اولا انا اسمي محمود
من السويس
وعايز اقولكم اني كنت متخرج كما قولت من كلية التجارة 2009 وكنت من الاوائل على الكلية ووتقديري العام امتياز وكنت فرحان جدا بهذا الي ان جائت الصدمات والصدمة تلو الاخري والمفاجأة تلو الاخرى مع اول يوم من تخرجي ووالله العظيم كل كلمة انا بقولها لكم هيا حقيقية.
فجأة بعد مرور اربع سنين حسيت اني انضحك عليا وضعيت احلي سنين عمرى في المذاكرة زي العبيط كنت لا احضر رحلات ولا حفلات ولا اي حاجة في الدنيا دي الا المحاضرات فقط وكان زملائي الولاد والبنات ينظرون لي على اني معقد .
المهم اني كان همي في المذاكرة وبس وجنيت ثمار هذا باني طلعت من الاوائل وجبت تقدير امتياز الحمدلله
لكن المفاجاة اني بعد كل دة حسيت اني تساويت مع الاخريين ( مش تناكة والله لكن كان يجب ان يكون لي قيمة اكتر من كدة) وبقي اللي جايب مقبول زي اللي جايب امتياز بعد التخرج
بل والله في ناس كانت جايبة مقبول واشتغلت وانا لا بس مانابنيش غير وجع القلب وحرقة الدم
المهم ربنا يسهل للجميع
اول صدمة: عندما توجهت للكلية الحربية عندما علمت بقرار التحاق خريجي الكليات بشعبة الضباط المتخصصين وكان طالبين في الاعلان تخصص محاسبة..... ومعي ملفي بتاع الكلية الخاص بي وجميع شهاداتي
وكان كلي امل وثقة قي النفس ودخلت ال مبني الكلية الحربية ولكن تفاجأت بضباط رتبته عقيد سالني انتا خريج اية قولت كلية تجارة
قال سنة كام قولت 2009
قال تقديرك اية قولت امتياز
قال جامعة اية قولت انا خريج اكاديمية الشروق
راح قال كلمتين لن انساهم بص يا حبيبي احنا بناخد بس الجامعات الحكومية فقط وملناش دعوة بالخاص ( رغم اني معايا شهادة معادلة من المجلس الاعلي للجامعات ببكالوريوس الادارة والمحاسبة تخصص محاسبة)
وراح قال لي بمنتهي البرود روح روح
في اللحظة دي تمنيت اني لو الارض تنشق وتبلعني ولم اكن اسمع هذا الكلام
وانسحبت من امامة في صمت وعجز عن الكلام لاني اتصدمت
ثاني صدمة : لما روحت بعد لما اكملت موقفي من التجنيد كاي شاب عادي للتقدم على وظيفة محاسب في شركة كان اسمها السويس للحديد والصلب
قابلت موظف في الشركة كان شكلو كدا معقد
قولت بس انا يومي مش فايت
كان الراجل دا بيعمل معايا الانتر فيو
وفضل يسأل وبفضل الله انا اجاوب وسالني عن تقديري وسنة التخرج والجامعة
ولما ملاقاش فايدة من زحلقتي لاني طبعا مش معايا واسطه غير ربنا سبحانه وتعالي
فضل يحبط فيا ويقول مفيش شغل مفيش تعيين للمحاسيبن( كاني بشحت) كان فاضل يقولي اطلع براااااااااااااااااااااااااااااااااااااااااااااااا اااااااااااا
تركت له السي في بتاعي وانا عارف انو مزقه بعدما انصرفت من عنده
ثالث صدمة : تقديم على وظيفة محاسب في شركة السويس للسلامة المهنية
ولكن كانوا ظراف شوية عن الشركة السابقة
عملوا اعلان في جريدة الاهرام عن طلب محاسبين حديثي التخرج وكتبوا ان التقديم يجب ان يكون عن طريق ارسال السي في بالبريد الاليكتروني الي موقع بريد الشركة
بالفعل قمت بارسال السي في الخاص بي اليهم وتحدد ةموعد عمل الانترفيو
ذهبت اليهم في الموعد المحدد وكان هناك اختبار تحريري للمحاسيبن قمت باداء الاختبار مثل بقية الزملاء
وذهبت الي احد المديرين كان على معرفة بي وقولت له انا عملت اية في الامتحان
