هوجة هجرة المصريين

[شينكاوي]

الصحف المصرية والعربية

بصراحة الموضوع ده مستفز جدا , انا في الفترة الاخيرة ومن خلال ترددي كقارئ او كمشارك علي معظم المنتديات المصرية لاحظت وجود توجه عام وقوي جدا للهجرة الي كندا والمشكلة ان التوجه ده من شباب يعيشون داخل مصر وكمان من ناس عايشة بره مصر والتوجه ليس للعمل ولكن للحصول علي جنسية البلد الجديد وكأن الجنسية المصرية مش كفاية , واذا افترضنا ان الشاب داخل مصر ممكن تكون الظروف الصعبة التي يعيشها تخليه يفكر يهج لأي بلد لكن ايه مبرر اللي خارج مصر ويعمل براتب كويس جدا يخليه يعيش عيشة كريمة في البلد الذي يعمل به ويوفر كمان , بصراحة انا حاسس اني ممكن اصحي الصبح الاقي البلد فاضية ومفيش فيها حد واللي قاعدين فيها قاعدين بالسكند ناشيوناليتي , يمكن اولادي او احفادي يلوموني لأني معملتش زي الناس وقررت الهجرة وخصوصا اني اقدر وظروف عملي تساعدني اني اخد تأشيرة لدول اوربية لكن انا عايش برة مصر وماشي الحال الحمد لله فايه المبرر اللي ممكن يخليني افكر في سكند ناشيوناليتي وده طبعا لحبايبنا اللي بره مصر وعملوهم علي قلبهم ولو الموضوع منظرة قولوا لنا برده علشان نتمنظر

 

[فــيــروز]

يا أخ "شينكاوى" لماذا الاختيارات محدوده للغايه و معظمها تصب إمّا فى خانة المنظره أو خانة تكنيز المال !! سبحان الله هو البحث عن مكان أفضل للعيش بقى عيب أو حرام !! ما الذى يزعج البعض فى رغبة البعض الآخر فى الهجره !! ما شاء الله البلد عمرها ما هتفضى ..

أنا شخصيا بدأت مؤخّرا أفكّر جديّا فى الهجره ولا أفكّر فى موضوع الجنسيه و أكيد لا أفكر فى الحصول على مزيد من المال لأن المعروف أن المهاجرين فى "اوربا" و "امريكا" غالبا لا يستطيعون الادّخار كما هو الحال بالنسبه للعاملين فى الخليج "ما شاء الله اللهم لا حسد"

 

 

[شينكاوي]

اقتباس المشاركة الأصلية كتبت بواسطة فــيــروز يا أخ "شينكاوى" لماذا الاختيارات محدوده للغايه و معظمها تصب إمّا فى خانة المنظره أو خانة تكنيز المال !! سبحان الله هو البحث عن مكان أفضل للعيش بقى عيب أو حرام !! ما الذى يزعج البعض فى رغبة البعض الآخر فى الهجره !! ما شاء الله البلد عمرها ما هتفضى ..

هقولك يا فيروز الموضوع بالنسبة لي مستفز ليه ؟ لما تدخلي منتدي وتلاقي النك نيم بتاعي شينكاوي الكندي ان شاء الله ولا لما تلاقيني حاطط في الصورة بتاعتي علم كندا ولا لما تدخلي اي منتدي مصري وتلاقي توجه عام لأبناء البلد بالهجرة والسؤال عن طريقة الهجرة وكيفية الهجرة وازاي اكون انسان منتج في البلد اللي انا رايح لها وازاي وازاي وازاي ونادرا ما تلاقي واحد مصري يسأل ازاي اقدر اخدم بلدي وتتفتح بلوجات للهجرة الي كندا , وانا قلت التوجه العام للأسف من اللي عايشين بره مصر وغالبا في الخليج انا مش هقول ان كل اللي عايشين في الخليج الحالة معهم فل وعنب لكن كتيير منهم جدا حالته المادية كويسة وهو كده كده عايش بره مصر طيب يبقي يفكر في سكند ناشيوناليتي ليه وايه مبرره غير يا المال او المنظرة او واحد الحكومة مطلعة عينه اعتقالات فبيستعين بسكند ناشيوناليتي علي الاقل توفر له حماية عند اللزوم , انا نفسي اعرف الواحد من مغتربي الخليج ومعظمهم كما قلت عملوهم فأيه المبرر للهجرة مهو يمكن الواحد برده مش شايف كل زوايا الموضوع ,

