بيت صغير فى كندا .. ملك مش ايجار .. ممكن والا لا

[ehabtaher]

كتير مننا نسى فى الايام اللى فاتت هو ليه مهاجر لكندا.. بعضنا مهاجر علشان زهقان من الحكومه وبعضنا شايف ان الحال فى البلد مش حا يتصلح الا بعد عمر طويل يحينا ويحييكم ربنا.. بس اكيد محدش فينا بعد دراسه مستفيضه للهجره واللى بيحصل فيها بيهاجر علشان يجيب فلوس لان الظاهر واللى باين ان اللى بيهاجر لكندا بيقشطوه اول باول علشان يفضل قاعد هناك .. بياخدوا منك ايجار البيت فى حدود الف دولار و بيقولولك علشان تشتغل لازم تدرس من جديد وطبعا الدراسه دى على قلبنا زى الحجر ( مش حاقول زى السم) بس ايه اللى رماك على المر.
ولا يعطوك قروض للدراسه او الاعانه او او الا لما تبقى على الحميد المجيد.. طبعا كويس ان فيه اعانه من اساسه .. هو حد طايل..
انا اللى شفته واستنتجته فى المده اللى فاتت فى دراسه الهجره لكندا (جايز اكون غلطان وانتم ليكم اراء احسن من رايى) ان هدف الهجره لناس كتير هو الباسبور وطبعا ده للحمايه والحريه اللى الواحد بيشوف الاجانب بيتمتعوا بيها فى كل مكان فى العالم وحتى فى مصر فى مقابل البهدله اللى الواحد بيشوفها بباسبوره المصرى سواء فى مصر او فى الدول العربيه.
طيب والهدف التانى
انه يكون لينا بيت صغير فى كندا.. يا ترى ده صعب
انا لما باتكلم عن بيت فى كندا باتكلم عن البيت المملوك لك وليس المستأجر
بصراحه انا شايف ان الموضوع مش صعب وخصوصا بره تورونتو وميسيساجا لانهم غاليين نار

بس فى المقابل ان الواحد لو عايز يستثمر بيته فى الوقت اللى هو مش قاعد فيه .. كإيجار مؤقت مثلا .. مش حايقدر يعمل ده الا فى تورونتو .. علشان كده انا طرحت الموضوع ده .. فى محاوله لترتيب الخطوات الفعليه والمعقوله التى تكفل لنا الحصول على بيت فى كندا وفى نفس الوقت بسعر رخيص.. وياريت يبقى جنب كليه وجنب الشغل وجنب المسجد (طمع بقى)

جايز نبقى شركاء فى بيت كبير شويه كل واحد حجره .. مافيش مشكله طالما ممكن كل حاجه تترتب
جايز يبقى انت دور وانا البدروم .. مش مشكله .. اهو كله بتمنه
نحاول .. نشوف حا نقدر والا لا
الشيخ القرضاوى كان له فتوى زمان بعدم جواز استخدام القروض الربويه فى شراء بيوت فى الخارج .. لكن بعد كده وجد انه بكده وبعد 10 او 20 سنه يظل المهاجر قاعد فى بيت ايجار وبيدفع نفس المبلغ اللى كان بيشترى بيه البيت كأيجار
قام اجتهد وافتى بالرجوع عن الفتوى دى بجواز شراء البيت حتى لو بقرض ربوى (بس البيت الاول فقط) مش تبقى شغلانه بقى ويعملها تجاره ويشترى ويبيع .. وفى الاخر يخسر زى اللى فى الولايات المتحده الامريكيه لما انفجرت فيهم الفقاعه العقاريه.
نتناقش فى المواضيع دى .. نتشارك ..نشترى وقت اللاندنج .. والا نستنى لما نشتغل فى كندا (اى بعد عمر طويل) والا ايه .. قولو رايكم ايه .. ما خاب من استشار

 

[ehabtaher]

مقدرتش ماحطش القصيده دى

شعور سخيف
إنك تحس بإن وطنك شيء ضعيف
صوتك ضعيف
رأيك ضعيف

إنك تبيع قلبك وجسمك
وإنك تبيع قلمك وإسمك
ما يجيبوش حق الرغيف

يا ساقية دورى ... عدى فوقى ودوسى
نصبوا عليا وشحتونى فلوسى
ربطونى فيكى .. حتى ما اتغميت
هما اللى فرحوا ووحدى أنا اتغميت

