس جديد و تعين حكومه جديده ..

المجلس العسكرى لم يحمى الثوره الا من شره ... يعنى على رأي الاعلان كده اول ما لقى الثوره راح قايل هووووووووب و ما رضيش يضرب نار على الثوار .. ليهههههه ؟؟؟

بحسب كلام المشير طنطاوى ماحدش طلب منه يضرب نار .. يعنى ما عملش اي حاجه من اللى كنا بنتخيلها .. حسنى تنحى من تلقاء نفسه و ما طلبش من حد يضرب نار و المجلس قرر انه يدير البلاد لغاية ما تتعمل الانتخابات مع نفسه كده .. و احنا وافقنا و احتفلنا و رجعنا البيت و كل واحد حاطط في بطنه بطيخه صيفى ..

و لو مشينا وراء الاحداث ح نلاقى ان المجلس كان مصر على بقاء الوضع على ما هو عليه .. التغيرات الجوهريه كانت دائماً بتحصل بعد ما ترمومتر التحرير يعد مليون .. يعنى من الاخر لو كان الناس قررت تركب عجلة الانتاج و تسيبها من التحرير كنا ح نلاقى شفيق لسه رئيس وزراء و امن الدوله لسه في اماكنهم و المحليات لسه في اماكنها ..

طب ما شرف قلب على شفيق بس من غير بلوفر .. و امن الدوله كل اللى عمله انه غير اليافطه .. اما المحليات فمش فارقه .. نعتبرهم عملوا اضراب ..

فاضل ايه ؟؟

محاكمة مبارك ؟؟؟ برضوا جت بعد ما اتملى التحرير .. و قالوا ح نصور و نذيع .. و بعدين ؟؟؟ بخخخخخخخخ

وقفوا الاذاعه و تحول كل الشهود لشهود نفي .. لدرجة انى شاكك ان مبارك ح يرفع على مصر في آخر المحاكمه قضيه و ح يطالب بالتعويض كمان !!!!!

فاضل ايه ؟؟؟؟؟؟؟؟؟؟؟

اه .. التوقيت الصيفي .. 800 واحد ماتوا عشان يتغير التوقيت الصيفى .. والله نتيجه مش بطاله !!!

ده الوقت طبعاً الناس قرفت من الثوره و اللى عملوها عشان اللى بيسير امور البلاد مش بيسير حاجه خالص .. يعنى الاسعار ضربت و الشارع بقى سداح مداح للي عايز يعمل اي حاجه .. الميدان مبقاش بيلم مليون زي زمان .. خلاص المولد اتفض .. قفل بقى على القنوات اللى بترغى كثير دول و قفل على الجرائد و الكتاب ..

بس برضوا احنا اللى غلطانين .. هو احنا كنا متخيلين ان المجلس العسكرى ح يسمح انه يجي رئيس جمهوريه غير عسكرى .. و كمان يعين حكومه .. و يعين وزير دفاع ؟؟

 

[abysaleh]

طب ذيييييييييييييييع







































يعني نقول مبروك للفلول واللا ايه

 

 

[abysaleh]

طب الحل ايه؟؟؟

الجميع أجمع على ان الانتخابات هي الحل

طب وبعدين.... نعمل ايه في تزوير الارادة ؟؟؟؟مش تزوير الانتخابات

 

 

[le petit toto]

على فكرة الناس كلها متضايقة بس يؤسفنى انى اقول ان الناس اللى في الاربعينات والخمسينات وما فوق اول ما يقابلوا حاجة سلبية مثلا زى المتسوليين اللى في المترو يقولوا ادى اللى عملته الثورة وادى اللى اخدناه من الثورة والنهاردة كانت هتقوم خناقة في المترو بسبب الموضوع ده ما بين مؤيد ومعارض للثورة بس انا شايف ان الناس ما بقتش متفقة على حاجة واحدة زى الاول وده مؤشر مش مبشر

 

 

[Gerrarpool]

المجلس حمى الثورة من الوصول للحكم لان الكرسي مغري وبيلزق وممكن يخليك تعمل جرائم وكوارث وحاجات كتير غلط علشان تحافظ عليه

علشان كده المجلس قال بيدي لا بيد الثورة

 

 

[poza]

ذيع خلى الناس تنبسط

 

 

[aymanology]

مصر :: مارس 2012 ♥
.
.
... .
مبارك على القنوات المصرية مباشرة في كلمة هامة للشعب: ♥

ايها الأخوه و الأخوات

ها أنا بعد إثبات براءتي من كل التهم أتحدث إليكم حديث الأب لأبنائه حديثا من القلب ♥

لقد تخليت مؤقتا عن السلطة و فوضت المجلس العسكري

وذلك لتحقيق أعلى درجات نزاهة التحقيقات معي

أما الأن وبعد البراءة فكل واحد أولى بشعبه .♥. ولا إيه

وعلى الرغم أنه ما زال يحز في نفسي ما لقيته من أبناء شعبي لكن برضه المسامح كريم

لذا أعلن انتهاء تفويضي للمجلس العسكري واستلامي مقاليد البلاد من تاني

واحنا في النهاية ملناش غير بعض ♥

ودي كانت ساعة شيطان وأهي راحت لحالها

و الله الموفق و المستعان

 

 

[إكرام يوسف]

