المختصر المفيد في نظام الهجرة الجديد لكندا Express Entry

[mostafasaad]

دعوه لموضوعي

كندا كعب داير

بسم الله الرحمن الرحيم

أعزائي الإخوة المطاريد..

طبعا انتوا عارفين أن أنا منشئ التوبيك "كل شئ عن نظام الهجرة الجديد لكندا Express Entry" والحمد لله الموضوع أصبح من أهم الموضوعات في أبواب الهجرة .. ولكن المشكلة فيه أننا بدأنا التوبيك في بداية أكتوبر 2014 حينما لم تكن الكثير من المعلومات متوافرة وبالتالي كنا بنكتب المعلومات المتوفرة لدينا ثم تم إضافة معلومات جديدة لاحقا عندما تم الإعلان عن النظام الجديد بالتفصيل في بداية ديسمبر.. ثم ظهرت تفاصيل أكثر وأكثر مع بدء تطبيق النظام في بداية يناير 2015 ثم توالي السحوبات..

بالإضافة إلى ذلك تم التطرق إلى موضوعات كثيرة ومناقشات متوسعة بين الأعضاء وهذا بالطبع أمر جيد ولكنه يصعب المهمة كثيرا على الوافدين الجدد على الموضوع أو على موضوع الهجرة عموما في الحصول على أي معلومة مما يدفعهم لطرح تساؤلات ربما طرحت من قبل عشرات المرات ولكن يصعب عليهم الوصول إليها بسبب كثرة المشاركات والردود

لذلك رأيت أن أقوم بإنشاء موضوع جديد يتم فيه شرح النظام الجديد من الألف إلى الياء وشرح خطوات التقديم بحيث يكون مرجعا لمن يريد الحصول على المعلومات حول الموضوع في حين سيتم غلق الموضوع أمام الردود لعدم التشتيت، ويبقى الموضوع الآخر مفتوحا لطرح التساؤلات، وكذلك موضوع المستشار المجاني

في حالة وجود أي ملاحظة أرجو مراسلتي على الخاص أو على الموضوع المفتوح من أجل تحسين هذا الموضوع والوصول به إلى أعلى مستوى ممكن

 

[mostafasaad]

دعوه لموضوعي

كندا كعب داير

سأبدأ في الكتابة في هذا الموضوع قريبا نظرا لانشغالي حاليا.. فاعذروني وانتظروني

 

 

[Hany Said]

اقتباس المشاركة الأصلية كتبت بواسطة mostafasaad سأبدأ في الكتابة في هذا الموضوع قريبا نظرا لانشغالي حاليا.. فاعذروني وانتظروني

ربنا يباركلك يا مهندس مصطفي و الرجاء يكون بسرعة علشان الواحد متلغبط شوية في الموضوع الثاني

 

 

[Mighty red]

سؤال هام ارجو الافاده<<<<<<

وانا بعمل شهادة الخبره فيه شركتين علاقتي انقطعت بيهم فمسحتهم من ال CV والسنتين اللي قضيتهم معاهم ضيفتهم مع شركتي الحاليه ........فيها مشكله ولا عادي ؟؟؟

السؤال الثاني <<<
كان عندي جواز سفر قديم قبل الحالي وغيرته في ٢٠١٢ بواحد جديد وطبعا القديم مش معايا يا تري بيحتاجوا نسخه من القديم خصوصا ان بداية سفري للسعوديه كانت اول تاشيره علي جوازي القديم.

 

 

[sada]

اقتباس المشاركة الأصلية كتبت بواسطة mostafasaad سأبدأ في الكتابة في هذا الموضوع قريبا نظرا لانشغالي حاليا.. فاعذروني وانتظروني

لو سمحت فيه مكتب إسمه ريتش ايميجريشن فتح فرع فى مصر للهجره هل المكتب دا موثوق منه ولا لا ولو حد يعرف مكاتب موثوق منها فى مصر ياريت يقول
posted via mobile device

 

 

[shriefpure]

منتظرينك يا استاذ مصطفى

 

 

[M. Yousef]

السلام عليكم

بعد اذنك يا باشمهندس مصطفى .. انا شفت الناس بتسأل كتير عن ازاى تبدأ ف الاكسبريس انترى و انت مشغول (ربنا يعينك و توصل على خير) ففكرت انى اكتب هنا كام ملاحظة كدا كنت مجمعهم بنية انى اعمل توبك زى دا.. بس انت سبقت بأه

ف انا هاحط الكلمتين دول و انت تبقى تكملهم و تصلح اللى فيهم لما يبقى عندك وقت ان شاء الله.

