مهارات التواصل الانسانى

[حسام]

الصحف المصرية والعربية

السلام عليكم
العنوان كما ذكر
مهارات التواصل الانسانى
communication skills
بداية التواصل أو الاتصال الانسانى ينقسم لنوعين:
1-اتصال مع أفراد
2-اتصال مع الجماعاتmass communication
واحنا فى كتابنا بنتكلم عن الاتصال مع فرد
وهو كتاب لشرح منهج تدريبى يدرس للعاملين فى مجالات عديدة
كمجال المبيعات
وخدمة العملاء
والمتفاوضين
وأرى أنه يهم كل شخص فى دنياناحتى لو لم يكن يعمل فى المجالات السابق ذكرها
فى عملة
وبيتة
ومع أصدقائة
ومن لا يعرفهم
ومع أقرب الناس الية
لو قابلتك قبل كدة مشكلة انك تيجى تتكلم مع حد
يفهم كلامك غلط
أو الرسالة اللى انت بتقولها ماتوصلش زى ما انت تقصد
أو حاسس ان فية فجوة بينك وبين واحد من الناس
قريب ليك
أو غريب عنك
أو حتى مش قادر تتواصل مع كتير من الناس
فلتقرأ هذا الكتاب
لتصلح الخطأ
ولتصل كلماتك كما أردت وقصدت بالمللى لمن تخاطبة
وسنبدأ تلخيص الكتاب فى المشاركة القادمة باذن الله

 

[hoppa]

فين رابط الكتاب عشان نحمله

 

 

[حسام]

مفيش رابط ياباشمهندسة هبة
أنا هلخصة وهكتبة على حلقات
وأى خدمة

 

 

[حسام]

هنتكلم دلوقتى عن ازاى حضرتك بتوصل رسالة للى قدامك
أيا كان
مديرك
شريك الحياة
الأسرة
سواق تاكس
بياع خضار
زملا فى مكان ما
الأصدقاء
للأسف كتير من الناس فاكرة ان التواصل ونقل الرسايل بين الناس
بالكلمات
للأسف المعلومة مش صحيحة وهية من أشهر الاخطاء الشائعة
نقل المعلومة أو التواصل بين شخص واخر يتم كالتالى
أولا الكلمات
ثانيا نبرة الصوت
ثالثا تعبيرات الوجة والجسد
تخيلوا بقى النسبة كام بين التلات وسايل فى التواصل بين الناس؟
هل هيبقوا بالظبط؟
33% لكل واحدة؟
لأ
هل الكلمات بتعبر أكتر من لغة الجسد والوجة ولا الصوت؟
لأ
للأسف
التفاهم بين الناس والاتصال بينهم بيبقى كالتالى بالنسبة للحجم الكلى للتفاعل والاتصال بينهم:
أولا لغة الجسد والوجة تشكل أكثر من نصف اتصالنا بمن حوبنا
تخيلوا
بتعبر عن 55 % من اتصالنا ابلعالم الخارجى
ودى المفاجأة
حد كان متصور كدة؟
ثانيا نبرة الصوت تشكل 38 % من أدوات الاتصال بين حضرتك والعالم الخارجى
ثالثا الكلمات واللى كتير من غير المتخصصين بيفتكروها هية الوسيلة الأهم ودة للأسف مش صحيح
بتشكل بس 7 % من أدوات الاتصال
النتيجة غريبة؟
كانت متوقعة؟
لية ملحوظة بعد اذن القارئ فى الموضوع لمن يشارك زى حالاتنا فى منتديات
فى المنتديات انت بتشارك انت وكل اللى حواليك بنسبة 7 % بس من وسائل التفاهم
وهية الكلمات
مش قصدى أضرب فكرة المنتديات
بالعكس
لكن نفسى ان أى واحد قبل ما يزعل من حد يعرف ان التفاهم بالكلمات بيشكل بس 7%
يعنى لو كان الشخص اللى حضرتك بتختلف معاة
أو متضايق منة
قدامك
شايفة وشايفك
شايف تعبيرات وشة
وحركات جسمة وايدية
صدقنى كان ممكن تحبة بدل ما تتضايق منة
تحياتى
والى اللقاء فى الجزء القادم
ولو فية أى ملحوظة أو أى سؤال أنا تحت أمركم
حسام

 

 

[حسام]

