تغيير في الموقف المصري بشأن ترجمة الكتب الاسرائيلية

[حشيش]

الصحف المصرية والعربية

[web]https://news.bbc.co.uk/hi/arabic/middle_east_news/newsid_8096000/8096125.stm[/web]

 

[مصرية]

قريت الخبر ده النهاردة وقفلت الجرايد؛ لا حول ولا قوة إلا بالله. هو أيهم أفضل؛ ميروحش اليونسكو ويبقى السبب اللي حيفتكره التاريخ إنه موافقش على التطبيع مع إسرائيل؟ ولا إنه يركع ويقول آمين ويروح اليونسكو؟

أيهم أشرف وأكرم وأعلى وأرقى!!!!!!!
ربنا يرحمنا من المنافقين ولا يؤاخذنا بما فعل السفهاء منا

 

 

[hoppa]

هوترجمة الكتب العبرية يبقى تطبيع ثقافى
طيب اليس من المفترض اننا نعرف حتى اعدائنا ازاى بيفكروا بأننا نقرأ مؤلفاتهم وكتبهم
مش ضرورى ترجمتها رفاهيه لنشرها و لزيادة المبيعات لكن من اجل المهتمين بدراسة اثقافة العبرية..برضه كله مفيد على طريقة"من عرف لغة قوم أمن شرهم"

 

 

[مصرية]

اقتباس المشاركة الأصلية كتبت بواسطة hoppa هوترجمة الكتب العبرية يبقى تطبيع ثقافى طيب اليس من المفترض اننا نعرف حتى اعدائنا ازاى بيفكروا بأننا نقرأ مؤلفاتهم وكتبهم مش ضرورى ترجمتها رفاهيه لنشرها و لزيادة المبيعات لكن من اجل المهتمين بدراسة اثقافة العبرية..برضه كله مفيد على طريقة"من عرف لغة قوم أمن شرهم"

يا هبة ما إحنا بنعرف بيتكتب إيه في جرايدهم وبنعرف بيعملوا إيه فينا وفي باقي العرب؛ يعني ترجمة الكتب مش معرفة لغة قوم.

ترجمة الكتب ممكن يكون لها تأثير سلبي على شباب كتير، يعني لما بتقري أدب انجليزي مثلا أو فرنسي بتلاقي نفسك من غير ما تحسي عشتي في البيئة بتاعة القصة وسرحتي فيها وده بيقربك لثقافتهم وممكن تحبيها وتتعاطفي معاها.

ترجمة الكتب العبرية محتاجة لقرائ واعي وناقد عنده بصيرة وإلا حتبقى مشكلة كبيرة فعلا.

والله أعلم

 

 

[hoppa]

اقتباس المشاركة الأصلية كتبت بواسطة مصرية يا هبة ما إحنا بنعرف بيتكتب إيه في جرايدهم وبنعرف بيعملوا إيه فينا وفي باقي العرب؛ يعني ترجمة الكتب مش معرفة لغة قوم. ترجمة الكتب ممكن يكون لها تأثير سلبي على شباب كتير، يعني لما بتقري أدب انجليزي مثلا أو فرنسي بتلاقي نفسك من غير ما تحسي عشتي في البيئة بتاعة القصة وسرحتي فيها وده بيقربك لثقافتهم وممكن تحبيها وتتعاطفي معاها. ترجمة الكتب العبرية محتاجة لقرائ واعي وناقد عنده بصيرة وإلا حتبقى مشكلة كبيرة فعلا. والله أعلم

الصحف لا تنقل سوى الخبار السياسية فقط و غالبا وجهة نظرهم و هى معروفة لنا و مجرد تبرير لكل حاجة
طيب هل خطر فى بال حد انه يعرف هما بيقولوا عننا ايه فى منتدياتهم على النت مثلا؟؟
و الا ده مش مهم و معرفته ليس فيه اى نوع من الفائدة؟؟!!

اما الكتب ففيه منها روايات و فيه كتب بحثية تحتوى معلومات
اللى قصدك عليه يخلى الانسان يتعاطف معاهم هى الروايات اللى بتنقل جانب انسانى
انما كتب مثلا بحثية فيها معلومات او وجهات نظرهم فى قضايا معينة و مذكرات القادة بتوعهم و ما يشبه ذلك اكيد فيها فائدة و تفيد الباحثين العرب فى الشئون العربية مش مجرد القارئ العادى عشان كدة قلت:

اقتباس مش ضرورى ترجمتها رفاهيه لنشرها و لزيادة المبيعات لكن من اجل المهتمين بدراسة اثقافة

و طبعا زى ما انتى عارفة اللغة العبرية يتم تدريسها فى بعض الجامعات و يمكن متصل حاجات تانية زى الأدب العبرى و الرواية العبرية و نواحى اخرى من ثقافتهم...والا كله يعتبر تطبيع؟مجرد سؤال مش أكتر..

