عبدالناصر ... تقرير خطبة 1961 للشعب ... أرقام وحقائق ومشاريع وواقع ... وأمل للمستقبل - منتديات المطاريد
بسم الله الرحمن الرحيم
وَهُوَ الَّذِي فِي السَّمَاءِ إِلَٰهٌ وَفِي الْأَرْضِ إِلَٰهٌ ۚ وَهُوَ الْحَكِيمُ الْعَلِيمُ (84) وَتَبَارَكَ الَّذِي لَهُ مُلْكُ السَّمَاوَاتِ وَالْأَرْضِ وَمَا بَيْنَهُمَا وَعِندَهُ عِلْمُ السَّاعَةِ وَإِلَيْهِ تُرْجَعُونَ (85) "الزخرف"

منتديات المطاريد | الهجرة الى كندا | الهجرة الى استراليا

 



BBC NEWS

    آخر 9 مشاركات
    ♥♥♥♥ عمار يا كندا ♥♥♥♥
    الكاتـب : Ehab Salem -
    يابلاش - الجنسية المصرية بـ 10 ألاف دولار!
    الكاتـب : حشيش -
    ماذا تفعل لو نسيت مفتاح السيارة بداخلها؟
    الكاتـب : حشيش -
    الجاسوس... الياهو بن شاؤول كوهين يهودي من...
    الكاتـب : د. يحي الشاعر -
    دعـــــاء يـــــوم الجـمعـــة ... تقبل...
    الكاتـب : kokomen -
    مقاطعة ساسكتشوان فاتحة التقديم Occupations...
    الكاتـب : Alashkar -
    منى عبد الناصر فى حوار صريح وجرئ مع عمرو...
    الكاتـب : د. يحي الشاعر -
    شركاء إنقلاب 3 يوليو - أين هم الآن؟!
    الكاتـب : حشيش -
    إعتقال زياد العليمى وقيادات إخوانية
    الكاتـب : حشيش -

    العودة   منتديات المطاريد > تاريخ مصر والعالم > تاريخ مصر

    تاريخ مصر

    عبدالناصر ... تقرير خطبة 1961 للشعب ... أرقام وحقائق ومشاريع وواقع ... وأمل للمستقبل


    الهجرة إلى كندا والولايات المتحدة واستراليا

    مواقع هامة وإعلانات نصية

    إضافة رد
     
    أدوات الموضوع انواع عرض الموضوع
    قديم 28th September 2008, 07:25 PM د. يحي الشاعر غير متواجد حالياً
      رقم المشاركة : 1
    شاهد على العصر
     






    د. يحي الشاعر has a reputation beyond reputeد. يحي الشاعر has a reputation beyond reputeد. يحي الشاعر has a reputation beyond reputeد. يحي الشاعر has a reputation beyond reputeد. يحي الشاعر has a reputation beyond reputeد. يحي الشاعر has a reputation beyond reputeد. يحي الشاعر has a reputation beyond reputeد. يحي الشاعر has a reputation beyond reputeد. يحي الشاعر has a reputation beyond reputeد. يحي الشاعر has a reputation beyond reputeد. يحي الشاعر has a reputation beyond repute

    عبدالناصر ... تقرير خطبة 1961 للشعب ... أرقام وحقائق ومشاريع وواقع ... وأمل للمستقبل

    أنا : د. يحي الشاعر




    عبدالناصر ... تقرير خطبة 1961 للشعب ... أرقام وحقائق ومشاريع وواقع ... وأمل للمستقبل

    عبدالناصر ... تقرير خطبة 1961 للشعب ... أرقام وحقائق ومشاريع وواقع ... وأمل للمستقبل

    لا تعليق لي .. سوي طلب التمعن في الأرقام ... والحقائق ... ومقارنة وقتئذ ... باليوم ... حتي نعرف معني ... الضياع ... الذي سببه التراجع ..

