حجازي : شباب الدعوة أنقذوا الثورة وسر شقة العجوزة

[إكرام يوسف]

الصحف المصرية والعربية

اقتباس المشاركة الأصلية كتبت بواسطة savary الهتاف من زمان قوى يا شيخ صفوت (( مصر يا أم ..ولادك أهم ..دول عشانك شالوا الهم )) !

يعلم أبناء جيلي أن مبتكر هذا الهتاف، المهندس كمال خليل (كان وقتها الطالب في كلية الهندسة) في مظاهرات منتصف السبعينيات (وقبل انتفاضة يناير 1977)..
والهتاف كان "مصر يا أم.. ولادك أهم.. دول علشانك شالوا الهم.. دول يفدوكي بالروح والدم". وهذا الهتاف كان يقال في أول الأمر عند ترحيل المعتقلين من السجون، أو خروجهم للمحاكمة.. وأمام قاعة المحكمة وفي القفص لرفع معنوياتهم وتشجيعهم.. وكان العزيز كمال خليل يطلقه في البداية عند خروج أي زميل للتحقيق من أجل تشجيع الزميل ودعمه معنويا وهو في طريقه للتحقيق، مع ما كان يتوقع من تعرضه لمخاطر.. وكان يقول معه شعار "ابنك يا مصر.. عشانك يا مصر.. بيتسجن يا مصر.. ويستشهد يا مصر.. ويموت يا مصر.. فدامي يا مصر.. تعيش يامصر."

وتحضرني هنا قصة حكاها لي أحد الزملاء الظرفاء كان من المعتقلين في يناير 1977 .. قال لي، أنه أثناء الاعتقال، ارتكب أحد مخبري سجن القلعة مخالفة، وتقرر تحويله إلى التحقيق.. وكان الزملاء يعانون من سخافة هذا المخبر عليهم.. فوقفوا صفين في ممر السجن أثناء توجه المخبر للتحقيق في مكتب الإدارة يهتفون "جوز خالتك يا مصر.. بيستهبل يا مصر.. وبيتغابى يا مصر"

 

 

[Vitruvius]

اقتباس المشاركة الأصلية كتبت بواسطة إكرام يوسف المسألة مش كده خالص.. بصرف النظر عن التناقض الصارخ بين كون المرء داعية ديني وبين استخدام أسلوب الردح البذي وتلقيح الكلام المبتذل في الرد على المخالفين في الرأي. وبصرف النظر عن أن اتهام المحصنين والمحصنات بلا بينة يتطلب جلده 80جلدة. وبصرف النظر عن كلامه المرسل صار يطول كل من له شقة في العجوزة (بالمناسبة شقتي يمكن اعتبارها في العجوزة رغم انها تتبع ادرايا قسم الدقي، وكان يؤمها أكثر من تلاتين شابا من شباب الثورة.. وشقة وائل غنيم في العجوزة.. وفيه شقة كمان بتاعة ناس من مجلس أمناء الثورة ـ اللي شكِّله صفوت حجازي بعد الثورة عشان يضرب بيه ائتلاف شباب الثورة ـ ومنهم ناس اختلفت معاه ويمكن يقصدهم.. وأكيد العجوزة فيها شقق لشباب كتير اشترك في الثورة.. يعني كل الناس دول حيبقوا خصوم للسيد حجازي قدام ربنا.. فضلا عن أن كلامه كشف القناع عن وجهه الحقيقي في الدنيا قدام الناس اللي ما كانوش يعرفوا حاجة عن فتواه بإجهاض طفلة بريئة وتدمير امها لإنقاذ صديقه الفنان الشاب من المأزق، مثلا) وبصرف النظر عن ان يوم موقعة الجمل كان جميع الثوار محصورين في التحرير، وثابت بشهادة شهود من المسئولين والصحفين، وقبل أكثر من مرة أنه عرض عليهم خروجا آمنا من الميدان ورد ممثل الثوار: "مش حنخرج من هنا غير جثث".. يبقى مشيوا امتى؟ فيه نقطة مهمة هنا الراجل بيقول "الناس اللي بتقول الإسلاميين ركبوا الثورة.. باقول لهم ما تخلونيش اتكلم على اللي حصل في شقة العجوزة".. طيب إيه العلاقة بين ان سيادتك بتركب الثورة، وبإن فيه شقة للمنكر في شقة العجوزة؟ يعني هو ده الرد؟.. واحد يتهم واحد بإنه سرق 50 ألف جنيه من درج المحل، يقوم يقول له ما تخلنيش أقول انك ولامؤاخذة أخلاقك بطالة؟ إيه علاقة ده بده؟ ما سيادتك برضه ما رديتش على الاتهام الأول بانك سرقت ال 50 الف جنيه؟

