حققت حلمك ولا لسه :وفاة محمود الفيشاوي الوالد في «ألف مبروك»

[Farida]

الصحف المصرية والعربية

انا عارفه ان الخبر جايز يكون مايهمش حد بس انا النهارده لما قرأت مقالة أحمد حلمى فى الدستور عن الرجل ده زعلت جدا و ثارت جوايا اسئله كتير و مش عارفه حبيت اتكلم فيها حتى ولو لم يرد احد تخيلت نفسى مكانه انا عندى احلام كتير ماتحققتش لسه و يمكن اكون نسيتها و مش عارفه هل الوصول للحلم شئ يستحق ولا كله محصل بعضه ............تخيلوا واحد طول عمره نفسه يمثل و ابوه كان مانعه طوال حياته و لما مثل اول و اخر فيلم له الف مبروك وهو فى الخمسين بجد اذهلنى و اذهل النقاد بموهبه حقيقيه انا كنت حاسه انى شفته كتير قبل كده و قلت الحمد لله لقينا اب مش زى حسن حسنى ولا لطفى لبيب اللى اصبحوا وجوه مستهلكه و فقدوا بريقهم و هو بيستعد لتانى دور له فى السينما توفى فجأة ............فكرت ياترى ممكن الواحد يفضل يحلم و يحاول يحقق حلمه زى ماعمل محمود الفيشاوى و لما يبتدى يجنى ثمار حلمه ده ينتهى العمر فجأة .......متلخبطه بجد هل يكفى الأنسان سعاده انه حقق حلمه مرة حتى ولو لم بكمل فرحته دى و لا الأفضل يظل الحلم حلما و الواحد يعيش كافى خيره شره و خلاص طالما النهايه واحده ........ اعلم ان الأعمار بيد الله لكن كل منا له حلم و ممكن يغير حياته و يتعب اللى حواليه فى سبيل تحقيق حلمه و بعد كده ايه النهايه ....الموت و كأننا مش عارفين ان دى هى النهايه .............بجد انا متلخبطه و مش عاراقول ايه غير الله يرحمه و يغفر له و يابخته اللى قدر يحقق حلمه حتى ولو مات بعدها مباشره
https://dostor.org/art/news-and-varie...anuary/18/3400

اقتباس وفاة محمود الفيشاوي والد أحمد حلمي في «ألف مبروك» إثر إصابته بذبحة صدرية الإثنين, 2010-01-18 12:40 | عبير عبد الوهاب محمود الفيشاوي في مشهد من ألف مبروك توفي الممثل محمود الفيشاوي عن عمر يناهز ستين عامًا إثر إصابته بذبحة صدرية الأسبوع الماضي، حيث أصيب بآلام شديدة أثناء وجوده في بلدته الإسماعيلية فسارع ابنه بنقله إلي أقرب مستشفي في الواحدة صباحا فأخبره الأطباء بإصابته بذبحة صدرية ثم توفي بعد عدة ساعات علي إثرها. وقد تلقت عائلته العزاء في مدينة الإسماعيلية التي كان يعيش فيها قبيل انتقاله للقاهرة منذ فترة قريبة. محمود الفيشاوي ظهر كوجه جديد في دور والد أحمد حلمي في فيلم «ألف مبروك»، حيث كانت تربطه علاقة قوية بالسيناريست محمد دياب بحكم صداقة دياب لابن محمود الفيشاوي فاقترح دياب علي محمود الفيشاوي أن يشترك في بطولة الفيلم فوافق الفيشاوي علي الفور ليحقق حلمه القديم في التمثيل بعد أربعين عاما من العمل في المصالح الحكومية، تدرج خلالها حتي وصل إلي منصب وكيل أول وزارة في وزارة الكهرباء. الفيشاوي اشترك في بطولة حملة دعائية لصالح إحدي شركات المياه الغازية مع أحمد مكي وعرضت في شهر رمضان الماضي، وكان يستعد للاشتراك في بطولة فيلم جديد بعنوان «الأتوبيس» تشارك في بطولته كل من بشري وزينة وهو من تأليف وإخراج محمد دياب. حيث انتهي من قراءة السيناريو الأسبوع الماضي وكان يستعد لتصويره خلال الفترة المقبلة. جدير بالذكر أن محمود الفيشاوي لديه ثلاثة أبناء واحتفل منذ عدة أسابيع مع ابنته «مروة» بإنجابها مولودتها الأولي.