    سطور من تقرير جمال عبدالناصر للشعب يوم 23 ديسمبر 1961 ، خلال خطبته السنوية إحتفالا بعيد النصر في بورسعيد

    الأرقام والحقائق والمشاريع والواقع ... الأنجازات وأمل للمستقبل

    وأتسائل ... اين ذهب كل ذلك ... ولماذا تم التفريط في كل ذلك ... ؟؟؟

    د. يحي الشاعر




    اقتباس
    هذا - أيها الإخوة المواطنون - هو سبيلنا فى بناء مجتمعنا الجديد؛ المجتمع اللى حنبنيه النهارده مش هو المجتمع اللى حنورثه من الدولة العثمانية، أو مش هو المجتمع اللى احنا ورثناه من الاحتلال البريطانى؛ دا مجتمع بنبنيه علشان يلبى رغباتنا مجتمع بنبنيه علشان الـ ٢٧ مليون مصرى.. مش علشان ٥% من الـ ٢٧ مليون! أو ٣% من الـ ٢٧ مليون. دا المجتمع اللى هو بنقول عليه مجتمع الكفاية والعدل، الكفاية زى ما بنقول هى العمل.. هى الإنتاج.. العدل زى ما بنقول هو العدالة الاجتماعية.. القضاء على كل أنواع الاستغلال؛ الاستغلال السياسى، والاستغلال الاجتماعى، والاستغلال الاقتصادى.

    ماكانش ممكن واحنا بنعمل مجتمع من أجل الحرية الحقيقية والمساواة، وتكافؤ الفرص؛ أن نترك ما ورثناه.. أن يكون الغنى إرثاً والفقر إرثاً.. والسلطة إرث والنفوذ إرث، والذل إرث، والصحة إرثاً والمرض إرث.

    دا المجتمع القديم؛ كنا عايشين فى مجتمع إقطاعى قبل الحرب العالمية الأولى، وكان هذا المجتمع الإقطاعى يتعاون مع الاستعمار من أجل إخضاع أبناء هذه الأمة، من أجل أن يمكن الاستعمار، كان الإقطاع يتعاون مع الاستعمار. ثم تطورت الأمور وقامت الرأسمالية فى الحرب العالمية الأولى لتتعاون مع الاستعمار. كان الإقطاع أيضاً بيتعاون مع الاستعمار قبل كده علشان يعملنا مزرعة لبريطانيا تزرع القطن، وتصدر القطن لبريطانيا بأبخس الأسعار. كان الإقطاع بيجد فى هذا مصلحة، هل كان فيه مصلحة للشعب؟!

    كان الشعب بيأخذ الفتات؛ كان الشعب بيأخذ فى هذا ما يمكنه أن يقتات، وأن يعيش، ليخدم الإقطاع؛ علشان الإقطاع يخدم بريطانيا ومصالح بريطانيا. ثم بعد هذا تطور المجتمع الإقطاعى وأصبح مجتمعاً إقطاعياً رأسمالياً.

    والرأسمالية أما بدأت فى بلدنا بدأت وقد تعاونت مع الاستعمار، فى بلدنا هنا تعاونت مع الاستعمار الإنجليزى، وفى البلاد الأخرى المحيطة بنا تعاونت مع الاستعمار الفرنسى، فأعوان الاستعمار وجدوا الفرصة انهم يتحولوا إلى رأسماليين صناعيين أو تجار، وعملوا الأموال، وكانوا يجدون دائماً أن عمل الأموال يستدعى بقاء الاستعمار فى هذه البلاد. ثم صاروا بعد هذا ودخلوا فى السياسة؛ لأن السياسة تمكن لهم من أنهم يسيطروا على الحكم، وسيطرتهم على الحكم تمكنهم أنهم يأخذوا أموال أكـثر، وكان هناك الفساد، وكان هناك الاحتكار، وكانت هناك سيطرة رأس المال، وكانت هناك ديكتاتورية الإقطاع، وكان هناك ديكتاتورية رأس المال، ثم كانت هناك الملكية الفاسدة التى تعمل على أن تأخذ خيرات هذه البلاد لأنفسها.. كان الملك وكان الأمراء بيلموا أيضاً أموال من العزب والتفاتيش، ومن السمسرة ومن النسب المئوية؛ اللى كان بياخد ٥% واللى بياخد ٨% علشان يعملوا أرباح معينة.