فعلا نفس الإسلوب.. تحويل الإنتباه عن الموضوع الأساسي و إستخدام المغالطات المنطقية بطرق تكاد تكون واحدة بل أقول طرق منهجية في مهاجمة الخصوم و الطعن في شرفهم أو مصداقيتهم أو حتى لمجرد تشتيت مسار النقاش!!!

بستغرب..
لأنه فعلا بالملاحظة لقيته منهج واضح عند الإخوان بالذات.. من صبحي صالح لصفوت حجازي حتى مع واحد صديقي من شباب الإخوان لاحظت إستخدامه للإسلوب ده من سنين!!! هما بيتعلموا ده بطريقة ممنهجة؟!!!


يا شيخ صفوت عيب
ناس كتير احترموك و قدروك و انا أولهم لما كنا في الميدان و شفنا موقفك
إنما الأساليب دي أساليب لمؤخذة.. عارف ولاد البلد لما حد يقول كلام زي ده بيقولوا عليه ايه؟؟!!

خليك راجل دوغري بلاش كدة... عيييييييب

 

 

[بطاطا]

اقتباس المشاركة الأصلية كتبت بواسطة إكرام يوسف فيه نقطة مهمة هنا الراجل بيقول "الناس اللي بتقول الإسلاميين ركبوا الثورة.. باقول لهم ما تخلونيش اتكلم على اللي حصل في شقة العجوزة".. طيب إيه العلاقة بين ان سيادتك بتركب الثورة، وبإن فيه شقة للمنكر في شقة العجوزة؟ يعني هو ده الرد؟.. واحد يتهم واحد بإنه سرق 50 ألف جنيه من درج المحل، يقوم يقول له ما تخلنيش أقول انك ولامؤاخذة أخلاقك بطالة؟ إيه علاقة ده بده؟ ما سيادتك برضه ما رديتش على الاتهام الأول بانك سرقت ال 50 الف جنيه؟

فى التشكيل الوزارى المكون من 34 وزير..لا أحد
فى تشكيل المحافظين المكون من 26 محافظ..لاأحد
فى رؤساء الصحف والمجلات ورؤساء التحرير (18منصب)..لايوجد
فى المجلس القومى لحقوق الانسان المكون من25 عضوا..لايوجد
فى مجلس أمناء الإذاعة والتلفزيون المكون من 15عضوا ..ولا واحد
فى السفراء والحركة الدبلوماسية 163 سفير..إنسى يا عمرو
فى القيادات الجامعية 872 منصب : و لا عميد كلية واحدة ولا وكيل و أوعى تتكلم عن رئيس جامعة أو نائب
طبعا رؤساء البنوك واعضاء مجالس إدارتها مستحيل
رؤساء الأحياء والمدن 222 منصب ..ولا الهوا
رؤساء شركات قطاع أعمال 219 ..أسفين.
وكلاء وزارات ورؤساء هيئات ومصالح وعددهم 924 ولا تشموا ريحتها

ممتاز جدا يعنى نصيب الاخوان من2518 منصب يساوى صفر ..

فعلاً الاخوان سيطروا على البلد وركبوا الثورة وعقدوا صفقات مع المجلس العسكرى وما سابوش لحد حاجة !!!!!





