المشاكل و الصعوبات الي ممكن تقابل المهاجر الجديد

[Moe]

الصحف المصرية والعربية

بفضل الله المواضيع الي هنا و الي هناك فيها معلومات اكبر من بعض المواقع الحكومية نفسها ..موضوع واحد شخصيا شايفه مهم ..حقوق المهاجر ايه..ايه الي ليه و الي عليه??..معظم المشاكل الي وقعت فيها انا و اهلي كانت لاننا مش عارفين حققونا ايه ..

ناس كتير في البلد لسا مش عارفة حقوقها و ماشية جوة الحيط ..مع ان البلد بلد حريات ..طالما انت مستقيم و مهاجر شرعي يبقي زيك زي اي حد من اصغر عامل ل(هاربر) نفسه ..الاخلاق عالية صحيح بس مش كل الناس ملايكة ..حتلاقي الي يستغلك لو عرفك انك مش فاهم حقوقك ايه ..

حتلاقي العنصري و ان كان ما يقدرش يفتح بقه لان بيته و البيت الي جنب بيته ممكن يتخرب ....كل ما فهمت حقوقك كل ما كنت اقوي و اتمتعت بالبلد اكتر ..البلد من اصغر واحد لاكبر واحد مهاجرين ..ده رأي شخصي ..
دي بعض المشاكل الي حصلتلي و بعض الناس الي انا اعرفهم بجمعها من فترة كل ما الاقي وقت فاضي ..حكتبها و ايه الي ليك و الي عليك.. ما فيش حد محتاج شئ بفضل الله و كل الحاجات الغامضة اول ما تحط رجلك حتبان..بس حكتبها و خلاص بما ان الواحد فاض الكام يوم دول شوية قبل بداية ال Summer school في مايو ... يمكن تواجه شخص و لو عنده فكرة مسبقة حتقلل الصدمة شوية .. the worst Scenario ..يا ريت الي عنده شئ يضيف لان دي تجربة فرد واحد فقط ..اكيد في حلول اكتر لكن ده الي اعرفه ..:-

السكن

اسرة جايه جديد .. قاعدة في فندق كل ما تتصل علي مكان عشان تأجر يقوللهم احنا عايزين References ..ازاي حيجيب ريفرنس و هو جديد ..ما فيش شغل ..ما فيش معارف ازاي حيسكن كده ؟

قانونا ما فيش Landlord يقدر يقول لشخص انا مش حأجرلك عشان (لونك-سنك-عمرك-دينك) بس حتت ال Reference دي حتقف مشكلة ..مش كل البيوت عايزة Reference ..الواحد عايز يدور Little Harder في الاول ..لو قفلت خالص يعرض علي الشركة انه يدفع Deposit كبير غالبا حيوافقوا ..لو ما نفعش أسئله لو ينفع guarantor Or Personal Reference و شوف حد من معارفك يضمنك ..لو ما نفعش شوف بيت او شقة مملوكة لفرد مش شركة ..حتكون القصة اسهل و اعرض عليه نفس الكلام ..لو ما نفعش و ما فيش حد يفيدك او يساعدك ألجاء لواحد من دول حيساعدوك اكيد.. حتلاقي ناس بتتكلم عربي

Housing Help Centers

Library Settlement Workers

Community Centers


الحمد لله لقيت بيت ..ايه الي ادور عليه في البيت ؟

لو شقة (Apartment Or Flat )..معظم الشقق لازم قبل بداية عقدك و ما تتنقل لها انه يجدد البيت ..يدهنه ..ينضفه ..(غالبا) ما تنسوش انا بتكلم عن تجربة شخصية ..لازم يجيبله التلاجة جديدة و البوتجاز يتجدد ...كل ده في العقد ..ساعات بيستهبلوا لما يلاقوا الشخص مش فاهم ..ما تدخلش البيت لو عملت عقد الا لما يجدده او ينضفه و يجيبلك الي متفق عليه (علي حسب المتفق عليه طبعا القصة بتختلف )..القصة بزنس ما فهاش كسوف و لا احراج ...شوف اي اثار لحشرات او قوارض او اي شئ ..الله اعلم الي قبلك كان مربي ايه ..اسئل عن ال Heat و الكهربا ..حسسه انك فاهم ..اهمية اللغة طبعا فرق كبير
لما تسكن و حصل شئ في البيت .. التلاجة باظت..المجاري ..كلم ال Landlord علي طول ..ما تصلحش حاجة ..هو المسؤل عن اي حاجة تبوظ (غالبا)...البيت (House ) قصة مختلفة شوية ..ما عنديش فكرة كبيرة عنها