أنا اللى صاحب البيت
عايش بدون لازمة
ولما مرة شكيت
إدونى بالجزمة
أنا اللى زارعك دهب
بتأكلينى سباخ
إن كان دة تقل ودلع
بزيادة دلعك باخ

كرامتنا متهانة
واللقمة بإهانة
بتخلفينا ليه لما انتى كارهانا

يعنى ايه تبقى إنتى هبة النيل يا حلوه
وكل يوم المية تقطع
يعنى ايه لما اشتكى غلو الفاتورة
يقولو تشكى بس تدفع

لما قش الرز ثروة بتتحرق
وأما نفط الأمة ثروة بتتسرق
وأما جلادك على ولادك بيبطش
وأما علمك ما يلاقيش يآكل فيطفش

يعنى ايه نرفع ايدينا بالسلام لاجل الغزاه
ويعنى ايه لما ابقى ماشى فى حالى اتشد اشتباه

يعنى ايه مش حاسة بالعمر وغلاوته
بتصبى مر العمر ليه
دة انا كنت ح اوهب لك حلاوته

أنا عمرى ما أتأمرت
ولا حطيت شروطى
ومكان ما ترسى مركبك
بابنى شطوطى
أنا كنت جيشك لما مماليلك باعوكى
وكنت يوسف لما عشتى سنين عجاف
وضلوعى دى اللى فى معركة قادش حموكى
وشفايفى دى اللى ما بطلتش فى يوم هتاف
دة انا كل شبر فى أرضك اتمرمغت فيه
وكل يوم عشتيه
أنا اتغذبت بيه

علا صوت أدانك جرس
فى الشدة صاحينلك
من امتى كانوا الحرس
هما اللى باقينلك

بعتينى علشانهم
وعنيكى معصوبة
ياهل ترى خاينة
ولا زيى مغصوبة

كل الكلام اتقال
والشعر بقى ماسخ
والصبر علو جبال
والظلم شىء راسخ


علمونا بالعصاية
ورضعونا الخوف رضاعة
علمونا فى المدارس
يعنى ايه كلمة قيام
علمونا نخاف من الناظر
فيتمنع الكلام
علمونا ازاى نخاف
وازاى نكش
بس نسيوا يعلمونا الاحترام
فمتزعلوش
لما ابقى مش باسمع كلامكم
وماتزعلوش لما ابقى خارج عن النظام

مستنى ايه من طفل ربوه بالزعاق
غير المشاكل والخناق

الحب يعنى براح فى قلب العاشقين للمعشوقين
يعنى الغلابة يناموا فى الليل دفيانين
الحب يعنى جواب لكل المسجونين
هما ليه بقوا مسجونين
يعنى أعيش علشان هدف
علشان رسالة
يعنى احس بقيمتى فيكى
إنى مش عايش عوالة

يعنى لما اعرق تكافئيى بعدالة
الحب حالة
الحب مش شعر وقوالة

الحب حاجة ما تتوجدش فى وسط ناس
بتجيب غداها من صناديق الزبالة

الدفة مظبوطة
وأصلا مافيش دفة
والكفة مش مايلة
علشان مافيش كفة

و جحا اللى جاى بالليل لساه بيتخفى
شايف ديدان الغيط سارحة ومارحماشى
من جبنه شاف الدود سابه وراح ماشى
ولا اتكسف للناس
ولا حس على طوله
الناس عشمها كبير جريوا بيشكوله
ضحك جحا ضحكة مواشى
مادام بعيد عن طينى ... ماشى

الدود قاعد لك يا جحا ولابد فى طينك
بعد ما يمص فى دمانا مش حيحلاله الا طينك

احنا اهلك
احنا رجالتك
أمانك
إحنا وقت الشدة سندك
إحنا زادك

يا جحا احمى ولادك
لو كنت عايز تحمى طينك
سوف أرحل
ربما يلقانى من ارجو لقاه
هامشى ويا الشحاتين

وابكى على حلمى اللى تاه
بس مش هاشحت رغيف
هاشحت وطن لله

المصدر: قصيدة جحا للشاعر هشام الجخ

 