 

 

[فــيــروز]

طيب أنا هاكون صريحه معاك شويّه و يا رب صراحتى لا تضايقك
أنا استغربت أوى طرحك أنت تحديدا للموضوع .. قول لى ليه
أقول لك عشان أنت -حسب ما قرأته لك من مداخلات- توجّهك فى الحكم على الأمور توجّه دينى
ومن ثمّ موضوع بلدى و وطنى و الحاجات دى لم تكن من الأشياء التى تخيّلت أنّك تهتم بها !!
من زمان جدّا و أصحاب التوجّه الدينى عندهم موقف ضد موضوع الوطنيه و القوميه .. خاصة و هناك آيات من القرآن الكريم تحث المستضعفين على الهجره فى أرض الله الواسعه كما أن مفهوم الدوله و الوطن مفاهيم حديثه جدّا ليس لها محل للإعراب من وجهة نظر الشرع و الدين .. ده اللىّ أنا فهمته يعنى ومن ثمّ استغربت جدّا طرحك أنت للموضوع

نأتى لفحوى الموضوع ذاته وهو لماذا يفكّر الناس فى الهجره !! خاصة المقيمين فى دول الخليج
أظن طالما هناك اعتقاد ان الأحوال الماديّه لشريحه لا بأس بها من العاملين بالخليج احوال مقبوله نوعا ما تتدرّج حتى تصل للوفره و الثراء .. كما ان الهجره لأوربا أو أمريكا و كندا لا تعد بتوفير أو ادّخار يبقى بديهى يكون السبب شئ آخر أهم من الأموال و أظن بما أنّك قرأت موضوعات الهجره فى "المحاورات" -باعتبار "الكندى" إن شاء الله أحد الأعضاء هناك- فالأسباب التى يطرحها الحالمون بالهجره واضحه و معروفه ..

حسب فهمى المتواضع لهذه الأسباب هى تتلخّص فى الإحساس بالآدميه و العدل و المساواه .. تتلخّص فى الاحتياج للشعور بأننّا جميعا سواء أمام القانون .. الشعور بقدر من الاطمئنان للمستقبل .. تفتكر إيه اللىّ يخلّى واحد يضحّى بالاطمئنان المادى للمستقبل و الذى يمثّله البقاء فى الخليج إلاّ شئ آخر بدأ يستشعر أنّه أكثر أهميّه ..

تفتكر حادث مثل حادث "الدويقه" يمكن أن يقع فى مكان يحترم آدمية مواطنيه ليخرج رئيس الدوله و يمنّ عليهم قائلا : هاتاخدوا شقق الإيواء من غير ما تدفعوا مقدّم أو أقساط !! أو يخرج رئيس الحكومه ليقول لمن تشرّدوا و أصبحوا بلا مأوى : الحصول على الشقّه بموجب بطاقة الرقم القومى أو وصل النور أو فاتورة التليفون !!

تقدر تقول لى اللىّ هيهاجر ده هيتمنظر على مين أصلا ولاّ مين هيفكّر فيه بعد ما يركب الطيّاره و يرحل إلى غياهب المجهول !!
ممكن تقول أن احتمال المنظره ممكن يبدأ بعد سنوات طويله قاسيه فى الهجره مشروطه بتحقيق قدر معقول من النجاح و الاستقرار و إن كنت أظن بعد هذا العدد من السنوات سيتراجع كثيرا احتمال المنظره بعد أن تتّضح الرؤيه و يعرف من هاجر ما الذى ضحّى به فعلا و ما الذى اكتسبه حقّا مقابل هجرته و ساعتها أعتقد رغبته فى المنظره -إن كانت موجوده أصلا- ستكون قد انكسرت و تلاشت ..