سكنت في البيت ... عملت عقد لمدة سنة ..و لقيت حشرات مثلا ..لقيت ان في شئ مضايقك ..مش مرتاح في البيت ..عايز تمشي قبل نهاية العقد او المدة المتحددة في العقد ؟

في شقق حتلاقيهم في العقد عمالين غرامة مالية معينة لو كسرت العقد .. في اماكن لا ..مهم جدا تقرأ العقد ...لو ما فيش ..كلم ال Landlord براحة و هدؤ الاول ..اشرحله موقفك ..الانسان البسيط السهل مهضوم في اي ثقافة ...لو وافقك ..مهم جدا انك تكتب الكلام ده في ورقة و تمضي عليه انت و ال Landlord ...مهممممم جدددددددددااااا ..مهما كان ظريف و لذيذ معاك ..البلد بلد ورق ..لازم اي شئ بورقة ممضية ..مافيهاش كسوف و لا احراج و لا مجاملات ...

لو رفض و انت مش قادر تستحمل لنهاية المدة الزمنية ..فيران او اي بلوة ما كانتش موجودة قبل ما تأجر ..اتصل علي محامي في حاجة اسمها Legal Aid ..دول محامين الحكومة بتدفعلهم عشان يساعدوا الناس مجانا (غالبا )..او بأجر رمزي جداااااا....هو حيقولك تعمل ايه
لو كل ده ما نفعش و انت مش قادر تقعد بجد و خلاص جبت اخرك ..في شقق لا تطاق فعلا ..اتصل علي

the Investigation and Enforcement Unit,of the Ontario Ministry of Municipal Affairs and Housing

IEU
416-585-7214
1-888-772-9277
هما حيقوموا بالواجب

 

[Moe]

اسرة مهاجرة جديد ...محتارين في سكن و لقت (شخص) بيأجر مكان ..و لما راحه قابلوه هات يا ظرافة و لطافة و عايز يسكنهم بدون عقد ..او ورق رسمي ..تسكين من الباطن يعني ؟

شخصيا انا مش حعملها ...امشي قانوني لان لو يوم مثلا المجاري (ضربت) و اتصلت عليه عشان يصلحها و هو كان سهران طول الليل و و كلمك وحش و انت زعلت و اللطافة و الظرافة اتحولت معارك..و لا حتقدر تعمل شئ ..و لو طردك بره و اتصلت بالبوليس و لا حيعمل شئ ..البلد بلد (ورق) اي شئ لازم يتثبت بالورق و المستندات ...
لو أجرت قانوني ..مهم جدا تحتفظ بكل ورقة ادهالك الLandlord ..اي Receipt حيدهولك يثبت انك دفعت الايجار اطول فترة ممكنة ..انا مشتري شنطة مخصوص و مجمع فيها الحاجات دي


اسرة سكنت جديد في بيت ...و حست ان ال Landlord الي اكيد معاه نسخة من المفتاح بيدخل البيت من غير أذنهم لما يكونوا برة ؟؟


بالقانون ال Landlord ما يقدرش يدخل بيت حتي لو حيصلح شئ في البيت الا لما يدي علي الاقل 24 Hr Entry Notice ... الا لو في حالة Emergency ...لو حسيت انه بيعمل كده كلم ال Manager بتاعه علي طول ...لو ما فيش استجابة اتصل علي ال 911..طالما انت قانوني و شرعي في البلد ..طالما انت مش غلطان ما فيش شئ تخاف منه ابدا ...بالعكس الكل حيقف معاك


اسرة سكنت في بيت ..او بيزمنت ...ال Landlord الي مجأرين منه ساكن معاهم في نفس البيت ..طابق علوي مثلا ..في الشتاء كان بيقفل الHeat ساعات عشان يوفر عليه المصاريف شوية ..كل ما يروحوا يكلموه (يا عمنا احنا في الشتا ..ما ينفعش) يقولهم اعلي ما في خيلكم اركبوه ...اصلهم مهاجرين جديد و هم عارف كده ؟