 

 

[Farida]

على رأى العمدة صلاح منصور فى الزوجه التانيه ......هى حبكت ................كل ده علشان اليونسكو و لسه من شهر جايب قائد اوركسترا اسرائيلى و من قبلها تراجع عن التشكيك فى المحرقه اليهوديه ياربى ناقص يعمل عجين الفلاحه ..يارب بعد ده كله ما ينجحش و يتكسف و يغور هو و اللى جايبينه روقه افندى بسلامته

 

 

[مصرية]

يا هوبا كل اللي عايزة تعرفيه حتلاقيه على النت ومترجم بأكتر من لغة محبكش يعني العربي علشان يبقى التطبيع شئ عادي وناخد منهم ثقافتهم وعاداتهم وأفكارهم وديانتهم.

رأيهم عنا في المنتديات حتلاقيه في المنتديات ومنها كتير منتديات عربية ليهود وإسرائيليين عرب وده معروف لإن الباحثين في أصول اليهود الإسرائيليين وخصوصا المصريين دخلوا في حوارات معاهم من خلال منتدياتهم مراحوش إسرائيل علشان يتحاوروا معاهم.

اللي عيزة أقوله إن مش الترجمة للعربي هي اللي حتزود من فكرنا وعلمنا وأبحاثنا فيه حاجات تانية كتير ممكن تعمل نفس الحاجة ومن ناحية تانية السبب ورا الترجمة وهو التدليس لإسرائيل من أجل مقعد اليونسكو؛ دي لوحدها حتى لو كان النتيجة من ورا الترجمة دي إن مصر يبقى فيها مليون زويل فهي برضه حاجة في رأيي مخزية جدا.

اقتباس يارب بعد ده كله ما ينجحش و يتكسف و يغور هو و اللى جايبينه روقه افندى بسلامته

يسمع منك ربنا يا دكتورة.

 

 

[hoppa]

عزيزتى مصرية انا فى موقفى من فاروق حسنى زى موقفكم بالضبط لكنى مشوشة بخصوص التضييق على ترجمةالكتب و دى فى نظرى ارى انها تفرق كثير عن مثلا اقامة المهرجانات السينمائية و دعوة افلام اسرائيليه لها ده فى نظرى صورة اوضح من التطبيع الثقافى و كون ان هذه الافلام تتعرض فى بلادنا لها تأثير اكبر من حيث نقل نمط حياتهم و تذويبهم فى حياتنا بحيث يخلق التعاطف و ما الى ذلك كما ذكرتى
لكن الكتب و ما تحويه تراث انسانى و معرفة بغض النظر عن كاتبها و ديانته و موقفنا منه المفروض تعامل معاملة مختلفة...
طبعا كما هو معروف ان الاسرائيليين مش كلهم بيتكلموا عبرى و رغم انها اللغة الرسمية لكن حسبهم جذورهم و البلد اللى اتهجروا منها على اسرائيل فالاسرائيليين بيتكلموا عدة لغات لكن لما كاتب معين يكتب الكتاب باللغة العربية و لا يكتبه بلغته الأم التى نشأ بها فى الدولة الأم فالحكاية دى لها دلالة معينة قد لا يفهمها الا المهتم بالشئون الاسرائيلية و طبعا هم قلة و رغبتهم قد لا تكون محفزة بالفعل لان يتم ترجمة الكتب الاسرائيلية بنفس الرتم الذى يتم ترجمه كتب بلغات اخرى

 

 

[Farida]

منى الشاذلى بتناقش الموضوع ده دلوقتى

 

 

[حشيش]

اقتباس وكان حسني قد قال العام الماضي ردا على سؤال فيما اذا كانت مكتبة الاسكندرية تحوي كتبا اسرائيلية انه لو علم بوجودها لأحرقها

التصريح ده مش لايق على شخصية زبالة زى فاروق حسنى بصراحة ... مش لايق عليه دور الوطنية