حكاية شاب بيخطط للهجرة وأسباب هجرته

[أهرامات الجيزة]

السلام عليكم
بعد إذنكم ،،أنا هقولكم رأيي في الهجرة بس لازم تعرفوا سبب رأيي الأول بس مش عايز حد يقول إني بحكي حكاية نكد أو بحبط حـد أنا بإختصار هقول اللي حصل لي ،، إعتبروها فضفضة عـبر الأثير

وأقسم بالله العظيم مش عايز حاجة خالص من حـد ، أنا إستغنيت بفضل الله ، وربنا يكرمنا كلنا ، أنا بس بحكي معاكم

أنا خريج تجارة عين شمس شعبة عربي قسم محاسبة سنة 2007 تقدير مقبول ،، وأعشق علم المحاسبة وبحره الواسع ومعايا 5 كورسات منهم 3 كورسات محاسبة وكورس كمبيوتر وشهادة لغة إنجليزية بالمستوى فوق المتوسط من الجامعة الأمريكية ، وكنت (على الأقل بيني وبين نفسي عارف أنا كنت بعمل إيه) كنت بذاكر مذاكرة جادة من أول ما تبدأ الدراسة ، لكن مكانش لي نصيب في تقدير وكمان أول سنة تعبت جداً في الترم التاني وسقطت قي أربع مواد من ستة ، قدر الله وما شاء فعل ، وقبل التخرج وبعده إشتغلت شغلانات تانية غير وظيفة محاسب ، وبدور من ساعة ما إشتغلت على وظيفة محاسب ، ولفترة قصيرة جداً إشتغلت محاسب في مكـتبين محاسبة ، و مبسيبش إعلان لا في النت أو في الجرنان عن وظيفة محاسب إلا وروحته أو أرسلت الـ C.V بتاعي بالإيميل أو الفاكس أو أسلمه باليد ( على حسب ما ينص الإعلان ، وبعدين بتصلوا بي ) وبتطلع النتيجة كالآتي :

** إما يكون الإعلان مكتوب محاسب ويطلع الشغل حاجة تانية خالص ( مندوب مثلاً أو مدخل بيانات أو كاشير أو محصل أموال ومندوب توصيل أو كله مع بعضه ماعدا محاسب )

** أو يكون الإعلان منظر، ده منظر والناس إختاروها أصلاً من زمان بس عشان القانون بيفرضه ع الشركة دي وخصوصاً لو قطاع عام

** أو يكون الإعلان عن محاسب وإعلان صحيح وصاحب الشركة هو اللي طلبه وحذر مدير الحسابات من الواسطة ، لكن كل اللي في الشركة ليه حد يعرفه بيجيبه ويوصي عليه ومدير الحسابات بيراعي خاطرهم وساعتها الإعلان بيتحول لإعلان صوري

** أو لو محاسب قانوني ( في حالة عدم وجود واسطة وديه بقى حالة خاصة ليها موال ) يروح يعمل إعلان ويجيب الشاب من دول يشغله شهرين أو تلاته أو ستة شهور ، يعلمه في أسبوع يعمل إيه ويشغله زي الطور في الساقية ، و لايؤمن عليه ، وبعدين يقوله إطلع برة ، وهكذا دواليك ( إلا من ذهب إليه بالواسطة الجامدة مش التعبانة ) ، وطالما إنت مش معاك واسطة ممكن يشغل حد عنده أكتر من سنتين من غير تأمينات ولما يجيله مزاج يبقى يأمن عليه ،، مشكلة التأمين للي عايز يبقى محاسب قانوني و يكون له مستقبل محترم ، إنه لا يعتمد من وزارة المالية كـمحـاسب قانوني مستقل إلا لما يجيب شهادة من التأمينات بثلاث سنوات سابقة بالإضافة لأوراق أخرى ( مش هوجع دماغكوا بيها) عشان كدة لازم يتأمن عليه كمحاسب تحت التمرين عند المحاسب القانوني ، عشان سنين عمره متـتسرقـش

