طب الاسنان في كندا

[dr_mohamedimam]

اللي كمان عايز أتأكد منه.. هل تقديرنا و درجاتنا في البكالوريوس عندنا حتفرق في القبول؟؟؟ و بالنسبالي انا عملت دبلومة سنة بعد التخرج في جراحة الفم ..فحياخدوا بمجموعي و تقديري في البكاوريوس وللا اللي في الدبلوما؟؟؟ وللا أصلا ملهومش دعوة بتقديراتك...لان اللي فهمته انك لو حتقدم على برنامج الجامعة حيبقوا عايزين مجموعك .. لكن لو سكة المعادلة الطويلة اعتقد ملهومش دعوة بالمجموع..

 

[OmarDent]

مممم بص يا سيدي موضوع القبول دة طبعا مرتبط تقريبا بكل حاجة في ملفك
لو انت راجل جايب في البكالريوس 90% و جايب تويفل عالي و في امتحان ال Eligbility جايب سكور عالي أكيد هتكون فرصك أعلي كتير من واحد جايب تقدير نص نص و هكذا
المشكلة ان جامعة من جامعات أونتاريو ( هما جامعتين بس في أونتاريو اللي موجود بيهم البرنامج دة ) مش فاكر أي واحدة فيهم كانت بتاخد 25 واحد في السنة و عندك الهنود صواريخ مذاكرة و بيجيبوا سكورات عالية جدا و عادة هما و الاسيويين اللي بياخدوا الأماكن دي
المهم كلامك متطابق مع اللي أنا قلته من ناحية سكك المعادلة ... و طبعا موضوع ان 300 بس اللي مقدمين فانتا عندك الاف هناك مستنيين الفرصة :( و متنساش ان كيبيك عمالة تجيب ناس و بأعداد كبيرة غير اللي انتا شايفه في الفيدرال
العمل كمساعد طبيب أسنان بيتطلب ترخيص و دة مش بتاخده الا لما تاخد كورس مش فاكر كان 6 شهور أو سنة و تكلفته كانت معقولة تقريبا 5000 دولار بس الاقبال عليه عالي و كانوا كاتبين جنبه Competitive لكن أكيد لما دكتور أسنان يقدم حتي لو مش معادل هيكون ليه أولوية ( و الله أعلم )
نرجع تاني للمعادلة .. أنا شايف ان التدريب التأهيلي دة هيتطلب من كله و بالتالي هتكون المشكلة انك تتقبل في جامعة بتقدم البرنامج دة
لكن نرجع نقول انظام الجديد دة برضو فيه ميزة ... علي الأقل انه هيستوعب عدد كويس من الناس الفطاحل بتوع اسيا و يزود عدد الفرص المتاحة في برامج المعادلة (النظام القديم ) للي مش هيفلح في انه يلتحق ببرنامج التدريب المطلوب للمعادلة ( النظام الجديد )
بالنسبة لي أنا مستني ان ملفي يتقبل الأول ( ربنا يسهل ان شاء الله ) و بعد كدة ابدأ أتحرك و أقدم
لكن أنا شخصيا بفكر اني أقدم علي دراسة تانية غير الأسنان بحيث انها تزود فرصي في العمل الي أن يشاء الله ان موضوع المعادلة دة يمشي
أنا أصلا كنت بفكر اني أدرس حاجة في مجال ادارة الأعمال و أنا هنا في مصر و قبل ما أفكر في موضوع كندا و كنت مقدم علي MBA في الجامعة الأمريكية و أخدت ال GMAT Test و جبت فيه سكور كويس الحمد لله و قبلت في الجامعة الأمريكية .. لكن تراجعت لبعض الأسباب منها ان التعليم في مصر استثمار مش امن و عائده صعب جدا التكهن بيه و ال MBA دي كنت هصرف عليها حوالي 150-200 ألف جنيه
فبصراحة أنا بدأت افكر تاني اني أقدم علي Full Time MBA في كندا و و دي ممكن تستغرق حوالي سنة
لكن حتي الان لسة مسألتش حد من الأخوة اللي موجودين في كندا عن جدوي الدراسة دي و فرص انها توفرلي عمل مناسب .. و وجود GMAT معايا هيسهل اني أقدم للجامعات يعني هقدم و مش هخسر كتير ان شاء الله و لو قبلت هتكون فرصة كويسة لو مفيش أي فرص أحسن ... انما لو لسة هجهز نفسي عشان GMAT و TOEFL أكيد كنت هفكر قبل ما أضيع كل الوقت دة في حاجة ممكن مستخدمهاش
ياااااه أنا اتكلمت كتير أوي
و علي فكرة يا دكتور محمد أنا بعتلك علي الخاص ردا علي كلامك من يومين لكن انت مرديتش