بالقانون اي Landlord مطالب انه يوفر درجة حرارة معينة لل Tenants الي عنده في البيت ...في تورونتو
minimum of 21C/70 Fahrenheit لو درجة الحرارة في البيت اقل من كده ...و انت مش سبب مباشر لتغير درجة الحرارة (مجنون زي بيفتح الشباك علي مصرعية في الشتاء ) ...اتصل علي ال
city's Building and Inspections department or your city councilor

338-0338 (Access Toronto)
East District
East York 416-397-4590
Scarborough 416-396-7322
North District
North York 416-395-7000
South District
Toronto 416-392-7539
West District
Etobicoke and York 416-394-8002
و اشرحلهم موقفك .. حيساعدوك اكيد



اجرت بيت ..ال Landlord مش عايز يصلح حاجات في البيت ..كهربا ...تلاجة ..اي شئ؟؟


كلمه شفهي بالاصلاحات المطلوبة ...لو رفض اكتب جواب و صور منه نسخة و ابعتله الجواب ده و احفظ التاريخ الي ارسلت فيه الجواب ..ما فيش استجابة برضه ..كلم ال
city's Building and Inspections..
خليهم يبعتوا مفتش يكتب تقرير بالاضرار الي حيشوفهاو المالك مش عايز يصلحها ..و احتفظ بنسخة من التقرير ..لو اتكلمت و طلبت city Building Inspector و ما جاش اتصل علي نفس الرقم و اتلم مع الSupervasiror بتاعه ...بعد ما التفتيش تم و لسا عمو ال Land lord ما معبرك ...اتصل علي
the
Investigation and Enforcement Unit,of the Ontario Ministry of Municipal Affairs and Housing

IEU
416-585-7214

1-888-772-9277

هما حيقوموا بالواجب

city's Building and Inspections department or your city councilor

338-0338 (Access Toronto)
East District
East York 416-397-4590
Scarborough 416-396-7322
North District
North York 416-395-7000
South District
Toronto 416-392-7539
West District
Etobicoke and York 416-394-8002


حصل مشاكل مع ال Landlord لاي سبب ..هل ممكن ال Landlord و انا بره يغير القفل و يطردني بره ؟

حتي لو مش دافع ايجار ..و هو ما بعتلكش Eviction Notice .. ما يقدرش يعمل كده ..لو حصل اتصل علي 911 علي طول ..بس الي ما يدفعش الايجار يستاهل الي يحصله

اسرة اجرت بيت ....عمو ال Landlord اللذيذ شاف ان الناس دول مهاجرين جداد و حب يتنطط و بعتلهم جواب رسمي (فهمي)( نظمي) بيقولهم ان الايجار حيرتفع من الي موجود في العقد كل تلات او ٦ شهور ؟؟

قانونا في اونتاريو ال Landlord حقه فعلا انه يرفع الايجار ... بس قانونا مرة كل ١٢ شهر ..اقل من كده غير قانوني و لا يعتد بيه و من حقك ترفض طبعا ..لو كلمته و ضحكلك و قالك امضيلي علي الورقة دي ..ما تمضيش علي اي شئ في البلد قبل ما تقراه اكتر من مرة ..


اجرت بيت او شقة عند Landlord بس عنصري ..مش بيحب العرب ..مريض نفسي ..اي بلوة ..ابتدي يضايقني و يخلي ( صبيانه) يضايقوني ..بيهددني مستغل انا الانجليش لسا مش قوي ..اعمل ايه ؟

انت مهاجر جديد لانج ..لغتك علي القد ...اعمي و اعرج و اخرس ..ما فيش حد ليه الحق يعاملك سئ او يهددك ..لو حصل ..اتصل علي

the Investigation and Enforcement Unit (IEU) of the Ministry of Municipal Affairs and Housing
علطول في 18887729277/ or 416-585-7214
او اتصل علي محامي في مباشرة ال Legal clink ..حتتعجب من الي حيحصله