مبدئيا: الاكسبريس انترى مش نظام جديد للهجرة بدل الفيدرال و كيبيك.. هو مجرد طريقة جديدة للتقديم ف نفس الأنظمة القديمة (فيدرال – ترشيح مقاطعة – نظام الخبرة الكندية CEC ) و بيلمهم كلهم تحت سقف واحد زى ما بيقولوا.
يعنى ايه؟ يعنى انت لسا هتقدم فيدرال... يعنى لازم تتوافر فيك شروط الفيدرال القديمة (ما عدا لستة الوظائف الملعونة ... من النهاردة مافيش لستة.... انا اللستة هههههههه)

طيب هى ايه كانت شروط الفيدرال (بسرعة كدا للى لسا بادئين مشوار الهجرة و مش عارفين الحاجات دى):

اولاً: تعدى ال 67 نقطة من 100 اللى بيتحسبو بنفس الطريقة القديمة:

• 25 نقطة على التعليم: 21 لو بكالوريوس او ليسانس ، 23 لو ماستر و ال 25 كلها لو دكتوراه. و لازم طبعا تعمل تقييم (مش معادلة) من WES لغير المهن الطبية.
• 28 نقطة على اللغة: 24 نقطة على اللغة الاساسية (جنرال ايلتس لو انجليزى و تيف لو فرنساوى .. بيتحولو الاتنين لحاجة اسمها Canadian Language Benchmark (CLB)) و 4 نقط لو امتحنت اللغة التانية بردو و جبت فيها سكور. تفاصيل حساب النقط حسب سكور كل امتحان موجودة هنا: https://www.cic.gc.ca/english/immigra...ge-testing.asp انزل لآخر الصفحة و دوس على Federal skilled worker program هتلاقى جداول حساب النقط على حسب انت الانجليزى لغة اساسية و الفرنساوى تانية ولا الفرنساوى لغة اولى و انجلش تانية. حد ادنى من اللغة الاساسية اللى هو CLB 7 اقل من كدا ما ينفعش تقدم.
• 15 نقطة على سنين الخبرة برا كندا فى خلال اخر 10 سنين: 9 لاكتر من سنة و اقل من 2 ، 11 لاكتر من 2 و اقل من 4 ، 13 لاكتر من 4 و اقل من 6 و ال 15 كلهم للأكتر من 6 سنين خبرة. مش شرط متواصلين بس حد ادنى للتقديم سنة خبرة فى ال NOC اللى هتقدم عليه اقل من كدا ما ينفعش تقدم.
• 12 نقطة على السن: اقل من 35 سنة بتاخد 12 نقطة كلهم. بعد كدا كل ما السن بيزيد النقط بتقل .. مش فاكر كام بالظبط لكل عمر. حد ادنى 18 سنة اقل من كدا ما ينفعش تقدم.
• 10 نقط لعرض العمل المدعم ب LMIA: غالباً مش هتعرف تجيبه فى المرحلة المبكرة دى الا فى حالة من اتنين: يا اما تكون حاليا بتدرس او بتشتغل جوا كندا يا اما تكون سوبرمان و مخبى شخصيتك الحقيقية من الأشرار!
• 10 نقط على Adaptability: و دا بند مطاط كدا بيديك 5 نقط لو انت او زوجتك (او زوجك) ليك قرايب درجة اولى ف كندا و 5 نقاط تانيين لو حد فيكو اشتغل او درس سنة كاملة او اكتر جوا كندا.

ثانيا: يكون معاك مبلغ معين بيتحسب على حسب عدد افراد الأسرة و تجيب شهادة بنكية بكدا (نادراً ما بيقبلو ممتلكات عينية بدل الكاش) تفاصيل المبلغ هنا: https://www.cic.gc.ca/english/immigra...lled/funds.asp

ثالثا: يكون معاك اثباتات ورق لكل الحاجات المطلوبة فوق دى:

• شهادات التقييم من WES ليك و لزوجتك او زوجك (المهن الطبية ليهم تقييم مختلف ماعرفش عنه كتير .. ممكن حد من الدكاترة او الصيادلة هنا يفيدكم و ما اكثرهم ما شاء الله)
• شهادات الايلتس او التيف او كلاهما ليكو انتو الاتنين
• و شهادة خبرة من الشغل بمواصفات معينة (تحتوى على اسم و عنوان و تليفون و ايميل او فاكس الشركة، توضح تاريخ الالتحاق بالعمل و تاريخ ترك العمل لو استقلت و تاريخ اصدار الشهادة و المسمى الوظيفى و عدد ساعات العمل و الراتب الشهرى او السنوى و المهام اللى بتأديها و اللى طبعا لازم تكون شبه المهام الخاصة بال NOC بتاعك هنا https://www5.hrsdc.gc.ca/NOC/English/...h.aspx?val65=* بس طبعا ما تكونش متاخدة كوبى بيست. بلاش فهلوة المصريين من اولها كدا.