 

[حسام]

لم أتشرف بلقاء أخونا الفاضل دكتور ايهاب طاهر فى الواقع
ولم تتعد علاقتنا مناقشات أو مشاركات أو رسائل على الخاص
الا أننى معجب جدا بأفكاره التعاونية
وحبه لكل فكرة يظهر فيها لم الشمل بين الناس
خالص مودتي يا دكتور ايهاب
وأكرمك الله بقدر نياتك االطيبة
وتفكيرك الاجتماعي المحترم

 

 

[3omda To]

مانت كنت ماشي حلو في الاول
بتفكرنا بمصر ليه

 

 

[ehabtaher]

القصيده موجوده بالصوت والصوره فى مغاره من مغارات المطاريد اتكعبلت فيها فقلت احطها هنا خارج السياق
ماعدا اخر سطر فيها

 

 

[memma]

انا راشق معاك ياهوبا بس انا عايز كلجارى...لو موافق نشوف بيت من دورين كل واحد دور بس انا حمام السباحة وانت الجنينة

 

 

[ehabtaher]

وعلشان تعرفوا ان الموضوع مش صعب برضه
ده سعر بيت فى اونتاريو
https://ontario.propertysold.ca/burli.../391-plains-rd

وده مكانه

https://maps.google.ca/maps?f=q&hl=en...N,%20L7T%204M2

بالقرب من هاميلتون يعنى حوالى 50 كيلو

 

 

[ehabtaher]

انا شخصيا حادور على بيت ينفع يتفتح فندق او بنسيون علشان الفتره اللى حاقعدها بره كندا يقعد البيت يشتغل مش يبقى فلوس مركونه ايه رايكم
ويمكن يبقى فيه محل تحت علشان يتفتح مطعم حلال الستات بتوعنا يشغلوه

يشبه ل ده بس يكون فيه محل تحت
https://ontario.propertysold.ca/hamil...54-cannon-st-e

 

 

[أحمد سيف]

شوف يا ايهاب ... أنا امبارح كنت لسه باتكلم مع واحد صاحبي عاش في كندا فترة ... قاللي لو مش ناوي تقعد على طول في البلد يبقى الأحسن تشتري شقه Condo تستعملها لما تنزل وتخلي الشركة اللي بتدير البنايه تأجرها لك وانت مش موجود .. المشكلة في البيت انه عليه التزامات أكبر فلو مش هتقعد فيه هيكلفك كثير ... مثلا طالما البيت ملكك يبقى انت مسؤول تشيل الثلج اللي على الرصيف اللي قدامه كل يوم الصبح ... لو واحد معدي واتزحلق بسبب الثلج ده ممكن يرفع عليك قضيه يخرب وبيتك ولازم تساوي النجيله وتضبط الشجر الموجود في حديقتك ... غير تكاليف الضرائب والصيانه والتأمين ولو حبيت تأجره يبقى عايز له تجهيزات كثير وصيانه كل شويه وتتفق مع شركة تديره لحسابك.

دي وجهة نظر واحد قاعد بعيد طبعا ... لكن اللي يقدر يفيدك أكثر هما الناس اللي عايشين في البلد.

 

 

[ehabtaher]

ماهو زى ما الشقه ممكن تتاجر .. ممكن برضه تلاقى شركه تأجرك البيت وتاخد بالها منه
ولو كلو واحد نازل يعمل لاندنج ياخد العنوان وينزل على البيت ده مخصوص يبقى ان شاء الله نخلص القروض وممكن طبعا عمنا الكبير اكسيلانس يدور لنا الفلوس فى السوق .. شغلته بقى ويفهم فيها اكتر مننا وبعدين ممكن اللى يعمل لاندنج فى الشتاء يقعد فى البيت بتخفيض فى السعر بشرط يشيل التلج من قدام البيت ... ممكن برضه نديله شهاده خبره بالشهر اللى شال فيه التلج من البيت ان ضليع فى صيانه المنازل .. وساعتها يبقى ضمن الخبره الكندى فوق البيعه

( انتم جايز شايفين الموضوع شكله هزار )
بس فكرو فيها كده تلا قوها ممكن تمشى بس لو صلحت النوايا