?اخبار مصر | مقال رائع بعنوان الثورة.. بخ - لـ إسعاد يونس
#Enn #Egypt
? جلال عامر.. دموع..
? أخيرا تم الإفراج عن مساهمى موبينيل الرهائن بعد طول اختطاف اقتصادى.. رغم أنهم مش فاهمين ليه كان مفروض يقبضوا مائتين وخمسة وأربعين جنيه وقبضوا مائتين واثنين فقط.. محدش قالهم حاجة.. الدور والباقى بقى على مساهمى أوراسكوم للاتصالات والتكنولوجيا الشركة المنقسمة الجديدة اللى هما مش فاهمين هما مساهمين فيها ليه أساسا.. يطلبون حبة شفافية فى المعلومات.. يتمنون على الوسائل الرقابية فى البورصة والشركات وسوق المال والحاجات دى ألا تعتمد على مصادرها من الجمعيات العمومية التى تسيطر عليها الأغلبية المالكة.. يعنى أشركوهم فى القرارات برضه.. أصحاب حق ويستاهلوا تعبروهم باعتبارهم بنى آدمين مش أشياء يعنى.. يتمنون ألا يؤخذوا رهائن هما كمان.. ياخدوا فلوسهم ويتكلوا على الله.
* أصبح المصريون لغزاً معقداً جداً إذا ما حاول المصريون التانيين إنهم يفهموه.. تغيير جذرى فى الشخصية المصرية كثيراً ما تخيلنا استحالته.. عانينا من احتلالات على كل شكل ولون ما اتغيرناش.. كل الملل والأصناف والأشكال والألوان واللغات احتلتنا وخرجوا من عندنا بيرطنوا عربى ويشيدوا بالهوية المصرية النادرة التى تؤثر فى أى شخص يخطر على باله مجرد خاطر إنه يغيرها.. واللى وصف مصر من شوارعها واللى من تراثها واللى من أخلاقها.. أما الآن.. وبعد هذا الغزو الأخلاقى الأخير الذى تم زرعه فينا بفعل الكراهية والغباوة.. فأتخيل واحد خواجة مستشرق كده ساقه مصيره التعس وأيامه السودة إنه ييجى يأرخ لمصر ويوصفها.. إن لم يصدم من مظهرها المزرى وزبالتها وباعتها الجائلين وكرنفال الأزياء العجيبة والقبيحة واختفاء أى معالم حضارة بها.. فبالتأكيد سيصدم من أخلاق جزء كبير من شعبها.. إيه ياولاد كمية القباحة وقلة الأدب دى؟؟.. إيه النفسيات الخربانة والأحقاد اللى باظة من أوداجكو دى؟؟
? الواحد كان فرحان إن التقدم التكنولوجى وصلّنا وسبعة تمانية مليون مننا قاعدين على النت يمارسوا التواصل الاجتماعى والمعرفى.. هو ليه أى تحضّر نستعيره من الغرب لازم نستخدمه غلط؟؟.. لازم نطرطشه مياه صرف صحى وبذاءة؟؟.. مع إن المصريين التانيين اللى أقصدهم يشرحوا القلب من حيث سعيهم للمعرفة بجد واكتساب الصفات الحميدة من كل خروج إلى العالم من خلال النت..
? مهرجان برلين.. واحتفالية سينما من أجل السلام.. واحتفاء بالثورة المصرية تحت اسم «فى ذكرى موقعة الجمل» وتنويه عن أفلام الثورة «?? يوم» و«الطيب والشرس والسياسى» و«الثورة.. خبر».. البرادعى يلقى كلمة عن الربيع العربى ويعلن فيها أن ثقافة الخوف قد تراجعت.. ثم يشارك فى الاحتفالية ويسلم أنجيلينا جولى جائزة تكريم بمناسبة أول فيلم من إخراجها.. كوول ده ولم ير قطاع كبير من المصريين حبايبنا سوى صورة البرادعى وهو يسلم على أنجيلينا.. وخد تريقة بقى وقلة أدب وطولة لسان مقززة فعلاً.. ولا تنم إلا عن جهل شديد وخيابة أشد.. شىء مؤسف.. الذى لا يعلمه الكثيرون أن ما يكتبونه من تعليقات تشى بشكل الجالس وراء شاشة الكمبيوتر.. وبالبيئة التى أتى منها وحتى شكل صوابع رجليه وما بينها.
