نفسي اضحك من قلبي

[toota]

الصحف المصرية والعربية

احباط

يأس

حروب

مشاكل اقتصادية

مشاكل اسرية

وفاة

مستجدات ومشاكل غير مستحبه يوميا


نفسي اضحك من قلبي مرة...مع اني بحب الهزار وبهزر كتير اوي...بس مبضحكش من قلبي ابدا...مبحسش ان الفرحه بتلمس احساسي بجد من جوه....

الحزن واليأس والاحباط بيلفوا خيوطهم حوالين قلبي ويخنقوه....خصوصا ان العمر بيجري...والكتاكيت بتكبر ..اولادي يعني وكل واحد بيشوف حياته مع الوقت وبيبعد....

الاهل بعاد...واخبارهم بتوصلني من بعيد مفيش معايشه يومية ليهم ولا لامورهم...الخبر الحلو بيقولوه والوحش بيداروه عشان ميشغلونيش......


عايزه اضحك وبجد من قلبي...وبقوة تنسيني كل الي عايشينه...


حد عنده طريقة مجربة مش مجرد كلام انشاء؟

 

[مصرية]

Join the club

 

 

[نانا]

السلام عليكم ورحمة الله وبركاته
حسيته اوي كلام حضرتك يا توتا ولفت نظري العنوان اوي وبتأسف بجد اني بشارك مش عشان اساعدك لا ده عشان اني انا كمان حاسة بنفس الإحساس الضحكة مش صافية والناس بتتخم في ضحكي وهزاري ما يعرفوش ان ورا الضحك والهزار ده نار بتحرق في قلبي وان بعد ما بسيبهم ببكي لاني فعلا مش بقدر اضحك ضكحة حاساها بحس اني منافقة في ضحكتي وان ضحكتي دي بتتعبني اكتر ما بتريحني
مش عارفة ايه السبب بالظبط بس حاسة ان كل الظروف والحياة بما فيها برغم اني لسة ما شوفتش حاجة فيها انا مجرد طالبة بدرس ولسة ما شوفتش من مشاكل الحياة حاجة
حاسة ان الظروف غلط بتعب لنفسي ولغيري في نفس الوقت مش عارفة ليه كدة عمري ما كنت كئيبة كدة لكن بجد مش عارفة اعمل ايه مع نفسي ممكن يكون لاني مش على درجة الإيمان اللي المفروض اكون عليها انا الحمد لله بأدي كل فروضي والحاجات اللي عليا وبراعي ربنا في كل حاجة بس حاسة انه ده مش كفاية لاني بجد محتاجة اوي لربنا ومحتاجة اني اصلي اكتر واستعين بربنا اكتر واكتر وانا ما عملتش ده بجدية انا متأكدة انه هو ده الحل بجد
يا ريت يا أخت توتا لو قدرتي تعرفي ايه الحل تفيديني
أنا بقالي فترة متأخرة ومقصرة اوي في المنتدى فبجد متأسفة اوي اني بعد الفترة دي اشارك بالكآبة دي بجد اعذروني

 

 

[حرررم بم بم]

اقتباس حد عنده طريقة مجربة مش مجرد كلام انشاء؟

أطبخي بسمن النخلتين نفسيتك ترجع في أكلتين

 

 

[moka]

.
.

مش عارف اواسيكي ولا اواسي نفسي لان الحال من بعضه اضف على ذلك وحدة مؤلمة لا انيس ولا ونيس فيها ..! موضوعك قلب عليا المواجع ..! ونفسي افتح باب جنبك واقول اللي يضحك مدام توتا اوعى ينسى يضحكني انا كمان ..!

اسف على المداخلة الغم دي مني ..

 

 

[haya]

للأسف صعب أوي حد ينصح حد إزاي يفرح من قلبه
كل واحد وخصوصا وهو ناضج بما يكفي هو بس اللي عارف فين مفتاح السعاده الحقيقة جواه .أنا عارفة مفتاح سعادتي في إيه بالتحديد و الحاجة ديه لما بتنقص بتبقي حياتي صعبة اوي ومش بأحس بطعم أي حاجة
فيه إنسان مفتاح سعادته بس في راحة البال
وفيه إنسان مفتاح سعادته إهتمام إللي حواليه بيه
وغيره في المال وغيره في الاكتناز وغيره في الحب وغيره القرب من ربنا ومساعدة الناس وغيره نجاحه العملي في مهنته وشغله وتحقيق طموحه...
صدقيني كل واحد عارف كويس أوي أوي فين مفتاح سعادته الحقيقي ..انت يا توتا أكيد عارفاه ولو المفتاح مش موجود ماحدش هايقدر يديلك بديل ...
ربنا يفرح قلبك وقلب الجميع ...