** أو لو محاسب في سفرية للخليج يقولك إيه :: إنت حديث التخرج ، تؤ تؤ تؤ تؤ .. المرتب ألف ومائة درهم ( الإمارات ) والإقامة عليك والأكل عليك وتذكرة السفر في الأجازة عليك والعقد لمدة خمس سنين وفي شرط جزائي لو مكملتش و مكتب السفريات اللي عمل الإعلان هيخصم كل شهر من مرتبك 250 درهم لحد ما يحصل أتعابه كلها ،
وبصراحة السفر للخليج إذا ما كانش لشركة أجنبية أو مصلحة حكومية ، للمحاسبين ، رأيي والله أعلم ، يبقى مالوش لازمة ،، الكفيل لا يرحم ، أنا طبعاً مسافرتش لأنه كان عـرض مزفـت

** أو لو شركة كبيرة ومحترمة ،، لا تقبل إلا خريجي ثانوية عامة لغات وخريجي شعبة محاسبة قسم إنجلييزي أو فرنسي أو جامعة أجنبية خاصة ،، ويفضل لو معاه لغتين ( معرفش ليه ، ما الإنجليزي كفاية ) ويفضل أيضاً حامل لزمالة أجنبية ( بصراحة مقدرش أغامر بفلوس وأخدها قبل ما أكون إشتغلت وأخدت خبرة ، لأن أنا خريج شعبة عربي وموقفي أصلاً ضعيف ، لذا من غير خبرة وكمان متخرج من مدة يبقى بالنسبة لي للأسباب دي مش هتفيدني إلا لما أكون خدت خبرة ، وغير كدة لحد فترة قريبة مكنش معايا تمن كورس الزمالة) ، طب اللي مش إبن حظ يروح فين ؟

** أو إن الإعلان صادق وكل حاجة ،، لكن الصدفة إن مدير الحسابات أو رئيس الحسابات أو مراقب الحسابات ( حسب مين فيهم اللي بيعمل مقابلة وحسب التوجيهات اللي واخدها من اللي فوقيه أو حتى حسب ميوله الشخصية )
الصدفة إن مدير الحسابات أو رئيس الحسابات أو مراقب الحسابات يستتقل دمك ، رغم إن إنت محترمه جداً ، لكن هو إما إنه شايف إنك شاب مؤدب أوي ويقولها في وشك ، ويقولك أنا عايزك إبن بلد وصايع شوية، مع إني إبن بلد – دانا أصلاً جيزاوي - و مبحبش الناس اللي بتبقى متحنتفة ، ويهريك تريقة وطبعاً مبردش عليه أو برد بإحترام، وف الأخر ميتصلش ، أو لو اللي بيعمل معاك مقابلة شايف إنك شاب مش راقي (من منظوره هو ، ولا تليق بمستوى الشركة ، مع إني شكلي مش إجرام و الله ) وهو عايز واحد يكون أرقى من كدة ،

أو المفاجأة إن اللي بيعمل معاك المقابلة يكون عايز حد من بلدياته أو من الناس اللي قريبين من مربع منطقته اللي نشأ فيها ( منياوي مثلاً عايز منياوي زيه أو على الأقل سوهاجي أو على الأقل صعيدي زييه ،، أو لو جيزاوي من السوق القديم مش عايز غير جيزاوي زيه من شارع المحطة أو على الأقل لما يبعد شوية من الساقية مثلاً أو أضعف الإيمان من المنيب ) مع إحترامي للمنيا وسوهاج والصعايدة والجيزة وأهلها وكلهم أجدع ناس

أنا ،، والحمد لله من قبل ومن بعد ،، مريت بكل الحالات دي ،،

يالإضافة لما سبق أنا إشتغلت الآتي :
** أيام الجامعة ، في الأجازة كنت شغال في محل موبايلات لمدة وبعدين إشتغلت مندوب أغذية محفوظة ومجمدة لكن ماكنتش بحب الشغل ده ، مش مجدي وبتتحمل علي خصومات لأن أصحاب المحلات بيتأخروا في الدفع ، يا عم الحاج وأنا ذنبي إيييييييييييييه ؟ هو أنا قولت لهم ميدفعوش لو عليا مش منزلهم تاني بس إنت بقى عمال تقولي إنت مبتشتغلش إنت مبتبيعش ، إتخانقت مع أصحاب محلات مكانوش بيرضوا يدفعوا رغم إنهم بيكسبوا كويس ، دا غير الزعـيق الكتير من صاحب الشركة ليا ، رغم إن صاحب الشركة كان خريج جامعة ؟؟ لكن معاملته كانت زي بقية زملاء الكار أصحاب شركات المجمدات اللي معاهمش مؤهل أصلاً

