نِفسى أنام بدرى فأصحى بدرى

[mohsen]

اقتباس المشاركة الأصلية كتبت بواسطة فــيــروز المشكله إنّى اتعوّدت إن فترة النوم الاولى دى تكون ساعتين على أقصى تقدير .. فلو عملت عبيطه و قلت فى عقل بالى أدخل أنام الساعه 9 مثلا ولاّ حتى 10 على أساس أفضل نايمه للصبح غالبا كنت أرجع أستيقظ بعد ساعتين تلاته أربعه على أقصى تقدير و أفضل أغنّى ظلموه .. حتى لو كنت هاموت من التعب بردو لازم أستيقظ ..

جربى الطريقة دى:
قللى المدة بتاعة فترة النوم الأولى بالتدريج (يعنى مثلا من ساعتين لساعة و نص و بعدين ساعة واحدة و هكذا) لغاية وا توصلى لدقيقة واحدة

طبعا المدة تغيريها بعد ما تتعودى على اللى قبلها (يعنى تصحى لوحدك من غير منبه)

و لو الطريقة دى نفعت قولى لى عشان أجربها أنا كمان

 

[Farida]

مشكله ..........فيه فرع فى عيلتنا بيناموا بالنهار و بيسهروا طول الليل لحد ما يصلوا الفجر حاضر ولو اولادهم بيروحوا المدرسه يوصلوهم المدرسه و يرجعوا يناموا تانى ......عيشه صعبه بجد ..و بيصعبوا على جامد .........
بالنسبه لى مافيش مواعيد محدده و متبرمجه عليها .......بس انا رأيي بطلى نوم الضهر انا كمان كنت مواظبه عليه و بعدين بطلته نهائيا و كنت اجى على الساعه 11 انام زى الطوبه ........بس دلوقتى بقيت بحالات لو تسنى لى النوم الضهر اسهر بالليل و لو مافيش على الساعه 12 ........1.....نوم .........

 

 

[فــيــروز]

طيب فيه حاجه عاوزه أوضّحها عشان فعلا لم أوضّحها كما ينبغى فى المداخله الأولى ..

أنا فعلا بطّلت أنام بعد الشغل من ييجى شهرين كده ... ده إنجاز رائع على فكره قياسا على الحال قبل الشهرين دول ..
بس المشكله إنّى لازلت لا أستطيع أن أنام مبكّرا و ده عامل لى الأزمه .. يعنى نفسى مثلا أنام الساعه 10 مساء و لو قبلها يبقى ممتاز .. بس ده لازال شئ صعب جدّا بالنسبه لى و محفوف بمخاطر جمّه إنّى أصحى الساعه 2 صباحا ..

و لنا عوده بمشيئة الله

 

 

[حشيش]

اقتباس المشاركة الأصلية كتبت بواسطة فــيــروز أظن الموضوع شارح نفسه و مش محتاج توضيح .. حد عنده تجارب مع تظبيط الساعه البيولوجيه بحيث يكون بينام فى موعد أقصاه 11 مساء مثلا فيقدر يصحو منتعش و مبسوط الساعه 6 صباحا؟ أنا قضيت سنين طوييييييييله لازم أروّح من الشغل أنام ساعتين و بعدين أقوم أنتشر فى البيت سواء للفرجه على التليفزيون أو القراءه أو -طبعا- النت .. حتى لو روّحت بيتنا الساعه 8 مساء ولاّ حتى 9 لازم أنام و أرجع أستيقظ مثلا الساعه 11 .. و طبعا مش بانام بعدها قبل 3 صباحا .. حد يسألنى طيب و ليه ماتفضليش نايمه للصُبح .. المشكله إنّى اتعوّدت إن فترة النوم الاولى دى تكون ساعتين على أقصى تقدير .. فلو عملت عبيطه و قلت فى عقل بالى أدخل أنام الساعه 9 مثلا ولاّ حتى 10 على أساس أفضل نايمه للصبح غالبا كنت أرجع أستيقظ بعد ساعتين تلاته أربعه على أقصى تقدير و أفضل أغنّى ظلموه .. حتى لو كنت هاموت من التعب بردو لازم أستيقظ .. المهم يعنى عشان مازهّقكوش .. لو فيه حد مظبّط مواعيد نومه يقول لنا عملها إزّاى دى .. أنا لو عليا ممكن أدخل أنام الساعه 8 مساء مثلا لأنّى غالبا بارجع من الشغل فى الوقت ده بس الأزمه إنّى أفضل نايمه للصبح وماصحاش فى نُص الليل زى الوطاويط

أنصح بعقار (سيكو سيكو فوكسين) المنوم مع كمدات خلات الرصاص ... 3 حبات على الريق صباحاً وقبل الذهاب إلى الفراش بساعة مساءاً وألف سلامة

 

 

[Isis]

أمري لله..هدلي بدلوي في الموضوع ده..


محسوبتكم واحدة بتنام في الشهر صبح و ليل و ليل و صبح و خربطه و سهر أيام الاوف...

الاول كانت حياتي عذاب لدرجة إني كنت بوصف لنفسي مهدءات و منومات..(بستخدم ادوية فيها مخدر زي مثلا ادوية الحساسية المتوفرة ليا كوني مصابة بيها)..أورح أشتكي للدكتور من الأرق يديني مخزون أسبوع منوم..و كده.