    وكلنا نعرف من سنة ٤٨ وقبل ٤٨؛ ازاى حتى فى الأسلحة كان فلان بياخد ١٠%، وفلان بياخد ٨%، ولسه الكلام دا ماشى لغاية دلوقت فى بلاد أخرى، ومعروفين هناك؛ فلان الفلانى بيقولوا عليه مستر ٢% والسيد ٤%، الكلام دا احنا هنا خلصناه، خلص عندنا.

    دا الكلام اللى كان موجود فى الماضى، وكان هناك تحالف وتعاون وتآزر بين الاستعمار والإقطاع والرأسمالية الفاسدة المستغلة والاحتكار، وكنا جميعاً نريد أن نقضى على هذا.

    دا كان المجتمع القديم اللى احنا وجدنا فيه. قامت ثورات كثيرة، قامت ثورة فى زمن الخديوى توفيق أما قام عرابى، قام عرابى وقال: قد ولدتنا أمهاتنا أحراراً، ونحن لن نورث، ولن نورث أبداً لأى فرد، ولو كان الخديوى توفيق، خدوه الإنجليز وجم ونفوه، ولكن هل قدروا بعد أن نفوا عرابى وزملاء عرابى إنهم يقضوا على الحرية فى هذا البلد؟ أبداً بدليل ان احنا النهارده أحرار، والبلد بتاعتنا بس، وان احنا بنبنى هذه البلد كما نشاء، يمكن السنين طالت أو الزمن طال، ولكن البلد بتاعتنا. مافيش سياسيين بيعملوا للاستعمار.. مافيش أعوان للاستعمار، ولكن كل فرد بيعمل لبلده بيعمل لأبناء بلده.. بيعمل بكل جهده؛ العامل فى مصنعه، والزراع فى الأرض؛ لأن البلد بتاعتنا كلنا. وكل واحد بيعرف ان الكلام اللى كان زمان انتهى.. إقطاع انتهى.. استغلال انتهى.. ديكتاتورية رأس المال انتهت.. سيطرة رأس المال انتهت، المجتمع القديم صفيناه، البنوك تأممت، الفلوس اللى اتعملت أيام الاستعمار وأيام سيطرة الاستعمار رجعت لأصحابها.. الشعب استردها.. الشعب استرد حقوقه؛ لأنه لا يمكن بأى حال من الأحوال أن يقيم المجتمع الذى تسود فيه الكفاية والعدل، والأوضاع اللى ورثناها تفضل على ما هى عليه.

    حددنا الملكية الزراعية سنة ٥٢، حددنا الملكية الزراعية سنة ٦١ بـ ١٠٠ فدان؛ علشان الـ ٢٧ مليون، مش علشان نعمل تفتيش للملك أو للأمراء، أو مش علشان ناخد أرض لحد من الوزراء، مافيش حد من الوزرا بياخد أرض.. مافيش حد عندنا هنا يعمل زى ما كانوا بيعملوا قبل كده، أممنا البنوك مش علشان أنا أتملكها أو فلان أو فلان يتملكوها، أنتم اللى تملكتوها مش الوزرا دول.. الشعب.. ملكية الأمة، ملكية الشعب.

