تجار الدين و الدم و الشرعية !

[savary]

الصحف المصرية والعربية

بيطنطنوا كتير قوى

بيحرضوا البسطاء و المؤدلجين للعنف

بيرطنوا كالعادة ... عن الشرعية !

خد بالك انهم نفسهم اللى كانوا بيرطنوا كتير قوى بالشريعة

و خد بالك انهم نفسهم اللى كانوا بيرطنوا كتير قوى بمشروع ..النهضة !





وخد بالك برده ان كل اللى عندهم طلع .... فنكووووووووش

حكم الشريعة ...فنكووووووووووش

والنهضة ...فنكووووووووووش

و هثبتلك كمان شوية ان الشرعية اللى بيرغوا فيها دى ...فنكووووووووووش

برده .







تعالى نسأل سؤال :

ماذا تفعل لو كنت مكان الرئيس مرسى ؟؟

35 مليون مصرى فى الشوارع و الميادين ... الرئيس المخلوع بشرطة

..اعترف بنفسه ان منهم كتير قوىشباب يائس و غاضب و محطم ... غاضب

بسبب الظروف الاقتصادية السيئة و الظروف الامنية السيئة وكل حاجة واللى

بقت هى كمان سيئة فى البلد .


هو نفسه كمان اعترف انه كان فى تقصير كبير منه و من حكومته !

و قال ان فى ناس من النظام القديم بتستغل غضب الشباب دول !

ماشى ..



خلينا فى المشهد اللى قدامنا دلوقتى

ملايين الغاضبين فى الشوارع منهم غاضبين لتردى الأوضاع و منهم من

يستغل هذا الغضب من النظام القديم .- بحد كلام مرسى مش كلامى .



ملايين بجد والله مش فوتوشوب

ملايين بجد مش شعب تانى استلفناه أو أجرناه !

ملايين فى الشوارع و فى كل مكان فى مصر .






الحل الأمنى مستحيل ..اولا الداخلية رفعت ايديها و ثانيا الجيش على الحياد و

ثالثا و دا الأهم : محدش يقدر على الملايين دى !!

ولا الناتو نفسه كان يقدر يعمل حاجة !




مبقاش قدامنا إلا الحل السياسى .

يطنطن الرئيس و يطنطن مؤيديه ... انهم مع الشرعية !

انهم ضد انهيار الشرعية الدستورية

وانهم مع اى حاجة ... طالما كانت تحت مظلة الشرعية و تحت مظلة الدستور !



كدابين برده !

نصابين برده !

اجراء... زى استفتاء الشعب المصرى على اجراء انتخابات رئاسية مبكرة هو

اجراء قانونى و دستورى و تحت مظلة الشرعية و تحت مظلة الدستور !


الدستور بتاع الغريانى اللى سلقوه و سرقوه ...بيقول أن رئيس الجمهورية

يستفتى الشعب المصرى فى القضايا والحالات المرتبطة بتهديد الامن القومى

المصرى .



طيب هو مين اللى يحدد الحالات دى ؟

نفس الدستور بيقول ان مصر دولة مؤسسات ... ودا يودينا لرأى المؤسسة

العسكرية فيما يحدث والمؤسسة العسكرية أبلغت الرئيس مرسى ان اللى

بيحصل فى الشارع يوم 30 يونيو يهدد الأمن القومى المصرى !

ودا كان واضح للعيان .. البلد واقفة تماما و مشلولة تماما

ابتدت حرب شوارع بين المصريين ... وابتدى قتل على الهوية و قتل على

الانتماء السياسى .



يبقى واجب الرئيس و مسؤليته هنا هى اجراء الاستفتاء .

ان تحتكم الناس إلى صناديق بدلا من ان تحتكم لقتال الشوارع و حشد الميادين .


لو الرئيس دا فعلا عاوز يحافظ على الشرعية

لو الرئيس دا فعلا قد المسؤلية الملقاة على عاتقه

لو الرئيس دا فعلا مؤتمن

لو الرئيس دا فعلا يكترث لدماء المصريين التى أقسم أن يصونها سواء من مؤيديه أو معارضيه

لو الرئيس دا فعلا يخشى من العودة للمربع صفر

لو الرئيس دا فعلا حريص على الشرعية الدستورية


كان اجرى الاستفتاء .

كنا روحنا لصناديق اقتراع و كان الكل حط لسانه جوا بقه ..

وكان بقى واضح قوى الشعب مع مين و عاوز ايه و كان الكل انصاع لقرار الشعب و كان كل دا تم

تحت مظلة الشرعية الدستورية القانونية التى تغنى بها مرسى و يتغنى بها مؤيديه الآن و يحرقون مصر .