دا حزب التجمع بتاع رفعت السعيد كسب من الثورة اكثر من الإخوان يا عالم

بطلوا افترا لحسن تروحوا النار

 

 

[جدة حبيبه]

دعوه لموضوعي

كيفية صلاة النبى صل الله عليه وسلم

نواه نجم



د.صفوت حجازي كلمني

صحيت الصبح لقيت تليفون من الدكتور صفوت حجازي والمكالمة كانت بخصوص التصريحات بتاعته
انا حانقل لكم المكالمة زي ما هي، هو قالي:
بصي يا نوارة انا باتشتم ليل نهار ومش بيهمني وفيه ناس قليلة تهمني انت منهم عشان كده كلمتك، الموضوع اللي انا قلته ده معروف لكل الناس هو انت مش عارفاه؟
انا: لا يا دكتور مش عارفاه ومش عايزة اعرفه.. وانا شايفة ان الكلام ده ما يلقيش بقيمتك ومش موفق
هو: انا عارف اني غلطت اني قلت كده، وعارف انه كلام مش موفق، بس انا تعبت، انا مش باقعد في البيت، ومش عايز حاجة من حد، ومش حاترشح، ولا حاقبل مناصب، وعايز لما الثورة دي تخلص اروح اقعد في المدينة المنورة واريح دماغي، انا بقيت متهيالي اني ارمي التليفون ده، فيه مجموعة معينة ما وراهش غيري، ووصل الامر انهم يقدموا فيها محاضر وبلاغات كاذبة ان صفوت حجازي تعدى علينا بالضرب، وانا العيال دي عارفها بالاسم، وعارف هم ايه؟ وعارف الاحزاب اللي بتاخد فلوس من الجيش، وقلت ان فيه احزاب بتاخد فلوس من الجيش في نفس الندوة دي وماحدش بروز الكلام ده، ولا حد قال اني قلت اننا مش حنقبل حاكم عسكري لمصر، كل اللي بروزوه الكلام التاني اللي قلته، انت ما تتخيليش الضغط على اعصابي عامل ازاي، واتهامات على طول، وتخوين على طول، وانا عندي بيت واسرة وبناتي بيعيطوا لما بيشوفوا الكلام ده عن ابوهم، ويجنني بقى لما الاقي الكلام ده من ناس انا عارفهم، وعمري ما حاقول اسماءهم بس انا عارفهم وعارف هم ايه.. ويوم 8 ابريل وقعوني وكان هدفهم الاغتيال، ويوم صلاة العيد تعدوا عليا، وعلى طول يطلعوا في الاعلام ما وراهمش غير صفوت حجازي، هو صفوت حجازي ده مش بني ادم؟ ما بيحسش؟ ما بيغلطش؟ انا باحاول اعمل اللي اقدر عليه لله وللبلد ومش عايز حاجة ومش عايز حاجة ومش ناوي اقبل اي مكافئات دنيوية، بس انا بشر، وليه التصيد اللي على طول ده؟ وليه لما اقول حاجة كويسة تتخفي والاعلام ما يركزش عليها، ولما اغلط تنزل مانشيت؟ وكوني غلطت اتشنق يعني؟ طب هم ياما خاضوا في عرضي وقالوا عني كلام سافل كتير.. هه.. ماحدش اتكلم ليه ولا قال حاجة ولا دافع عني؟
------------------------------
بصوا بقى... انا فاهمة تماما اللي هو بيقوله.. تماما
وفاهمة الضغط النفسي اللي واقع عليه، وفاهمة احساسه بصراحة، وفاهمة يعني ايه الواحد يبقى طالع تلاتينه في الحياة ويلاقي عيال رمم وزبالة عمالة تزايد عليه، وانا بصراحة عمري ما كلمت صفوت حجازي على غفلة ولقيته في بيتهم ابدا، وعمري ما رحت في حتة ولا كلمت مصاب ولا محبوس ولا منكوب ولا ابو شهيد الا ولقيته وهو بيشتكي لي يقول لي: والله لولا صفوت حجازي كان زمانا مش لاقيين ناكل..والله صفوت حجازي اللي جاب لنا المحامي، والله صفوت حجازي هو اللي دخلني المستشفى
دي شهادة لوجه الله واللي مش مصدقني ينزل بنفسه يروح للمصابين ويجيب قدامهم سيرة صفوت حجازي، ولا يروح يزور اللي مقبوض عليهم في المحاكمات العسكرية ويجيب سيرته، حتى الناس اللي هو مش موافق على مواقفهم زي ظباط 8 ابريل، بيروح لهم برضه
ايه بقى اللي بيخلي الناس تبقى عدوانية عليه؟ ان ناس تانية برضه بتعمل شغل ومجهود ويفضلوا يقولوا لي: يعني هو ماحدش انضرب في الميدان غيره؟ هو ماحدش وقف مع المحابيس غيره؟ هو ماحدش وقف مع المصابين غيره؟ ماحدش ماسك ملف الشهدا غيره؟
لا فيه ناس كتير عملت حاجات غيره.. بس هو اللي بيتشتم مش هم، منى سيف ومالك عدلي واحمد سيف واحمد حلمي وغيرهم بيعملوا حاجات كتير للمقبوض عليهم والمصابين واهالي الشهداء، بس ما سمعتش حد بيشتمهم، ولما بتيجي سيرتهم بيشكروهم، ناس كتير كانت حتموت في الميدان، ومالك مصطفى مثلا انا برضه كنت باشوفه على طول وهو اول ما يشوف ضرب يجري عليه، يشوف رصاص يجري عليه، بس ماحدش بيشتم مالك مصطفى