    أممنا شركات التأمين، بقت ملك مين شركات التأمين؟ كان زمان بنشوف الرأسماليين والإقطاعيين والسياسيين، كل واحد بيجرى علشان يدخل عضو مجلس إدارة، أو يبقى مستشار فى الشركة الفلانية، أو يبقى رئيس فى الشركة الفلانية، أو يشترى أسهم فيها علشان يسيطر عليها، وبهذا يكون هو له نفوذ كبير فى الأسواق المالية، كل دا انتهى النهارده، شركات التأمين ملككم أنتم لأن الشعب.. الـ ٢٧ مليون.. هو اللى يملك كل بنك فى هذه البلد، كل واحد فيكم أما يعدى على بنك النهارده ما يقولش دا بنك فلان ولا بنك علان، يقول دا البنك بتاعى، بتاع بلدى.

    كنا زمان بنشعر بهذا الاستغلال، ونتمنى اليوم اللى ينتهى فيه الاستغلال.. الحمد لله، الحمد لله اللى مكننا من أن ننتصر فى ثورتنا السياسية؛ حتى نسير فى ثورتنا الاجتماعية.

    بنقول الكفاية والعدل.. العدل هو عدالة التوزيع.. لا ديكتاتورية لرأس المال.. لا ديكتاتورية للإقطاع.. لا استغلال سياسى ولا اقتصادى ولا اجتماعى.

    العدل ان ثروة هذا البلد تكون ملكاً لجميع أبناء هذا البلد؛ بالعدل والمساواة، كل حسب عمله، دى العدالة.

    أما الكفاية فهى ان احنا نعمل ونتعب، ونعرق، ونبنى؛ علشان نزيد دخلنا القومى، علشان نزيد نصيبنا من ثروة هذه البلاد.

    أممنا البنوك وأممنا شركات التأمين، وأممنا عدد من المصانع، وأممنا عدد من الشركات التجارية، أممنا التجارة الخارجية كلها، ثم أممنا ٥٠% من شركة البترول الإنجليزية - المصرية، وبعض الشركات الأخرى، ثم أممنا ما يزيد عن ١٠ آلاف جنيه فى بعض الصناعات الأخرى؛ وبهذا عادت الحقوق، عادت الوسائل إلى أصحابها، وسائل الإنتاج اللى هى كانوا بيشغلونا فيها.. العامل.. عنده إيه العامل؟ عنده عمله، الرأسمالى عنده إيه؟ عنده فلوسه، الرأسمالى بيشغل العمال عنده، الآخر أجور العمال كانت بتطلع ٢٥% بس من الأرباح، ومكاسب الرأسماليين القلائل ٧٥% من الأرباح. هل هذا عدل؟ هل دى شريعة الحق.. شريعة الله؟ هل دى شريعة العدل.. شريعة الله؟ هل دا الإسلام؟ هل دا الدين؟ هل دى المسيحية؟ بأى حال من الأحوال دا الاستغلال.. دا الاستعمار.. دا تعاون الاستعمار مع الرجعية مع الاستغلال.

    مين يقبل هذا؟ جميع المكاسب تتكتل لفئة قليلة، مليون عامل بياخدوا قد ٥ آلاف واحد، ٥ آلاف واحد بياخدوا ٣ مرات أد مليون عامل؛ يعنى أجور مليون عامل بياخدوا الرأسماليين أو خمس آلاف رأسمالى قدها ٣ مرات كأرباح.. هل دى شريعة ربنا؟ هل حد يقبل هذا الكلام؟! دا المجتمع اللى احنا ورثناه.

    أممنا وحددنا. أنا حاقول لكم الأعداد؛ علشان نكون على بينة: فى سنة ٥٢ قلنا عايزين نحدد الملكية بـ ٢٠٠ فدان، و٥٠ فدان لكل ولد؛ على ألا يزيد على ولدين، وحددنا الملكية، وصدر قانون فى سبتمبر سنة ٥٢، واستولينا على نصف مليون فدان؛ اللى هو زيادة عن الـ ٢٠٠ فدان، تعرفوا الـ ١/٢ مليون فدان دول أخدناهم من كم واحد؟ أخذناهم من ٣٤٢ واحد بس.. طبعاً أخذناهم من ٣٤٢ وسيبنا لكل واحد من الـ ٣٤٢ مائتين فدان، ومائة فدان لأولاده؛ يعنى سيبنا لهم ٣٠٠ فدان. وأخذنا النصف مليون فدان علشان نديه لـ ١٠٠ ألف عيلة أو ١٢٠ ألف عيلة.. دا العدل.