من أسابيع قليله كنت فى مصيف متوسّط الحال ب "مرسى مطروح" .. و كان أحد الأطفال يطلب من شاب صغير يعمل فى الأمن إنّه يزق له المرجيحه !! و الشاب رفض لأن هذه ليست وظيفته و فوجئت بالطفل يقول له إنت مجرّد حارس أمن و لازم تزقّنى أحسن لك !! عيّل مفعوص زى ده أهله من هذا السن يربّوه على هذه الفوارق الطبقيه المقيته و على نظام "إنت مش عارف بتكلّم مين" رغم إن اهله قد يكون حالهم ليس أفضل كثيرا من حال أهل هذا الشاب لكن أهو كلّه بيتنطّط على كلّه !! الحقيقه أن الهجره يمكن يكون سببها الرغبه فى الهرب من حالة المنظره الحقيقيه التى يعيشها المصريون و العرب و ليس العكس .. الحقيقه إن إحنا اللىّ مرضى بالمنظره فى أوطاننا العربيه وليس من يفكّرون فى الهجره

المشكله إنّنا من أيّام فيلم "الأفوكاتو" اللىّ أخت البطل فيه بتنام و تصحى تحلم بسفر زوجها إلى "ليبيا" أو "السعوديه" لادّخار بعض المال للزواج متخيّلين إن الناس مش بتهاجر و تسيب أهلها و وطنها غير عشان الفلوس و بس و من ثمّ لو توافرت الفلوس يبقى مفيش داعى للسفر و الشحططه !! و الفكره دى مش منزله ولا الفلوس و الاستقرار المادّى بتشكّل السبب الوحيد للهجره .. بالعكس يمكن هجرة من هم بوضع مادّى مستريح بالفعل تضحد هذه الفكره و تنفيها تماما و تدفع للتفكير فى أسباب أخرى أكثر وجاهه

أعتذر للإطاله

 

 

[Mizo]

صبحك الله بالخير يا ابو مصعب...

أتذكر في يوم واحنا على العشا وجات سيره الهجره لكندا كلاً منا سأل الأخر لماذا لا تُهاجر ، وكلاً منا أيضا وضع مبررات حول أسباب تأخر الفكره ، ولكن الشيء الجميل إن كلانا لم يقل لن أهاجر أو فكره الهجره مرفوضه..

بصراحه يا ابو مصعب زي مانت شايف حال مصر والمشاكل والمصايب اللي كل يوم تغم نفسنا ، إذن المؤشر يقول "مصر خطر مميت" وعلي يدك أخونا رمضان بعد رجوعه من اجازه قال إيه!!

طيب الأسر الشابه اللي في الخليج عايزه تجني ثمرة غربتها في مكان يؤمن لها ولأبنائها معيشه طيبه ، دراسه محترمه ، الحصول على عمل للابناء!!

ولعلمك يا ابو مصعب الهجره مش عشان العائد المادي الخليج أحسن مادياً ، لا في ضرايب وكل شيء مدعوم من الحكومات الخليجيه بس المستقبل لأهل البلد، وده اللي بيميز كندا "الجنسيه" للتمتع بالمواطنه..

وطبعاً عندي أصدقاء كتير أسرهم في كندا وهما موجودين هنا في الكويت وبيشتغلوا بيحولو مصاريف لكندا ويروحو اجازات لكندا.. وبعد ما الاولاد تخلص تعليم هيجيو من كندا يشتغلو في الكويت

 

 

[msameh]

اقتباس المشاركة الأصلية كتبت بواسطة فــيــروز .... حسب فهمى المتواضع لهذه الأسباب هى تتلخّص فى الإحساس بالآدميه و العدل و المساواه .. تتلخّص فى الاحتياج للشعور بأننّا جميعا سواء أمام القانون .. الشعور بقدر من الاطمئنان للمستقبل .. تفتكر حادث مثل حادث "الدويقه" يمكن أن يقع فى مكان يحترم آدمية مواطنيه ليخرج رئيس الدوله و يمنّ عليهم قائلا : هاتاخدوا شقق الإيواء من غير ما تدفعوا مقدّم أو أقساط !! أو يخرج رئيس الحكومه ليقول لمن تشرّدوا و أصبحوا بلا مأوى : الحصول على الشقّه بموجب بطاقة الرقم القومى أو وصل النور أو فاتورة التليفون !! تقدر تقول لى اللىّ هيهاجر ده هيتمنظر على مين أصلا ولاّ مين هيفكّر فيه بعد ما يركب الطيّاره و يرحل إلى غياهب المجهول !! ممكن تقول أن احتمال المنظره ممكن يبدأ بعد سنوات طويله قاسيه فى الهجره مشروطه بتحقيق قدر معقول من النجاح و الاستقرار و إن كنت أظن بعد هذا العدد من السنوات سيتراجع كثيرا احتمال المنظره بعد أن تتّضح الرؤيه و يعرف من هاجر ما الذى ضحّى به فعلا و ما الذى اكتسبه حقّا مقابل هجرته و ساعتها أعتقد رغبته فى المنظره -إن كانت موجوده أصلا- ستكون قد انكسرت و تلاشت .. .... الحقيقه أن الهجره يمكن يكون سببها الرغبه فى الهرب من حالة المنظره الحقيقيه التى يعيشها المصريون و العرب و ليس العكس .. الحقيقه إن إحنا اللىّ مرضى بالمنظره فى أوطاننا العربيه وليس من يفكّرون فى الهجره .. بالعكس يمكن هجرة من هم بوضع مادّى مستريح بالفعل تضحد هذه الفكره و تنفيها تماما و تدفع للتفكير فى أسباب أخرى أكثر وجاهه