لكن دا محصلش و رفض الرئيس و رفصت الجماعة رفضا قاطعا

وفضل التهديد و إيصال رسالة لمؤيديه .... خوضوا حربا أهلية

حاربوا و قاتلوا و اسلكوا العنف .



ليه عمل كدا ؟؟ ... ليه فضل ان يحرق مصر ؟؟؟ ليه مرضيش يشتغل


بالشرعية الدستورية اللى طنطن بها

وتغنى بها ... ويتغنى بها مؤيديه و تابعيه ؟؟؟؟


نقول فى المداخلة الجاية ...

 

[savary]

لماذا رفض الرئيس و رفضت الجماعة الذهاب لاستفتاء على انتخابات رئاسية مبكرة ؟؟

لماذا صمم الرئيس و الجماعة على الانتخابات البرلمانية و بعدها سحب الثقة من الرئيس .؟

انا أقولك



مرسى و جماعته عرفوا من حشود الشارع ان الاستفتاء هيكون قطعا ضدهم

الاستفتاء يخلص بنتيجة 50 % +1

الشعب هيطلب انتخابات رئاسية مبكرة قطعا و قسما و عظما .


طيب ايه العمل ؟؟


نرفض اجراء الاستفتاء و نطلب من المعارضين الذهاب لانتخابات البرلمان

كستور أم أيمن ...ذلك الدستور القمىء بيقول ان سحب الثقة من الرئيس يتطلب موافقة أكثر من ثلثى

البرلمان !!!

يعنى بانتخابات البرلمان .. عشان مرسى يمشى ..لازم نتيجة تلتين +1

67 % +1 !

تخيل !!

يعنى باختصار ... الأقلية هنا بتحكم الأغلبية !

يبقى 60% من الشعب المصرى مش عاوزه و مع ذلك ميقدروش يسحبوا الثقة منه !

يعنى لو معاه تلت البرلمان بس و التلتين ضده .. برده يفضل رئيس !


شىء لا يصدقه عقل الحقيقة !



المهم ...

الرئيس و الجماعة فضلوا( حصر ) اسقاط الرئيس على انتخابات البرلمان و رفض الاستفتاء

ودا طبعا لأن عندهم أمل ياخدوا بتحالفتهم تلت البرلمان و بكدا يفضل مرسى !



يبقى الكدابين النصابين اللى ييقولوا الشرعية الدستورية .... مكنش هامهم الشرعية الدستورية

والا كانوا قبلوا اجراء استفتاء



انما كان هامهم قوى الكرسى

الكرسى !

الكرسى !


هما اشتروا الكرسى و حاولو يحافظوا على الكرسى

قولها واضحة و صريحة و جلية و كفاية نصب على الغلابة و اللى مش فاهمين حاجة

انتوا حاربتوا عشان الكرسى

وبتحاربوا دلوقتى عشان الكرسى

وبتحرقوا مصر عشان الكرسى

وبتحرضوا على العنف ..عشان الكرسى


متغنيش عليا و تتاجر بالشرعية الدستورية !



واحنا فيها على فكرة

لو الجماعة و انصار مرسى يوافقوا نروح لاستفتاء ... يلا بينا

وسنحطم أنوفكم بالصندوق .


بس انتوا عارفين ان الاستفتاء ضدكم لأن المصريين ضدكم

فبتفضلوا حرب الشوارع و قتال الشوراع .



الرئيس اللى يفكر فى كرسى و كل تفكيره يحصره فى الكرسى حتى لو على دماء شعبه

ميبقاش رئيس و يبقى فقد شرعيته



كفاكم طنطنة و كفاكم تجارة ...بئس التجارة

تجارة دين

تجارة دم

تجارة ...شرعية !

 

 

[تكسير]

كلمات معلبة يلعقها الجهلة بعد ان حصلوا عليها من مزابل الإعلام ورويبضات المجتمع , كمقولة التجارة بالدين , وعلي فرض ان هذا المصلح المعلب الجاهز الملعوك صباح مساء انه صحيح , فما بالكم بمصطلح اخر لم ولن تحصلوا عليه من رويبضاتكم , الا وهو التجارة بالديمقراطية
والعجيب ان هذا المصطلح هو الأقرب لهم , ولكن هناك فئة من الشعب لا تعطش إلا عندما تري كوب الماء في يد الاخر
فينظرون للدين وفوائده وارباحه , فيجدونه مربحاً , ثم ينظرون إلا تجارتهم في دواليبهم فيرونها كاسدة خاسرة , فلا هم أشتروا بضاعة رابحة , ولا هم أقروا بفساد بضاعتهم
فيقولن في نهاية الامر ,بحسرة التاجر الخاسر الخائب , انهم يتاجرون بالدين
ثم عندما قرر الاخر صاحب بضاعة الدين , أن يتاجر بالديمقراطية , ربح وتحولت في يديه إلا سلعة ما أجملها وأروعها
فنظر الخائب إلي بضاعته وهي تُباع , فجري مهروولا ممسك بمطوي وزجاجة نار مشتعله


