تاكسي ...كندا ..( حواديت و مشاوير )

[Ahmedshaker]

الصحف المصرية والعربية

بسم الله الرحمن الرحيم

الحمد لله و الصلاه و السلام علي رسول الله ... إنه من يهده الله فلا مضل له و من يضلل فلا هادي له و اشهد ان لا اله الا الله و اشهد ان محمد رسول الله ثم ... اما بعد...

فقد احببت ان ابدا في تدوين مذكراتي منذ فكرت في الهجره و لن ارجع الي ما قبل ذلك فانا احب ان اجعله كالكنز الثمين بما له وما عليه...

سوف احكي ما في صدري وعقلي دون تزييف او مواربه ... فقد تجدونه احيانا جافا كالحطب و احيانا سلس و يروي كالماء البارد في الهجير

ليس من عادتي الكتابه بالتفاصيل ... و لم أكن يوماً من هواه المنتديات الا في النواحي العلمية الخاصة بتخصصي ... لكني ساستخدم هذه المغاره لتكون واجهه لذكرياتي و قناعاتي ايضا و انقل بها كل الاخبار و المواقف التي مرت وتمر و ستمر بي سواء في بلدي او في كندا

و سوف احاول استخدام اللغه العربيه الفصحي قدر الامكان ...فقد و الله خسرنا كثيرا بتخلينا عن هذه اللغه ...فهي لغه اهل الجنه و هي أغني لغات العالم في التعبير الدقيق و الوصف المفصل ... فأرجوا الا يجعل هذا كلامي مملا للبعض و لكن فلنعتبر هذه الطريقه احد الاساليب للحفاظ علي الهويه العربيه لنا في بلاد العم سام ( لا اعلم ان كانت كندا تدخل تحت هذا المسمي مع امريكا ام لا )

احترت كثيرا في اختيار عنوان يعبر عما بداخل المغاره ...و استقريت اخيرا علي تاكسي ...كندا ..( حواديت و مشاوير ) علي غرار كتاب تاكسي للكاتب خالد الخميسي نظراً لان الكتاب يحكي الواقع من خلال حواديت التاكسي اللي كل من بمصر يعرفها جيداً

 

[Ahmedshaker]

نبدأ بسم الله ...اول ما كانت الفكرة في عقلي كانت مجرد احلام مراهقة ايام الجامعة و لم يكن هناك اي تفاصيل بالنسبة لي و كانت بعيدة المنال فكان هناك احد المقربين لي سافر الي امريكا للدراسة لمدة سنتين و كانت حكاوية تجعلنا نعيش عالم لم نرة من قبل و كانت بدايات الانترنت سنة 1997 ... طفرة في مصر و من قبلها بسنوات في الدنيا كلها ...

لمن لا يتذكر كان الاشتراك غالي و بعدين عملوا المجاني بتاع 10 قروش الدقيقة اللي هوه 0777 ... و الله كانت ايام و كنا نتسابق في الحصول علي username and password علشان نقدر ندخل علي النت و كانوا عاملين زي الكنز :)

المهم نسيت الاحلام حتي دخلت الجيش و استمريت به 3 سنوات وشعرت بانتهاء احلامي ... و ظهر صديق عزيز لي و بدأنا نتكلم عن نفس الفكرة مرة اخري و كان ذلك 2002 و بعد ذلك عرفت انه سافر ...و كانت ظروفة افضل مني للسفر و استعدادة كان اقوي ماديا و لغوياً

و ظل الحلم يراودني سنين و كنت بين الحين و الاخر ادخل علي المحاورات و ابدا في تجميع الملفات وما ادراك ما المحاورات ايامها و كان د قناوي عامل شغل و ابداعات بندعيلوا بيها لحد دالوقتي وبدأت في الاعداد للملف و لكن كان يحبطني اني المفروض ان احصل علي درجات عالية في الايلتس

كما اني لم اكن متزوجاً و كان الحصول علي مبلغ كبير يوضع في البنك صعب ... و نسيت الحلم او تناسيتة و بدأت في شق طريقي في الدنيا و قولت اتعب كتير و اكسب كتير بس كنت بتعب بس ...ههه ( وش احمد حلمي ) ...

المهم ربنا كرمني من شغل لاخر و كلها كانت حكومية حتي استقريت في افضل مكان حكومي بالنسبة لمن يعمل في مجالي و كنت ظروفي تحسنت كثيرا و لغتي تحسنت ايضا كثيرا بعد عمل ال MBA ثم ماجستير في تخصصي و الحصول علي الكثير من الشهادات العلمية في مجالي مما كان له أثر كبير في تقوية لغتي

ثم سافرت الي ماليزيا لمدة شهر في دورة تدريبية و كانت القشة التي قسمت ظهر البعير ... رجعت و امام عيني هدف واحد ... كيف السبيل الي الهجرة !!!