قال لا يا حودا انتا يا بطل انا شوفت ورقتك انتا حلك كويس وطمني
لكن المفاجاة اني علمت من احد موظفي الشركة اني سقطت ههههههههههههههههههههههههه في الاختبار( شر البلية ما يضحك ) رغم اني راجعت على الاسئلة بعض لما روحت ووجدت نفسي مجاوب كويس وراح الامل ههههههههههههههه
وبعد كدا روحت للناس اللي المفروض انهم اعضاء مجلس شعب وبيخدموا الناس عشان خاطر التعيين لكنهم كانت وعودهم كتيرة وغير مجدية بالنفع
سمعت عن دورة جيل المستقبل fgf وادمت فيها واتقبلت وقعدت اسبوع واحد بس كلفني 150 اشتراك الدورة بس لاقيت انهم بيدرسوا حاجات انا بفضل الله كنت اخذتها قبل كدة يعني مفيش جديد وكانت(icdl- انجليزي_ الخ) طبعا انا كنت واخذ شهادة ال ICDL من وانا في الكلية
ولما اتخرجت قعدت فترة قرابة شهر عشان كنت باخد كورس انجلش وكنت خلصت لحد المستوى الرابع وكان معايا دورة تدريبية ببنك اجنبي . المهم خلعت نفسي بالعافية من ال FGF لانها كانت بالنسبة لي تضييع وقت وشحططة على الفاضى وكان هناك شرط جزائي قدرة 2500 للذي يترك الدورة . ,ولكن تم التفاوض من المسؤول والحمدلله خرجت منها وعايز اقول حاجة دورة ال FGFحلوة اوي لل متخرج وليس معه اي شهادة.
ثالث صدمة البنك اللي كنت بتدرب فية الراجل اللي اعرفة اتنقل والناس اللي كنت بعتبرهم اصدقائي نفضولي
واخيرا
بعدها قولت بس مبداهش بقي كفاية ذل وانحناء لليسوي ول مايسواش
قررت تغيير مسار حياتي وتركت تخصصي كمحاسب اللي مفروض كنت اشتغل فية
وغيرت مساري العلمي بان توجهت الي الشهادات العالمية في مجال الحاسب الالي
لاني كنت بعشق حاجة اسمها كمبيوتر
ولاني كان حلم حياتي اني اكونى مهندس وجدت بفضل الله الطريق وهو شهادة هندسة الشبكات المعتمدة من شركة مايكروسوفت (MICROSOFT CERTIFIED SYSTEM ENGINEER)
اختصارها MCSE 2003 والناس اللي في مجال ال IT عارفيين كويس اوي معني وقيمة هذة الشهادة العلمية
توجهت الي اقرب مركز واجريت اختبار القبول والترشيح والحمدلله نجحت فيه ودخلت الدورة وخلصت منتصف الدورة ,وحصلت علي شهادة مدير شبكة ADMINISTRATOR
وهي Microsoft critfied system administrator
اختصارها mcsa 2003
وبفضل الله نواي اكمل في المسار لحد شهادة mcse
والحمدلله انا الان معايا شهادة مدير شبكة اقدر بيها اشتغل في وظيفة محترمة
لكن حظي العثر دائما كان يرافقني
لاني ذهبت بعد لما خلصت الmcsa بعد عناء شديد للتقديم على وظيفة مدير شبكة
في احدي الشركات وبالصدفة كانت شركة السويس للصلب اللي انا كنت مقدم فيها كمحاسب ولكن المرة دي قدمت كمدير شبكة وولكن كالعادة تم عمل الانترفيو على عدة مرات مع مدير قسم ال it
وتم سؤالي في اسئلة تستدعي الخبرة العملية وكنت لا املكها لاني كنت امللك معلومات الشهادة اللي احملها وبعض الحالات العملية فقط وبالتالي اساسا هما مش عايزني من الاول
فضل الراجل يحبط فيا وتم رفضي
النهاية انا حاسس اني طولت عليكم لكن والله يا شباب هذا هو الواقع اللي مريت بيه
مين يستحمل كدة شاب متخرج وكلوا امل يصبح متشائم
وفي النهاية لا يجد عمل
حسبي الله ونعم الوكيل في الناس اللي عملت فيا كدا
وعوضى على الله في تعبي اللي راح هدر
آخر 10 مشاركات
المنتدى بإشراف Ehab Salem,Remon.soliman,Muhammad Gad
28th July 2010, 06:41 PM
العرض المتطور