بطلوا تشتموه وانا ابطل ادافع عنه
بطلوا تشتموه وهو يبطل يقول تصريحات مرة تصيب ومرة تخيب
وانا فاهمة والله يعني ايه الواحد يتعب ويزهق ويحس انه بيحفر في بحر وانه بيتعامل مع اشكال قليلة الاصل لحد ما يغلط غصب عنه، فاهماها تماما.. اذا كنت انا الفسلة اللي ما باعملش نص اللي هو بيعمله بابقى عايزة اولع في الناس ومرة اتخانقت مع واحد كاتب على التويتر: انا في المسيرة ومش شايف نوارة
قلت له: ونوارة مش نازلة تاني خالص بقى.. لك عندها حاجة؟ انت مش ابويا عشان تفتش عليا.. هو انا الدادا بتاعتكم؟ اشمعنى انا اللي باتعامل كده؟ اقعد في الاعتصام في الصينية يقولوا طالعة تتصور، اخش الخيمة يقولوا هي جاية تعتصم ولا تنام في الخيمة، اكنس الميدان يقولوا بتستعرض، اسيب ام المقشة واقعد يقولوا فاكرة نفسها اميرة ومشهورة وهي تقعد والناس تخدم عليها، وتنزلوا المسيرات تدوروا عليا؟ انتوا نازلين المسيرة عشان حاجة مقتنعين بيها ولا عشان تفتشوا عليا وتشوفني نزلت ولا لا؟ اشمعنى ماحدش بيدور على بلال، ولا على ابراهيم عيسى، ولا على الحملاوي، ولا على رشا عزب، ويوم ماحد يشوفهم يبقى كتر خيرهم انهم نزلوا، وانا كنت الخدامة يعني ولا ايه مش فاهمة؟ والناس قعدت تقولي: معلش يا نوارة ما يقصدش.. ده من العشم.. وانا برضه غلطت نفسي اني اتكلمت كده، هو ما قالش حاجة لده كله.. الجدع بيدور عليا محبة يعني.. بس الضغط العصبي بيخلي الواحد اعصابه تفلت
وبمناسبة بقى بلال وابراهيم عيسى، اول ما يختلفوا معاكم يبقى بلال وابراهيم عيسى باعوا نفسهم.... انا زهقت على فكرة
زهقت قوي.. زهقت من قلة الاصل والمزايدة واللي يوضيكم زي اللي ينجسكم.. بلال وابراهيم ايه اللي حيبيعوا نفسهم؟ ايش حال ما شفتهم سنة 98 وهم بيتقاسموا سندوتشات الطعمية وبيرموا على بعض حساب القهوة زي فيلم المنسي لما عادل امام قال لاحمد ادم: انا جبت لامك ازازة زيت الاسبوع اللي فات حاسب انت حساب القهوة بقى... وكان جرنالهم مقفول وطالع عينهم ومش لاقيين يدفعوا الايجار ولو كانوا قالوا يا بيع ساعتها كانوا لقوا الف شاري.. ما عملوهاش وهم مش لاقيين ياكلوا حيعملوها دلوقت؟ وهو كل عيل اهطل نزل له يومين افتكر نفسه صلاح الدين الايوبي وحيفضل يزايد على ام الناس وينصب لهم محكمة؟
خلاص.. صفوت حجازي قال تصريحات مش موفقة من كتر الضغط وهو حاسس انه غلط... ندبحه على العيد؟ ندبحه على العيد وننسى ان راسه كانت مفتوحة في الميدان وما رضيش يخيطها ولبس عليها حلة وراح وقف تحت تمثال عبد المنعم رياض يشاور للقناصة عشان يضربوا عليه
هو لوحده اللي عمل كده؟
لا مش هو لوحده اللي عمل كده... بس هو لوحده اللي مشهور ومعروف وشجاعته في الاقدام على الموت شجعت شباب كتير من اللي بيثقوا فيه.. وهو لوحده من ضمن المشاهير اللي ما كانش بيرضى ان "مريديه" يحاوطوه ويعملوا له بودي جاردز زي ما بنشوف مع بقية المشاهير، وكان بيزقهم ويجري على الضرب وده كان بيشجع شباب تاني، يعني اخد ثواب نفسه وثواب غيره من الشباب اللي بيحبه واتشجع لما لقاه بيعمل كده، وهو لوحده من المشاهير اللي كان بيتخانق مع الناس اللي بتقوله: خليك انت يا دكتور صفوت ورا، ويمكن اول مرة يشتم قال: ينعل ابو الشهرة انسوني سيبوني ماحدش له دعوة بيا
التصريحات اللي قالها دي غلط، وما يليقش انه يقولها، وبتحط ناس كتير ابرياء في دائرة الاتهام، وهو قالها بسبب الضغط العصبي اللي عليه وانا بصراحة فاهمة قوي موضوع الضغط العصبي، الشهادة لله انتوا تكرهوا الواحد في عيشته وتندموه على انه عمل خير في حياته ولو تعرفوا في القعدات الخاصة فيه ناس وصل بيها الامر انها تقول: والله مبارك كان معذور.. ده ايه القرف ده؟
