خادمة ولكن..؟!

[بنت شعنونة]

الصحف المصرية والعربية

تقريبا دلوقتي مافيش بيت فيكي يا مصر او يا دول عربية الا وفيه خادمة
سواء كانت مقيمة او تاتي يوميا او ايام من الاسبوع او حتى مرات البواب تطلع تنضف و تمشي
او واحدا تيجي تطبخ
المهم انه فيه حد بيجي يساعد في البيت

في الفترة الاخيرة ابتديت الاقي بنات بشهادات بكالوريوس تجارة وحقوق واخرين والله وبيشتغلوا في البيوت
من فترة كنت بتكلم مع مجموعة من الاصدقاء عن الموضوع دا
ف ردت علينا زميلة ب عصبية شديدة..
مستحييييييييييييل ادخل واحدا من البنات دي بيتي
- ليه يا سيتي؟ مع انه انا في نظري دي أأمن بنت ناس ومثقفة يعني على الاقل استايل مختلف في التعامل معاكي ومع ادوات البيت ومع الولاد كمان
- وهما دول لو محترمين كانوا اشتغلوا في البيوت؟ دول اصلا بيخربوها وممكن يخطفوا جوزك؟
- طب يا ستي مافيه "وليات" خطف ازواج من زوجاتها !! القصة مش قصة مثقفة او جاهلة ؟


- طب وهيا الشغلانات خلصت؟
- انتي عارفا ان دول برا بيتخطفوا خطف وان الاجانب بيدوروا على "مؤهلات" عشان يوافقوا يشتغلوا معاهم؟ دا ياريت هيا ترضى تجيلنا بس.؟

دا كان جزء من الحوار

على النقيض بقى
اعرف طبيب متزوج ومخلف شاب و عنده "خادم" مقيم في بيته يطبخ ويكنس وينظف ويصلح السباكا ويعمل المشاوير!!!!!!!!!!!!

السؤال بقى
عندك خادمة في البيت؟ وايه رايك في الموضوع دا؟
ماهي صفات لاخادمة المثالية ولو جالك نموذج المراة المثقفة دا توافق- توافقي انك تدخلها بيتك؟ و ليه؟
وماهي حدود الخادمة في بيتك..يعني هل ممكن تتدخل في الولاد .. تاكلهم وتشربهم ومش بعيد تديهم من ثقافتها بحكم جلوسها معاهم؟

 

[toota]

بتخرطي على قلبي بصل يا شانا بمواضيعك

عشرين سنه في الامارات وانا عندي شغاله مقيمة....معززة مكرمة تروح واحدة تيجي غيرها....ده يوم ما كانت بتمشي الشغالة...بيبقى يوم عصيب مطلعلتوش سمس

المهم لما جيت مصر..جربت امشي النظام ده وابتديت اجيب مقيمات في سن ال 16 ومافوق...طلعت فيهم بلاوي منيله...بستين مليون نيلة....وقررت انه لا بيات بعد اليوم...

طيب نشوف مرات البواب...تدخل يوم ويوم...وتاخد شهرية...بقت تيجي يوم ولا.. يوم ولا...شويه تقول اصل العمارة بعتوني وجابوني الخ...

قلت بلاها مرات البواب كل يوم...ولا يوم ورا يوم..لخصت الموضوع يوم او يومين ف يالاسبوع تخلص فيهم الشغل ....قالت لا حاجي يوم واجيب معايا ست تساعد الشقه كبيرة لانها دورين....قلتلها حاضر....ومن ساعتها...مبقتش اجيب مقيمات نيفر ايفر....ولا يومية....لا حتى نص اسبوعيه...هي مره او مرتين بالكتير وحسب الحاجة...تيجي تخلص الي عليها...ومش بقف على دماغتهم...وبسيبهم بالاخر خالص ببقى عارفه الحتت الي مش بينظفوها كل مره وبقولها اعملي ده وده نيسيتيه وخلاص...

بس لا بتتدخل لا في طبيخ ولا نفيخ ولا اولاد ولا اي مواضيع ملهاش فيها...وخدي بالك...الشغالات دول اشر خلق الله....وياسننة بيضة بقى لو متعلمة....حتعملك من الحبة قبة...ومش حتخلصي....لا الجاهله نافعه...ولا المتعلمه حتقتنع انها شغالة وتحط راسها براسك....وعيشي بقى

كفايه رغي بقى...