 

 

[dr_mohamedimam]

ليه بس يا دكتور عمر.. أنا بعتلك على الماسنجر نفس اليوم ... :) و بنفس اسمي هنا ...
كل ما بسمع حد من الأسنان ناوي يغير الكرير.. بكتئب... :(
ربنا يصلح الحال يا رب و يوجهنا للخير...

 

 

[OmarDent]

ههههه لا مفيش اكتئاب و لا حاجة ان شاء الله
طيب انت رأيك ايه في وضع أطباء الأسنان في مصر ؟؟ أهو دة اللي يجيب اكتئاب صح
أنا في الشوية اللي اشتغلتهم في الصحة كانت الممرضة اللي معايا في عيادة الأسنان بتاخد حوافز أكتر مني ... هاه ايه رأيك ؟؟ عشان كدة خدت أجازة بدون مرتب من الحكومة
و علي فكر موصلنيش حاجة منك خالص ... دي مش أول مرة تحصل معايا .. عموما ابعتلي ايميلك

 

 

[dr_mohamedimam]

اقتباس المشاركة الأصلية كتبت بواسطة OmarDent ههههه لا مفيش اكتئاب و لا حاجة ان شاء الله طيب انت رأيك ايه في وضع أطباء الأسنان في مصر ؟؟ أهو دة اللي يجيب اكتئاب صح أنا في الشوية اللي اشتغلتهم في الصحة كانت الممرضة اللي معايا في عيادة الأسنان بتاخد حوافز أكتر مني ... هاه ايه رأيك ؟؟ عشان كدة خدت أجازة بدون مرتب من الحكومة و علي فكر موصلنيش حاجة منك خالص ... دي مش أول مرة تحصل معايا .. عموما ابعتلي ايميلك

الوضع مش محتاج نتكلم عليه ماهو واضح زي الشمس و اديك قلت الممرضة بتاخد حوافز أكتر.. أنا سبت مصر كلها و رحت اشتغلت في السعودية اساسا.. هنا يمكن ماديات أحسن بس مستوى الشغل ضعيف خالص بالنسبة لل GP
عشان كدا عايز أدرس في اي حتى تانية .. ربنا يعين..
هو صحيح مفيش ولا طبيب أسنان شفته معدي من هنا... !!!!! هم ما بيهاجروش وللا ايه؟؟؟

انت موجود عندي في الماسنجر خلاص...

 

 

[Dr Mariam]

اقتباس المشاركة الأصلية كتبت بواسطة OmarDent ههههه لا مفيش اكتئاب و لا حاجة ان شاء الله طيب انت رأيك ايه في وضع أطباء الأسنان في مصر ؟؟ أهو دة اللي يجيب اكتئاب صح أنا في الشوية اللي اشتغلتهم في الصحة كانت الممرضة اللي معايا في عيادة الأسنان بتاخد حوافز أكتر مني ... هاه ايه رأيك ؟؟ عشان كدة خدت أجازة بدون مرتب من الحكومة و علي فكر موصلنيش حاجة منك خالص ... دي مش أول مرة تحصل معايا .. عموما ابعتلي ايميلك

