كلام الناس وتاثيرة على قرارتنا !!!! يهمنى رأيك

[سعيد صابر]

الصحف المصرية والعربية

أخوانى وأخواتى أعضاء منتدى المطاريد
السلام عليكم ورحمة الله وبركاتة
أدعو الله أن تكونوا جميعاً بخير وفى أحسن حال
تعرضت اليوم لحل مشكلة ابعد الله عنكم المشاكل
ولأنها غريبة أحببت أن اشرككم معى!!!
الموضوع يخص أحد جيرانى وهو شاب توفى والده ويعيش مع والدته وهى إمرأة فاضلة كانت مدرستى فى المرحلة الإبتدائية 00المهم الشاب كان خاطب لأحد زميلاته بالدراسة اثناء حياة والده وطبعاً هناك أشياء كثيرة تم الإتفاق عليها
منها مدة الخطوبة وألا تزيد عن سنتين والكل يعلم مايعانيه الشباب فى تجهيز الشقة ومستلزمات الزواج 00أكيد بتسألوا فين المشكلة فى كل ده!!
المشكلة إن الشاب له أخت خارج مصر وفكر فى عدم ترك والدته تعيش بمفردها وعندما صرح بذلك لخطيبته أعلنت رفضها ذلك وإنها تريد مملكة لها بمفردها وايدها أهلها أيضاً فى الرفض وعندما تدخلت سمعت عجب العجاب عن كلام الناس وبنات العائلة التى لم يحدث لإحدهما ذلك وإن الموضوع قسمه ونصيب
اندهشت كيف يحدث ذلك 00ومن هم الناس الذين نخاف من كلامهم ..؟!
ولماذا وصل بنا الحال إلى الخوف منهم إلى هذه الدرجه ..؟!
هل من المعقول أن نضطر لفعل أشياء لا نرغبها .. من أجل إرضاء الناس ..؟!
هل تفشل قصة حب وزواج لمجرد كلام الناس!!!
ولا أدرى أى كلام للناس فى أبن بار بأمه ولايريد تركها تعيش بمفردها وهل المملكة التى تريدها الفتاة ستتأثرمن إمرأة مسنة ومربية فاضلة من الممكن أن تربى اولادها كما ربتنا فى العمارة جميعاً
وتذكرت قصه جحا ليثبت لإبنه أن كلام الناس غاية لاتدرك ..والقصة لمن لايتذكرها00
مشى جحا وابنه مع حمارهما فانتقدهم النّاس لإنهم لم يستغلوا وسيله النقل بالحمار ..
فركب جحا وابنه على الحمار فانتقدوهم النّاس بعديمي الرحمه كيف يركب 2 على حمار ..
نزل جحا وترك ولده00 فانتقدوا الناس الابن .. وقالوا إنه ولد عاق ..
نزل الابن وركب جحا فقالوا عن جحا انه لايرحم وأنه قاسي على ابنه ..
قام جحا وابنه وحملوا الحمار وهم يمشون .. فضحك الناس عليهم لبلاهتهم ..
إذاً رضا الناس .. غاية لاتدرك .. !!!

أصبحنا لا نقدم على أمراً إلا وكان في الحسبان كلام الناس
إلى متى هذه العقليه .. !
فنحن دائماً ما نضع نصب أعيننا كلام الناس ..
هل هو فعلا ً خوف من كلام الناس ..
أم إنه خوف من المظهر الذي سنظهر به أمام هؤلاء الناس .. !
فالكثير منا يود الظهور بالشكل الذي يحبه ويرغبه !!
لكنه يخشى من ردة فعل الناس ومن كلامهم ..
ماذا سيقول الناس عنه .. ؟؟
وماذا سينظرون إليه مستقبلا ً ..؟؟
وبذلك يخسر طموحه .. ورغبته في الظهور بالشكل الذي أراده ..
وذلك كله بسبب خوفه من نظرة الناس وكلامهم
الحديث يتشعب منى .. فى أكثر من طريق !!
وأعلم أن لكل شخص منكم رأي .. ووجهة نظر حيال هذا الموضوع ..من حيث الخوف من كلام الناس وتأثيره فى قرارتنا؟؟!! 000وزواج الفتاة فى بيت أسرة الشاب ؟؟!!
لن أطيل عليكم .. وسأترك لكم المجال .. للحديث .. ولمناقشة هذه المشكلة!!؟؟

 

[Doudy]

استاذ سعيد
انا متفقة مع حضرتك اكيد فى بر والدته و الاهتمام بها

لكن اختلف فى ان لكل ست مملكتها الخاصة و سيظل بيت والدته

هوة بيتها و مملكتها و لن تقبل ان ينازعها فيه احد

ثانيا انا موافقة حضرتك ان الام مربية فاضلة و لنفرض ايضا ان

زوجة الابن ايضا لا غبار عليها

لكن المشاكل بين الحماة و زوجة الابن لا تنتهى حتى لو كانوا فى

نفس العمارة او نفس الشارع حتى و ليس نفس الشقة

و زى ما بيقولوا البعيد حبيب دة فعلا حقيقى

فالافضل ان الابن يتزوج فى شقة مستقلة و هذا لا يمنعه من

رعاية والدته هوة و زوجته لت خلاف على ذلك

هذا راى واكيد لا الزم به احد

تحياتى لحضرتك و فعلا دة موضوع مهم يجب مناقشته

 

