المركز القومي لبحوث المربى .. !!

[أمة العزيز]

الصحف المصرية والعربية

المركز القومي للبحوث
اللي كان حلم حياتي اتعين فيه .. واني اوصل في يوم واكتشف حاجة
اخترعلي فاكسين لتحصين مرض ..
او اكتشف هرمون جديد مثلا ..

لما كنت بعدي من قدامه كنت بحس برهبة شديدة ..
واتخيل ان الباب الرئيسي مفتوح ومفروش سجاجيد حمراء ..
مينفعش حد يدوس عليها الا لما يكون عالم ..
عالم مؤهل انه يوصل لنوبل ..

انهاردة انهارت الصورة ديه تماما
لما كنت في المعهد بسال عن التعيينات ..
وكعادة اي مصلحة حكومية .. من عدم احترام - اللهم الا قليل من البشر اللي عاملوني بدون تعالي - ودوخوني ..
وشفت البيروقراطية في اسمى صورة لها
وفي النهاية حد من ولاد الحلال الموظفين قالي .. معاكي واسطة هتتعيني .. مش معاكي متضيعيش وقتك ..

قلت مفيش مشكلة خالص ..
رحت اتصلت بصديقة ليا اتعينت هناك - طبعا بالواسطة وبرغم ان تقديرها اقل مني - قلت اسلم عليها عيب يعني اكون هنا ومسلمش
مش علشان انق لا سمح الله ..

رحت .. لقيتها قاعدة على المكتب .. ومطلعة من شنطتها كيس السندوتشات .. وبتفطر .. !!!

ايه يا بنتي فين الشغل ؟؟
شغل ايه يا حاجة صلي على النبي .. كله ورق .. حتى لو في شغل انا مش فاضياله انا بزاكر تمهيدي ومش مركزة في حاجة هنا ..
ببساطة ال 80 جنيه مش بيكفوا اكيد مواصلاتها ..
الماجستير على حسابها لانها تعيين مؤقت ..
لما تبقى تاخده ان شاء الله .. ويتعمل اعلان داخلي جوة المعهد وتقدم فيه وتتقبل .. وتتثبت .. ومرتبها يزيد .. تيقى تدور على شغل ..

يا خبر ***** .. هو ده البحث العلمي
هو ده اللي الناس بتوهبله حياتها وبترفض احيانا تتجوز علشان مفيش حاجة تشغل ذهنها عن ابحاثها

المهم مطولش عليكم .. قالتلي ان في كورس تحاليل كويس - زي ما هي سمعت - وروحي قدمي فيه جايز تتعلمي حاجة تنفعك

رحت المكان اسمه مركز التدريب .. مكان سئ للغاية
مفيش نضافة ولا اهتمام .. ونفس المعاملة من الموظفين اللي مفيهاش اي احترام
وفوجئت ان مش بس كورسات التحاليل اللي بتتاخد هناك
لا لا .. ده في كورسات عظيمة تانية

فوجئت ان الموظف بينادي ..
اللي مسجل كورس
مربى وحلويات
مخبوزات
نسيج وحياكة ..

ومن ساعتها وانا مصدومة ..
الناس بتتكلم في النووي .. واستغلال سطح القمر لصناعات النانوتكنولوجي
واحنا بنتكلم في كورس مربى وحلويات

محبطة للغاااااااااية

 

[يجعله عامر]