المهم بدأت أعالج نفسي بنفسي..إزاى؟


الأول العلاج النفسي..يعني طول ما الواحد حاطط في دماغه فكرة أو خايف مثلا إنه يصحى 3 الفجر صدقيني هيصحى 3 الفجر...دماغك هيغلس عليكي و هينبهك الوقت ده بالذات...أولا شيلي التوقع ده من جواكي..حاولي مش تخلي النوم موضوع لأنه هيبقى موضوع و مش هتعرفي تسترخي أو تنامي أبدا...حددي الوقت..حاولي تعملي ليه طقوس مش فيها توتر شان برضه مش تكوني متيقظه و متنبهه..


مثلا انا بعمل إيه؟ بضمن إن كامل المكان مظلم..بلبس بيجامه النوم شان أحس إني في مرحلته...بشرب حليب بارد..بفتح الأباجورة..اجيب كتاب مش ممتع بدرجة كبيرة بس نفسي أخلص قرايته بدام جبته و يا ريت موضوعه مش يكون حاجه تنرفز..حاجه ممكن تخليكي تتاملي أو تسرحي.....و احطه جنب السرير..أقفل باب الاودة...أفتح القرآن بصوت هادي اوي و أحيانا ممكن موسيقى كلاسيك.....لو بتحطي كريم مساء مثلا للبشرة حطي و روحي إقري الكتاب على نور الأباجورة الهادي و تصبحي على خير..بصي الهدف تعملي كام حاجه تسبق النوم و تكوني إتعودتي إنها دايما بتعمليها قبل النوم...عقلك الباطن هيختزنها كتحضير للنوم و هتلاقي نفسك تلقائيا بتحسي بنعاس و هدوء و هتنامي..المهم تكرري نفس الأفعال مدة كبيرة لحد ما تبقى مقترنه بفترة النوم..



محفزات النوم...


الشاي الأخضر..بجد جربي تخليه من ضمن عادات قبل النوم و هيساعد على انك تنامي..


بلاش العشا..حاولي تتجنبي الأكل مثلا 3 ساعات قبل النوم .. أنا من الناس اللي ضغطها بينزل و دايما أصلا معدله واطي..عارفه إن الأكل بيعلي الضغط بالتالي هتنشط..بحاول لو عايزة أنام إني أكل خفيف جدا أو قبله بساعات كبيرة شان أضمن إن ضغطي هينزل شوية و هحس بدوار خفيف و كسل و أنام..


طريقة العد التقليدية..جربتها و الله...بس على شكل تسبيح سريع..و هتغرقي في النوم...

قبل النوم بساعه مثلا هدي نشاطك..يعني إسترخي .. مش تدخلي في نقاش ممكن يستفز عقلك شان يفكر..اعملي حاجات بسيطة و بالحركة البطيئة كمان.....


طبعا أحسن حاجه إنك بطلتي نوم الضهر..هيدعم جدا إنك تبني عادات نوم جديدة..و تصبحي على خير..

 

 

[Prof]

فيه طريقة ممتازة كنت وصفتها لحشيش قبل كده ومن ساعتها وهو نايم.. حتى ما شكرنيش عليها.

 

 

[حشيش]

اقتباس المشاركة الأصلية كتبت بواسطة Prof فيه طريقة ممتازة كنت وصفتها لحشيش قبل كده ومن ساعتها وهو نايم.. حتى ما شكرنيش عليها.

مش طريقة التحكم فى التنفس؟ ... جربتها وجاتلى أسفكسيا وكنت حروح فيها علشان كده ما شكرتش

 

 

[Prof]

اقتباس المشاركة الأصلية كتبت بواسطة حشيش مش طريقة التحكم فى التنفس؟ ... جربتها وجاتلى أسفكسيا وكنت حروح فيها علشان كده ما شكرتش

يا عم بأة
تلاقيك كنت سايب الغاز مفتوح أصلاً.

 

 

[toota]

يا روقانك ياايزيس.....ومنين الواحد يجيب الوقت لده كله قبل النوم....ويعمل بشكل يومي ثابت...نهار ابيض....طب لو عملت كل ده وجت الانسة وزه مثلا جنبي ووشي كله كريم...حتملي شعر منها ومش حعرف انام...ولا لو قفلت الباب...النونوة تبتدي تشتغل كاني حابسهم مع اني انا الي ببقى حابسه نفسي....ده لو مطلعوش السرير وناموا جنبي ولا القردة الصغيره باربي جت عند عيني وقعدت تلعب معايا وتضربني على عيني عشان افتحها وتلعب معايا...مش حتنام وتفضل قارفاني للصبح....


مانتي عارفه النظام

 

 

[Isis]

اقتباس المشاركة الأصلية كتبت بواسطة toota يا روقانك ياايزيس.....ومنين الواحد يجيب الوقت لده كله قبل النوم....ويعمل بشكل يومي ثابت...نهار ابيض....طب لو عملت كل ده وجت الانسة وزه مثلا جنبي ووشي كله كريم...حتملي شعر منها ومش حعرف انام...ولا لو قفلت الباب...النونوة تبتدي تشتغل كاني حابسهم مع اني انا الي ببقى حابسه نفسي....ده لو مطلعوش السرير وناموا جنبي ولا القردة الصغيره باربي جت عند عيني وقعدت تلعب معايا وتضربني على عيني عشان افتحها وتلعب معايا...مش حتنام وتفضل قارفاني للصبح.... مانتي عارفه النظام

الله يخليهوملك القطاقيط..ده كأنك مربية أطفال دائمين و الله..و لا عمرهم هينضجوا..ماشاءلله..



طيب ما في حل...الكل يتعلم و يتعود..انتي و قططك...


يا خبر أبيض..البيت كله هيبقى كريم ترطيب..و الحليب مرمي في كل حته...و نونوه على موسيقى كلاسيك....العيال دي لازملها حل..