انت بتذاكر فين كويس

[محمد أبوزيد]

الصحف المصرية والعربية

إن تذاكر - في الكافية - تنجح!
ضياء الدين فتحي- ولاد البلد- عشرينات- 24/12/2008

بدأ العد التنازلي واقتربت امتحانات نصف العام، وأصبحت الشوارع شبه خالية وبدأت المعسكرات "المنزلية" استعدادا للامتحانات، ولكن هناك من ينقل هذه المعسكرات إلى أماكن أخرى كنوع من التغيير وطرد الملل، فهناك من يفضل المذاكرة في الكافيهات وخصوصا في جماعات، وآخرين يكون تركيزهم في النوادي!. "هنذاكر في الكافيهات"

في أحد الكافيهات وجدنا سمير العسكرى وصديقه مصطفي، الذين قالا: "هنذاكر السنة دي في الكافيه على الأقل الواحد يرتاح من كلام بابا وماما، والواحد يذاكر على راحته شوية، ودايما بنجمع بعض ونذاكر مع بعض لأن المذاكرة الجماعية بتكون أكثر حماسا".

بينما يقول أحمد لبيب، كلية دار العلوم، "أنا كل سنة بحب أذاكر في مكان مختلف"، ويوضح أنه يكون أكثر تركيزا خارج المنزل "بعيدا عن دوشة البيت".

سعد، عامل في إحدى الكافيهات، يوضح أن إدارة الكافية حريصة أشد الحرص في هذه الفترة على تقديم الراحة الكاملة للطلاب الراغبين في المذاكرة خارج المنزل، فهم يرون أن المذاكرة أفضل في الخارج بشرط الهدوء والراحة، ويضيف أن للكافية عدد كبير من الزبائن الدائمين، منهم من تخرّج ويأتي ليقوم بأعماله هنا. وماله البيت؟

بينما تقول إناس، طالبة بالجامعة الأمريكية: "والدي شديد جدا ويرفض تماما المذاكرة في الخارج حتى ولو عند إحدى الصديقات، ودائما يحرص على دفعها للمذاكرة في غرفه خالية تماما وبعيدا عن أخواتها أو أي شيء آخر يلهيها".

مروان محمد، أولى ثانوي، يقول: "مفيش غير مذاكرة النادي، الواحد لما يكون وسط أصحابه بيكون أحسن بكتير، بيكون الواحد متحمس للمذاكرة، وكمان كلنا بنحاول نساعد بعض و ده أهم شيء".

على العكس يبين لنا مؤمن، ظابط شرطة، أنه كان يحب المذاكرة في المنزل في فترات الأجازات، حيث أن كليته داخلية والمذاكرة بالطبع تكون فيها، فالبيت كان هو المكان الوحيد الذي يخلو من الأفراد والزحام.

"ذاكر تنجح غش تجيب مجموع"، شعار رفعه الأصدقاء أمير ووائل وصلاح، فبرأيهم أن المذاكرة الآن لم يعد لها أي قيمة والغش هو اللي بيجمّع الدرجات الكتير!. "مفيش مذاكره بره"

أولياء الأمور أنفسهم اختلفوا في المذاكرة خارج البيت.. يحكى لنا الحاج "السيد"، أنه يمنع أولاده من المذاكرة خارج المنزل ويقول: "بلا كافيهات بلا نوادي بلا كلام فاضي وكل ده اندفاع شباب طايش لا يعلم أين مصلحته، كيف يذاكر الشباب في هذه الأماكن العامة؟.. يعنى ينفع الواحد يذاكر في ميدان التحرير؟".

ولي الأمر "محمد خليفة"، يوضح أنه لا يمنع أولاده من المذاكرة خارج المنزل حرصا على راحتهم النفسية، ويقول: "أنا ليا النتيجة في نهاية العام، والمذاكرة في جماعات تكون أفضل بكثير بشرط توافق المجموعة في المادة المراد مذاكرتها".

بينما يرى المهندس "أحمد حمدي" أن أيام زمان كانت المذاكرة في البيت وبس، ولكن الآن بالتأكيد أصبح الزمان أكثر اختلافا، ووجد الشباب أماكن جديدة تدفعهم للمذاكرة فيها، مضيفا أنه غالبا ما يمارس بعض أعماله في إحدى الكافيهات أو النوادي أو المطاعم على سبيل التغيير وليس على سبيل الدوام.

...

وأنت.. بتذاكر فين؟

 

[gadolly]

احلي مذاكرة يا باشا علي السرير, وتحط المخدة علي حجرك و تعملها تربيزة, و يا سلام لو تتغطي كمان و تجيب حاجة تشربها جنبك و ممكن حبة سوداني او لب

قبل ما حد يعترض, الحمدلله انا طول الكلية بذاكر كدة ة نجحت و جبت تقدير

 

 

[Badroora]

وانا كمان يا جادوللى عمرى فى حياتى ما عرفت اذاكر على مكتب ابدا دايما كل كتبي حواليا ع السرير ولما احب اتذكر حاجة معينه او احفظ جمله اغطس تحت الغطا وااقب بعدها بساعة ساعتين بس دى الطريقة اللى طول عمرى بذاكر بيها ونتجيتها مضمونه ومريحه جدا جدا بس بدون لب وسودانى عشان صعب التخلص من القشر لو وقع ع السرير بعد كدا

 

 

[galaxy]

انا بقي عمري ما عرفت اذاكر علي السرير السرير للنوم بس لكن المذاكره هنام ومش هركز..................ولا بعرف كمان اذاكر مع حد لاني بتعطل جدا .............لاني بنجز في المذاكره شويه وبلخص وبالتالي بتاخر لكن لو بنفتح الماده سوا كدا علي خفيف ومش قبل الامتحان مباشره طبعا ممكن نذاكر جماعه وغالبا كانت اللمه وكل صحباتي والمذاكره بتكون عندي في البيت في اوضتي لاني الوحيده في اصحابي اللي بيتي يصلح للمذاكره وهادي.......لكن قبل الامتحان مباشره لازم اكون بمفردي لزوم التركيز..........بس برضه مش بقعد علي المكتب .......................انا بذاكر وانا ماشيه في الاوضه ..............او اقعد اقرا ع المكتب ولا الفوتيه وبعدين اقوم بقي اخدها تمشيه وشرح واشاور بايدي وارسم ع الهوا وحالتي بتبقي صعبه جدااااااااااااااا...............بذاكر بقي

 

 

[Amal]

على الارض وحواليا الكتب والملخصات ولازم نوته كبيره عشان اكتب واشخبط واكبر كبايه نسكافية....القهوه على فكره مش بتسهرني بالعكس بنام عادي بعدها