 

 

[msameh]

من مداخله سابقه بمكان اخر





احرص دائما ان تعيش في البلد التي توفر لك الاتي

* للمواطن الحق في سكن صحي هو و اسرته (عدد حجرات = عدد الافراد - 1)

* للمواطن الحق في مصدر دخل كاف لضروريات الحياه حتي لو كان عاجزا عن العمل

* للمواطن الحق في علاج علي اعلي مستوي مجانا او علي نفقه التآمين الصحي ... و ما يتبع من علاج او تأهيل نفسي او جسدي

* للمواطن الحق في التعليم حتي المرحله الثانويه مجانا

* للمواطن ان يحيا في مجتمع يطبق فيه قانون واضح صارم علي الجميع بدون واسطه او محسوبيه او معلهش

* للمواطن ان يحيا في بيئه صحيه هواءه نقي و مياه شرب نظيفه

دي اساسيات لازم اي دوله محترمه تديها لمواطنيها ... مش هبه و لا احسان .... دا حق

و نهاره ابيض

 

 

[شينكاوي]

اقتباس المشاركة الأصلية كتبت بواسطة فــيــروز طيب أنا هاكون صريحه معاك شويّه و يا رب صراحتى لا تضايقك أنا استغربت أوى طرحك أنت تحديدا للموضوع .. قول لى ليه أقول لك عشان أنت -حسب ما قرأته لك من مداخلات- توجّهك فى الحكم على الأمور توجّه دينى ومن ثمّ موضوع بلدى و وطنى و الحاجات دى لم تكن من الأشياء التى تخيّلت أنّك تهتم بها !! من زمان جدّا و أصحاب التوجّه الدينى عندهم موقف ضد موضوع الوطنيه و القوميه .. خاصة و هناك آيات من القرآن الكريم تحث المستضعفين على الهجره فى أرض الله الواسعه كما أن مفهوم الدوله و الوطن مفاهيم حديثه جدّا ليس لها محل للإعراب من وجهة نظر الشرع و الدين .. ده اللىّ أنا فهمته يعنى ومن ثمّ استغربت جدّا طرحك أنت للموضوع نأتى لفحوى الموضوع ذاته وهو لماذا يفكّر الناس فى الهجره !! خاصة المقيمين فى دول الخليج أظن طالما هناك اعتقاد ان الأحوال الماديّه لشريحه لا بأس بها من العاملين بالخليج احوال مقبوله نوعا ما تتدرّج حتى تصل للوفره و الثراء .. كما ان الهجره لأوربا أو أمريكا و كندا لا تعد بتوفير أو ادّخار يبقى بديهى يكون السبب شئ آخر أهم من الأموال و أظن بما أنّك قرأت موضوعات الهجره فى "المحاورات" -باعتبار "الكندى" إن شاء الله أحد الأعضاء هناك- فالأسباب التى يطرحها الحالمون بالهجره واضحه و معروفه .. حسب فهمى المتواضع لهذه الأسباب هى تتلخّص فى الإحساس بالآدميه و العدل و المساواه .. تتلخّص فى الاحتياج للشعور بأننّا جميعا سواء أمام القانون .. الشعور بقدر من الاطمئنان للمستقبل .. تفتكر إيه اللىّ يخلّى واحد يضحّى بالاطمئنان المادى للمستقبل و الذى يمثّله البقاء فى الخليج إلاّ شئ آخر بدأ يستشعر أنّه أكثر أهميّه .. تفتكر حادث مثل حادث "الدويقه" يمكن أن يقع فى مكان يحترم آدمية مواطنيه ليخرج رئيس الدوله و يمنّ عليهم قائلا : هاتاخدوا شقق الإيواء من غير ما تدفعوا مقدّم أو أقساط !! أو يخرج رئيس الحكومه ليقول لمن تشرّدوا و أصبحوا بلا مأوى : الحصول على الشقّه بموجب بطاقة الرقم القومى أو وصل النور أو فاتورة التليفون !! تقدر تقول لى اللىّ هيهاجر ده هيتمنظر على مين أصلا ولاّ مين هيفكّر