و للحديث بقية إن كان في العمر بقية

 

 

[Ahmedshaker]

طبعاً كان في ناس كتير لما بتسمع كلمة الهجرة بيركبها ميت عفريت و يقولك انت وضعك كويس في البلد و احسن حتي من الخليج و بقي ليك أسم في السوق ...لية الهجرة ؟؟؟؟؟؟؟؟؟؟


بدأت في السعي مرة أخري للسفر ... و وجدت صديق أعتبرة مثل أخي تماماً ... و كان ذلك في أوائل 2009 و بدأنا التفكير في الهجرة و قال لي " يا أبوحميد ما تيجي نجرب نفسنا في الأيلتس" و كان في حاجة بتتعمل في البريتيش كاونسل تعريف بالامتحان و كيف يتم الحصول علي أعلي الدرجات و كان ثمنة 140 جنية ... ذهب هو ولم أذهب انا و لكنه اعطاني كل المعلومات فأصريت علي اقتسام الفلوس معه ... كان المبلغ بسيطاً لكن المعني كبير ... و هوه مادمنا قررنا خوض الطريق معاً فعلينا ان نتحمل تكاليفة سوياً

و ذهبنا الي الامتحان و حجزنا و كانت المفاجأة الحصول علي ما يجعلنا نهاجر من أول مرة ... لولولولولولولوللي :)

و قال لي " مش قولتلك اننا هنعدي من أول مرة "

المهم بدأنا في تجميع الاوراق و الحصول علي الورق المترجم ... طبعا انا كنت هشرح بالتفصيل ...بس طبعا النظام اتغير و دالوقتي منتظر نظام جديد تماماً في أول السنة القادمة ...فلن يكون هناك جدوي من شرح النظام الخاص بي

في بس ملحوظة صغيرة بالنسبة لورق شهادة الخبرة
إياك ثم إياك ان تكتب بالحرف ما هوه موجود علي الموقع بتاعهم في ال job Duties و الا سيكون محل شك كبير ...انا كتبت حاجة مختلفة تماماً لكنها تحمل نفس المضمون

بدأ صديقي في السؤال علي المحامين ...و كان أرخصهم بياخد 2000 دولار ...الف عند بداية التقديم و الف عند الفيزا ...
وكان سؤال صديقي للمحامي" هوه حضرتك هتقدملي اه"
و كان رد المحامي " هملي الورق معاك و اتابعلك الملف و استقبل الايميل و ارد علية"
صديقي" بس.....؟؟؟ يعني مفيش اي ميزة زيادة لي علشان مقدم معاك"
المحامي" لا "

نصيحتي ...علشان تقدر تعيش في كندا و تحقق اقصي ما تحلم .. محتاج تكون قادر علي الحصول علي المعلومات من علي الانترنت بشكل اساسي و تكون عندك القدرة علي البحث و الفحص و التمحيص كما سيرد في فترة اللاندنج ان شاء الله
فلا تلجأ الي محامي الا لظروف خاصة جداً ..اما في العادي فانت عندم المقدرة في الوصول الي ما تريد دون محامي ... مشاكلهم كتير من كثرة ما قرأت من المنتدي


و كان القرار اني انا و صديقي نجلس نملأ الاوراق بالاعتماد علي الله ثم قراءة الapplication بشكل جيد و مراجعة الانترنت و المطاريد فيما نختلف فية

و تم أرسال الاوراق في سبتمبر 2009 و رجع في اواخر يناير 2010 علشان الفيزا اوفيس كنا كاتبين egypt بدل من cairo

و تم تعديل الاوراق و الارسال مرة اخري في فبراير 2010 و في اخر ابريل 2010 تم فتح الملف و الحصول علي ارقام للملفات و في 26 يونيو 2010 تم حذف وظائفنا من اللستة و كأننا علي رأي صديقي " الباب قفل علي صبعنا و احنا بنقدم"

و بدأ الانتظار حتي بدأنا في إضافة أولادنا الي الملف و كان في شهر اكتوبر 2011 و قد كنت رزقت بطفلة في يوم " 25 يناير 2011" صباح يوم الثورة

ثم تلقيت اول ايميل منهم يوم 15 ديسمبر 2011 لعمل ابدييت و تلقي صديقي هذا الايمل بعدي بشهر بالتمام و الكمال

ثم هوه سبقني باسبوعين في طلب الميديكال جاءة في اواخر فبراير و سبقني بثلاث اسابيع في طلب الباسبورات و كان ذلك في اول يونيو و سافر هو في يوليو وسافرت انا في 4 اكتوبر 2012 و رجعت في 18 أكتوبر 2012