    ٣٤٢ واحد بس هم اللى طبق عليهم قانون الإصلاح الزراعى الأول؛ بتاع سنة ٥٢، اللى خدنا منهم أرض بتساوى حوالى ١٥٠ أو ٢٠٠ مليون جنيه. اللى انطبق عليهم قانون الإصلاح الزراعى سنة ٦١ (١٨٩٢ اللى هم خدنا منهم اللى زيادة عن ١٠٠ فدان، طبعاً بيدخل ضمنهم اللى انطبق عليهم القانون الأولانى اللى هم الـ ٣٤٢.

    ١٨٩٢ بناخد منهم حوالى ١٥٠ أو ١٧٠ ألف فدان؛ علشان نوزعهم ٥ فدادين على كل عيلة ٥ أفراد، وبنسيب لهم برضه كل واحد ١٠٠ فدان.

    عدد اللى انطبق عليهم قوانين التأميم فى الشـركات ١٧٧٢ بس ١٧٧٢ واحد، اللى انطبق عليهم قانون الـ ٥٠% - مش تأميم كامل - يعنى تأميم الخمسين فى الميه ١٧١٥.

    اللى انطبق عليهم قانون الزيادة عن عشرة آلاف جنيه ٢٠٧٠، اللى انطبق عليهم قانون تأميم محالج القطن ٦٥.

    يعنى كل اللى انطبقت عليهم قوانين التأميم والخمسين فى الميه والزيادة عن ١٠ آلاف جنيه ٥٦٢٢، من ٢٧ مليون بنى آدم بيشتغلوا من الصبح لبليل؛ يعنى فى هذه القوانين الاشتراكية وفى الإصلاح الزراعى بيقى عندنا حوالى ٧٣٠٠، أخدنا منهم حاجات بتساوى لها أد ٥٠٠ مليون جنيه.

    ٥٠٠ مليون جنيه من ٧ آلاف واحد، طب والـ ٢٧ مليون عندهم إيه؟ طبعاً دا الوضع اللى ورثناه. دى الاشتراكية ان يبقى فيه عدالة اجتماعية، ولكن مش الاشتراكية واحد يطلع يكسب، مش العدالة الاجتماعية ومش المجتمع اللى نعيش فيه واحد يكسب نصف مليون جنيه فى السنه، وبعدين كاتب لأولاده أسهم كل واحد نص مليون جنيه، طب والباقيين.. الناس اللى لهم حق فى هذا البلد، إيه نصيبهم فى هذه البلد؟ ورثوا إيه فى هذا البلد؟

    لا يمكن بأى حال من الأحوال أن يكون الغنى إرثاً، والنفوذ إرثاً، والذل إرثاً، ولكن نريد العدالة الاجتماعية، نريد الكفاية والعدل، ولا سبيل لنا بهذا إلا بإذابة الفوارق بين الطبقات، ولكل فرد حسب عمله، لكل واحد يعمل، لكل واحد الفرصة، ولكل واحد العمل ثم لكل واحد ناتج عمله.

    كل واحد له فرصة أن يعمل، ولكل واحد ناتج عمله. أما العاطلون بالوراثة، واللى بيورثوا الأموال وبيورثوا كل شىء فدا مجتمع انتهى؛ لأن احنا ما احناش عايزينه، مافيش حد فينا عايز هذا المجتمع، لا عايزه لنفسه ولا عايزه لأبنائه، كل واحد فينا عايز يعلم أبناءه، عايز يجد المدرسة لأبنائه يعلمهم، عايز يجد الفرصة انهم يطلعوا ويشتغلوا، ويعيشوا حياة حرة كريمة.

