خطيبى كدااااااااااااااااااب

[منحوسه]

الصحف المصرية والعربية

خطيبى كدااااااااااااااااااب

مش عارفه ابدأ الموضوع ازاى و احكيه منين لكن الملخص خطيبى كداب كداب كداب
مش عارفه اعمل ايه او اتصرف ازاى لكن ححكيلكم الحكاية من بدايتها و شوفوا بنفسكم و احكموا

احنا اتعرفنا على بعض اخر سنه فى الكلية كان وقتها مفهمنى انه لبنانى وامه انجليزية بصراحة انا مصدقتش
القصة دى لانه ملامحه مش اوروبية خالص و بعدين ضعفه الشديد بالانجليزية كان واضح جدا فمش معقول
ان تكون مامته انجليزية و هو فى الضياع

قولت فى نفسى بلاش اظن فيه يمكن اكون انا غلطانه .... كان لما بنكون ماششين فى الشارع مع بعض كان دايما
بيوضحلى انه خايف من عمه اللى هو عنده سلسلة محلات كبيرة اوى و ان مرات عمه و بناتها بيعاملوه وحش جدا
و بيعاملوه بعدم اهتمام كان بيقولى ان الشقة اللى هو ساكن فيها هى تمليك لعمه و ان هو قاعد فيها لغاية ما يخلص
دراسته فى مصر

بصراحه انا كان قلبى مش مرتاح للى بيحصل و حاولت انى انهى العلاقة دى فى بدايتها قبل ما تكبر
فصارحته اننا لازم نسيب بعض و كل واحد يشوف طريقة فجأة لقيته مسك موس و حاول انه يقطع شرايين ايده
وده كان بجد و فعلا هو صعب عليا ووافقت انى اديله فرصه تانى لكن عن شرط يصارحنى بالحقيقة

 

[منحوسه]

صارحنى بالحقيقة و ياريته ما صارحنى

قاللى ان هو مش لبنانى بس كان عايش فى لبنان فترة طويلة هو ووالده وامه الانجليزية و ان جنسيته
الحقيقية هى جزائرية وانه اتضر انه يخبى عليا لانه ميعرفنيش وبالاضافة ان ابوه هربان فى لبنان بتهمة
قلب نظام الحكم الجزائرى و ان فيه خطر كبير عليه لو فضح المعلومات دى علشان كده هو خبى عليا

حكالى انه هو اصلا معاه الجنسيىه البريطانية و انه اخر 7 سنين كان عايشهم فى بريطانيا مع امه
ومؤخرا اتضر انه يسافر على مصر هروبا لان وجوده فى بريطانيا فيه خطر على حياته وحياة امه لان المخابرات الجزائرية ممكن
تقتله انتقاما من ابوه انا صدقته و خفت عليه قوى اكتر من الاول و حاولت اساعده كتير بس كنت خايفه انى
اعرفه على اهلى ليسببلهم مشاكل او اى حد يعمل حاجة فى اخواتى

كان مفهمنى ان عمه اللى عايش فى مصر غنى جدا جدا جدا و ان نفوذه فى مصر كبيرة و ان الممتلكات
بتاعة عمه مشاركه بالنص مع ابوه اللى هى توكيل اجهزة كهربائية روسى كبير فى مصر و 4 عمارات
فى ارقى مكان فى القاهرة و فيليتين كبار فى نفس المنطقة ده غير الفلوس اللى فى البنوك ...

 

 

[منحوسه]

من الوقت ده بدأت احبه وقررت انى اساعده بالرغم من ان الموضوع مكلكع و كله مشاكل و فيه خطورة كبيرة اوى عليا و على اهلى و خصوصا ان البلد بعد الثورة فى البطيخ و ان لا فيه امن و لا فيه ضمير و الشرطة كانت بتصيف فى مارينا يعنى لو حصلت اى مشكله محدش حيجبلى حقى

كنت موجوده معاه وكنت مرعوبه خايفه عليه و خايفه على نفسلى موت ومش عارفه اعمل ايه اسيبه و لا اكمل و لا ايه بالظبت
يوم ورا يوم العلاقة بتقوى وبنتعلق ببعض اكتر و اكتر.... وعدت الايام
انا عمرى ما شفت عمه بس كان بيكلمه على التليفون كتير و كان بيزعقله اكتر و كانت بتبقى حالته دايما وحشه جدا بعد كل مكالمه وكان بيصعب عليا جدا كنت بحاول افهم ليه عمه بيعامله و حش كده و ليه هو ميشتكيش لابوه من عمه و من معاملته الوحشه ليه