أيا إيها المتاجر الخائب سحقاً سحقا


ههههههههههههههه
اه والله بيحصل

 

 

[savary]

اقتباس المشاركة الأصلية كتبت بواسطة تكسير كلمات معلبة يلعقها الجهلة بعد ان حصلوا عليها من مزابل الإعلام ورويبضات المجتمع , كمقولة التجارة بالدين , وعلي فرض ان هذا المصلح المعلب الجاهز الملعوك صباح مساء انه صحيح , فما بالكم بمصطلح اخر لم ولن تحصلوا عليه من رويبضاتكم , الا وهو التجارة بالديمقراطية والعجيب ان هذا المصطلح هو الأقرب لهم , ولكن هناك فئة من الشعب لا تعطش إلا عندما تري كوب الماء في يد الاخر فينظرون للدين وفوائده وارباحه , فيجدونه مربحاً , ثم ينظرون إلا تجارتهم في دواليبهم فيرونها كاسدة خاسرة , فلا هم أشتروا بضاعة رابحة , ولا هم أقروا بفساد بضاعتهم فيقولن في نهاية الامر ,بحسرة التاجر الخاسر الخائب , انهم يتاجرون بالدين ثم عندما قرر الاخر صاحب بضاعة الدين , أن يتاجر بالديمقراطية , ربح وتحولت في يديه إلا سلعة ما أجملها وأروعها فنظر الخائب إلي بضاعته وهي تُباع , فجري مهروولا ممسك بمطوي وزجاجة نار مشتعله أيا إيها المتاجر الخائب سحقاً سحقا ههههههههههههههه اه والله بيحصل

ياعم انت ما ترد عليا بدل خطبكم العصماء دى !

نفسى مرة واحدة ...ترد !


السؤال واضح و صريح اهو يا عزيزى تكسير


لماذا رفض الرئيس الذهاب لاستفتاء على انتخابات رئاسية مبكرة فنحتكم للشعب والصندوق و نحقن دماء الأبرياء
وهو اجراء قانونى و دستورى و تحت مظلة الشرعية الدستورية التى تتغنون بها ليل نهار ؟؟؟؟؟



رد عليا !!!

لو كنت تملك ردا

 

 

[savary]

مش هترد يا تكسير ... لأنك لا تملك ردا !

مش هترد .. لأنك على باطل ..مش على حق


مش هترد .. لأنك بتنصر باطل على حق ...لأن الباطل على هواك


مش هترد ..لأنك مش عارف هتقول ايه


مش هترد ..لأنك لا تكترث لدماء زاكيات طاهرات تسيل الآن فى شوارع مصر


مش هترد .. لأنك مش فارق معاك حاجة !


ايوا تجار دين

وايوا تجار دم

وايوا تجار شرعية


لا تقولون إلا باطلا

ولا تحتجون إلا بباطل

ولا تغنون إلا بباطل .


وقد سئمنا باطلكم يا زميل .

وسئمت مصر باطلكم يا زميل




يا تكسير انا مش تاجر لابدين ولا بدم ولا بديقمراطية


يا تكسير انت بتقول الحاجة و عكسها فى نفس الوقت


يا تكسير فى موضوع قتل حسن شحاتة الشيعى أنت بنفسك قولت ان الجريمة حصلت لأن الناس كانت

غاضبة و فى دولة لا تقيم الشريعة ..هى دى النتيجة .


انت بتعترف هنا ان مرسى و حكم الاخوان لا كان بيقيم شريعة ولا دياولوا

انت بتعترف انهم كانوا تجار دين مش اكتر .