    دا مجتمعنا اللى احنا حنبنيه، ودى - يا إخوانى - الحرية الحقيقية والديمقراطية الحقيقية، دى الحرية والديمقراطية والمساواة. بهذه الحرية والديمقراطية، وبهذه المساواة حينما نقيم الدستور بعد أن يجتمع المؤتمر الوطنى نبقى بنقيم دستور واحنا على ثقة إن الكلام اللى فى هذا الدستور كلام حقيقى؛ مش كلام بس فى مواد، وكلام مكتوب على ورق بحبر، لأ.. كلام على الورق وكلام مطبق؛ لأن مافيش تفاوت طبقى، مافيش سيطرة طبقية، مافيش طبقة بتتحكم فى رقاب الناس أبداً، ولكن فيه عدالة وفيه مساواة.

    لما بنقيم الدستور بعد انعقاد المؤتمر الوطنى، ونقول ان فيه ديمقراطية، وفيه حرية وفيه مساواة. كل واحد منا يكون مطمئن إن فيه حرية، وفيه ديمقراطية وفيه مساواة؛ لأن مافيش طبقة قليلة بتسود، مافيش طبقة رأسمالية بتتحكم فيه، مافيش احتكار بيتحكم فيه، مافيش ديكتاتورية رأس المال، مافيش رشاوى رأس المال، مافيش الرأسمالية الفاسدة، مافيش تحكم رأس المال، مافيش استغلال رأس المال، ولكن فيه ملكية للشعب، لكل الشعب، لكل فرد من أبناء الشعب.. فيه تأميم؛ يعنى ملك الأمة كلها، كل هذه الآلات، أدوات الإنتاج، البنوك، التجارة الخارجية المؤممة هى ملك كل فرد من أبناء هذه الأمة، وليست ملك الـ ٦ آلاف واللا الـ ٧ آلاف اللى أنا قلت لكم عليهم.. دلوقت بقت ملك الـ ٢٧ مليون. الـ ٧ آلاف عندهم ما يمكنهم من إنهم برضه يعيشوا عيشه أحسن من العيشة اللى عايشينها الـ ٢٧ مليون، الفلاح اللى بيطلع الغيط من الصبح لغاية المغرب يشتغل علشان يجد قوت يومه، أو العامل اللى بيطلع من الصبح لغاية المغرب بيشتغل، أو التاجر اللى بيطلع يسرح بتجارته طول النهار، هم برضه الـ ٧ آلاف دول، ولو إننا خدنا منهم ٥٠٠ مليون جنيه؛ ولكن رغم هذا بيعيشوا عيشة أحسن من الـ ٢٧ مليون الباقين بين أبناء هذا البلد. والـ ٧ آلاف أنا كنت باقول دول بيمثلوا ٥%؟ أبداً، ١%؟ اللى بيعرفوا حساب بيحسبوا نصف% يمكن أو أكتر من كده، ربع%؟ هل معقول نسيب ربع% يملك ٥٠٠ مليون، وياخد كل واحد منهم أرباح إيه؟‍! أرباح عرقنا وأرباح عملنا؟!

    دى بقى الديمقراطية اللى ادوها لنا الإنجليز سنة ٢٣، دى الديمقراطية اللى جابوا لنا برلمان وقبة برلمان، وجابوا لنا شوية أحزاب، وقالوا للأحزاب توزعوا عليكم الشركات، وتوزعوا عليكم البنوك، كل واحد يروح له بنك، وكل واحد يروح له شركة، وكل واحد بيطلع له فى الآخر بدخل آخر السنة ١٠٠ ألف جنيه أو ١٥٠ ألف جنيه، فيه ناس كان دخلها ١٠٠ ألف جنيه و١٥٠ ألف جنيه، وأهو كل واحد بيشتغل فى السياسة، ويتكلم عن الحرية والديمقراطية ويدخل البرلمان.. يخبط له خطبتين ويقول الحرية كذا، والديمقراطية كذا، ويطلع يخبط له أيضاً عضويتين فى مجالس إدارة شركة وياخد عشرين ثلاثين ألف جنيه، والآخر بيبقى رفع مستوى نفسه، وزود فلوس نفسه، ونسى الشعب ونسى الكلام، وبقت العملية دجل تحت اسم الديمقراطية، وتحت اسم الحرية، وتحت اسم المساواة.