هاي يدكتور عمر شكرا بجد علي كل المعلومات الي بتحاول توفرهالنا انا بجد محبطه جدا علي فكره انا كنديه مامتي مصريه ولسه مخلصه بكلوريوس طب اسنان من مصر وبحاول اعمل المعادله في كنده بس للاسف مش لقيه اي حد يقدر يسعدني اعمل ايه انا تيهه وخايفه اروح كندا ومعرفش اعمل حاجه انا الان في السعوديه بشتغل بس الرواتب ولا ليها فيده خصوصا اني مش متخصصه وللاسف في ناس اعرفهم مخلصين البروجرام السنتيت بس مش رضين يقولولي اي حاجه يلا ربنا يدي كل واحد علي قد نيته بس بجد انا فرحت لما لقيتك كاتب كل المعلومات دي حسيت ان الدنيا لسه فيها ناس كويسه بتحب تساعد الغير ارجوك اذا قدرة تساعدنا باي معلومات يريت متبخلش وربنا يجزيك خير عليها وشكرا بجد شكرا جدا ربنا يحميك ويوفقك

 

 

[محمد منجي]

اقتباس المشاركة الأصلية كتبت بواسطة Dr Mariam هاي يدكتور عمر شكرا بجد علي كل المعلومات الي بتحاول توفرهالنا انا بجد محبطه جدا علي فكره انا كنديه مامتي مصريه ولسه مخلصه بكلوريوس طب اسنان من مصر وبحاول اعمل المعادله في كنده بس للاسف مش لقيه اي حد يقدر يسعدني اعمل ايه انا تيهه وخايفه اروح كندا ومعرفش اعمل حاجه انا الان في السعوديه بشتغل بس الرواتب ولا ليها فيده خصوصا اني مش متخصصه وللاسف في ناس اعرفهم مخلصين البروجرام السنتيت بس مش رضين يقولولي اي حاجه يلا ربنا يدي كل واحد علي قد نيته بس بجد انا فرحت لما لقيتك كاتب كل المعلومات دي حسيت ان الدنيا لسه فيها ناس كويسه بتحب تساعد الغير ارجوك اذا قدرة تساعدنا باي معلومات يريت متبخلش وربنا يجزيك خير عليها وشكرا بجد شكرا جدا ربنا يحميك ويوفقك

اهلا يا دكتورة انا مراتي ناوية تبدا المعادلة احنا دلوقتي في تورنتو ممكن تتفقوا وتشوفو هاتعملو ايه مع بعض واللي عنده معلومة يساعد بيها التاني على فكرة احنا برده في السعودية...

 

 

[dr_mohamedimam]

يا دكتور مؤمن .. أنا ما قصدتش انك بتدعو للإحباط.. أنا كنت في نفس مرحلة الاحباط دي.. خصوصااني ماشفتش تجربة لسة لطبيب أسنان هاجر.. و اشتغل كطبيب أسنان هناك.. و محدش قال ان المشوار سهل .. أكيد صعب طبعا و لازم الواحد يضع كل الاحتمالات بس ربنا ان شاءالله مش حيضيع مجهودنا .. أنا لية زميل لسة مهاجر جديد و لسة في أول مشوار المعادلة.و بالتالي لسة مفيش نتائج..

انا عايز أعرف صاحبك كانت ايه المشكلة بالضبط اللي واجهته في المعادلة؟؟؟ عشان نستفيد لان فعلا عايز اشوف تجربة واقعية لحد عمل معادلة لأسنان هناك.. .. و عايز أعرف هو ماشي في انهي سكة .. ال IDAPP وللا المعادلة اللي هي امحانات نظري و عملي ?