دا باختصار شروط ال Federal Skilled worker لو عديت ال67 يبقى تنفع تقدم مش مهم جايب 68 ولا 98 بس ما يكونش فى مانع من الحاجات اللى قلنا عليها ما ينفعش تقدم من غيرها. لو فى حاجة من دول يبقى حتى لو معدى ال 67 مش هتعرف تقدم.

طيب خلاص استوفينا جميع الشروط و عدينا ال 67 و جمعنا الورق اللى يثبت. نبعته ازاى و لمين علشان نقدم؟

لأ سيادتك مش هتبعته لحد... دا بأه الاختلاف اللى عمله الاكسبريس انترى.
انت هتعمل بروفايل تحط فيه كل الحاجات دى و تنضم ل مجموعة المنتظرين ( ال Pool) و تستنى تجيلك دعوة للتقديم Invitation to Apply (ITA) . لو اختاروك و بعتولك دعوة ساعتها هاتبعتلهم كل دا مع شوية حاجات تانية اونلاين بردو و خلاص.
المرحلة الللى بعد ما ييجيلك ITA شرحها زميلنا EG_Mohamed فى التوبك بتاعه هنا https://www.almatareed.org/vb/showthread.php?t=749247 و هو ما شاء الله اول المطاريد اللى يجيلها دعوة ربنا يباركله و يوفقه ف حياته الجديدة. قولوا آمين.

البوست دا كدا يعتبر مقدمة تمهيدية للناس اللى هتبدأ المشوار من الصفر و لسا بتتعرف على الدنيا.

كان لازم اقول الكلام دا علشان لاحظت كام حالة كانو بيجيلهم انهم not eligible فى الاكسبريس انترى و السبب كان انهم ركزوا مع شروط ال EE مع انهم مش مستوفيين الشروط الاساسية بتاعة ال FSW.
فى البوستات الجاية المهندس مصطفى و العبد لله هنحاول نتكلم خطوة بخطوة عن ال EE و شروطه و كيفية عمل البروفايل و التقديم ان شاء الله.

 

 

[sano-ro]

[
ثالثا: يكون معاك اثباتات ورق لكل الحاجات المطلوبة فوق دى:

• شهادات التقييم من WES ليك و لزوجتك او زوجك (المهن الطبية ليهم تقييم مختلف ماعرفش عنه كتير .. ممكن حد من الدكاترة او الصيادلة هنا يفيدكم و ما اكثرهم ما شاء الله)
• شهادات الايلتس او التيف او كلاهما ليكو انتو الاتنين

بعد التحية
لو ممكن اسال بخصوص النقطه دى من كلام حضرتك افهم ان لازم اعمل تقييم على wes لشهادة زوجتى و ايضا لازم زوجتى يكون معاها الايلتس .
لو انا معملتش كده لن يتم قبول الطلب ......
السؤال التانى من فضلك من كلام حضرتك انى مش ببعت اصول الورق ان انا مثلا بسحب الورق اسكانر و يتبعت اتاش .

وشكرا

 

 

[mr_hyip]

اقتباس المشاركة الأصلية كتبت بواسطة sano-ro [ ثالثا: يكون معاك اثباتات ورق لكل الحاجات المطلوبة فوق دى: شهادات التقييم من WES ليك و لزوجتك او زوجك (المهن الطبية ليهم تقييم مختلف ماعرفش عنه كتير .. ممكن حد من الدكاترة او الصيادلة هنا يفيدكم و ما اكثرهم ما شاء الله) شهادات الايلتس او التيف او كلاهما ليكو انتو الاتنين بعد التحية لو ممكن اسال بخصوص النقطه دى من كلام حضرتك افهم ان لازم اعمل تقييم على wes لشهادة زوجتى و ايضا لازم زوجتى يكون معاها الايلتس . لو انا معملتش كده لن يتم قبول الطلب ...... السؤال التانى من فضلك من كلام حضرتك انى مش ببعت اصول الورق ان انا مثلا بسحب الورق اسكانر و يتبعت اتاش . وشكرا

لازم لكم انتو الاتنين ممكن تروح الكلية معاها حضرتك و تشوف الموضوع

 

 

[aikhalil]

[*]شهادات التقييم من WES ليك و لزوجتك او زوجك (المهن الطبية ليهم تقييم مختلف ماعرفش عنه كتير .. ممكن حد من الدكاترة او الصيادلة هنا يفيدكم و ما اكثرهم ما شاء الله)[*]شهادات الايلتس او التيف او كلاهما ليكو انتو الاتنين



السلام عليكم و رحمة الله و بركاته
استاذنا العزيز (ارجو تقبل اسئلتي بصدر رحب )
لازم الشهادات و الايلتس ليا انا و زوجتي و لا ليا انا يكفي ، و هل زوجتي برضو لازم تجيب سكور معين عشان تتقبل و لا لا ؟
و شكرا