و كان حقاً علي أن ارد الجميل لكل من ساعدني و تحملني في هذا المنتدي الرائع الذي أدمنتة و اكنت مداوم علية لساعات طوال يوميا في انتظار معرفة من وصل له ايميل بالميديكال و من تم طلب الباسبورات منه
كانت ايام صعبة و الانتظار مرير و كان ناس كتير بتشاركني الانتظار باليوم و الساعة

و النصيحة هي " لا تشغل بالك بالانتظار ان كانت التوقيتات في ال avarage لانها ليس لها مقياس محدد "
حاولت كثيرا بطريقة التباديل و التوافيق إيجاد algorithm محدد و لكني لم استطيع الحصول علي معادلة لتحديد تواريخ التقديم


شعوري في لحظة استلام إيميل الميديكال بالذات نظراً لاني عارف ان دة عنق الزجاجة ... كان لا يوصف ... أتذكر اني كنت في المكتب و أول ما قرأت الايميل وجدت نفسي ساجداً لله بجانب مكتبي فرحاً به

كان طلب الباسبورات قد تأخر علي قليلاً و ارسلت ايميل للاستفسار و كان ردهم بعد أربعة أيام بإيميل طلب الباسبورات نفسة و تم ارسالها في 10 أيام و الحصول علي الفيزا ...و تشعر و كأنهم ناسيين الملف و لما افتكروا خلصوا كل حاجة بسرعة


طبعاً اود ان اشكر أناس كثيرين هنا بالمنتدي و خارجة و اولهم
المهندسة أمل
المهندس أيهاب سالم
د. قناوي
محمد زهيري
al kabeeer awy
Dr.Samo
دكتور MOE
أكسلانس
الجلد
Meckeen
بلدياتي salamatarek
m.amd.z
هيما باشا
titogovo ... بتاع عربية الكبدة :)
طبعاً مدام شير و برنس موني و هما ربنا يبارك فيهم تعبتهم بأسألتي الكتير قبل السفر

..... ناس كتير في توبيك ما بعد 28 فبراير 2008 انا بس خايف انسي حد ... لكن الكل يساعد دون انتظار الاجر ... و الله إحنا كويسيين اوي ...محتاجين شوية حاجات تتظبط و نبقي احسن من حضارات كتير قائمة الان

نبدأ في سرد الاستعداد للسفر و النصائح وأحداث السفر نفسة حتي الرجوع الي أرض الوطن و بعدها ال Lesson Learned المستفادة من الرحلة

و للحديث بقية إن كان في العمر بقية

 

 

[canada wait me]

الف شكر على المجهود وردك للجميل للمنتدى

حاجز كرسى رقم 1

 

 

[عبدالرحمن الطويل]

دعوه لموضوعي

الطريق إلى المجهول

وانا حاجز جنب العم الكنداوي اللي فوق

بالتوفيق إن شاء الله

 

 

[مييزو]

إضافة جديدة من حضرتك الكتابة باللغة العربية الفصحة وبالمناسبة دى كنت قريت موضوع أن كندا بتشجع المهاجرين على الإحتفاظ بثقافتهم مع الاندماج فى المجتمع الكندى بمعنى تشجيع اللغة العربية بين العرب وفى نفس الوقت اللغة الانجليزية
مرة و أنا فى السعودية واحد سعودى صيح وعلا صوته على مقيم هندى وقاله أنتا ليش ما تتكلم عربى ؟ أنتا هنا فى السعودية بلد عربى مسلم يبقى لازم تتكلم عربى ممكن يكون السعودى عنده حق بس ارهاب الناس ثقافيا أعتقد مش مظبوط ويمكن عشان كده الشعب الإنجليزى محترم عن الفرنسيين فى أثناء احتلالهم فى النقطة دى فرض الثقافة على الشعوب ودى نقطة احترام نحفظها لكندا وممكن حضرتك تفيدنا فيها أكتر
معلش زودت شوية بس عاوزين نسمع تفاصيل حضرتك أكتر
تحياتى وبالتوفيق

 

 

[dentist mohamad]

و أنا حاجز أول صف

 

 

[ابو اياد]

اسلوب رائع وشيق جدااا انا متابع فى الصف الاول

 

 

[nmhaggag]

وانا معاكم
نزل يا ابني شاي وسحلب وعناب للرجاله

 

 

[canada wait me]

اقتباس المشاركة الأصلية كتبت بواسطة عبدالرحمن الطويل وانا حاجز جنب العم الكنداوي اللي فوق بالتوفيق إن شاء الله

يا خبر ابيض المهندس عبد الرحمن جنبى بنفسة
لا كدة يبقى المكسرات والمشاريب عليا واوعى تحلف