اقتباس المشاركة الأصلية كتبت بواسطة تكسير جريمة القتل لا تكفر ده شيئ معلوم , لا تكن تكفيري , هذا الرجل الخبيث , يستاهل الصراحة ما حدث له وقد كتب الله عليه ميتة سوء وسوء خاتمة , لما فعله من سب وطعن ولعن علي خير البشر المناظر صعبة , نعم شديدة الصعوبة ولكن من لم يمت بالسيف مات بغيره تعدد الاسباب والموت واحد وقع في أيدي بشر يعلمونه جيدا , اخذتهم الحمية والغيرة , في ظل غياب دولة الشريعة , ففعلوا به ما اراد الله ان يُفعل به ولا راد لما قضي الله فيه والحمد لله الذي وضع لشره حد

وفى نفس الوقت بتقول على معارضين مرسى ...انهم معارضين للشريعة !


واخد بالك انت ؟


مرسى لا يقيم الشريعة ... ومعارضين مرسى ...بيعارضوه عشان هما معارضين للشريعة - اللى مرسى

مبيطبقهاش !!!!!!!!!!!!!!!!!!!!!!!!!!!!!!



يا تكسير ... لو قضيتك الشريعة .... فانت نفسك عارف زى ما انا عارف و زى ما كل الناس عارفين ان حكم الاخوان و حكم مرسى مكنش له دعوة بال ...شريعة

يا تكسير ...لو قضيتك الديمقراطية و الشرعية الدستورية .... فانت المفروض عارف ان الأزمة مكنش ليها حل غير اجراء الاستفتاء ودا اللى مرضيوش يعملوه

لأن الكرسى عندهم أغلى من اى حاجة ...اغلى من الدم و الأرواح و البلد و الشعب و الشرعية و الدستور و كل حاجة !


يا تكسير فهمنى قضيتك ايه

و فهمنى بتدافع عن مرسى و جماعته تحت اى مبدأ و دفاعا عن اى قضية !!


غير كدا يبقى الموضوع ..(.هوى )...ليس أكثر ولا أقل

 

 

[تكسير]

اقتباس المشاركة الأصلية كتبت بواسطة savary ياعم انت ما ترد عليا بدل خطبكم العصماء دى ! نفسى مرة واحدة ...ترد ! السؤال واضح و صريح اهو يا عزيزى تكسير لماذا رفض الرئيس الذهاب لاستفتاء على انتخابات رئاسية مبكرة فنحتكم للشعب والصندوق و نحقن دماء الأبرياء وهو اجراء قانونى و دستورى و تحت مظلة الشرعية الدستورية التى تتغنون بها ليل نهار ؟؟؟؟؟ رد عليا !!! لو كنت تملك ردا

أنا يائس منك يا سفاري
بصراحة خسارة شوية الحبر إلي هم أصلا ببلاش يضيعوا في نقاش
صح ولا لأ؟؟
ما هو لو انت عقلك مش مفهمك إلي هو أصلا مفهوم , حنعمل إيه بقي في الورطة دي
طيب
شوف يا سيدي معلش , علشان خاطرك بس يا غالي
الحديث عن شرعية وإنتخابات مبكرة والكلام ده بعد الإنقلاب
مالوش فائدة
والحكاية وبمنتهي البساطة
جيش حبس وعزل رئيس , وعين طرطور لمدة سنتين في يده كل السلطات , شوره وشعب وقضاء وعلي يمينه شيخ ماتريدي عثل عثل وعلي شماله أنبا عثل عثل عثل
يعني تجارة بالدين دبل فيس , عايز فتوي إسلام أديها , عايز موعظة مسيحية أديها , عايز كيلو كباب وشوية بطارخ كما فيش مشاكل
والكهربة رجعت والسولار تمام والحياة بمبي بمبي بمبي

طيب حط السنة علسي السنتين يبقوا كام ؟؟؟ 3 سنين
حيعدوا هوي زي النسمة
لكن انك تشيل وتعزل وتقصف وعايز تقتل وتعتقل , فريق كبيييييييير من شعب مصر
كدة يبقي انت عايز تحط البيلد في خانة انا ومن بعدي الطوفان
والناس دي مش حتسلم رقبتها بسهولة
ومعاهم حق
مين يروح يدبح بمزاجه
فخلاص
بقت حياة او موت
وكل ده بسببكم أنتم

رجعتم كل حاجة قام عليها اشعب
اتفلفلتم واطرطرتم بشكل غريب
ولسي بتتغازلوا في عقولكم وانكم أذكياء ما شاء الله نخب نخب يعني
ياراجل
كتكم وكسة وكستونا معاكم

 

 

[تكسير]

سعادتم
الشرعية حاجة والشريعة حاجة تانية

 

 

[savary]