ولا فيه ام تمييز وبالظبط بالظبط اللي يوضيكم زي اللي ينجسكم، واللي ما بيعملش حاجة غير الرغي الفارغ وتفريق الصفوف واحنا عارفين عنهم حاجات مش عايزين نقولها تعملوهم عجل ابيس وتقدسوهم واياك حد يتني لهم كلمة، واياك حد ينتقد اي حاجة بيقولوها، وعمالين تألهوهم واحنا عارفين دواخلهم وعارفين اتصالاتهم بالجيش وعارفين الاعيبهم واتصالاتهم بالسفارات كمان ومش عايزين نتكلم، وعشان ما بنتكلمش انتوا عاملينهم آلهة وماحدش يقدر يقول عنهم حاجة مع ان مواقفهم باينة، وتمشوا وراهم وورا طراشهم ولما يعكوا الدنيا تختلقوا لهم اعذار.. مع ان ابسط حاجة الناس دي قاعدين في بيوتهم يعني عمرنا ما شفنا لهم نزلة ولا بهدلة ولا نيلة، وهرابين من المواجهة كمان... واللي يتفانى بجد ووارد انه يقع في الغلط زي اي انسان تطلعوا ميتين اهله لما حاجة بقت تقلب البطن.. ماهو طبيعي اللي ما بيعملش حاجة ما بيغلطش واللي بيعمل عشرين حاجة وارد انه خمس حاجات تفلت منه... ايه؟ وطبيعي انه لو بيعمل عشرين حاجة تتفق معاه في تلاتاشر حاجة وسبع حاجات تختلف معاه فيهم، تسيب التلاتاشر حاجة وتمسك في السبع حاجات وتخونه كمان عشان مش متفق معاك؟
بس ده حال الدنيا.. حنعمل ايه؟ الصبر.. الصبر
هم يعني الناس اللي بتشتم دي احسن من سيدنا علي اللي قالوا له: انت على الحق، تقبل حلول وسط ليه؟ انت كافر.. يالا توب بقى وادخل الاسلام
ماهو التاريخ فيه الفئة الباغية اللي كسبت الدنيا.. واللي اعتزلو وقعدوا مالهمش اي تلاتين لازمة في الحياة غير يرغوا وطبعا كفوا نفسهم شر الناس وماحدش اتعرض لهم لانهم حزب كنبة.. والفئة اللي على الحق ودي الفئة الوحيدة اللي اتشتموا وكل واحد فيهم مات مقتول
هو ربنا عايز كده
بس برضه نتعلم من سيدنا علي.. صحيح ماحدش فينا زيه مهما حاولنا، وبرضه البني ادمين ضعفا، بس هو اتشتم على المنابر واتكفر واتقال عليه كلام اوحش من ده كله وما وقعش نفسه في الغلط وقبل ما يتكلم كان بيحسب كل حرف طالع منه.. نحاول على قد ما نقدر، وده اللي انا قلته للدكتور صفوت، يحاول على قد ما يقدر انه يمسك نفسه، ولو لقى نفسه مرهق قوي يرتاح 48 ساعة بس.. ده ما بيهمدش خالص.. خالص.. ده زمان مراته وعياله بيدعوا على الثورة دي، والضغط ده والارهاق ده هو اللي وقعه في الغلط.. هو مش عيل صغير على البهدلة دي وكمان قلة ادب
وانا مش حاشهد شهادة زور عشان اعوم على عوم الناس واراضيهم على حساب الحق، ومش حامسح مساهمات بني ادم وبطولاته عشان قال تصريحات غلط، الغلط يتقال عليه غلط بمعزل عن تشويه الشخص، وهو معترف انه كان غلط يقول كده، الكلام ينفع يعتذر عنه والموضوع ده يتقفل ويتحرم استخدام الاسلوب ده في الكلام خالص بينا وبين بعض، لكن الافعال ما تتنسيش
وقبل ما اي عيل خايب في الحساب يقول لي ما مبارك عمل الطلعة الجوية نسامحه؟
والله لو مبارك اخطاؤه على قد الكلام بس كنا سامحناه، لكن خطيئته تعدت القول الى الفعل وقتل ناس وبقى فيه دم ابرياء، ثم ان مبارك كان في موقع مسئولية ورئيس، صفوت حجازي لا رئيس ولا وزير ولا حتى مدير البوفيه
والناس اللي قاعدة ما ورهاش غير تدور ورا خلق الله.. والله لو فكروا يعملوا اي حاجة مفيدة في حياتهم مش حيبقى عندهم وقت يشتموا الناس
ومدام جبنا سيرة سيدنا علي بقى، احب افكركم ان الخوارج كانوا ثوار، وثوار انقياء كمان، وكانوا بيدوروا على الحق، وكانوا راديكاليين، وانتهى بيهم الامر انهم كفروا سيدنا علي وولاده.. واللي شتموا سيدنا ابو بكر وسيدنا عمر برضه كانوا ثوار، وانقياء، وبسبب اختلاف في المواقف السياسية مسحوا 23 سنة من الكفاح والبهدلة والتضحيات وقرروا انهم ناس وحشة عشان موقف واحد
البني ادم ما يسارعش لفتح جاعورته كده.. كل واحد وارد انه يغلط، ومدام مش بيكابر في الغلط يبقى الموقف انتهى