 

[ممدوح56]

ناس كتير قوى ماتت ولا نستطيع ان نقول انها لم تحقق احلامها لان هذا هو عمرها وهذه هى نهاية حياتهم كما كُتِبَت لهم وطموحات الإنسان غير محدودة وينوى على اشياء كثيرة ويحلم ويحلم بس لا بد أن يقول بإذن الله أو ان شاء الله , انا من رأيى ان احلامى هى لغاية الوقت اللى انا فيه أى نعم لى أحلام مستقبلية بس مش حاطت عليها آمال كبيرة لان من يضع نصب عينيه هذه الآية الكريمة ( ولا تدري نفسٌٌ ماذا تكسبُ غدا ولا تدري نفس بأي أرض تموت ) هايرتاح كتير قوى من التفكير.

 

 

[moka]

.
.

الله يرحمه ويغفر له ..!

 

 

[haya]

اقتباس بجد انا متلخبطه و مش عاراقول ايه غير الله يرحمه و يغفر له و يابخته اللى قدر يحقق حلمه حتى ولو مات بعدها مباشره

لا خالص مش بتتقاس كدة بالنسبة له ...يعني مش اكيد يا بخته ..لانه في عالم تاني خالص وحلمه اللي انتي بتحسديه عليه ممكن اوي يكون سبب في تعاسه ابدية له ..( والله اعلم طبعا ) والسعادة اللي حققها من تحقيق حلمه دامت شهرين تلاته سته مثلا ..يمكن ...!! لكن ياتري ايه اللي باقي معاه دلوقتي ؟؟؟حلمه ولا عمله الصالح مهما كان ..؟؟ ايه اللي ممكن ينفعه دلوقتي ؟؟ شهرته ونجاحه وتحقيق حلم عمره ولا عمل ينتفع به او صدقه جارية او ولد صالح يدعو له

صدقيني يا دكتورة فريدة ..الحياة لا تستحق الاحلام الا اذا كانت هاتتحول لرصيد في الاخرة ..غير كدة كل الاحلام مجرد اوهام ..حتي لو اتحققت هاتدينا سعادة مؤقتة والباقي منها بس هو اللي هايبقي بعد ما الانسان يموت وتفضل صدقه جارية علي روحه

ربنا يرحمه ويعفو عنه و يكتبه من الصالحين باذن الله هو وجميع امواتنا واموات المسلمين يارب

 

 

[فــيــروز]

أهميّة الأحلام هى فى أن تتواجد فى فكرنا و فى أن نسعى لتحقيقها و أن يكون لدينا القدره و الشجاعه على هذا السعى .. تحقّقها مش مهم أوى .. لو أسعدتنا الأقدار بتحققها بيكون شئ لطيف و شعور جميل بالإنجاز لكن حتى لو لم تتحقق فهذا لا يعيبنا و يكفينا أنّنا سعينا نحوها و مافضلناش نهزّ كتافنا .. و على رأى "كلينت استود" فى فيلمى المفضّل اللىّ "فريده" مش بتطيقه :

“The old dreams were good dreams. They didn't work out, but I’m glad I had them.”
The Bridges of Madison County

 

 

[أحمد باشــا]

الإنسان مكلف بالسعي و يسئل عن أعماله و سعيه

أما النتائج فلا يسئل عنها فهي رزق من الله لمن يشاء و كيفما يشاء

يعني المفروض ان الإنسان يحلم و يسعى ان يحقق احلامه

و يحمد ربنا على ما آتاه منها او تحقق

و قديما قالوا ليس كل ما يتمناه المرء يدركه

و انت تريد و انا اريد و الله فعال لما يريد

 

 

[حنان]

الموضوع بالنسبة لي مش مسألة احلام
انما مسألة واجبات
يا ترى يا رب حعمل كل اللي عليا اعمله قبل ما اموت؟
حفيد ناس بعلمي؟ حساعد مرضى محتاجين لي؟
حتجوز واجيب عيال اربيهم تربية صالحة وسليمة؟
حساعد قرايبي اللي محتاجينلي؟ امي واخواتي؟
حعمل كل اللي عليا اعمله وواجب عليا؟ حلحق قبل ما اموت اعمل اللي يضمن لي الجنة؟
دي احلامي
وربنا يقدرني واحققها يا رب
الف رحمه ونور على محمود الفيشاوي
ربنا يرحمه ويرحم موتانا جميعهم يا رب ويجعل نهايتنا طيبة ومأوانا الجنة
آمين يا رب العالمين

 

 

[brain]

عمنا الساخر محمود السعدني سمعته مره بيقول
اصحاب الاحلام الكبيره هم الاطول عمرا
لان عمرهم لا يقاس كباقي الناس بالسنين التي عاشوها
و لكن بالحلم الذي حلموا به و خصوصا عندما يتحقق
السؤال بقى الذي لابد ان يسأل
كم واحد حلم لغيره و لم يكتفي باحلامه لنفسه فقط ؟

 

 

[Farida]

لو مش حاتحلم معايا مضطر احلم لنفسى
لكنى فى الحلم حتى ........عمرى ما حاحلم لنفسى