** إتخرجت إشتغلت مندوب مبيعات ف شركة أدوية ، الحمد لله كنت بعمل تارجت زي ناس شغالة من خمس سنين ، لكن المشكلة ، كل يوم الصبح إجتماع من 9 إلى 11 وعلى ما أروح منطقتي اللي مسئول عنها تبقى الساعة 12 ظهراً ، اللي شغال مندوب دعاية أو مبيعات أو صيدلي هيعرف دا معناه إيه ( دا معناه خسارة فادحة للشركة ) عشان مش هـلحق الصيدلي اللي بيتواجد الصبح فقط في صيدليته وبيترك الصيدلية بعد كدة للعامل أو الصيدلي المساعد ويطلع يشوف مصالحه التانية (ودي قصة لوحدها) ، ودول غالباً مش مسئولين عن التعاقد على الأوردرات إلا إذا كان واخدين الأوردر ده من صاحب الصيدلية قبل ما يمشي ، وده مش دايماً بيحصل ،

في صيدلي يحب التعاقد يكون وجهاً لوجه مع السؤال عن إمكانية عمل عروض خاصة ليه ، وأنا مش بلحق هذا النوع من الصيادلة بسبب نظام عقيم في الشركة ( وفي الآخر يقولك المدير والمشرف : لا لا لا إنت مش شغال زي الناس ) ،، كتير أوي من شركات الأدوية ( سواء مصنعة للدواء أو موزعة له أو الإتنين مع بعض ) بيكون التعامل فيها مع مندوب المبيعات ( وليس الدكتور مندوب الدعاية ) بالشتيمة والتهزيق وسب الـ .... ؟؟ ولو حتى كان شغلك تمام ،، يقولك : طيب ،، من تحت الضرس

ربنا يحاسبني على اللي بكتبه لو بكدب ،، عايز حد يرد عليا من السادة الصيادلة أو مندوبي الدعاية الطبية أو مندوبي المبيعات الدوائية ،، لو أنا بكدب وهقولهم على إسم الشركة ع الخاص لو عايزين ،،

وكمان كنت ممكن أحصل شيكات بخمسة الاف أو أكتر ، لأن البيه المحصل مش شايف شغله ومكانش في عربية للشغل كمان خاااالص لمندوبي البيع ، المشكلة بقى إن الواحد ممكن يمسك أماكن مسئول فيها عن البيع مالهاش دعوة ببعض ، المقطم ، المعادي ، الصف ، وأماكن فيها بتكون مسجلة أعلى معدل جرائم ، حاجة كدة زي المنطقة اللي كانت في فيلم حين ميسرة ، لكن في صيدليات في المربع ده أو قريبة منه ولازم أعمل معاها أوردر بيع ، وكمان ممكن أكون مكلف بتحصيل ألاف الجنيهات من هناك ، وكمان الصيادلة أوقات كانوا بيغلطوا في الواحد عشان الطلبية بتاعة الدوا إتأخرت ، لأن البيه السواق بيوصل كام طلبية في اليوم ويطنش ع الباقي ويروح ينام وأنا أبقى في وش المدفع ،،

وكمان دكاترة الدعاية كان بعضهم مقصر ، وبعضهم كان بيبقى شغال في شركتيتن ومهتم بواحدة ومطنش شغل التانية ، يعني مش بيروحوا للدكتور بشكل منتظم ويفكروه بالأدوية بتاعة شركتنا وعشان كدة الدوا بتاعنا كان بيخلل في الصيدليات ، والصيدلي يصوت في وشي أنا ، يا عم طب أنا ذنبي إيييييييييييييييه ؟؟ ولما زميل لي يكون مش محقق التارجت بتاعه يقسموه علينا كلنا ولازم نخلصه ، طب إزاي ؟؟ هو أنا الصيدلي هياخد مني بالعافية زيادة عن إحتياجه ؟؟ وكل ده كوم والعيال المنحرفة في المناطق المنيلة اللي كنت بدخلها لما بيعرفوا إني مندوب من كلامي مع الصيدلي ، يستنوني أما أخرج ويفضلوا يزنوا عليا ، عايزين أدوية محظورة أبقى أجيبها لهم ويديني اللي أنا عايزه ؟؟؟؟؟؟؟ رغم إن شركتنا لا تبيع ولا تصنع الأدوية دي