 

 

[إكرام يوسف]

اقتباس المشاركة الأصلية كتبت بواسطة بطاطا فى التشكيل الوزارى المكون من 34 وزير..لا أحد فى تشكيل المحافظين المكون من 26 محافظ..لاأحد فى رؤساء الصحف والمجلات ورؤساء التحرير (18منصب)..لايوجد فى المجلس القومى لحقوق الانسان المكون من25 عضوا..لايوجد فى مجلس أمناء الإذاعة والتلفزيون المكون من 15عضوا ..ولا واحد فى السفراء والحركة الدبلوماسية 163 سفير..إنسى يا عمرو فى القيادات الجامعية 872 منصب : و لا عميد كلية واحدة ولا وكيل و أوعى تتكلم عن رئيس جامعة أو نائب طبعا رؤساء البنوك واعضاء مجالس إدارتها مستحيل رؤساء الأحياء والمدن 222 منصب ..ولا الهوا رؤساء شركات قطاع أعمال 219 ..أسفين. وكلاء وزارات ورؤساء هيئات ومصالح وعددهم 924 ولا تشموا ريحتها ممتاز جدا يعنى نصيب الاخوان من2518 منصب يساوى صفر .. فعلاً الاخوان سيطروا على البلد وركبوا الثورة وعقدوا صفقات مع المجلس العسكرى وما سابوش لحد حاجة !!!!! دا حزب التجمع بتاع رفعت السعيد كسب من الثورة اكثر من الإخوان يا عالم بطلوا افترا لحسن تروحوا النار