 

[بنت شعنونة]

يعندي شوية نقاط
ها اقولها بدون ترتيب
لازم يخلي باله من امه وماحدش ينكر دا
لكن
هل هوا اللي ها يخدمها والا " مراااااااااته" اللي ها تخدمها؟
هنا السؤال
هل الحاجا اللي مراته ها تعملها في اول الجواز تفضلا منها ها تتقلب الى واجب عليها وبدون مقابل حتى معنوي وكلمتين كويسين وان دا فرض عليكي؟
هل لو العكس الزوج ها يوافق "يخدم" حماته
على فكرة
انا لاحظت انه في معظم بيوت مصر ما بيحصلش مشاكل قد كدا لما اهل الزوجة يجيوا يزوروا بنتهم في بيتها مهما قعدوا لسبب واحد ان بنتهم هيا اللي بتخدمهم مش جوزها
انما لو العكس الزوجة هيا اللي ها تنضف وراهم وتطبخ وتسوي وطبعا جوزها قاعد مأنتخ ولا على باله هوا و الضيوف وتتحرق الست بقى وهنا توجد كل المشاكل تقريبا

الست زي المغناطيس ولكن قطب سالب بس عمرررررررررها ما ها تتفق مع ست تانية حتى لو "ادعت" دا لفترة
وانا كام لو ربيت ابني وطلع بووووووووزي فيه ها اديله على دماغه واطلع عينه لو رماني في اخر عمري الله امال انا مخلفاه ليه؟
وانا لو زوجة ما انا ما اتخلقتش عشان اخدم غيري دا الجيل دا بالعافية بيخدم نفسه لو قدر وضغوط الحياة وكربستها بقت اكتر بكتييييييييييير من اهل زمان اللي كانوا فاضيين لبعض تقريبا

يبقى الحل
تحترم البنت دي جدا لآنها جابت من الاخر هيا واهلها وما لفوش وداروا ولا غشوه وبعدين حطوه قدام الامر الواقع
لو هوا مش قادر يسيب امه يبقى خلاص البنت دي منتهيى من حياته وخلصنا
لة ينفع يجي شقة في نفس شارع والدته عشان يطمن عليها كل شوية يمكن الموضوع يتحل جزئيا
سنة الحياة ان الكل يتجوز ويبعد عن اهله مش ها نفضل لازقين فيهم على طول لكن لازم ناخد بالنا منهم ومش معنى دا اناي اعيش في حضنها 24 ساعا!! لكن ممكن اكلمها كل يوم ازورها حتى لو كل يوم اقضيلها مصالحها وتعيش معززة مكرمة


عندي سؤال فضولي
ليه لو الام عندها ولد وبنت وبنفس المواصفاااااااااااااات ونفس الازواج ونفس كل حاجا
بتطلب كلللللللللللللللللل حاجا من الولد ولا تطلب اي شيء من البنت!!!
ولو الولد قصر فليلا يبقى جاحد ومراته مقسياه
انما لو البنت طنشتها تماما يبقى معلش مشغولة في بيتها وجوزها!!!!!!!!!!!!!!!!!!!

 

 

[hoppa]

بالنسبة لفكرة الموضوع الأساسية
فأكيد كلام الناس له تأثير على قرارتنا لكن بنسبة ضئيلة جدا
على سبيل المثال انت تريد ارتداء شئ معين مثلا لكنه لا يتوافق مع المتعارف عليه من ازياء فى المحيط الذى تعيش فيه فتعدل عن هذه الفكرة اتقاء لردود افعال الناس من نظرات استنكار او استهزاء
ده مثال بسيط جدا
لكن خطأ اننا نعتقد ان الناس بيدهم ان يحددوا الأصلح لنا و يرسموا لنا خط سعادتنا و انهم يتدخلوا فى اسباب سعادتنا و تعاستنا
لأ فى الحالة الناس مش هتكون أدرى بشئوننا منا....و اصلا الناس لو بتنفع كانت نفعت نفسها
قال على رأى جورج وسوف..كلام الناس لا بيقدم و لا يأخر