* على فكرة.. هناك سوفت وير تم تداوله حديثا فى أوروبا.. لا يقتحم فقط كمبيوتر الشخص ويتلصص عليه.. ولكنه يقتحم الكاميرا المركبة به ويكشف منظر الجالس يلقى بصفايح قمامته اللفظية على الناس.. يا نهار ازرق عالمناظر.. تقول للكحيت بتاع مصطفى حسين قوم وانا اقعد مطرحك.
? يالهوى يالهوى يالهوى.. إيه مالك يا ستى؟؟.. بيقولك ياختى الجماعة الإسلامية طالبة حقيبة وزارة الداخلية.. ياخدوها يعملوا بيها إيه ياختى؟؟.. تشربى شاى؟؟.. شاى إيه بقولك الداخلية الداخلية.. حاياخدوها إزاى دول؟؟.. يعنى اللى كانوا بيموتوا الناس ويفرقعوا فينا الكنابل حايبقوا هما الداخلية؟؟.. تاكلى نداغة؟؟.. والا حايصفوا حسابهم مع الداخلية بقى ويخلصوا عليهم كلهم؟؟.. طب تقزقزى لب؟؟.. أتارى مرة شوية أمناء شرطة كانوا عاملين مظاهرة بيطالبوا فيها إنهم يربوا دقونهم ويلبسوا سراويل فى الخدمة.. أقشرلك تين شوكى؟؟.. والا حقيبة وزارة التعليم.. خلاص كده مش حايبقى فيه كى جى وان وتو.. حايقلبوهم كتاتيب.. تقرقضى درة؟؟.. وماله برضه اما يبقى العيال كلهم حفظة قرآن.. أهى شغلانة لو خابوا فى التعليم.. تمزمزى حرنكش؟؟.. ده كده المناهج بقى مش حاتعلم العيال أى حاجة عن تاريخ مصر إلا التاريخ الإسلامى.. حاينسفوا الحضارة الفرعونية بقى والرومانية والإغريقية والقبطية.. تمصى قصب؟؟.. قال وبنقول نصلح التعليم ده حايخيب خيبة بالويبة.. تمضغى لبان؟؟.. عليه العوض فى العيال.. إحنا نعلمهم فى البيوت بقى ونقدملهم على شهادات من بتاعة بره من منازلهم.. تقربعى بيبس؟؟.. ده الإخوان حايشكلوا الحكومة يامّه.. خيرت الشاطر قالك إحنا مستعدين نشكل الحكومة دلوقتى أهو.. تلهطى طبق أم على؟؟.. اللجان يقسموها على بعض.. والحكومة ينصصوها سوا.. تقرقشى شوية عين جمل؟؟.. إنتى ماعندكيش دم خالص؟؟.. هو إيه اللى تلهطى وتقرقشى وتقربعى.. أمال احنا كنا اتنيلنا عملنا ثورة ليه؟؟.. خلاص كده؟؟ بخ ثورة؟؟
? قومى يا وليه انتى من قدامى.. مفيش حاجة من دى حاتحصل.. الإخوان مش هبل ولا عبط عشان يشكلوا حكومة وتفشل.. دى ناس بتلعب دايماً عالمضمون وكل ده هتش.. مفيش حاجة حاتتعمل إلا بعد ما ييجى رئيس.. بلاش خوتة بقى.. واللى يقولك الثورة بخ.. قولى له الثورة هى ضمان بقائك الوحيد ومن غيرها كله حاياكل بعضه بدرى بدرى.. تهضمى بقى برز بلبن؟؟
? ألفين مبروك للرقيقة بسمة والدكتور عمرو حمزاوى على عقد القران.. أجمل ما قيل فى هذه المناسبة.. أنه قال لها بعد انصراف المعازيم: حياتى.. أخيراً بقينا لوحدنا.. دعينا نحتفل بنجاحنا فى مؤسسة علاقتنا وتشييد إطار مرجعى شامل وهياكل وظيفية متكاملة قادرة على استيعاب زخمها الجارف وتحويله إلى طاقة بناءة.?
مزيد من التفاصيل