من زمان وانا بعدّي قدام مركز البحوث يا (ست الكل) تعرفي أكتر شيء لفت نظري وانا بعدي إيه الرخام اللي معمول بيه الوجهه حسيت انهم ما شاء الله مهتمين بيه ، وكمان قدامه علطول مكنوس ونضيف ، بفتكر ديما اللي عنده محل اكل عيش أو قهوه الصبح يقوم كانس وراشش ويجعل صباحنا نادي .. بعد فترة يشاء ربنا اخش جوه ، ما شاء الله برضوه مكنوس ونضيف في الطرقات ، لكن الدور الأرضي زي الزفت طب مش مشكله محتاج توضيب نصرفه بتاع 8 مليون ونشتري زعفات ونضفه .. شوف السطحية انت علفكره يا ابني بتهتم بالمظاهر ، خلاص نخش المعامل ، المعمل عامل زي التربة أو الميتم بس الشهاده لله المهندس اللي دخلت معاه قام جايب السخان وخبطنا كوبيتين شاي وولعنا كام سيكاره وعمل معاي واجب صح .. طب نقعد مع ناس كبيره معاها دكتوراهات مش دبلون وكلام فارغ ، والله ناس زي العسل تحسي انك بتكلمي مع راجل مخه شغال صح وبيعرف يجيب القرش من زور الديك ، أصل العلم بيقول علم ايه يا ابني لايمني ع الفكه ، انت عارف العيشه والظروف الصعبة ، هُبّه تلاقي معمل اتحرق واجهزه اتسرقت ، شويه تلاقي مأموريه للواحات عشان نعرف نجيب قرشين حلوين ، شويه نظبط مع النجار والسباك وهكذا لكلاليك ..
ما علينا
شاب زي العسل اتخرج وكان الأول ع الدفعة في هندزه وامتياز وكلام من ده ، ربنا غضب عليه فجاله تعيين بمركز الليوث قعد ست اشهر يسب بالتين ، وبعدين عقل وفهم الدنيا صح فبدل ميركب عربية الكوبري الخشب ركب الناقه وشرخ ع السعوديه واهو الحمد لله ربنا كرمه آخر كرم بقى معاه فلوس حلوه وجاب شقه حلوه وعمل الأرضيات بركيه والرخام اللي في دخلة العماره مجزع وزي الفل وكمان في مرايه وزهرية ملاينه خضره حاجه ترد الروح بجد بذمتك لو كان حبس نفسه في القرف والبحوث والكلام الفارغ ده كان حد هينفعه ..

نيجي بقى للدراسات لو الماستر هيجيب معاكي فلوس ، ممكن تستمري القعده ووقت الفراغ ! بتاع الشغل ، عشان لو قعدت مية سنه مفيش شغل في المركز ، ممكن بلغوة السوق تلاقي مصلحه وسبوبه حلوه ، لكن شغل مفيش تقوم تعملي دراسات لإنو هتفعك فيما بعد ، جالك عقد مثلا ، رحتي دوله متقدمة من دول الخليج ، حاجات زي كده ، أما لو هتحضري بردوه وفي مخك العلم والكلام ده فهيبقى تضييع وقت ، وممكن ع الاقل تتكلمي مع حد م الدكاتره اللي في المركز وانتي تعرفي واتعظي من أحوالهم ..
بالنهايه .. لا زال في أمل ، والخبر الإسود بكره يبقى رمادي وابيض ، بس بكره ده هيجي إمته الله أعلم ..
عيشي الواقع يا أمة ، الواقع جميل جدا ومبهج جدا صدقيني ومصر أم الدنيا وفجر الحضارة واحنا اللي بنصدر العلم لكل البشر بس الصبر .. ويكون معاكي في جيبك ديما حبوب عشان الضغط ..

ربنا يسعدك وتحققي اللي نفسك فيه .

 

 

[يجعله عامر]

صحيح نسيت اقول حاجه مهمه عشان منهضمش الناس حقوقها
الراجل اللي عزمني على شاي في المعمل كان معاه بتاع ربع كيلو لب وقزقزنا سوا لحد مشفيفي ورمت م القزقزه ..

 

 

[diab]

اقتباس المشاركة الأصلية كتبت بواسطة يجعله عامر صحيح نسيت اقول حاجه مهمه عشان منهضمش الناس حقوقها الراجل اللي عزمني على شاي في المعمل كان معاه بتاع ربع كيلو لب وقزقزنا سوا لحد مشفيفي ورمت م القزقزه ..

ههههه مية مية يا ريس

لا بجد المشكلة في الدكاترة بتوع الجامعة انهم بيعيشوك الوهم وانهم ولا طه حسين في الأيام
اتاري العملية برة كلها بيزنس واحنا لسة بندور علي نوبل

الفلوس هي اللي بتصرف ع العلم مع ان المال خادم والعلم مخدوم بس للأسف المال بقي مش خادم
ده بقي صاحب البيت
تحياتي