 

 

[FINETOUCH]

عن سيدنا على بن ابى طالب: اياك والكذاب فانه يقرب البعيد ويبعد القريب
ابعدى عنه باى طريقه
وما ادراكى ان اى كلام يقوله فيه ذره صدق
الكذاب يجلب المصائب دائما
ابعدى عنه ابعدى عنه

 

 

[منحوسه]

المهم تمر الايام و تجرى الايام و احكى الحكاية لواحده صحبتى ربنا يباركلها نصحتنى انى لازم اكلم امه فى التليفون و فعلا اخدت قرار انى لازم اكلم امه و شرطت عليه انى لازم اكلم حد من اهله
كان بيتحجج بان ابوه خطر جدا انه يتصل بيه لحساسية الوضع اللى هو عايش بيه و امه كمان
خيرته انى اكلم حد من اهله او نسيب بعض لان علاقتنا كده حتفقد معناها

المهم انزعج جدا من الموضوع ده و قعد يزعق و يهددنى ان حيموت نفسه اذا سبته و عمل مشاكل جامده اوى وقتها بس انا نشفت رأيي و خلانى كلمت عمته فى التليفون قصدى اللى كان هو مفهمنى انها عمته
بس انا اصريت انى اكلم امه ...
راح قاللى انه حيقولى على سر خطير و فيه خطورة على علاقتنا انى لو عرفت الحقيقة
و الحقيقة اللى هو كان مخبيها عنى ان ابوه و امه اتقتلوا فى لبنان و ان عمه هو اللى متولى حمايته فى مصر
و مخبيه هنا من المخابرات الجزائرية طبعا انا سمعت الموضوع ده صعقت و كان دايما بيستعطفنى لانه يتيم و ملوش حد فى الدنيا حتى عمه كان بيعامله وحش وواخد منه ميراث ابوه ووخاخد منه باسبورة و كل اوراقه الخاصة

 

 

[منحوسه]

بعدها سارت الامور عادى جه فى يوم قفل موبايله و كل ما اسأله انت قافل موبايلك ليه كان بتحجج انه هربان من عمه و تصرفاته الغلط معاه فضل قافل موبايله 20 يوم كان بيفتحه بس علشان يكلم عمته اللى هى حتطلع امه الجزائرية الاصل ابا عن جدا و ان هى مش بريطانية من اصله وابوه كمان عايش و فى اتم صحه
وانى كل الفترة دى كنت عايشه فى الوهم
فى يوم فتح موبايله راح عمه الحقيقى كلمه ووبخه فى التليفون وطلب منه انه لازم يقابله و يقابلنى انا كمان هو
كان حاكيلهم عنى و انا كمان كنت عايزه اقابل اى حد من اهله علشان احكيلهم على اللى حصل معايا من ابنهم
وقررت بينى و بين نفسى انها تكون اخر مرة اقابله او اعرفه فيها

 

 

[منحوسه]

قابلت عمه انسان محترم جدا و شخص خلوق للغاية حكيتله الحكاية بس مش بالتفاصيل وحكيت لامه كمان
حاول انه يصالحنى ووعدنى انها تكون اخر مرة وقتها كنت بحبه ومكنتش حستحمل الالام الانفصال قولت اديله فرصة واحده بس واخيرة وفهمته كويس انها اخر فرصه بجد

 

 

[كرم احمد]

اقتباس المشاركة الأصلية كتبت بواسطة منحوسه قابلت عمه انسان محترم جدا و شخص خلوق للغاية حكيتله الحكاية بس مش بالتفاصيل وحكيت لامه كمان حاول انه يصالحنى ووعدنى انها تكون اخر مرة وقتها كنت بحبه ومكنتش حستحمل الالام الانفصال قولت اديله فرصة واحده بس واخيرة وفهمته كويس انها اخر فرصه بجد

انت بتحكى فى اية دة انسان مريض

 

 

[ysma]

واضح من القصة إنه شخص مريض عنده شيزوفرينيا

مع خالص إعتذارى لإسمك الكريم: الحل إنك تنحسيه..

 

 

[aymanology]

الي انا مش قادر افهمه .. ازاي واحد معاه جنسيه بريطانيه ويهرب من المخابرات الجزائريه ويستخبي منها في مصر