هل تقرأ بنود أى عقد قبل التوقيع عليه؟

[حشيش]

الصحف المصرية والعربية

عندما أذهب للتعاقد على أى خدمة من الخدمات (عقد جديد للموبايل أو تغيير شركة الكهرباء أو الغاز ... إلخ) يطلب منى التوقيع على العقد الذى غالباً ما يحتوى على مئات البنود كلها مكتوب بالخط الصغير ... يناولك البائع قلمه ويشير إليك إلى المكان الذى يجب أن أضع توقيعى فيه وغالباً ما يضع علامة x عند الخانات التى ينبغى أن ألطع فيها إسم الكريم ... لم أفكر مرة فى قراءة البنود ببساطة لأن قرأتها سيستغرق وقتاً طويلاً جداً ده لو فهمت مدلولات البنود أصلاً ... سؤالى هو: هل ينبغى قراءة بنود أى عقد بالكامل قبل التوقيع عليه؟ ... وهل تفعل ذلك أنت عند التوقيع على عقود البيع والشراء؟

 

[شينكاوي]

محدش بيقرا قبل ما يوقع ودي مصيبة خصوصاً عند فتح الحسابات البتكية ودي كارثة لأن في شروط واحكام بتبقي مكتوبة بخط صغير وهي طبعاً ضد العميل وبتدي البنك حقوق منها قفل الحساب وخصم اي عمولة وبدون إبداء اسباب كمان للعميل

 

 

[حشيش]

اقتباس المشاركة الأصلية كتبت بواسطة MOHAMED HASSAN محدش بيقرا قبل ما يوقع ودي مصيبة

ودى حلها إيه يا شينكو؟ ... لو الواحد طلب من الموظف يديله وقت على ما يقرا بنود العقد حيقول له ( خد العقد إقراه فى البيت براحتك وابقى فوت علينا بكره)

 

 

[بنت شعنونة]

اسكت يا حشيش
موضوع الوقت دا مصيبة
عشان انا ببقى بقرأ العقد زي ما اكون بعمل حاجا غلط ومتلهوجه وممكن اقراه وما اعرفش اقاره يعني اكني مش شايفاه اصلا

الراجل صاحب الشقة اللي انا مأجرة منه كل اول سنة يقرفني بالعقد ولما اقعد اقراه "خصوصا انه ما بيرضاش يديهوني اقراه لوحدي وامضيه القرد" عشان بيقى عامل كل مصيبة ومصيبة في كل عقد
ويفضل يتكلم وانا بقرأ عشان يسهيني وكل شوية خلاص خلاص

مرة من المرات لقيته مزود بند بيقول اني لو قفلت الشقة وماتواجدتش فيها لمدة شهر من حقه انه يفتحها ويدخل ويستفيد باللي جواها بدون الرجوع للقضاء

شفت الهنا



الحل..


تنح تعيش مستريح

 

 

[brain]

فعلا عقود البنوك و عقود الشراء بالتقسيط محدش بيبص فيها
و الواحد بيمضي على المغمض
و بيحس انه بيعمل ذنب لما يقرأ و ان اللي قدامه هيضربه
الحل
هو اللي قالته شانا
التصميم على القراءه حتى لو الموضوع اخذ ساعه
بالنسبه ليا انا اقرأ نوعين من العقود
عقد العمل
عقود البطاقات الائتمانيه مع البنوك - علشان عارفهم حراميه

 

 

[شينكاوي]

مش حرامية بس دوووول نصابين كماااان بس انسي لو قريت الشروط 20 مرة هتلاقي استخدام للجاركن علي خفيف ف الشروط والاحكام وبالتالي العميل هيدفع يعني هيدفع
الحل ان الواحد قبل ما يروح ياخد اي حاجة فيها تعاقد مع القطاع الخاص بالذات لازم يسأل وياخد فرصة في جمع المعلومات ولا مانع من الذهاب للمكان وبكل تناحة يقول للموظف ممكن تديني دقايق اقري العقد برا ويروح ف الوايتنج ايريا ويقرا العقد كويس ويشوف الشروط تناسبه ولا لأ في حالة عقود الإيجار يقول للمالك بكل بساطة ممكن تديني فرصة اقرا العقد ولو مرضيش يبقي فراقه ارحم لإنه هيبقي راجل لبط وعاوز يكروت الزبون وبصراحة هنا في الكويت الأمور واضحة إلا في حالات البنوك وما يعمل في نفس مجالها من شركات تمويل واجارة .

 

 

[مهاجرة]

انا بقراه بند بند

كل سنة اوقع على عقد مع المعهد اللي بشتغل فيه ومع ذلك بقراه العقد كل سنة واتأكد من درجتي الوظيفية والمرتب اللي حطوه بالعقد ولو شالوا بند من البنود اللي هي من حقوقي استفسر عليه، فين البند دة؟

 

 

[حشيش]

أنا فعلاً بحس إنى برتكب معصية لما بحاول أقرا بنود العقد قدام البياع خصوصاً البنود المكتوبة بخط صغير جداً لأنى بكون لازق العقد فى عينى ومش عارف أتنفس لأن الورق بيكون سادد مناخيرى

 

 

[الحاج فوزى]

لو عقد شقة عقد عربية ، يعنى عقد من العيار الثقيل .. طبعا سطر سطر وكلمة كلمة ..

لكن عقد موبيل وماشابه .. بصراحة مش بقرى .. لكن مش بوقع بتوقيعى .. خط فوق وخط تحت وخلاص ..