وفى الحالة اللى معانا هنا عندنا الناس ممكن تلوم على هذه الزوجة لانها قبلت بانها تعيش مع حماتها وممكن يسخروا منها ويستهزأوا بيها و كل ده من ورا ظهرها طبعا لكنها تعرف انه سيحدث
طيب هل الناس دى اطلعوا على حياتها هتكون ازاى اذا عاشت مع حماتها
هما فرضوا و قدروا و قرروا ان العروس تبقى خدت حقها تالت و متلت اذا كان لها بيت لوحدها
كلام سليم...بس مش كل واحد وله ظروفه
لاحظوا انا هنا لا اتحدث عن حماتها و هل هتكون طيبة معاها و الا انا بتكلم على الفرض الغريب ده اللى فارضينه بأن الزوجة تعيش مع حماتها بغض النظر عن ان الظروف متكونش مناسبة
طب افرض الزوج ده مكنش بإيده لا ماديا و لا ظروفه تسمح كان تصبح والدته بمفردها لكنه زوج خلوق لا يجود الزمان بمثله و يستحق ان تضحى تضحيه بسيطة من اجل حياة هانئة معه فهل الناس فى الحالة دى ادرى بشئونها منها عشان تخاف من كلامهم عليها..!!!!

 

 

[القلب الكبير]

بالنسبه للفكره الرئيسيه كلام الناس طبعا له تأثير على قرارتنا
يعنى ممكن يأثر فيها او يضغط على قرارك
اما بالنسبه للموضوع انا مش شايفه اى ضروره لكلام الناس هنا
يعنى فيها ايه لما الابن يكون بار بوالدته وخايف عليها
وايه اللى هيحصل لما الزوجه تعيش معاها
بالعكس دى فرصه للزوجه عشان تتقرب الى الله وتاخذ حسنات
واسمحولى اقول مثل بسيط
اللى ملوش خير فى امه استحاله هيكون ليه خير فى اى حد فى الدنيا

 

 

[بنت شعنونة]

معلش
انا ليا وقفة على جنب هنا
اصل انا استفزتني اوي كلمة اللي مالوش خير في اهله مالوش خير في حد
عشان بسمعها كتييييييييييييييييييييييييير بطريقة سخيفة يعني
السؤال بيقول
ليه؟؟؟؟؟؟؟؟
او اثبت؟
او اشمعنى؟ او ايه الامارة او عشان ايه
سموها اللي تسموها بس انا مش شايفا اييييييييييييي علاقة بين علاقة الابن باهله وعلاقته بزوجته!!
ياما ناس قتلت امهاتها عشان زوجاتها والعكس قتلوا زوجاتهم عشان امهاتهم
ويا ما ناس مريضة وعلاقتها ب اهلها علاقة استعباد بحت وليس ابن واهله وما اعتقدش النوع دا ( وهوا منتشر اوي اليومين دول) انه ها يكون له خير في اي حد حتى نفسه!

 

 

[toota]

انا حتكلم بصفتي ام.....لو ابني عايز يتجوز الافضل له ولي ولزوجته انهم يعيشوا بشكل منفصل عني...الا لو الظروف الصحية او المادية لا تتحمل هذا التصرف...غير كده البعد سعد.......وممكن مع الوقت تتحول لخادمة او دادة لاولاد ابنها خصوصا لو الزوجة تعمل.....

الام العاقلة لازم ييجي اليوم الي تفهم فيه ان ابنها او بنتها حينفصلوا عنها ويعملولهم حياة ليهم....زي ماهي عملت قبلهم وكل الي سبقونا....

 

 

[بنت شعنونة]

يا عيني
عليكي
يا
توتا



























اللي زيييييييييييييييك انقرضوا اليومين دول يا بنتي والله

 

 

[سعيد صابر]

اسعدنى مشاركتكم ورأيكم الذى أثرى الموضوع بس ممكن فى كتير يستغرب كلامى شوية بصراحة البنت دى مايتزعلش عليها لأن فيها ايه لما تعيش مع حماتها وياريت نقول مع مامتها التانيه وترفض بس عشان مملكتها الخاصة ماهى مملكتها بس مع امها وام زوجها يعنى لو امها كانت لوحدها وطلبت تعيش مع ابنها ومراته رفضت ممكن هتقولى ايه على مرات أخوكى وكما ماينفعش تعيش مع البنت عشان راجل البيت غريب أحنا كبرنا على كده الأبن هو المسئول عن أسرته أكثر من البنت وبعدين الشقة بكام والأجهزة بكام وبعدين نقول عنوسة وتاخر فى الزواج
وحتة كلام الناس بقى هى كده كده بتتكلم فى الحلوة بتتكلم وفى الوحشة بتتكلم يعنى كلام الناس مش هيفيد ده ممكن يضر واتمنى تكون وجهة نظرى وصلت!!!!!

 

 

[hoppa]

اقتباس المشاركة الأصلية كتبت بواسطة بنت شعنونة معلش انا ليا وقفة على جنب هنا اصل انا استفزتني اوي كلمة اللي مالوش خير في اهله مالوش خير في حد عشان بسمعها كتييييييييييييييييييييييييير بطريقة سخيفة يعني

شانا...خديها من قصيرها وقولى بإختصار ان زوجة الرجل تعتبر من اهله كمان..بس كدة