اقتباس المشاركة الأصلية كتبت بواسطة dr_mohamedimam اللي فهمته انه قدامك حل من اتنين .. 1 - تقدم في برنامج جامعي اسمه (IDAPP ) = International Dentist Advanced Placement Program for Foreign-Trained Dentists اللي هم احنا ... تمام ده بعد ماتخلصه (مش عارف مدة التدريب قد ايه) بتدخل على سنة تالتة و رابعة في الكلية ... و بتتخرج بدرجة DDS=doctor of dental surgery و البرنامج ده بيأهلك انك تدخل امتحان البورد الكندي اللي حسب ما فهمت (كلهم بيدخلوه حتى الكنديين )عشان يتم اعتماد شهادتك و تترخص...و الامتحان ده نظري و عملي طبعا.. و من شروط انك تدخل برنامج ال IDAPP انك تكن معاك الايلتس و تكون ناجح في امتحان تقييم اللي هو EE=eligibility exam (و ده لسة مش قادر اعرفه ... هو يفرق ايه عن كل الامتحانات اللي حندخلها دي؟؟) ده طريق.. الطريق التاني : تدخل في سلسلة امتحانات ... و تدريبات و تقييمات ... و بعد ما تعديها تمتحن ال NDBE و بيبقى امتحانين written & OSCE اللي هو حتمشي في الخطوات بالضبط اللي في الصفحة دي https://www.ndeb.ca/en/non_accredited...graduates.html .....................

 

 

[Dr.memo]

السلام عليكم

انا عضو جديد في المنتدى و سعيد جدا بوجودي في هذا المنتدى طبعا كالاخوة يأست و انا ابحث في المنتديات عن هجرة اطباء الاسنان الى كندا و بصراحه الجوجل لم اجد فية موضوع يفيدني فصدفة ادخل على هذا المنتدى اذ ارى العديد من الاشخاص يعانون من معاناتي اذ انهم يفكرون لمعادلة شهادتهم الى كندا و لكن لا يعرفو احد هناك لكي يساعدهم بكيفية المعادلة لقد قرات المواضيع ولي اسفسار

اسمي الدكتور معاذ و انا من الاردن درست بكالوريوس طب اسنان في مصر بجامعة مصر للعلوم و التكنولوجيا و حصلت على معدل جيد جدا مرتفع عام 2006 و بعد تخرجي رجعت الى الاردن و ادرس الان ماجستير جراحة وجه و فكين من جامعةالاردن للعلوم و التكنولوجيا و معدلي 79.8 و انشالله في شهر 12 ساناقش الرساله لقد اعلمني احد الاصدقاء ان كندا فتحت باب الهجره ل اطباء الاسنان و بصراحه ذهبت الى احد المكاتب و ظيفتهم فقط تامين الهجره و الحمد الله مستلزمات الهجره من اقرباء و والى اخره تنطبق علي و افكر الذهاب الى تورينتو لقريب لي هناك و لكن مكتب الهجره لا يعرفون اي شيء بالنسبة لاطباء الاسنان و معادلة شهادتهم قرات في المنتدى عن المعادلة وجدتها صعبة وتعتمد على النسب للقبول الجامعات
سؤالي

عند الذهاب الى كندا تورينتو سمعت ان الحكومه الكندية تعطي بعد 6 اشهر مبلغ مالي للشخص و زوجته و اطفاله لحد ما يعادل شهادته و سؤالي الثاني هل استطيع العمل بداية مساعد طبيب اسنان لانه بصراحه يريدون مني العمل في جل الصحون و تنظيف السيارات لحد معادلة الشهاده و كيفية معادلةالشهادة هل فقط امتحانات او يجب ان ندخل ا لجامعه سنتين لمعادلتها هل يوجد امتحانات بدايه لكي نمارس طب اسنان و لو ماساعد هل معادلة طب الاسنان للذين يحملون الجرين كارد كندي مكلف لقد قرات في المنتدى ان دخول الجامعات لمعادلة طب الاسنان نسبة بسيطة طب و نحن الذين سنهاجر هناك ماذا تفعل الحكومه الكندية لهم بالرغم انهم يريدون طب اسنان انا جدا خائف حابب اهاجر و لكن لم اجد شيء واضح

اعرف الموضوع طويل اتمنى الجواب من شخص طبيب اسنان عادل شهادته في كندا لكي استفيد منها

شكرا لكم

 

 

[dr_mohamedimam]

طيب أنا عندي سؤال حيوي... هل الطب البشري فيه نفس التعقيدات و الصعوبة بتاعة الأسنان؟؟
يعني لو حبيت اني أدرس طب بشري هناك .. حعيد من أول سنة طب بشري بقى وللا ايه ؟؟و هم كام سنة طب هناك؟؟؟