    هل دا المجتمع اللى احنا عايزينه؟! لأ.. احنا عايزين المجتمع اللى يشعر كل فرد من أبناء هذه الأمة بكرامته، واللى يشعر كل فرد من أبناء هذه الأمة ألا استغلال من الإنسان للإنسان؛ لأن الإنسان هو السيد، الإنسان هو الفرد اللى احنا بنريد له الحرية، الإنسان هو الشخص الذى يجب أن يتمتع بكل الحقوق، يتمتع بإيه؟ بالحقوق الاجتماعية، وبالحقوق السياسية، يتمتع بالمساواة، يتمتع بالعدالة الاجتماعية، الإنسان يتمتع بجميع أنواع الخدمات، وهذا هو سبيلنا: تذويب الفوارق بين الطبقات لإقامة مجتمع ترفرف عليه الرفاهية.

    ما بيعجبهمش بره الكلام دا.. يتفلقوا! جرايد إنجلترا مش عاجبها هذا الكلام بتتفلق، قرينا جرايد الإنجليز بعد القرارات، كان زمان "التايمز" تنشر مقالة وتهاجم مصر تسقط الوزارة، ولا يسقطوا غفير دلوقت!

    جرايد إنجلترا مش عاجبها هذا الكلام.. ما يعجبهمش.. عنهم ما عجبهم! جرايد فرنسا مش عاجبها هذا الكلام، كان زمان الكلام دا، جرايد أمريكا مش عاجبها هذا الكلام، ولا جرايد أمريكا بتهمنا.

    بيهاجمونا بيقولوا ان احنا ماشين فى حالة انهيار اقتصادى - أبداً - حنعمل وحنبنى هذه البلد، حنبنى ونصنع كل حاجه.. التخريف اللى بيخرفوه خرفوه من زمان.. سنة ٥٦ تفتكروا قبل العدوان قالوا إيه؟ قالوا حندخل وحنهجم وحنعمل.. أنا كنت على ثقة ان ربنا حينصرنا؛ لأن احنا بنعمل للشعب، للشعب مش لفئة قليلة.

    قنال السويس بناخد منها النهارده ٥٢ مليون جنيه سنوياً، كنا بناخد مليون جنيه فى الأول؛ والباقى كانوا بياخدوه الفرنساويين والإنجليز، البنوك والمؤسسات الإنجليزية والفرنساوية ماكناش بناخد منها حاجة، كل الأرباح كانت بيحولوها، كلها اتأممت دلوقت بقت بتاعتكم، قناة السويس بقت بتاعتكم، البنوك بقت بتاعتكم، شركات إنجلترا الصناعية تأممت، ما حولتش ملكيتها باسمى مافيش حاجة بأملكها فى هذا البلد إلا الستر.. ما حولناش حاجة، باسمكم أنتم، دا التأميم، دى الاشتراكية.. دا التأميم، دى الاشتراكية.. ملك الأمة؛ ملك الشعب.