القصة مش( دراع ) و لا (بلطجة) لكن البلد بلد قانون ..انت مطالب تحترم القانون .. و غيرك مطالب برضه ..لو خالفت القانون مش حيشفعلك انك (مش فاهم) (انا مهاجر جديد ) ..و بالمثل لو حد تعتدي عليك و علي حقوقك حتلاقي الي ياخودلك حقك برضه ...في حتت القوانيين دي ..بجد سعيد اني هنا

 

 

[Moe]

طيب انا ما كنتش ناوي افتح موضوع جديد بس انا حاسس ان الكلام ده ممكن يفيد شخص يوما ما و لاني متاكد من بداية مايو انا مش حلاقي وقت. كل ما الاقي وقت بفضل الله اكتب الي شفته...لو معرفتش اتابع الموضوع شكلها حيبقي rude انا عارف.. بس دعواتكم بتيسير الاحوال وارجوا المعذرة

 

 

[Eng Hesham]

لا بجد موضوع مهم جدا جدا جدا
وخصوصا للناس اللى خلاص قربت تسافر
و دى حاجات مهمه جدا و اللى مياخدش باله منها لازم هاتحصله مشاكل كتير
شكرا على مشاركتك و مسجل متابعه لكل اللى حضرته بتقوله

 

 

[أكسيلانس]

بارك الله فيك يا دكتور - أذدنا يا سيدي - نحن في أشد الحاجه الي كل نصيحه و معلومه مفيده


خالص تحياتي

 

 

[ELSHAMY]

تسلم ايدك يا دكتور

جزاك الله خيرا

تسجيل متابعة

 

 

[ramyfathalla]

د / محمد بجد اللسان يعجز عن الشكر أمام شخصية زى حضرتك
حضرتك علمتنا حاجات كتير هنا و هناك و عطائك كبير قوى قوى فياريت ما تغبش عننا
و موضوع جميل و مهم جدا فعلا و ربنا يباركلك
و تسجيل متابعة

 

 

[نور عمر]

[SIZE=×4]السلام عليكم جميعا
ارجو المعذرة و المساعدة العاجلة و النصيحة لو سمحتم
1- أنا طبيب بيطري دفعة 97
2- أعمل في مجال التسويق و بيع الأدوية من تاريخ التخرج (13 سنة خبرة)
3- اترقيت خلال الفترة دي 3 مرات يعني الخبرة بقت أفضل
4- قدمت تبع مكتب القاهرة يناير 2007
5- حاليا ماشي في MBA من جامعة شهادتها معترف بيها دوليا حتي في كندا
السؤال : 1- مجال العمل في التسويق و البيع للأدوية أخباره ايه في كندا
2- الشهاده المعترف بيها دي هل ممكن يكون في أي طلب لعمل أي نوع من أنواع المعادلة أو اي حاجة تاني ليها علشان اعرف استغلها في الشغل
3- عاوز نصيحة مخلصة لأني احترت في موضوع الاقامة أنزل فين في كندا علشان يكون أولا: مجال الشغل أقدر أشتغل علي طول بعد أقل و قت
ثانيا: أنسب و عاوز أقول أنسب من ناحية تكاليف الاقامه و السكن مكان في كندا للبداية

أرجو المساعدة و الرد بسرعة خصوصا من الأخوة الأفاضل اللي مستقرين في كندا وشكرا لكم[/SIZE]

 

 

[نهر النيل]

بارك الله فيك يا دكتور محمد

الموضوع مفيد ومهم جدا

بمناسبة الحقوق والواجبات انا كنت سألت عن معلومة عندي معرفش هي صح ام خطأ وعايزة اعرف


هل من حق دافع الضريبة انه يطلب فلوس الضريبة اللي هيدفعها تتفع في انشطة معينه (تعليم او صحة مثلا)او من حقه ان يطلب ان اللي هيدفعة مايمولش حروب مثلا او اي نشاط هو مش عايزه ؟؟؟؟

ياريت تستفسرلنا لو تسمح

وجزاك الله الف خير

 

 

[صودا]

احسنت يا لورد كلام كبير ومهم جدا على كل المستويات واعتقد ان الاخوة لديهم استفسارات وخبرات من السابقين واللاحقين ومداخلات مفيدة نرجوا ادراجها للاستفادة ا لقصوى لكل الاعضاء الافاضل ولك المزيد من الشكر