جيلاتي بالايس كريم : ليه يا مصر حصلك كدة

[gadolly]

الصحف المصرية والعربية

جيلاتي بالايس كريم, حليب باللبن, قهوة بالكوفي, سلطة بالطماطم و الخص,..... ليه يا مصر وصلت لكدة

حد فاهم حاجة, انا مش فاهم و معتش عايز افهم, عشان كل ما بفهم مش بلاقي نفسي فاهم

حد يفهمني و يقوللي ليه مصر بقت كدة, ليه البياع بيبيع لك جيلاتي بالايس كريم و يقنعك انه زودلك حاجة علي الجيلاتي, ليه الحليب سعره يغلي و يقولولك اصلنا اضفنا عليه لبن, ليه التعليم في المدارس غلي و يقولك اصلنا حسنا المناهج!! ليه بناخد كورسات في النت وورك بعد الهندسة و يقولك عشان تلاقي شغل, طيب لازمتها ايه الكورسات اللي اخدناها في الكلية

انا مش فاهم يا مصريين, حد يفهمني ربنا يكرمكم, ايه الفرق بين المهندس و الفني دلوقتي, ايه الفرق بين فني الادوية و الصيدلي, طيب ليه بتوع التجارة و الحقوق دخله مجال الكمبيوتر و النت وورك, طيب بلاش قوللي ازاي بتوع الادارة هم اللي بيمتحنوا المهندسين في شركات الاتصالات, طيب يا عم بلاش دي, فهمووني ليه الحاجة سعرها بيغلي و يقولك عشان الجودة و تلاقيها هي المفروض تبقي كدة من الاول, يعني عشان تاخد حاجة صح تدفع اكتر, طيب فلوسها كانت لايه من الاول. السباك ده شاطر و بياخد اكتر عشان بعد ما يخلص بتلاقي الحنفية مش بتنقط, الله, يعني بعتلي جيلاتي بالايس كريم, ما هو كدة كدة لازم يصلحها. الميكانيكي ده جامد اوي و لما يصلح العربية مش بيبوظ حاجة تانية, يعني بعتلي حليب باللبن, ما هو لازم ميبوظ, هو انا حدفع اكتر في اللبن عشان اشتري حليب, حد فاهم حاجة
المحافظ ده شاطر عشان ركب رصيف, طيب هو ايه وظيفته اصلا و المفروض البلد يعني تبقي من غير رصيف عشان نصقف له, الراجل ده محترم و مش بيشتم حد, ما هو الطبيعي الانسان مش بيشتم, و لا خلاص يا بلد بقينا كلنا كدة.

انا زعلان و مش فاهم, حد يقوللي ايه اللي بيحصل, هو خلاص بقي الجيلاتي مغشوش عشان ادفع اكتر و يحط لي عليه ايس كريم عشان يرجع لحالته, ولا الحليب بقي طبيعي مية عشان ادفع اكتر و يحط عليه لبن و يرجع لحالته, ولا المهندس بيتخرج بمستوي ابتدائية و لازم ياخد كورسات عشان يبقي مهندس. كل حاجة بقت ناقصة, و لازم تعالجها عشان توصل لحالتها, و المشكلة اننا رضينا بالامر ده و بقي طبيعي و ساعدنا عليه بالسلبية بتاعتنا, و بقينا بنشكر في اللي بيعمل شغله باتقان لحد ما افتكرنا ان الطبيعي عدم الاتقان.
انا خايف من اليوم اللي منلاقيش الجيلاتي فيه ايس كريم ولا حتي فيه جيلاتي

سلام
جادوللي

 

[تامر احمد]

دى اسمها (( الفوضة)) يابشمهندس جدوللى اللى منتشرة فى كل بوصة فيكى يا مصر ويف كل وظيفة هتلاقى الفوضى اكتر م الهم ع الالب..انت مستغرب وبتقول ايه الفرق بين المهندس و الفني دلوقتي, ايه الفرق بين فني الادوية و الصيدلي.. انا هقولك ليه..لان الفوضى فى مصر بقت فوضى .. التعليم منقوع ف الفوضى..اكترماللى ف المواليد.. ولللا اقولك دا حتى الموالد ليها اصول وقواعد ومواعيد.... ف المولد كل واحد له وظيفة معينة ومنطقة معينة بيشتغل فيها.. ولهم مواعيد مقدسة ميقدروش يتعدوها.. مواعيد حاسبنها بالثانية
الحرامى ف المولد ميقدرش يتعدى الوظيفة المعينة والمنطقة معينة اللى بينشيل فيها
.. الاراجوزاتى من رابع المستحيلات انه يشتغل شغلانة النشانجى.. ومستحيل ينده على لعبة غير لعبته.. و مستحيل يشتغل شغلانة بتاع المراجيح.. ومستحيل ينده عليها

والحاوى عمره ماهى يشتغل شغلة الاراجوزاتى..
ولا الرقاصة عمرها هتشتغل شغلةالنشال

مش هستغرب لواللغويين حطو ف القواميس اووصاض معتى مصر ..مش هستغرب لو حطو معناها فوضى
زى محطو ف القواميس الانتهازية للتعريف بمكيافيلى
والنازى الفوهرر للتعريف بالدكتاتورية
وشارلى شابلن للتعريف الكوميديا
وافلاطون للتعريف بالمثالية
والجستابو للتعريف باشدانواع التعذيب

 

 

[gadolly]

للاسف يا د تامر, دي حتي الفوضي لها قواعد و الناس بتوع الفيزياء و الارصاد الجوية عارفين لنظم الفوضوية و انها لهل قواعد ماشيةعلبها من اول الانيشيل كونديشن لحد التشتت و عدم اتزان المعادلة اللي في الحقيقة متزن

وصلنا لمرحلة غريبة, حتي الفوضي الخلاقة (مع اعتراضي علي اللفظ) مش نافعة معانا, في مجتمعات لما توصل لاقل من الحالة بتاعتنا بكتير بتتغير و يحصل انقلاب و تعديل احوالها, بس الغريبة مجتمعنا اللي وصل لاسوأ حالة من حالات الفوضي مع الاعتذار للفوضي و لقينا الناس تأقلمت مع الوضع, بقت الناس هي اللي بتغير خصائصهاو اخلاقياتها عشان تتعايش مع الوضع, و لو الحال ذهب الي الاسوأ بارده الشعب حيغير خصائصه عشان يتعايش مع الوضع القائم. حتي لو وصلنا انك تشتري الجيلاتي و متلاقيش فيه جيلاتي و لا ايس كريم, حتلاقي الناس مبسوطة و اللي بيشتري بيقول: المحل ده كويس اصله اتوصي بالمكسرات علي الجيلاتي

 

 

[toronto]

زي ماحضرتك قولت يا دكتور/جادولي..عشوائيات.