 

 

[haya]

تصدقي يا شانا موضوع خادمه جامعيه ده يستحق التفكير
ولو انه مهما فكرنا هايظل في اطار التخمين الي ان تثبت اثاره بعد فتره ممارسه علشان تقدري تحددي ايجابيات وسلبيات هذه النوع الدخيله علي عالم الخادمات
تعالي نفكر كده في العيوب
لان المميزات معروفه انها تكون مثقفه اكثر وعيا في التعامل مع اداوت المطبخ و البيت و التعامل مع الاطفال ورقي الالفاظ اللي ممكن تتعامل معاهم بيها
لكن في المقابل المتطلبات اكيد هاتختلف عن واحده غيرها من ذوات الطبقه الفقيره او المعدمه و اللي ممكن يكون شئ مش معيب انهم يقوموا بالعمل ده

اولا الجامعيه ديه هاتكون ناقمه جدا علي العمل ده وناقمه علي صاحبه المنزل اللي هيا مش شايفه انها اقل منها عقليا وعلميا في شئ ولكنها ظروف القهر اللي ادي بها الحال للوضع ده

ثانيا الجامعيه ديه مش هايكون منتهي حلمها اليوميه ..لكن هايكون ذهنها واعي ومتفتح وعايزه تشوف افلام ومسلسلات اجنبي وعربي
عايزه تستخدم الكومبيوتر والانترنت
عايزه تستخدم الحاجات الشخصيه او علي الاقل بتبص اوي علي الحاجات الشخصيه لصاحبه البيت وبرضه بتشوف انها لايقه عليها ويمكن اكتر من صاحبه البيت نفسه
بشكل او بأخر هاتبقي شايفه ان ده مش مكانها الصحيح ولا ده كان في مخيلتها الدور اللي مكن تقوم بيه بعد سنوات دراسه 4 سنين واللي مثيلاتها ممكن يكونوا سكرتيرات او موظفات محترمات
كل النقط ديه مش موجوده في مرات البواب ولا القرويه اللي جايه من بيئه بسيطه

ده غير النقطه اللي لفتت نظر اصحابك في انها ممكن تطمع حتي في جوزها

انا شايفه ان النوعيه ديه ممكن يكون جواها دوافع للحقد و الغل اكبر بكتير اوي من الخادمات اللي نشات في بيئه فقيره وممكن تكون مامتها برضه خادمه

لا لا الجامعيه لأ ...اختيار غير موفق ابدا
افضل مرات البواب اللي بتيجي تعكلي البيت وانظف وراها بعد ما تمشي

فكرتيني بموقف لطيف حصلي الصيف اللي فات طلع من مرات البواب
جيبت الست الهانم تنظفلي الشقه المقفوله طول السنه
انا عاده مش باشتغل معاهم ولا باساعدهم لاني بافرفر بسرعه وبيبقي كفايه اوي ان قاعده متلقحه ادامهم طول النهار لغايه ما تخلص
قوم انا اتشمللت وقررت اني انظف الاويما بتاعه اوضه السفرة علشان هما عمرهم ما هايبصوا للتفاصيل الرفيعه ديه ,..ولو طلبت منها ممكن تحدفني بالميه ولا حاجه
قوم لقيتها بتقولي كويس كويس الله ينور يا مدام ..بس الحته ديه انتي مش عاملاها كويس ليه
قوم انا بقي
لكن بيني وبين نفسي ..كنت حزينه اوي علي برستيجي
روحت قاعده حاطه رجل علي رجل وما اتعتعتش من مكاني لغايه ما مشيت وقفلت الشقه كمان بس بعد ايه بقي

 

 

[hoppa]

اقتباس تقريبا دلوقتي مافيش بيت فيكي يا مصر او يا دول عربية الا وفيه خادمة سواء كانت مقيمة او تاتي يوميا او ايام من الاسبوع او حتى مرات البواب تطلع تنضف و تمشي

يا شيخة....كل بيت
دى نسبة متعديش 1% الا هما الستات الفافى اوى و الا عاملات و مش لاقيين وقت انما الشريحة الكبرى من الستات مش محتاجة اى خادمة

 

 

[hoppa]

اقتباس اولا الجامعيه ديه هاتكون ناقمه جدا علي العمل ده وناقمه علي صاحبه المنزل اللي هيا مش شايفه انها اقل منها عقليا وعلميا في شئ ولكنها ظروف القهر اللي ادي بها الحال للوضع ده

لا لو اندفع لها مرتب مغرى مش حتفكر كدة
وثانيا لو هى تقدمت للعمل ده حيكون برغبتها و ارادتها يعنى محدش غصب عليها علشان تكره الوضع اللى هى فيه

 

 

[الحاج فوزى]

أهم شىء للعامل - وزيرا ً كان أو غفير - هو الشعور بالرضى عن وظيفته ..