 

 

[nash]

علي رأي الفاضله ورده... ده أحنا في غربتنا ...لو لحظه تعبتنا ..بتبان همومنا جبال...

للأسف الغربه في حد ذاتها شيء صعب مهما وصفناة للأهل والأصحاب ما بيصدقوش ولا بيحسوة زي اللي أتغرب وعاش بعيد... لا هو طايل يكون زي أهل البلد.ولا قادر يتفاعل بطريقه أيجابيه مع مشاكل الوطن لما بينزل أجازة.... يعني الخسارة مضاعفه....

موضوع التعايش مع أمور الأهل في الغربه.سلاح ذو حدين..مع أننا هانواسيهم ونحس أننا معاهم..لكن أحيانا كتيرة بتزيدي همومك اللي أصلا مش ناقصاها وأنتي في غربتك.... ممكن حد يقول أني أنانيه..بس ابدا لإني أكتر واحده حريصه علي معرفه أمور أخواتي واهلي ومعايشتهم بس أحيانا بكون أكتفيت تماما ومش قادرة ازود عبأ جديد علي نفسي....

ألطف حاجه لما كنت أتصل فيهم وألاقي كم أخبار تغم بطريقه غير عاديه ..مين أتوفي ومين أطلق ومين خسر فلوسه كلها ومين دخل المستشفي...وقتها حسيت بإني بأستغل نفسيا ..بمعني أني بتصل علشان أسمع صوتكم واحس بالأمان ...أفاجيء بكل هذا الغم علشان احس أني في نعمه أني بعيده عن المشاكل ؟؟

علي طول أخدت خط دفاعي محترم...رساله طويله حكيت فيها كل أخباري وكل موقف سيء مر عليا من اول دخول المستشفي نتيجه حاله تسمم شديده لاحمد ..لغايه التكييف اللي ضرب وولع وكنا كلنا هانروح فيها... وختمت رسالتي..بطلب صغير وخجل جدا..ياريت الكام دقيقه اللي بكلمكم فيها ما أسمعش أخبار كئيبه غير أخباركم أنتم... وإلا ...إن عدتم عدنا.....


توتا لا أعرف النصيحه المفيده لك فكلنا في الهم شرق .... لكن اللي أعرفه بشكل ممتاز إزاي أضحك علي نفسي وإزاي أقدر أشغل نفسي بشكل مستمر حتي أصل إلي مرحله الإنهاك وبالتالي ما ألاقيش وقت للتفكير في أي سلبيات بتمر في حياتي وأي يأس وإحباط....

ربي يبعد عنك كل الغم ويسعدك ويفرح قلبك ...آمـــــــــين

 

 

[tweety]

اقتباس المشاركة الأصلية كتبت بواسطة حرررم بم بم أطبخي بسمن النخلتين نفسيتك ترجع في أكلتين

متسمعيش كلامه..













خليكي ف جنه لانها "ايزي اوبن"....والطبيعي يكسب

 

 

[بندق]

لما أكون مكتئب بأقص شعرى وأعمل أكلة مفتكسة .. وأخرج أقعد على قهوة عالبحر مباشرة وأديها حجر شيشة وكله يبقى ألسطة وتمام ..
















يخف الاكتئاب شوية بس بيرجع انى

 

 

[Sonesta]

دعوه لموضوعي

ليالى المطاريد.,,,هل تعلم

اقتباس المشاركة الأصلية كتبت بواسطة moka . . مش عارف اواسيكي ولا اواسي نفسي لان الحال من بعضه اضف على ذلك وحدة مؤلمة لا انيس ولا ونيس فيها ..! موضوعك قلب عليا المواجع ..! ونفسي افتح باب جنبك واقول اللي يضحك مدام توتا اوعى ينسى يضحكني انا كمان ..! اسف على المداخلة الغم دي مني ..

أنا زيك بالضبط يا موكا