فيه بعد ما يركب الطيّاره و يرحل إلى غياهب المجهول !! ممكن تقول أن احتمال المنظره ممكن يبدأ بعد سنوات طويله قاسيه فى الهجره مشروطه بتحقيق قدر معقول من النجاح و الاستقرار و إن كنت أظن بعد هذا العدد من السنوات سيتراجع كثيرا احتمال المنظره بعد أن تتّضح الرؤيه و يعرف من هاجر ما الذى ضحّى به فعلا و ما الذى اكتسبه حقّا مقابل هجرته و ساعتها أعتقد رغبته فى المنظره -إن كانت موجوده أصلا- ستكون قد انكسرت و تلاشت .. من أسابيع قليله كنت فى مصيف متوسّط الحال ب "مرسى مطروح" .. و كان أحد الأطفال يطلب من شاب صغير يعمل فى الأمن إنّه يزق له المرجيحه !! و الشاب رفض لأن هذه ليست وظيفته و فوجئت بالطفل يقول له إنت مجرّد حارس أمن و لازم تزقّنى أحسن لك !! عيّل مفعوص زى ده أهله من هذا السن يربّوه على هذه الفوارق الطبقيه المقيته و على نظام "إنت مش عارف بتكلّم مين" رغم إن اهله قد يكون حالهم ليس أفضل كثيرا من حال أهل هذا الشاب لكن أهو كلّه بيتنطّط على كلّه !! الحقيقه أن الهجره يمكن يكون سببها الرغبه فى الهرب من حالة المنظره الحقيقيه التى يعيشها المصريون و العرب و ليس العكس .. الحقيقه إن إحنا اللىّ مرضى بالمنظره فى أوطاننا العربيه وليس من يفكّرون فى الهجره المشكله إنّنا من أيّام فيلم "الأفوكاتو" اللىّ أخت البطل فيه بتنام و تصحى تحلم بسفر زوجها إلى "ليبيا" أو "السعوديه" لادّخار بعض المال للزواج متخيّلين إن الناس مش بتهاجر و تسيب أهلها و وطنها غير عشان الفلوس و بس و من ثمّ لو توافرت الفلوس يبقى مفيش داعى للسفر و الشحططه !! و الفكره دى مش منزله ولا الفلوس و الاستقرار المادّى بتشكّل السبب الوحيد للهجره .. بالعكس يمكن هجرة من هم بوضع مادّى مستريح بالفعل تضحد هذه الفكره و تنفيها تماما و تدفع للتفكير فى أسباب أخرى أكثر وجاهه أعتذر للإطاله

بصراحة يا فيروز انت سبقتي الاحداث ووصلتي بي لنقطة اؤجلها مؤقتا بخصوص رأي الشرع في السفر لبلاد الكفار ولكن علي عجالة بلاد الخليج هي بلاد اسلامية ولا اعترف بالحدود بين بلاد الاسلام ولكن كانسان يعيش في العصر الحالي يجب ان يكون لدي قدر من الحب للمكان الذي نشأت فيه وهذا لا يتعارض مع الشرع ابدا وامنيتي ان اري مصر افضل بلاد الارض ,نرجع بقي لمحور حديثنا وهو الجانب الوطني لو كل واحد فكر يسيب البلد وياخد جنسية تانية بسبب ما نعانيه من ظلم النظام الحاكم وامتهانه لادميتنا يبقي النظام الحاكم حقق هدفه الاسمي وهو تفريغ البلد من العقول التي تصلح لأن تقول لا للظلم ولا للطغيان , تفريغ البلد من غير المطبلين وغير المغنين لبطل الضربة الجوية واخترناك اخترناك هو هدف للحزب الحاكم , حادثة الدويقة وغيرها من المصائب التي ابتليت بها بلدنا هي نتاج لحالة الخنوع والخضوع التي نعيشها ولو حدث ولو لمرة وتحركت جموع الشعب لما وصلنا الي هذه الدرجة من التخلف والاستكانة والخنوع , اما الحرية التي نبحث عنها فهي حرية منقوصة اذا تعارضت مع مصالح تلك الدول التي نتغني بحريتها ,