أهو ده برضه تأكيد لمسألة تشتيت الموضوع.. الموضوع ده مش عشان اللي ركبوا الثورة ..ده الموضوع دوكهة اللي خرج عنه صفوت.. الموضوع هنا بقى عن شقة العجوزة والخمر والنساء يوم موقعة الجمل والداعية الخلوق اللي المفروض دينه أدبه، بيطعن في مخالفيه بلا بينة وبأسلوب لا يتفق مع اخلاق المؤمنين.. شفت بقى؟

 

 

[إكرام يوسف]

اقتباس المشاركة الأصلية كتبت بواسطة جدة حبيبه نواه نجم د.صفوت حجازي كلمني ........................................ صحيت الصبح لقيت تليفون من الدكتور صفوت حجازي والمكالمة كانت بخصوص التصريحات بتاعته انا حانقل لكم المكالمة زي ما هي، هو قالي: بصي يا نوارة انا باتشتم ليل نهار ومش بيهمني وفيه ناس قليلة تهمني انت منهم عشان كده كلمتك، الموضوع اللي انا قلته ده معروف لكل الناس هو انت مش عارفاه؟ انا: لا يا دكتور مش عارفاه ومش عايزة اعرفه.. وانا شايفة ان الكلام ده ما يلقيش بقيمتك ومش موفق .................. .............. ................ انت ما تتخيليش الضغط على اعصابي عامل ازاي، واتهامات على طول، وتخوين على طول، وانا عندي بيت واسرة وبناتي بيعيطوا لما بيشوفوا الكلام ده عن ابوهم، ويجنني بقى لما الاقي الكلام ده من ناس انا عارفهم، وعمري ما حاقول اسماءهم بس انا عارفهم وعارف هم ايه

يا حراااااام.. حاجة فعلا تقطع القلب.. يعني يقول كلام يتهم فيه أعراض ناس كتيييير (تقريبا كل اللي راح الميدان وعنده شقة في العجوزة) وبعدين يروح يشرح موقفة لنوارة؟ طيب والناس اللي اتهمتهم زور؟ والأعراض اللي سبيتها وسبت الاتهام معلق يمس أي حد في العجوزة؟

• وانت بس اللي عندك بيت وأسرة وبنات؟ ومش خايف عليهم انه كما تدين تدان.. ويمسهم كلام زي اللي بتقوله على خلق الله؟ وكل الناس اللي سبت التهمة معلقة عليهم دول مالهمش أسر؟ ياراجل يا داعية يا بتاع ربنا.. ما تعرفش ان اللي ممكن الناس تفوته لعيل خايب شوارعي مالقاش حد يربيه ونازل شتيمة في أعراض الناس، مش ممكن تعديه لداعية بيقول انه بيفهم في الدين وبيفتي للناس؟
• الداعية اللي يسب أعراض الناس عشان أعصابه تعبانة ما ينفعش لامؤاخذة.. وحتى لو حد شتمه، ما يصحش يقول كلام مرسل.. خليك راجل سوي (بلاش داعية دين).. خليك بس راجل وقول الأسماء وعنوان الشقة الحقيقي.. ولو عندك صور وتسجيلات بقى وسيديهات يبقى أحسن.. وورينا انك راجل صادق وشجاع..
• ياصفوت .. اللي يخاف ما يقولش.. واللي يقول ما يخافش.. ومادام قلت هات اللي عندك.. وخليك راجل عادي ممكن الناس تحترمه.. بلاش داعية
• أهي دي بقى من الحاجات اللي ما ينفعش يتقال فيها كنت باهزر

 

 

[حسام]

الاخوان والسلفيون أسوأ دعاية للاسلام
أحلى حاجة ممكن نعملها معاهم
نسيبهم يتكلموا
بس كفاية كدة عليهم
اللى بعده بقى ياللا

 

 

[savary]

