ويندوز xp ولا vista ؟؟

[MFaisal]

الصحف المصرية والعربية

اخوانى المطاريد .. كيف حالكم .. ايش أخباركم .. حياكم الله

استفسار تاعبنى ومخلينى مش عارف أنام .. فيستا ولا اكس بى ؟؟

أصل أنا كان جهازى قديم من ييجى 5 سنين وفضل شغال ومستحمل الأهانة لغاية ما بقى الهارد يزيق والمازربورد قفشت والبروسيسور بيطلع دخان ومروحة البروسيسور ساحت ولزقت فى بعضيها .. المهم الجهاز بقى عبارة عن واحد بيطلع فى الروح ..

الى أن حدثت المفاجأة اللتى غيرت مجرى الكون .. فى مرة وأنا بفتح الجهاز ما فتحش .. راااح خلاص

قلت يا واد يا ضبش اكرام الميت دفنه برضه وهو الراجل بيخدم من خمس سنين ولو بينطق كان قال كفاية ارحمنى ابوس ايدك

المهم .. روحت لوالدى حبيب قلبى اللى بينقذنى وبيدفع ويخلص فى المشاكل دى ..
ودار ما بينا حوار عاطفى ملئ بالحنان والشجن والبطيخ . وكان الحوار كالتالى :

ضبش : صباح الفل يا بابا
أبويا : صباح النور يا خويا . مش عادتك يعنى
ضبش : معندكش أى مشوار عايزنى أروحه أشيل حاجة أنضف حاجة .. احنا عايزين نخدم برضه .
أبويا : مانا بتحايل على أهلك لما بتطلع عينى وما بتعملشى حاجة . شكلك كده ياض عملت مصيبه
ضبش : لا يابا الصراحة الكدب خيبة هو فى مصيبه حصلت
أبويا : يرد لهفة : مصيبة ايه عملت ايه يخرب بيتك
ضبش : لا يا بابا اطمن . المصيبة مش فيا . المصيبة المرادى فى مرعى ( اسم الدلع بتاع الكمبيوتر القديم )
أبويا : مرعى كله الا مرعى . دانا دافع فيه دم قلبى من سنتين
ضبش : احنا هننصب يا بابا من أولها .. انت دفعت دم قلبك فى مرعى من خمس سنين مش سنتين .
أبويا : الله يخرب بيتك ده كان يسوى الشئ الفولانى ابعد عن وشى السعادى بد ما احدفك باللى فى رجلى
ضبش : هو انت مش ابويا برضه يعنى لازم تتحمل مسؤليتك المادية تجاه ابنك ضبش .. أول العنقود
أبويا : ده كان يوم اسود يوم ما شوفتك .. ما بيجيش من وراك حاجة عدلة
ضبش بكل رقة : يا بابا عيب الكلام ده الناس تقول عليك ايه . كمبيوتر ابنك باظ وانت سبته وحيد
أبويا : طيب المرة اللى فاتت جبلك الكمبيوتر لما قبضت الفلوس من ورث جدك الله يرحمه
ضبش : طيب هو ستى فاضلها كتير قصدى قصدى انت ممعاكش فلوس كتير ؟
أبويا : اخلع ياض من ادامى بدل ما اهب فى وشك الساعادى
ضبش : تهب ليه انتا وابور جاز
ابويا : المرة دى ماكانش كلام .. ده صوت طرئعة ايده على قفايا بعد الجملة الأخيرة

المهم فقدت الأمل .. وبشوية ضغط واقناع فى امى الحبيبة وافقت وخبطتنى 1000 جنيه وكام شتيمة روحت لسعت كمبيوتر فى اللذيذ 8 سلندر وبشاشتين

امكانياته بروسيسور 3 كاش 2 مسجا ورامات 1 جيجا وهارد 80 ومازربورد g31 فيها كارت شاشة 256 ميجا


ما علينا ...



أنهى أحسن .. أسطب ويندوز اكس بى ولا فيستا

 

[تقى]

والله فيستا رقيق وحلو بس رخم وخصوصا اذا كان مش اصلي بيقع بعد شهر وراتنين

لكن اكس بي بيشتغل وبيتحمل الشغل

 

 

[oskasan]

اقتباس ضبش : طيب هو ستى فاضلها كتير قصدى قصدى انت ممعاكش فلوس كتير ؟ أبويا : اخلع ياض من ادامى بدل ما اهب فى وشك الساعادى ضبش : تهب ليه انتا وابور جاز ابويا : المرة دى ماكانش كلام .. ده صوت طرئعة ايده على قفايا بعد الجملة الأخيرة