والان وضحت الرؤية
هدف هذا البرنامج التديبى
رفع مهارة التواصل مع الاخرين بتوصيل رسالة تعبر بالضبط عن قصدك
(ودى بداية الاقناع لأى شخص)
يعنى الكورس مهم للى عاوز يقنع حد بحاجة
الأول
لازم يعرف مهارات الاتصال
لانها الخط الأول للاقناع
طيب ما هى خطوات التواصل الفعال؟
1-اعرف نفسك وستايل شخصيتك
2-اعرف شخصية اللى بتتواصل معاة
3-كون رسالة فعالة ناجحة تعبر عما تقصدة بالضبط
وتكون طريقا للاقناع
طيب اية حكاية استايل شخصيتك؟
واستايل شخصية اللى قدامك؟
كاجوال ولا كلاسيك يعنى؟
لأ
الحقيقة عشان تعرف أنواع الشخصيات تبعا لمهارات الاتصال عليك تعرف عاملين مهمين بنقسم على أساسهم الناس وكل بنى ادم:
الأول:القدرة على التحكم فى المشاعر والانفعالات
وتبعا للعامل دة فية نوعين من الناس
أ-يتحكم فى انفعالاتة
ب-لايتحكم فى انفعالاتة
التانى:المبادأة
هية الحقيقى فى الكتب الانجليزية اسمها
power
وأنا مش شايف ان الاسم ينفع يترجم القدرة أو الطاقة أو أى حاجة تانية
مالقيتش ترجمة أنسب الا
المبادأة
طيب يعنى اية مباداة؟
تخيل نفسك مسافر فى قطر
طيارة
أو أى وسيلة
وجنبك واحد ماتعرفوش
فية ناس تلاقيها بتبدأ دايما الكلام
ودايما بتحب تاخد الخطوة الأولى
وناس تانية مش بتحب تبدأ أى تحرك فى الأول
بتحب تستنى لما تشوف الدنيا عاملة اية
وبناءا علية ترتب ردها
ناس بتحب الاكشن-الفعل
وناس بتميل للريأكشن-رد الفعل
النوع الأول بنسمية مبادئ(بضم الميم وفتح الحاءوكسر الدال)
والنوع التانى اسمة مستقبل(بكسر الباء)
تهت منى؟
بسيطة خالص
طبقا للتحكم فى الانفعالات فية نوعين
متحكم +غير متحكم
وطبقا للمبادءة هتلاقى نوعين
مبادئ+مستقبل
وبما ان اتنين فى اتنين =4
وبالتباديل بين العاملين واحتمالاتهم الثنائية
هتلاقى عندك الأربع أنواع من البشر
أو الأربع شخصيات
1-متحكم فى انفعالاتة+مبادئ وبنسميةالاستهدافى
2-متحكم فى انفعالاتة+مستقبل وبنسمية التحليلى
3-غيرمتحكم فى انفعالاتة+مبادئ وبنسمية المناصر(بضم الميم وفتح النون)
4-غيرمتحكم فى انفعالاتة+مستقبل وبنسمية الودود
تهتوا؟
دى سهلة قوى
الاستهدافى أكثر ما يهمة هو الهدف
التحليلى أكثر ما يهمة هو التحليل والمنطق والتخطيط
المناصر أكثر ما يهمة الفكرة
المحب أكثر ما يهمة هو الناس
طيب اية لازمة الفيلم الطويل دة؟
ينفع تتتواصل أو تتكلم مع واحد بيتكلم انجليزى وانت بتتكلم عربى؟
طبعا لأ
وبيسموة حوار الطرشان
طيب اية الحل؟
لازم تتكلموا انتم الاتنين لغة مشتركة
يا أما انت تكلمة انجليزى بلغتة
يا اما هوة يكلمك عربى بلغتك
يا اما انتم الاتنين تتكلموا لغة تالتة انتوا الاتنين تفهموها وليكن الفرنسية
لازم يبقى فية لغة مشتركة
عشان يحصل تواصل
يبقى طبقا لقاعدة التواصل اللى فوق
الأول خالص لازم تعرف انت مين
وشخصيتك اية فى الأربعة
ثانيا
اعرف الشخص اللى قدامك شخصيتة اية برضة فى الأربعة
ثالثا كون رسالتك وقولة اللى انت عايزة بما يفهمة حسب شخصيتك
مثلا
واحد بتاع أهداف(بس مش عمرو زكى يعنى)
عايز توصل رسالة ناجحة
ومقنعة
كلمة فى أى حاجة يكسبها
أو تحقيق هدف بالنسبة لة
أو مصلحة يسعى لتحقيقها
تكلمة بقى فى أفكار ومثل
لأ
تكلمة فى مشاعر وناس مش لاقية تاكل
ماياكلش معاة الكلام دة
تكلمة فى التكتيك والتحليل والترتيب
لأ
الا اذا كان هيوصل لهدف هوة عايزة
مع الاستهدافى لازم تبقى استهدافى
ومع الودود لازم تبقى وزارة الشئون الاجتماعية كلها
ومع المناصر لاوم تتكلم فيما يخص قضيتة أو مبدؤة
ومع التحليلى
اتكلم فى الترتيبات
والخطوات
والمنطق بيحتم اية
وتديلة وقت يدرس
كل واحد ولية لغتة اللى لو كلمتة بيها هتكسب تفاهمة
أتمنى أكون وضحت الصورة أكتر كيف تتواصل مع الاخرين
ولو فية اى استفسار
أنا تحت أمركم
لو حد متابع
ياريت يسأل
انشالله يعترض
عشان الواحد يحس لو فية اى حد متابع أو مهتم
شكرا

 

 

[FINETOUCH]

اكمل يا د حسام جزاك الله خيرا كنت فين من زمان

 

 

[haya]

كمل يا حسام كمل الموضوع شيق بجد ....

 

 

[حسام]

الف شكر للأفاضل هايا وفاين تتش
حقيقة أسعدتنى كلماتكم
وانا تحت أمركم

 

 

[حسام]

للرفع
موضوع من أحب الموضوعات الي قلبي
وأراه من أهم الموضوعات فى الحياة لكل الناس
وان رغب الزملاء فى المنتدي أن أكمل الموضوع
فسأكمله ان شاء الله
وان كان لنا العمر

 

 

[د عمرو الجندى]