طب أدخل إزاي المنطقة دي تاني ؟ وهل لما كذا شاب مدمن من دول يتجمعوا عليا هطلع منها سليم ؟؟ ، أنا كنت بسأل نفسي في أيام كتير ، أنا إزاي رجعت البيت سليم ، أرجعت ده لأن جسمي مليان ومـصدر بوذ طويل وعيون قرفانة طول مانا ماشي وبحلق ع الزيرو ، ليا واحد صاحبي كان شغال نفس الشغلة دي بس ف شركة تانية أصغر من اللي كنت فيها ،، ضربوه بمطوة ف رجله وخدوا فلوسه لما طنشهم كذا مرة وماردش عليهم في موضوع الدوا المهبب ، وماحدش عرف يجيب العيال دي ،
دا غير المرتب اللي مندوبي البيع مش عارفين على أساس إيه بيتحسب ، كل شوية نظام

وكمان أهم حاجة عند الشركة إن التارجت يخلص ، حتى لو مانمتـتش لمدة شهر ، الشركة مالهاش دعوة ، والله كان ممكن أروح البيت الساعة 4 فجراً ، وأكون في الشركة 9 صباحاً ، خسيت كتير بسبب كده وقتها

بعض الشركات الدوائية العالمية (مش كلها) هي اللي بيكون بيئة العمل فيها مناسبة لمندوبي البيع عن تجربة وشحططة ومقارنة طبيعة عملي مع زميل مهنة يعمل في شركة فرنسية

**بعدين إشتغلت أمين مخزن في شركة أغذية تانية (غير الأولانية) بس الواحد كان عينو في قفاه و مسئول عن مخزن كبييييييييييير لوحدي ، عايز إتنين كمان معايا عشان العجز اللي كان بيحصل بسبب اللي معندهمش ضمير ، صاحب الشغل يقولي ،، طيب بعدين ، بعدين ، لحد ما طفشت

** و إشتغلت في مكتبين محاسبة الأولاني كان العيال اللي فيه إتفقوا ميعلمونيش حاجة وصاحب المكتب كان مالوش دعوة بحاجة خالص كان مخلي واحد عنده 30 سنة وقديم معاه هو اللي يديره على مزاجه ، ومكنش بيعبرني والسكرتيرة مكنتش بترضى تدخلني لصاحب المكتب ولما كنت أقابله مكنش بيرد عليا رد عملي ، والتاني مكملتش فيه يومين على بعض ، صاحب المكتب الظاهر كان عايز ساعي وقهوجي وعامل نظافة وعامل توصيل مطاعم مش محاسب

**بعدين إشتغلت مدخل بيانات في مستشفى تجميل(عشان النحافة أو السمنة والبشرة و الذي منه )، (كنت رايح على إعلان طلب محاسبين وطلع عايزين مدخلين بيانات ، و إن كان عاجبك)، طلعت بتاعة مشاكل و البوليس جه قبل كدة وعمل قلق ، و كتبوا عنها في الجرايد ، وإتقفلت قبل كدا بقرار من المحافظ ، و جو الشغل كان سيء جداًَ ، والمدير بتاعي ( الله يخليه ويرزقه بمكان تاني أحسن ) طلعني من مشكلة مع صاحب المستشفى بأعجوبة

** وبعدين إشتغلت أمين خزينة في صيدلية وصاحبها دلوقتي سافر ع السعودية ومقـفـولة ، الصراحة متعبتش معاه في المعاملة وكان الشغل الخزنة وبس ومكنتش ببيع حاجة

** واليومين دول كل ما أروح مكان يقولوا لي الحجج إلي فوق وزاد عليها : ياااااااااااه ، دا إنت كبير ومشتغلتش محاسب كل ده ( أنا 25 سنة على فكرة ) ؟؟ لا لا لا إنت مـتـنـفـعش ، ليه كده يابا الحاج ؟ طب جربني

** ولو شغال وبتاخد كورس إنجليزي ولا كمبيوتر ، صاحب الشغل يطلع عين الواحد عشان يروح الدورة بتاعته في ميعادها ، ذل