بصراحة وماتزعلش منى يا ابو الضبابيش
انت كده ضبشت في والدك .. وليه حق بصراحه
ماتزعلش احنا بنتكلم يعنى

اقتباس امكانياته بروسيسور 3 كاش 2 مسجا ورامات 1 جيجا وهارد 80 ومازربورد g31 فيها كارت شاشة 256 ميجا :thumbsup:

ممكن تترجم الكلام ده انجليزي او عربي حسب ما تحب ؟

اقتباس أنهى أحسن .. أسطب ويندوز اكس بى ولا فيستا

xp طبعا ولو بايدى اقولك ملينيوم او 98
لكن اقصد xp لان اي مشكله هاتظهرلك هاتلاقى الناس كلها بتساعدك
لكن الفيستا محدش كتير فاهمه
وبعض البرامج لو عندك باكب ليها ممكن ما تشتغلش عليه هاتضطر تشترى نسخ متوافقه معاه

 

 

[moka]

اقتباس المشاركة الأصلية كتبت بواسطة تقى والله فيستا رقيق وحلو بس رخم وخصوصا اذا كان مش اصلي بيقع بعد شهر وراتنين لكن اكس بي بيشتغل وبيتحمل الشغل

صدقتي يا اخت تقى
انا عندي في المكتب اكس بي وماشي زي العسل ماشاء الله عليه
اما في البيت فحدث ولا حرج كل شوية يطلب رقم التفعيل بتاع الفيستا
وقارفني ليل ونهار ومنتظر يا تنتن يا تنتن ...
يعني يا احرقه
يا افرمته

وشكلوا حرام مدفوع فيه فلوس حلال هاااافرمته وارجع للاكس بي

ضبش بيه افندم سيادتك سعادتك افندينا طولي عمرك

توكل على الله وسطب الاكس بي

 

 

[Modest]

ضبوشه
تروح الأول تبوس إيد بابا و تعتذر له و تقول له أنا آسف يا بابا . مفهوم؟

و بعدين تيجي تاخد أحلى و أخف إكس بي و كمان متفعّل و شغّال 100 100 من هنــــــــــــــــــــــــا و مزيد من الروابط هنــــــــــــــــــــــــــا.

و لو سمعت إنك زعلت بابا تاني هاتعرف شغلك

ضبابيش آخر زمن

 

 

[MFaisal]

اقتباس المشاركة الأصلية كتبت بواسطة oskasan بصراحة وماتزعلش منى يا ابو الضبابيش انت كده ضبشت في والدك .. وليه حق بصراحه ماتزعلش احنا بنتكلم يعنى

اقتباس المشاركة الأصلية كتبت بواسطة Modest ضبوشه تروح الأول تبوس إيد بابا و تعتذر له و تقول له أنا آسف يا بابا . مفهوم؟

جرى ايه يا جدعان انتو صدقتو ولا ايه ده كله تأليفيشن

 

 

[oskasan]

ما تنكرش يا ضبش
حتى لو ما حصلش
فده متخزن في عقلك الباطن
وخرج عند اول تفريغ
ارجع يابنى اعتذر لوالدك
وقوله آسف يابا
حرمت يابا

محدش بيحبك ويضربك من قلبه قده
ده مافيش احن من أيد الأب وهى بترن على ال....
اسأل مجرب

 

 

[toota]

دمك شربات يا ضبش....وشكلك حيبقى لك مستقبل كصصي رهيب....بس شد حيلك

 

 

[MFaisal]

اقتباس المشاركة الأصلية كتبت بواسطة oskasan ما تنكرش يا ضبش محدش بيحبك ويضربك من قلبه قده ده مافيش احن من أيد الأب وهى بترن على ال.... اسأل مجرب

انت هتقولى عالحنية .. دانا شبعان حنان

اقتباس المشاركة الأصلية كتبت بواسطة toota دمك شربات يا ضبش....وشكلك حيبقى لك مستقبل كصصي رهيب....بس شد حيلك

ربنا يخليكى يا مدام توتا .. بس موضوع الكصص ده عمرى ما فكرت فيه .. كفاية علينا الحاج حشيش




بس يا جماعة اللى دخلو قالو سيبك من الفيستا وخليك فى xp
طيب هو ايه الفرق بينهم أصلا ؟

 

 

[toota]

اقتباس المشاركة الأصلية كتبت بواسطة ضبش انت بس يا جماعة اللى دخلو قالو سيبك من الفيستا وخليك فى xp طيب هو ايه الفرق بينهم أصلا ؟

الفرق ان الفيستا لسه فيه مشاكل كتيرة متعرفتش ومش اتعربت للعربي كويس....وطريقة التعامل معاها لسه صعبه...اما الاكس بي فاسهل ومعظم مشاكله بقت محلولة