     

     

     


    !Start Your Website Now

     
    رد مع اقتباس


    Latest Threads By This Member
    Thread Forum Last Poster Replies Views Last Post
    منى عبد الناصر فى حوار صريح وجرئ مع عمرو الليثى شهود على العصر د. يحي الشاعر 2 178 6th July 2019 12:29 PM
    أنباء "محاولة الانقلاب" في السودان شهود على العصر د. يحي الشاعر 0 229 13th June 2019 09:36 AM
    أمريكا حذرت مواطنيها في مصر قبل ساعات من هجوم... حرب الفساد د. يحي الشاعر 0 236 7th June 2019 03:39 PM
    Pompeo delivers unfiltered view of Trump’s Middle... فلسطين أرض الرباط د. يحي الشاعر 1 217 3rd June 2019 05:34 PM
    كل سنة وإنتم طيبين ... وعيد سعيد عليكم وعلينا... موضوعات عامة ... موضوعات خفيفة ... منوعات د. يحي الشاعر 2 166 3rd June 2019 05:04 PM

    إضافة رد

    مواقع النشر (المفضلة)


    أدوات الموضوع
    انواع عرض الموضوع

    الانتقال السريع

    المواضيع المتشابهه
    الموضوع كاتب الموضوع المنتدى مشاركات آخر مشاركة
    القوات ألأجنبية في سيناء .... أرقام .. وتفاصيل .. وحقائق .. و .... د. يحي الشاعر إتفاقية كامب ديفيد 2 7th March 2018 08:19 AM
    صورنادرة من وعن حياة جمال عبدالناصر الخاصة ، من مختصات د. هدي عبدالناصر د. يحي الشاعر شهود على العصر 29 29th September 2010 03:28 PM
    هـــنـــا وفي هذا المنزل ...ولد عبدالناصر.. وهــنــا نري ما وصل إليه منزل عبدالناصر د. يحي الشاعر تاريخ مصر 2 3rd February 2010 08:24 AM
    عبدالناصر يتكلم في الأسماعيلية عن صناعة الصواريخ والنشاط في المجال النووي خلال خطبة د. يحي الشاعر شهود على العصر 0 21st August 2009 01:30 PM
    خطبة جمال عبدالناصر يوم 23 يوليو 1967 (الصوت والنص) د. يحي الشاعر نكسة يونيو 1967 1 29th July 2009 10:24 AM

    Currency Calculator
    RSS RSS 2.0 XML MAP HTML


    Powered by vBulletin® Version 3.8.8
    .Copyright ©2000 - 2019, Jelsoft Enterprises Ltd
    (جميع الأراء والمواضيع المنشورة تعبِّر عن رأي صاحبها وليس بالضرورة عن رأي إدارة منتديات المطاريد)
    SSL Certificate   DMCA.com Protection Status   Copyright  
    منتديات المطاريد   Follow us on Google   لشراء مساحة إعلانية بالمطاريد  

    تنبيه هام

     يمنع منعاً باتاً نشر أى موضوعات أو مشاركات على صفحات منتديات المطاريد تحتوى على إنتهاك لحقوق الملكية الفكرية للآخرين أو نشر برامج محمية بحكم القانون ونرجو من الجميع التواصل مع إدارة المنتدى للتبليغ عن تلك الموضوعات والمشاركات إن وجدت من خلال البريد الالكترونى التالى [email protected] وسوف يتم حذف الموضوعات والمشاركات المخالفة تباعاً.

      كذلك تحذر إدارة المنتدى من أى تعاقدات مالية أو تجارية تتم بين الأعضاء وتخلى مسؤوليتها بالكامل من أى عواقب قد تنجم عنها وتنبه إلى عدم جواز نشر أى مواد تتضمن إعلانات تجارية أو الترويج لمواقع عربية أو أجنبية بدون الحصول على إذن مسبق من إدارة المنتدى كما ورد بقواعد المشاركة.

     إن مشرفي وإداريي منتديات المطاريد بالرغم من محاولتهم المستمرة منع جميع المخالفات إلا أنه ليس بوسعهم إستعراض جميع المشاركات المدرجة ولا يتحمل المنتدى أي مسؤولية قانونية عن محتوى تلك المشاركات وإن وجدت اى مخالفات يُرجى التواصل مع ادارة الموقع لإتخاذ اللازم إما بالتبليغ عن مشاركة مخالفة أو بالتراسل مع الإدارة عن طريق البريد الالكترونى التالى [email protected]