استفتاء .. أى الصحف تفضل ؟؟

[MFaisal]

الصحف المصرية والعربية

طبعا فى هوجة الصحف الخاصة بتاعة اليومين دول .. الصراحة انا عن نفسى عديت على جرايد كتير بس تقريبا مالقيتش حاجة حسيت انها perfect حتى الآن ..

المصرى اليوم : باكرهها لأنها صحيفة ساويرس + تطبيلها الدائم لمشاكل الأقباط ..

اليوم الساقع : صحيفة لا لها لون ولا طعم ولا رائحة + انى أخدت بالى من ان لهم اتجاه المصرى اليوم وشلة ساويرس بس بطريقة اكثر وقاحة ..

المصريون : تقريبا من أكتر الصحف اللى فيها staff محترم .. بس للأسف حسيت الفترة اللى فاتت انها بتسرح مع الأشاعات كتير واحيانا أخبارها الرئيسية بتطلع فشنك ( مجرد كلام متداول واشاعات )

الأسبوع : تابعتها مسافة الا انها اسبوعية وبالتالى بحس انها قديمة جدا ..

الدستور : ماتابعتهاش أوى .. وفى الفترة الأخيرة مابقتش أحترم ابراهيم عيسى زى الأول لأنوانضم لشلة ساويرس ..

الشروق : متهيألى من الجرائد ( الموزونة ) اللى موجودة على الساحة .. انا جديد عليها بس مش مشدود لها حتى الآن ..

الجرايد الحكومية : فى جردل الزبالة طبعا .. الا انى بحب اتابع سيد على كل سبت فى الأهرام .

ياريت نسمع رأيكم ..

 

[linux]

اعطيت صوتي للشروق.

أتابع المصري اليوم تقريبا يومياً على النت، و اقرأ بوابة الشروق بنهم كبير. أما باقي الباقة فأعتبرها تحصيل حاصل إلا من بعض الكتاب في جريدة الأهرام.

 

 

[مصرية]

بتعجبني المصري اليوم لإني بلاقي فيها كل الآراء مش بحس إنها مع حد ضد حد ولما بيجيبوا خبر أو اتهام بيبقى بالوثائق الرسمية لدرجة إنها بقت السبب في أوقات كتيرة لبدء التحقيق في أحداث مهملة من قبل الحكومة

كمان بلاقي فيها مقالات تاريخية حلوة ومفيدة ودايما فيها ملف خاص بيبقى عن موضوعه شيق في أغلب الأوقات

 

 

[حنان]

المصري اليوم... بحس انها صريحة وحيادية
ممكن على أساس كلامك يا ضبش أشوف الشروق أخبارها ايه كمان

 

 

[حرررم بم بم]

في الواقع و قبل الإعتماد على الإنترنت بشكل كامل في قراءه الصحف يعني حتى قبل ثلاث سنوات مضت

غالباً كنت أفضّل الأعداد الأسبوعية من كل جريدة

يعني الجمعة الأهرام بشكل أساسي
السبت الفجر و أخبار اليوم
الأحد الأخبار ايضاً
الإثنين صوت الأمة
الثلاثاء الأهرام
الأربعاء الدستور و من قبلها الأهالي
الخميس الجمهورية

الصحف المسائية لم أحبها إطلاقاً ( المساء ، الأهرام المسائي ) لأنها مجرد خبريات و لا أحد بها مقالات دسمة تستحق القراءة


بالنسبة للمجلات

أيام زمان منذ الثمانينات و أنا متابع جيّد لمجلة (الشباب) و لازلت أحتفظ بأعداد قديمة كثيره لها

تابعت أيضاً مجلة (أكتوبر) في الثمانينات و التسعينات بشكل كبير

و أحياناً مجلة (المصوّر)

 

 

[مصرية]

اقتباس المشاركة الأصلية كتبت بواسطة حرررم بم بم بالنسبة للمجلات أيام زمان منذ الثمانينات و أنا متابع جيّد لمجلة (الشباب) و لازلت أحتفظ بأعداد قديمة كثيره لها

يا سلااااااااام فكرتني بمجلة "الشباب" كنت متابعاها أيام ما كان رئيس التحرير عبد الوهاب مطاوع الله يرحمه بس بعد ما مات هو ويوسف عوف الله يرحمه حسيت المجلة مبقاش لها طعم ومواضيعها اتغيرت، من وقتها بطلت متابعتها

 

 

[أحمد باشــا]

اقتباس المشاركة الأصلية كتبت بواسطة حرررم بم بم أيام زمان منذ الثمانينات و أنا متابع جيّد لمجلة (الشباب) و لازلت أحتفظ بأعداد قديمة كثيره لها

يبقى اكيد شفت صورتي

 

 

[حرررم بم بم]

اقتباس المشاركة الأصلية كتبت بواسطة أحمد باشــا يبقى اكيد شفت صورتي

و هل يخفى القمر يا أحمد باشا

فاكرك بالأمارة أيامه كنت لسه ( أحمد بك) قبل الباشوية يعني

 

 

[أحمد باشــا]

اقتباس المشاركة الأصلية كتبت بواسطة حرررم بم بم و هل يخفى القمر يا أحمد باشا فاكرك بالأمارة أيامه كنت لسه ( أحمد بك) قبل الباشوية يعني

انت اللي قمر

بس تفتكر كان اسمها ايه الأول ؟؟؟

 

 

[حرررم بم بم]

آه طبعاً

الشباب و علوم المستقبل لحد 85 تقريبا