اعتذر للأخ ميزو عن عدم مقدرتي علي الرد علي مداخلته وكذا اشكر لأخي الكبير الدكتور مسامح مروره وان شاء الله بعد الافطار نكمل وتقبل الله صيامكم وطاعتكم اجمعين

 

 

[brain]

عزيزي الشينكاوي

اسمح لي ان اعلق على جزئيه بسيطه في مداخلتك و هي الخاصه بخنوع الشعب و رضائه عما يحدث

كنت دائمااشعر بمدى ارتفاع حس عبد الناصر و مجموعته من الظباط الاحرار عندما راوا - و هم على حق في ذلك - ان خطر الاحزاب و الاقطاعيين و اعوان الملك اكبر و اخطر بمراحل من خطر الاحتلال الانجليزي او حتى العدو الاسرائيلي و هو نفس ما اشعر به الان تجاه الشعب المصري

لا يمكن ان تطالب الشعب المصري بالحركه ضد الظلم الممثل في الحكومه طالما اذناب و اعوان النظام يعيثون في الارض فسادا سواء بالقول او بالفعل

من كان يصدق ان هناك مصري يستطيع ان يحمل ضحايا مجزره الدويقه نتيجه ما حدث ؟ هل يوجد مصري محترم يستطيع ان ينكر ما يحدث في مصر من تخريب و تدمير على ايدي الحكومه ؟ هل يوجد مصري واحد على وجه الارض لا يرى نتيجه ما فعلته الحكومه من اطلاق يد مجموعه من اسوأ العناصر التي وجدت على ارض مصر طوال تاريخها ليعيثوا في مصر فسادا فيستبيحوا الارض و الكرامه و التاريخ و الحاضر و المستقبل ؟

كل هذه النماذج من اشباه البشر موجوده و تسعى فسادا في صحف او مجلات او اذاعه او تليفزيون او منتديات

كيف يمكن للشعب المصري ان يثور و هناك من يبرر السرقه و النهب و الرشوه و الدعاره و الفساد و المخدرات و و يطلق مسميات مختلفه على هذه الاشياء لتبررها فمره عمولات و مره اكراميات و مره هدايا و هكذا

كيف يمكن للشعب المصري ان يثور و هناك من يبرر المساحات المهوله التي سرقت من حاضر الشعب و مستقبله ارضه التي اصبح لا يملك غيرها و يتحدث عن مستثمرين لم ياتوا و رخاء لا وجود له و ثراء و نعيم اشبه بعشم ابليس في الجنه

نقطه البدايه في الثوره على الظلم و الفساد و التخلص من الفاسدين و اعوانهم هي التخلص من ازلام و اعوان النظام سواء كانوا سارقي و ناهبي خيرات الشعوب او اولئك الذين يبررون لهم و يؤيدونهم للحصول على منفعه ما هنا او واسطه ما هناك

كنت اظن ان رجال الاعمال هم اسوا ما مر على هذه الارض الطيبه و هذا الشعب الغلبان و لكن اتضح لي ان الاسوأ منهم هم الاتباع و الازلام فهم كالضباع الذين يعيشون على بقايا الحيوانات فهولاء الازلام يعيشون على بقايا الاسياد و لا يكتفوا بذلك بل يعملوا كعاده كل الاتباع و الخدم في الخفاء لتبرير اعمال اسيادهم الاجراميه مستعينين بالدين تاره و بالكلام الكذب المعسول تاره اخر

سقوط هولاء و فضحهم سواء على صفحات الجرئد او المجلات او الاذاعه و التليفزيون او على صفحات المنتديات هو نقطه البدايه لضرب النظام الفاسد
عندها يمكن الحديث عن شعب يثور او امه تنهض من كبوتها

 

 

[Badroora]

انه التناقض فى حب مصر يا شينكاوى .!!!