اقتباس المشاركة الأصلية كتبت بواسطة le petit toto على فكرة الناس كلها متضايقة بس يؤسفنى انى اقول ان الناس اللى في الاربعينات والخمسينات وما فوق اول ما يقابلوا حاجة سلبية مثلا زى المتسوليين اللى في المترو يقولوا ادى اللى عملته الثورة وادى اللى اخدناه من الثورة والنهاردة كانت هتقوم خناقة في المترو بسبب الموضوع ده ما بين مؤيد ومعارض للثورة بس انا شايف ان الناس ما بقتش متفقة على حاجة واحدة زى الاول وده مؤشر مش مبشر

معلش بقى.. ما تقدرش تعمم ناس كتيييير من اللي في الأربعينيات والخمسينيات وما فوق فاهمين كويس وعارفين ان مافيش ثورة بتسقط نظام بالكامل في 18 يوم.. وعارفين ان اللي حصل ده الجولة الأولى من الثورة ولازم يكون فيه جولات تانية وتضحيات تانية لأن اللي بيحكم دلوقت لسة من بقايا النظام اللي سقطت رموزه..
المشكلة بقى.. واللي يغيظ كمان إن الشباب اللي همه المفروض يواصلوا الثورة ولسة قدامهم نضال طويل .. بعضهم (عشان ما نعممش) ماعندوش طول نفس.. وكان عايز الثورة تقوم من هنا ومبارك يغور من هنا.. وهوبا يلاقوا وظايف ويلاقوا سكن ويتجوزوا ويعلموا ولادهم أحسن تعليم ويتعالجوا أحسن علاج.. وفيه منهم كتير ماعندوش طولة بال ومش عايز يضحي.. وعايز ناس تانية تنزل تناضل وتستشهد وتصلح البلد على مزاجه هو.. يا إما يهاجر ويشوف مصلحته هو.. وبرضه يقعد يعدل وينتقد الشباب اللي قعد في مصر واستحمل وجع القلب عشان ماعملش الثورة بالطريقة اللي تريح سعادته

 

 

[Prof]

حسب إحصائية مش عارف مين اللي اتقالت مش فاكر امتى. الشباب أقل من سن 30 سنة يمثلون نسبة 60% من الشعب، مش كانت كده برضه؟

 

 

[Dr.Samo]

اقتباس المشاركة الأصلية كتبت بواسطة Prof حسب إحصائية مش عارف مين اللي اتقالت مش فاكر امتى. الشباب أقل من سن 30 سنة يمثلون نسبة 60% من الشعب، مش كانت كده برضه؟

دا صحيح ...انا فاكر برضه إنى سمعت الإحصائية دى من أحمد زويل فى صالون الأوبرا
وفاكر حسنين هيكل كان بيقول على المعلومة دى ان مصر شعبها .شعب (شاب) ممكن فى فترة قصيرة يعمل إنجازات عظيمة خصوصا فى مجال النهضة والتصنيع .
زمان كان فيه صديق ايام الجيش قالى ان الشعب المصرى من سيكولوجياته انه بيحبط بسرعة
وحصل نقاش قوى بينى وبينه ايامها وقلتله لو المصرى كدا ماكنش انتصر فى 73 فقالى دى حالة إستثنائية
هو أنا ليه حاسس بنبرة تشاؤم فى التوبيك هنا
أولا : من رابع المستحيلات ان يتولى حكم مصر حد من الجيش .... خلصت (تعلمت من رأس الذئب الطائر)
ثانيا : هو الثورة هى ميدان التحرير بس ...لأ طبعا الثورة اللى بيحصل فى الجامعات والنقابات والنوادى وكل مكان فى مصر بيتحط فيه خطة جديدة لوجوه جديدة وحياة جديدة .... هى دى مش ثورة .
الثورة أن المصرى بقى له كرامته وعزته .... وأن بقى قادر يرفع راسة فى كل مكان يروح له .... ماهو دا من نتائج الثورة برضه .
الثورة اللى خليتنا النهاردة بنحلم ببرلمان متزن ورئيس بيحب البلد على الأقل أول أربع سنين وخايف ليغلط .
تفتكروا ممكن حد يرجع يفكر قبل 10 شهور لما كنا بنقول جمال جاى ولا لأ ؟؟؟!!!
يا جماعة مصر كبيرة وعملت حاجة كبيرة وشعبها عظيم ....
المشكله إن الناس كانت بتحلم حلم كبير ..... وأحنا بننسى ان الحلم ده خصوصا له مدته .
ماينفعش ننام يوم 11 فبراير ... نصحى 12 نلاقى مصر السويد أو ألمانيا أو حتى تركيا مثلا
لو عايزين نقيس يبقى نشوف البلاد دى بدأت المشوار بقالها كام سنه
لسه .... لسه .... مصر مش هتتغير بين يوم وليلة .
كلمة أخيرة للعزيزة إكرام هانم .... اللى بيهاجروا عشرات أو مئات وهجرتهم ممكن يكون فيها فايده للبلد (الموضوع دا فيه 20 موضوع فى المطاريد
) ، فياريت حضرتك لا تلهبى ظهروهم بكلماتك القاسية (وأكيد من جواكى بتتمنى بقاؤهم ... بس فيه ناس فعلا مش قادرة )