اقتباس المشاركة الأصلية كتبت بواسطة تكسير أنا يائس منك يا سفاري بصراحة خسارة شوية الحبر إلي هم أصلا ببلاش يضيعوا في نقاش صح ولا لأ؟؟ ما هو لو انت عقلك مش مفهمك إلي هو أصلا مفهوم , حنعمل إيه بقي في الورطة دي طيب شوف يا سيدي معلش , علشان خاطرك بس يا غالي الحديث عن شرعية وإنتخابات مبكرة والكلام ده بعد الإنقلاب مالوش فائدة والحكاية وبمنتهي البساطة جيش حبس وعزل رئيس , وعين طرطور لمدة سنتين في يده كل السلطات , شوره وشعب وقضاء وعلي يمينه شيخ ماتريدي عثل عثل وعلي شماله أنبا عثل عثل عثل يعني تجارة بالدين دبل فيس , عايز فتوي إسلام أديها , عايز موعظة مسيحية أديها , عايز كيلو كباب وشوية بطارخ كما فيش مشاكل والكهربة رجعت والسولار تمام والحياة بمبي بمبي بمبي طيب حط السنة علسي السنتين يبقوا كام ؟؟؟ 3 سنين حيعدوا هوي زي النسمة لكن انك تشيل وتعزل وتقصف وعايز تقتل وتعتقل , فريق كبيييييييير من شعب مصر كدة يبقي انت عايز تحط البيلد في خانة انا ومن بعدي الطوفان والناس دي مش حتسلم رقبتها بسهولة ومعاهم حق مين يروح يدبح بمزاجه فخلاص بقت حياة او موت وكل ده بسببكم أنتم رجعتم كل حاجة قام عليها اشعب اتفلفلتم واطرطرتم بشكل غريب ولسي بتتغازلوا في عقولكم وانكم أذكياء ما شاء الله نخب نخب يعني ياراجل كتكم وكسة وكستونا معاكم

انت كما توقعت انا ... ترواغ ليس إلا

انت بتقطع مشهد من سياق الفيلم كله ... وتقول هى دى الحقيقة المطلقة

انت مثبت الكادر على مشهد النهاية و متبت فيه و بتقول هو دا المهم دلوقتى !


مش مهم مين ودانا لدا

و مش مهم ايه اللى حصل عشان النهاية تكون كدا

ومش مهم اى حاجة تانية


المهم حاجة واحدة بس ... رئيس حصل عليه ( انقلاب ) و على البسطاء أن يدافعوا عن رئيسهم بالدم

وعليهم اجراء الدماء أنهارا لأجل رئيسهم .




الكت السينمائى دا و تثبيت الصورة على مشهد النهاية ... بيخدم هواك

بيخدم ما تحشد له الآن و ما تحرض عليه ...بيخدم ما تنتصر له من باطل .


فى مشهد النهاية .. تقدر تشوف قتيل

لكن متقدرش تعرف هو اتقتل ظلم ولا اتقتل عشان قاتل !



بتشوف واحد مشنوق

لكن متقدرش تعرف هو مشنوق عشان هو مظلوم ولا عشان هو ثائر تمكن منه الأنذال ولا عشان قتال قتلة !



انت مركز على مشهد النهاية ... عشان بيخدم هواك ليس الا

عشان تقدر تبنى عليه خيال .. ملهوش اى واقع على الأرض .





ربنا ظالم عشان طرد ابليس من الجنة - مع فارق التشبيه قطعا -

مش مهم ابليس عمل ايه عشان يطرد من الجنة

مش مهم ايه للى حصل ..

مش مهم اى حاجة


المهم ان ابليس اتطرد من الجنة ..ودا ظلم !!



مش بقولك معندكش حاجة تقولها يا زميل .

 

 

[تكسير]

اقتباس المشاركة الأصلية كتبت بواسطة savary يا تكسير فهمنى قضيتك ايه و فهمنى بتدافع عن مرسى و جماعته تحت اى مبدأ و دفاعا عن اى قضية !! غير كدا يبقى الموضوع ..(.هوى )...ليس أكثر ولا أقل

لا ليس هوي ولا دياولو , أنا حبقي اشرح ما أتبناه مع بعض القراءات في مواضيع مستقلة , يمكنك طبعا زيارتها والتعليق عليها
فا مثلا
نزلت بموضوعين في باب الشعر والادب
ممكن تقراهم وتقول رايك
ومنها تفهم انا فين دلوقتي

 

 

[savary]

وانا هفضل الف وراك فى المواضيع المستقلة دى عشان اعرف قضيتك ؟


متقولش عليا متاجر خايب بقى يا زميل ..إلى أن تحاجج .