اقتباس في العصر الحالي يجب ان يكون لدي قدر من الحب للمكان الذي نشأت فيه وهذا لا يتعارض مع الشرع ابدا

وهل الهجرة لبلد الكفار كما سميتها تتعارض مع حب مصر الوطن او مع الشرع .!!!

اقتباس وامنيتي ان اري مصر افضل بلاد الارض ,نرجع بقي لمحور حديثنا وهو الجانب الوطني لو كل واحد فكر يسيب البلد وياخد جنسية تانية بسبب ما نعانيه من ظلم النظام الحاكم وامتهانه لادميتنا يبقي النظام الحاكم حقق هدفه الاسمي وهو تفريغ البلد من العقول التي تصلح لأن تقول لا للظلم ولا للطغيان , تفريغ البلد من غير المطبلين وغير المغنين لبطل الضربة الجوية واخترناك اخترناك هو هدف للحزب الحاكم ,

كلنا جميعا سواء فى الخليج او غيره نود ان نرى مصر من اجمل البلاد..

ايه الفرق بين تسافر بلد تاخد جنسية او تظل فى الخليج بلا جنسية؟
هل المشكلة فى الجنسية فقط ام فى البقاء خارج مصر؟
طيب لو البقاء فلماذا انت خارجها ألست من العقول المنيرة التى تحتاجها البلد فى البناء والنهضة.ولا لديك اسباب جعلتك تترك الوطن بحثا عن شيء مفقود فيه ,او هناك تعرقلات تقف فى طريق مستقبلك او طموحك.!!
اذن يا شينكاوى الهجرة الجنسية او البقاء فى الخليج بلا جنسية مسالة تحصيل حاصل كدا كدا احنا خارج البلد.!! ومهما طالت قعدتنا فى الخليج اسمنا مغتربن مش هنجنى غير المال دا لو كان فيه اساسا
اما الهجرة بجانب شغل محترم وحياة كريمة فى جنسية فى اقل من 5 سنوات يبقي انهى الافضل ؟!!

اقتباس حادثة الدويقة وغيرها من المصائب التي ابتليت بها بلدنا هي نتاج لحالة الخنوع والخضوع التي نعيشها ولو حدث ولو لمرة وتحركت جموع الشعب لما وصلنا الي هذه الدرجة من التخلف والاستكانة والخنوع , اما الحرية التي نبحث عنها فهي حرية منقوصة اذا تعارضت مع مصالح تلك الدول التي نتغني بحريتها

انت قولت ابتلاء يعنى الله هو المبتلى وليس مبارك ..لانه اضعف من الضعف .. ولكن الدويقة كمثال لاهمال الحكومة تجاه الكووراث والمصائب (They're not well trained or prepared for disasters)
يعنى مشكلة سوء تنظيم وادارة فى المواقف الصعبة .
لكن ايه دخل الهجرة ولا الغربة فى الخليج ولا خضوع الشعب فى اللى حصل يعنى هو وجودى ولا وجودك ولا وجود المهاجرين كان هيمنع البلاء عن مصر.!!
دا اختبار من الله لنا وللمتضررين وفرصة تكشف مدى تهاون واهمال السلطة فى حق المواطنين.!!
بخصوص التناقض والكندى ان شاء الله

شاب حاسس انه مش لاقى نفسه فى بلده وكان بينتقد الاوضاع والظريف ان اكثر ناس كانت بتدافع وتهاجم الميقيمن خارج مصر .!! فعلا اللى ايده فى المايه الباردة صحيح.. يعنى تبقي سايب مصر وشغال خارجها واكيد كانت عندك نفس الاسباب اللى خليتك طهقت وسافرت ولما ارتحت ويجي حد يقول انه مخنوق ومش طايق مصر والعيشة واللى عيشنها يقوم عرق الوطنية ينقح والكل يبدا يهاجم ويدافع ويلومه ازاى يتكلم كدا على مصر وانت متقولش مصر هتدنى ايه قول انا هدى ايه لمصر .. ودور عليهم تلاقيهم هما اول الطفشانين منها .ولما ينزلوا اجازة يرجعوا نقد وشكوى من كل شيء ..طيب هو يعنى حلو ليكم ووحش لغيركم.!!!
كلنا بنحب مصر بس كل واحد بقي حر يحبها بالطريقة اللى تريحه ...

يا ريت نكون واقعيين شوية .!!!