فإن شعر بالرضى ، تفنن فى إخراجها على أكمل وجه ..

وإن شعر بأنها دون مستواه ، كان ناقما ً عليها أولا ً غير مراعيا ً لها ..

فالجامعية أو ذات التعليم العالي ، إن كانت مقتنعة بأنها تحب عمل الخدمة فى البيوت .. وهذا بالطبع صعب .. فستكون أفضل كثيرا ً من الأخريات ..

لكن الأخريات أنسب كثيرا ً فهن لن يضعن أنفسهن دائما ً فى مقارنة بينهن وبين صاحبة البيت ..

ولن تراقب أعينهن الزوج فاتحين الباب لتطلعات من نوع أخر .. إلا فى حدود النسب المعتادة ..


لكن طبعا ً يا ليت الواحد منا يعثر على واحدة من هؤلاء اللواتى حصلن على تعليم عالي ويرين فى خدمة البيت أمرا ً عاديا ً ووظيفة مقبولة ..

 

 

[Prof]

المهم الثقة والكفاءة وان تكون أمينة على ما تستأمن عليه.. في حدود المهام اللي ممكن تقوم بيها.
وزيها زي أي وظيفة..
فمفروض يكون ليها چوب ديسكربشن.. ويكون ليها متابعة وتقييم ووو... وتدريب إن لزم لتحسين الأداء.

ولأن الشيء بالشيء يذكر.. كان واحد حكي لي مرة وأقسم وهو مطمئن على صدق كلامه.. ان في جنوب السعودية -تحديدًا في أبها- في أقليم نجران حيث تستوطن مجموعات من قرود البابون في البرية وتختلط أحياناً بمجتمع البشر.. قام أحدهم باستئناس وتدريب قرد على أعمال المنزل من غسيل أطباق وتنظيف وما إلى ذلك.
ولم أتأكد من الخبر من مصدر آخر..

 

 

[Farida]

موضوع الشغاله ده انا غلبت فيه و غلب غلبى ....بس من زمان و انا مش باحب الشغاله المقيمه
دى نهائى و خصوصا ان الشقه مش كبيره قوى يعنى ......و قررت ان مرات البواب تطلع لى يوميا تشطب المطبخ و الحمامات و يومين فى الأسبوع تروق كده و فى كل مرة بيبقى الترويق زى الزفت و اخر الشهر تاخد شهريتها و دمتم و لو حصل انى نزلت يوم و غبت شويه يبقى راح على اليوم و مافيش تعويض عنه
لأنى مش باعرف اتعامل معاهم بشده و اللى بيقولوا لى عليه بانفذه بالحرف .........لكن موضوع المتعلمه و خريجة جامعيه حأستبعده لأنى مش حأعرف اتعامل معاهما و حأتكسف اقولها على اشياء تقوم بها .......لكن موضوع تخطف الزوج و الكلام ده هو انا حأقعدها لما يكون الزوج موجود لا جامعيه ولا مش جامعيه هو مش بيشوفها مش باحب انضف الشقه و هو قاعد بيلخمنى جدا .....
اما عن موضوع ان المرأة العامله هى اللى بتحتاج لخادمه او للستات الفرافير مش صحيح معظم اللى عندهم خادمات سيدات بيوت ...............

 

 

[toota]

اقتباس المشاركة الأصلية كتبت بواسطة Farida اما عن موضوع ان المرأة العامله هى اللى بتحتاج لخادمه او للستات الفرافير مش صحيح معظم اللى عندهم خادمات سيدات بيوت ...............

وبعدين لسه نسميهم فرافير يا فريدة..هي الست لو من مستوى معين راقي وطوووول عمرها بتتخدم ...ومتعودة على انها متخدمش الا وقت الضرورة...لازم تتمرمط في الشغل عشان تبقى ست بحق وحقيق ولا ايه

 

 

[Farida]

انا كمان باتضايق من لفظة ان الست لازم تقوم بشغل البيت كله والا ما تبقاش ست و تبقى فرفورة ,.........
يالا بقى لنا كتير ما اتخانقناش موضوع ذو صلة
عمل المرأة المسلمة فى بيت زوجها