اقتباس المشاركة الأصلية كتبت بواسطة إكرام يوسف المسألة مش كده خالص.. بصرف النظر عن التناقض الصارخ بين كون المرء داعية ديني وبين استخدام أسلوب الردح البذي وتلقيح الكلام المبتذل في الرد على المخالفين في الرأي. وبصرف النظر عن أن اتهام المحصنين والمحصنات بلا بينة يتطلب جلده 80جلدة. وبصرف النظر عن كلامه المرسل صار يطول كل من له شقة في العجوزة (بالمناسبة شقتي يمكن اعتبارها في العجوزة رغم انها تتبع ادرايا قسم الدقي، وكان يؤمها أكثر من تلاتين شابا من شباب الثورة.. وشقة وائل غنيم في العجوزة.. وفيه شقة كمان بتاعة ناس من مجلس أمناء الثورة ـ اللي شكِّله صفوت حجازي بعد الثورة عشان يضرب بيه ائتلاف شباب الثورة ـ ومنهم ناس اختلفت معاه ويمكن يقصدهم.. وأكيد العجوزة فيها شقق لشباب كتير اشترك في الثورة.. يعني كل الناس دول حيبقوا خصوم للسيد حجازي قدام ربنا.. فضلا عن أن كلامه كشف القناع عن وجهه الحقيقي في الدنيا قدام الناس اللي ما كانوش يعرفوا حاجة عن فتواه بإجهاض طفلة بريئة وتدمير امها لإنقاذ صديقه الفنان الشاب من المأزق، مثلا) وبصرف النظر عن ان يوم موقعة الجمل كان جميع الثوار محصورين في التحرير، وثابت بشهادة شهود من المسئولين والصحفين، وقبل أكثر من مرة أنه عرض عليهم خروجا آمنا من الميدان ورد ممثل الثوار: "مش حنخرج من هنا غير جثث".. يبقى مشيوا امتى؟ فيه نقطة مهمة هنا الراجل بيقول "الناس اللي بتقول الإسلاميين ركبوا الثورة.. باقول لهم ما تخلونيش اتكلم على اللي حصل في شقة العجوزة".. طيب إيه العلاقة بين ان سيادتك بتركب الثورة، وبإن فيه شقة للمنكر في شقة العجوزة؟ يعني هو ده الرد؟.. واحد يتهم واحد بإنه سرق 50 ألف جنيه من درج المحل، يقوم يقول له ما تخلنيش أقول انك ولامؤاخذة أخلاقك بطالة؟ إيه علاقة ده بده؟ ما سيادتك برضه ما رديتش على الاتهام الأول بانك سرقت ال 50 الف جنيه؟

ولا يمهنا يا مدام إكرام

زيه زى سماح أنور و طلعت زكريا


الكلاب تعوى و الثورة تسير !!

وإذا أتتك مذمتى من ناقص !!


ولا تأسفن على غدر الزمان لطالما
رقصت على جثث الأسود كلاب
لا تحسبن برقصها تعلوا على أسيادها
تبقى الأسود أسود و الكلاب كلاب !!

 

 

[حسام]

ونوارة مع حبي وتقديري لها مش كلامها مقدس يعني
سبق ودافعت عن المجلس العسكري وبحماس غير عادي
وبعدها بكل شجاعة أعترفت انها كانت غلطانة
أنا بس بخاطب أى حد هيدافعن عن سي صفوت يستخدم عقله مش مشاعر اعجابه بسي صفوت
ينفع واحد بيتكلم فى الدعوة للاسلام يستعمل اسلوب انا اسف يعني التلقيح؟
ينفع تقول تهمة خطيرة زي دي بدون أسماء ولا دليل؟
وينفع عشان ناس أختلفت معاك تطلعلهم الكارت القذر ده؟
طيب
انا مختلف مع سي صفوت جملة وتفصيلا
ياترى هتطلع شقتي في العجوزة برضة ولا في أنهي مديرية بالظبط؟
دي قلة أدب والله

 

 

[savary]

أحلى رد على الكائن دا و على باقى الكائنات من نفس القبيلة

الرهيب مصطفى إبراهيم -- حصر مصر



بعد طرحك م الحساب

للعساكر و الكلاب

والأرانب و الفيران

والأجانب و الغيلان

والأرايل و القرون

والمرايل والدقون

اللى فاضل يا أفاضل

هو دا تعداد و حصر

العيال اللى جابتهم فى الحلال

الست مصر !!